৯. দুতিযউপক্খটসিক্খাপদং

৫৩২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরো পুরিসো অঞ্ঞতরং পুরিসং এতদৰোচ – ‘‘অয্যং উপনন্দং চীৰরেন অচ্ছাদেস্সামী’’তি. সোপি এৰমাহ – ‘‘অহম্পি অয্যং উপনন্দং চীৰরেন অচ্ছাদেস্সামী’’তি. অস্সোসি খো অঞ্ঞতরো পিণ্ডচারিকো ভিক্খু তেসং পুরিসানং ইমং কথাসল্লাপং. অথ খো সো ভিক্খু যেনাযস্মা উপনন্দো সক্যপুত্তো তেনুপসঙ্কমি; উপসঙ্কমিত্ৰা আযস্মন্তং উপনন্দং সক্যপুত্তং এতদৰোচ – ‘‘মহাপুঞ্ঞোসি ত্ৰং, আৰুসো উপনন্দ. অমুকস্মিং ওকাসে অঞ্ঞতরো পুরিসো অঞ্ঞতরং পুরিসং এতদৰোচ – ‘অয্যং উপনন্দং চীৰরেন অচ্ছাদেস্সামী’তি. সোপি এৰমাহ – ‘অহম্পি অয্যং উপনন্দং চীৰরেন অচ্ছাদেস্সামী’’’তি. ‘‘অত্থাৰুসো, মং তে উপট্ঠাকা’’তি.

অথ খো আযস্মা উপনন্দো সক্যপুত্তো যেন তে পুরিসা তেনুপসঙ্কমি; উপসঙ্কমিত্ৰা তে পুরিসে এতদৰোচ – ‘‘সচ্চং কির মং তুম্হে, আৰুসো, চীৰরেহি অচ্ছাদেতুকামাত্থা’’তি? ‘‘অপি নয্য, এৰং হোতি – ‘অয্যং উপনন্দং চীৰরেহি অচ্ছাদেস্সামা’’’তি. ‘‘সচে খো মং তুম্হে, আৰুসো, চীৰরেহি অচ্ছাদেতুকামাত্থ, এৰরূপেন চীৰরেন অচ্ছাদেথ, ক্যাহং তেহি অচ্ছন্নোপি করিস্সামি, যানাহং ন পরিভুঞ্জিস্সামী’’তি. অথ খো তে পুরিসা উজ্ঝাযন্তি খিয্যন্তি ৰিপাচেন্তি – ‘‘মহিচ্ছা ইমে সমণা সক্যপুত্তিযা অসন্তুট্ঠা. নযিমে সুকরা চীৰরেহি অচ্ছাদেতুং. কথঞ্হি নাম অয্যো উপনন্দো অম্হেহি পুব্বে অপ্পৰারিতো উপসঙ্কমিত্ৰা চীৰরে ৰিকপ্পং আপজ্জিস্সতী’’তি!

অস্সোসুং খো ভিক্খূ তেসং পুরিসানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো পুব্বে অপ্পৰারিতো গহপতিকে উপসঙ্কমিত্ৰা চীৰরে ৰিকপ্পং আপজ্জিস্সতী’’তি! অথ খো তে ভিক্খূ আযস্মন্তং উপনন্দং সক্যপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উপনন্দ, পুব্বে অপ্পৰারিতো গহপতিকে উপসঙ্কমিত্ৰা চীৰরে ৰিকপ্পং আপজ্জসী’’তি? ‘‘সচ্চং, ভগৰা’’তি. ‘‘ঞাতকা তে, উপনন্দ, অঞ্ঞাতকা’’তি? ‘‘অঞ্ঞাতকা, ভগৰা’’তি. ‘‘অঞ্ঞাতকো, মোঘপুরিস, অঞ্ঞাতকানং ন জানাতি পতিরূপং ৰা অপ্পতিরূপং ৰা সন্তং ৰা অসন্তং ৰা. তত্থ নাম ত্ৰং, মোঘপুরিস, পুব্বে অপ্পৰারিতো অঞ্ঞাতকে গহপতিকে উপসঙ্কমিত্ৰা চীৰরে ৰিকপ্পং আপজ্জিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫৩৩. ‘‘ভিক্খুং পনেৰ উদ্দিস্স উভিন্নং অঞ্ঞাতকানং গহপতীনং ৰা গহপতানীনং ৰা পচ্চেকচীৰরচেতাপন্নানি উপক্খটানি হোন্তি – ‘ইমেহি মযং পচ্চেকচীৰরচেতাপন্নেহি পচ্চেকচীৰরানি চেতাপেত্ৰা ইত্থন্নামং ভিক্খুং চীৰরেহি অচ্ছাদেস্সামা’তি; তত্র চে সো ভিক্খু পুব্বে অপ্পৰারিতো উপসঙ্কমিত্ৰা চীৰরে ৰিকপ্পং আপজ্জেয্য – ‘সাধু ৰত মং আযস্মন্তো ইমেহি পচ্চেকচীৰরচেতাপন্নেহি এৰরূপং ৰা এৰরূপং ৰা চীৰরং চেতাপেত্ৰা অচ্ছাদেথ, উভোৰ সন্তা একেনা’তি, কল্যাণকম্যতং উপাদায, নিস্সগ্গিযং পাচিত্তিয’’ন্তি.

