১০. কযৰিক্কযসিক্খাপদং

৫৯৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো পট্টো হোতি চীৰরকম্মং কাতুং. সো পটপিলোতিকানং সঙ্ঘাটিং করিত্ৰা সুরত্তং সুপরিকম্মকতং কত্ৰা পারুপি. অথ খো অঞ্ঞতরো পরিব্বাজকো মহগ্ঘং পটং পারুপিত্ৰা যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং এতদৰোচ – ‘‘সুন্দরা খো ত্যাযং, আৰুসো, সঙ্ঘাটি; দেহি মে পটেনা’’তি. ‘‘জানাহি, আৰুসো’’তি. ‘‘আমাৰুসো, জানামী’’তি. ‘‘হন্দাৰুসো’’তি, অদাসি. অথ খো সো পরিব্বাজকো তং সঙ্ঘাটিং পারুপিত্ৰা পরিব্বাজকারামং অগমাসি. পরিব্বাজকা তং পরিব্বাজকং এতদৰোচুং – ‘‘সুন্দরা খো ত্যাযং, আৰুসো, সঙ্ঘাটি; কুতো তযা লদ্ধা’’তি? ‘‘তেন মে, আৰুসো, পটেন পরিৰত্তিতা’’তি. ‘‘কতিহিপি ত্যাযং, আৰুসো, সঙ্ঘাটি ভৰিস্সতি, সোযেৰ তে পটো ৰরো’’তি.

অথ খো সো পরিব্বাজকো – ‘‘সচ্চং খো পরিব্বাজকা আহংসু – ‘কতিহিপি ম্যাযং সঙ্ঘাটি ভৰিস্সতি! সোযেৰ মে পটো ৰরো’’’তি যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং এতদৰোচ – ‘‘হন্দ তে, আৰুসো, সঙ্ঘাটি [সঙ্ঘাটিং (স্যা. ক.)]; দেহি মে পট’’ন্তি. ‘‘ননু ত্ৰং, আৰুসো, মযা ৰুত্তো – ‘জানাহি, আৰুসো’তি! নাহ দস্সামী’’তি. অথ খো সো পরিব্বাজকো উজ্ঝাযতি খিয্যতি ৰিপাচেতি – ‘‘গিহীপি নং গিহিস্স ৰিপ্পটিসারিস্স দেন্তি, কিং পন পব্বজিতো পব্বজিতস্স ন দস্সতী’’তি! অস্সোসুং খো ভিক্খূ তস্স পরিব্বাজকস্স উজ্ঝাযন্তস্স খিয্যন্তস্স ৰিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পরিব্বাজকেন সদ্ধিং কযৰিক্কযং সমাপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উপনন্দ, পরিব্বাজকেন সদ্ধিং কযৰিক্কযং সমাপজ্জসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, পরিব্বাজকেন সদ্ধিং কযৰিক্কযং সমাপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৯৪. ‘‘যো পন ভিক্খু নানপ্পকারকং কযৰিক্কযং সমাপজ্জেয্য, নিস্সগ্গিযং পাচিত্তিয’’ন্তি.

৫৯৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

নানপ্পকারকং নাম চীৰরপিণ্ডপাতসেনাসনগিলানপ্পচ্চযভেসজ্জপরিক্খারা, অন্তমসো চুণ্ণপিণ্ডোপি দন্তকট্ঠম্পি দসিকসুত্তম্পি.

কযৰিক্কযং সমাপজ্জেয্যাতি ইমিনা ইমং দেহি, ইমিনা ইমং আহর, ইমিনা ইমং পরিৰত্তেহি, ইমিনা ইমং চেতাপেহীতি. অজ্ঝাচরতি, আপত্তি দুক্কটস্স. যতো কযিতঞ্চ হোতি ৰিক্কযিতঞ্চ অত্তনো ভণ্ডং পরহত্থগতং পরভণ্ডং অত্তনো হত্থগতং, নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… অহং, ভন্তে, নানপ্পকারকং কযৰিক্কযং সমাপজ্জিং. ইদং মে নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৯৬. কযৰিক্কযে কযৰিক্কযসঞ্ঞী, নিস্সগ্গিযং পাচিত্তিযং. কযৰিক্কযে ৰেমতিকো, নিস্সগ্গিযং পাচিত্তিযং. কযৰিক্কযে নকযৰিক্কযসঞ্ঞী, নিস্সগ্গিযং পাচিত্তিযং.

নকযৰিক্কযে কযৰিক্কযসঞ্ঞী, আপত্তি দুক্কটস্স. নকযৰিক্কযে ৰেমতিকো, আপত্তি দুক্কটস্স. নকযৰিক্কযে নকযৰিক্কযসঞ্ঞী, অনাপত্তি.

৫৯৭. অনাপত্তি – অগ্ঘং পুচ্ছতি, কপ্পিযকারকস্স আচিক্খতি, ‘‘ইদং অম্হাকং অত্থি, অম্হাকঞ্চ ইমিনা চ ইমিনা চ অত্থো’’তি ভণতি, উম্মত্তকস্স, আদিকম্মিকস্সাতি.

কযৰিক্কযসিক্খাপদং নিট্ঠিতং দসমং.

কোসিযৰগ্গো দুতিযো.

তস্সুদ্দানং –

কোসিযা সুদ্ধদ্ৰেভাগা, ছব্বস্সানি নিসীদনং;

দ্ৰে চ লোমানি উগ্গণ্হে, উভো নানপ্পকারকাতি.