৩. দ্ৰেভাগসিক্খাপদং

৫৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ – ‘‘ভগৰতা পটিক্খিত্তং সুদ্ধকাল়কানং এল়কলোমানং সন্থতং কারাপেতু’’ন্তি, তে থোকংযেৰ ওদাতং অন্তে আদিযিত্ৰা তথেৰ সুদ্ধকাল়কানং এল়কলোমানং সন্থতং কারাপেন্তি. যে তে ভিক্খূ অপ্পিচ্ছা… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ থোকংযেৰ ওদাতং অন্তে আদিযিত্ৰা তথেৰ সুদ্ধকাল়কানং এল়কলোমানং সন্থতং কারাপেস্সন্তী’’তি! অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, থোকংযেৰ ওদাতং অন্তে আদিযিত্ৰা তথেৰ সুদ্ধকাল়কানং এল়কলোমানং সন্থতং কারাপেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, থোকংযেৰ ওদাতং অন্তে আদিযিত্ৰা তথেৰ সুদ্ধকাল়কানং এল়কলোমানং সন্থতং কারাপেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৫৩. ‘‘নৰং পন ভিক্খুনা সন্থতং কারযমানেন দ্ৰে ভাগা সুদ্ধকাল়কানং এল়কলোমানং আদাতব্বা ততিযং ওদাতানং চতুত্থং গোচরিযানং. অনাদা চে ভিক্খু দ্ৰে ভাগে সুদ্ধকাল়কানং এল়কলোমানং ততিযং ওদাতানং চতুত্থং গোচরিযানং নৰং সন্থতং কারাপেয্য, নিস্সগ্গিযং পাচিত্তিয’’ন্তি.

৫৫৪. নৰং নাম করণং উপাদায ৰুচ্চতি.

সন্থতং নাম সন্থরিত্ৰা কতং হোতি অৰাযিমং.

কারযমানেনাতি করোন্তো ৰা কারাপেন্তো ৰা.

দ্ৰে ভাগা সুদ্ধকাল়কানং এল়কলোমানং আদাতব্বাতি ধারযিত্ৰা দ্ৰে তুলা আদাতব্বা.

ততিযং ওদাতানন্তি তুলং ওদাতানং.

চতুত্থং গোচরিযানন্তি তুলং গোচরিযানং.

অনাদা চে ভিক্খু দ্ৰে ভাগে সুদ্ধকাল়কানং এল়কলোমানং ততিযং ওদাতানং চতুত্থং গোচরিযানন্তি. অনাদিযিত্ৰা দ্ৰে তুলে সুদ্ধকাল়কানং এল়কলোমানং তুলং ওদাতানং তুলং গোচরিযানং নৰং সন্থতং করোতি ৰা কারাপেতি ৰা পযোগে দুক্কটং, পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, সন্থতং অনাদিযিত্ৰা দ্ৰে তুলে সুদ্ধকাল়কানং এল়কলোমানং তুলং ওদাতানং তুলং গোচরিযানং কারাপিতং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৫৫. অত্তনা ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. অত্তনা ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং অত্তনা পরিযোসাপেতি, নিস্সগ্গিযং পাচিত্তিযং. পরেহি ৰিপ্পকতং পরেহি পরিযোসাপেতি, নিস্সগ্গিযং পাচিত্তিযং.

অঞ্ঞস্সত্থায করোতি ৰা কারাপেতি ৰা, আপত্তি দুক্কটস্স. অঞ্ঞেন কতং পটিলভিত্ৰা পরিভুঞ্জতি, আপত্তি দুক্কটস্স.

৫৫৬. অনাপত্তি তুলং ওদাতানং তুলং গোচরিযানং আদিযিত্ৰা করোতি, বহুতরং ওদাতানং বহুতরং গোচরিযানং আদিযিত্ৰা করোতি, সুদ্ধং ওদাতানং সুদ্ধং গোচরিযানং আদিযিত্ৰা করোতি, ৰিতানং ৰা ভূমত্থরণং ৰা সাণিপাকারং ৰা ভিসিং ৰা বিব্বোহনং ৰা করোতি, উম্মত্তকস্স, আদিকম্মিকস্সাতি.

দ্ৰেভাগসিক্খাপদং নিট্ঠিতং ততিযং.