৪. ছব্বস্সসিক্খাপদং

৫৫৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভিক্খূ অনুৰস্সং সন্থতং কারাপেন্তি. তে যাচনবহুলা ৰিঞ্ঞত্তিবহুলা ৰিহরন্তি – ‘‘এল়কলোমানি দেথ. এল়কলোমেহি অত্থো’’তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা অনুৰস্সং সন্থতং কারাপেস্সন্তি, যাচনবহুলা ৰিঞ্ঞত্তিবহুলা ৰিহরিস্সন্তি – ‘এল়কলোমানি দেথ, এল়কলোমেহি অত্থো’’’তি! অম্হাকং পন সকিং কতানি সন্থতানি পঞ্চপি ছপি ৰস্সানি হোন্তি, যেসং নো দারকা উহদন্তিপি উম্মিহন্তিপি উন্দূরেহিপি খজ্জন্তি. ইমে পন সমণা সক্যপুত্তিযা অনুৰস্সং সন্থতং কারাপেন্তি, যাচনবহুলা ৰিঞ্ঞত্তিবহুলা ৰিহরন্তি – ‘‘এল়কলোমানি দেথ, এল়কলোমেহি অত্থো’’তি!

অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ অনুৰস্সং সন্থতং কারাপেস্সন্তি, যাচনবহুলা ৰিঞ্ঞত্তিবহুলা ৰিহরিস্সন্তি – ‘এল়কলোমানি দেথ, এল়কলোমেহি অত্থো’’’তি! অথ খো তে ভিক্খূ তে অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… সচ্চং কির, ভিক্খৰে, ভিক্খূ অনুৰস্সং সন্থতং কারাপেন্তি, যাচনবহুলা ৰিঞ্ঞত্তিবহুলা ৰিহরন্তি – ‘এল়কলোমানি দেথ, এল়কলোমেহি অত্থো’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তে, ভিক্খৰে, মোঘপুরিসা অনুৰস্সং সন্থতং কারাপেস্সন্তি, যাচনবহুলা ৰিঞ্ঞত্তিবহুলা ৰিহরিস্সন্তি – ‘এল়কলোমানি দেথ, এল়কলোমেহি অত্থো’তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৫৮. ‘‘নৰং পন ভিক্খুনা সন্থতং কারাপেত্ৰা ছব্বস্সানি ধারেতব্বং. ওরেন চে ছন্নং ৰস্সানং তং সন্থতং ৰিস্সজ্জেত্ৰা ৰা অৰিস্সজ্জেত্ৰা ৰা অঞ্ঞং নৰং সন্থতং কারাপেয্য, নিস্সগ্গিযং পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৫৫৯. তেন খো পন সমযেন অঞ্ঞতরো ভিক্খু কোসম্বিযং গিলানো হোতি. ঞাতকা তস্স ভিক্খুনো সন্তিকে দূতং পাহেসুং – ‘‘আগচ্ছতু, ভদন্তো মযং উপট্ঠহিস্সামা’’তি. ভিক্খূপি এৰমাহংসু – ‘‘গচ্ছাৰুসো, ঞাতকা তং উপট্ঠহিস্সন্তী’’তি. সো এৰমাহ – ‘‘ভগৰতা, আৰুসো, সিক্খাপদং পঞ্ঞত্তং – ‘নৰং পন ভিক্খুনা সন্থতং কারাপেত্ৰা ছব্বস্সানি ধারেতব্ব’ন্তি. অহঞ্চম্হি গিলানো, ন সক্কোমি সন্থতং আদায পক্কমিতুং. ময্হঞ্চ ৰিনা সন্থতা ন ফাসু হোতি. নাহং গমিস্সামী’’তি. ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানস্স ভিক্খুনো সন্থতসম্মুতিং দাতুং. এৰঞ্চ পন, ভিক্খৰে, দাতব্বা. তেন গিলানেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘অহং, ভন্তে, গিলানো. ন সক্কোমি সন্থতং আদায পক্কমিতুং. সোহং, ভন্তে, সঙ্ঘং সন্থতসম্মুতিং যাচামী’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৫৬০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু গিলানো. ন সক্কোতি সন্থতং আদায পক্কমিতুং. সো সঙ্ঘং সন্থতসম্মুতিং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো সন্থতসম্মুতিং দদেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু গিলানো. ন সক্কোতি সন্থতং আদায পক্কমিতুং. সো সঙ্ঘং সন্থতসম্মুতিং যাচতি. সঙ্ঘো ইত্থন্নামস্স ভিক্খুনো সন্থতসম্মুতিং দেতি. যস্সাযস্মতো খমতি ইত্থন্নামস্স ভিক্খুনো সন্থতসম্মুতিযা দানং, সো তুণ্হস্স; যস্স নক্খমতি, সো ভাসেয্য.

‘‘দিন্না সঙ্ঘেন ইত্থন্নামস্স ভিক্খুনো সন্থতসম্মুতি. খমতি সঙ্ঘস্স, তস্মা তুণ্হী, এৰমেতং ধারযামী’’তি.

এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৬১. ‘‘নৰং পন ভিক্খুনা সন্থতং কারাপেত্ৰা ছব্বস্সানি ধারেতব্বং. ওরেন চে ছন্নং ৰস্সানং তং সন্থতং ৰিস্সজ্জেত্ৰা ৰা অৰিস্সজ্জেত্ৰা ৰা অঞ্ঞং নৰং সন্থতং কারাপেয্য, অঞ্ঞত্র ভিক্খুসম্মুতিযা, নিস্সগ্গিযং পাচিত্তিয’’ন্তি.

৫৬২. নৰং নাম করণং উপাদায ৰুচ্চতি.

সন্থতং নাম সন্থরিত্ৰা কতং হোতি অৰাযিমং.

কারাপেত্ৰাতি করিত্ৰা ৰা কারাপেত্ৰা ৰা.

ছব্বস্সানি ধারেতব্বন্তি ছব্বস্সপরমতা ধারেতব্বং.

ওরেন চে ছন্নং ৰস্সানন্তি ঊনকছব্বস্সানি.

তং সন্থতং ৰিস্সজ্জেত্ৰাতি অঞ্ঞেসং দত্ৰা.

অৰিস্সজ্জেত্ৰাতি ন কস্সচি দত্ৰা.

অঞ্ঞত্র ভিক্খুসম্মুতিযাতি ঠপেত্ৰা ভিক্খুসম্মুতিং অঞ্ঞং নৰং সন্থতং করোতি ৰা কারাপেতি ৰা, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, সন্থতং ঊনকছব্বস্সানি কারাপিতং, অঞ্ঞত্র ভিক্খুসম্মুতিযা, নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৬৩. অত্তনা ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. অত্তনা ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং.

৫৬৪. অনাপত্তি ছব্বস্সানি করোতি, অতিরেকছব্বস্সানি করোতি, অঞ্ঞস্সত্থায করোতি ৰা কারাপেতি ৰা, অঞ্ঞেন কতং পটিলভিত্ৰা পরিভুঞ্জতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, ভিক্খুসম্মুতিযা, উম্মত্তকস্স, আদিকম্মিকস্সাতি.

ছব্বস্সসিক্খাপদং নিট্ঠিতং চতুত্থং.