৫৩৪. ভিক্খুং পনেৰ উদ্দিস্সাতি ভিক্খুস্সত্থায, ভিক্খুং আরম্মণং করিত্ৰা, ভিক্খুং অচ্ছাদেতুকামা.

উভিন্নন্তি দ্ৰিন্নং.

অঞ্ঞাতকা নাম মাতিতো ৰা পিতিতো ৰা যাৰ সত্তমা পিতামহযুগা অসম্বদ্ধা.

গহপতী নাম যে কেচি অগার অজ্ঝাৰসন্তি.

গহপতানিযো নাম যা কাচি অগারং অজ্ঝাৰসন্তি.

চীৰরচেতাপন্নানি নাম হিরঞ্ঞা ৰা সুৰণ্ণা ৰা মুত্তা ৰা মণী ৰা পৰাল়া ৰা ফলিকা ৰা পটকা ৰা সুত্তা ৰা কপ্পাসা ৰা.

ইমেহি পচ্চেকচীৰরচেতাপন্নেহিতি পচ্চুপট্ঠিতেহি.

চেতাপেত্ৰাতি পরিৰত্তেত্ৰা.

অচ্ছাদেস্সামাতি দস্সাম.

তত্র চে সো ভিক্খূতি যং ভিক্খুং উদ্দিস্স চীৰরচেতাপন্নানি উপক্খটানি হোন্তি সো ভিক্খু.

পুব্বে অপ্পৰারিতোতি পুব্বে অৰুত্তো হোতি – ‘‘কীদিসেন তে, ভন্তে, চীৰরেন অত্থো, কীদিসং তে চীৰরং চেতাপেমা’’তি.

উপসঙ্কমিত্ৰাতি ঘরং গন্ত্ৰা যত্থ কত্থচি উপসঙ্কমিত্ৰা.

চীৰরে ৰিকপ্পং আপজ্জেয্যাতি আযতং ৰা হোতু ৰিত্থতং ৰা অপ্পিতং ৰা সণ্হং ৰা.

ইমেহি পচ্চেকচীৰরচেতাপন্নেহীতি পচ্চুপট্ঠিতেহি.

এৰরূপং ৰা এৰরূপং ৰাতি আযতং ৰা ৰিত্থতং ৰা অপ্পিতং ৰা সণ্হং ৰা.

চেতাপেত্ৰাতি পরিৰত্তেত্ৰা.

অচ্ছাদেথাতি দজ্জেথ.

উভোৰ সন্তা একেনাতি দ্ৰেপি জনা একেন.

কল্যাণকম্যতং উপাদাযাতি সাধত্থিকো মহগ্ঘত্থিকো.

তস্স ৰচনেন আযতং ৰা ৰিত্থতং ৰা অপ্পিতং ৰা সণ্হং ৰা চেতাপেন্তি, পযোগে দুক্কটং. পটিলাভেন নিস্সগ্গিযং হোতি. নিস্সজ্জিতব্বং সঙ্ঘস্স ৰা গণস্স ৰা পুগ্গলস্স ৰা. এৰঞ্চ পন, ভিক্খৰে, নিস্সজ্জিতব্বং…পে… ইদং মে, ভন্তে, চীৰরং পুব্বে অপ্পৰারিতো অঞ্ঞাতকে গহপতিকে উপসঙ্কমিত্ৰা চীৰরে ৰিকপ্পং আপন্নং নিস্সগ্গিযং. ইমাহং সঙ্ঘস্স নিস্সজ্জামীতি…পে… দদেয্যাতি…পে… দদেয্যুন্তি…পে… আযস্মতো দম্মীতি.

৫৩৫. অঞ্ঞাতকে অঞ্ঞাতকসঞ্ঞী পুব্বে অপ্পৰারিতো গহপতিকে উপসঙ্কমিত্ৰা চীৰরে ৰিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ৰেমতিকো পুব্বে অপ্পৰারিতো গহপতিকে উপসঙ্কমিত্ৰা চীৰরে ৰিকপ্পং আপজ্জতি, নিস্সগ্গিযং পাচিত্তিযং. অঞ্ঞাতকে ঞাতকসঞ্ঞী পুব্বে অপ্পৰারিতো গহপতিকে উপসঙ্কমিত্ৰা চীৰরে ৰিকপ্পং আপজ্জতি, নিস্সগ্গিযং পাচিত্তিযং.

ঞাতকে অঞ্ঞাতকসঞ্ঞী, আপত্তি দুক্কটস্স. ঞাতকে ৰেমতিকো, আপত্তি দুক্কটস্স. ঞাতকে ঞাতকসঞ্ঞী, অনাপত্তি.

৫৩৬. অনাপত্তি – ঞাতকানং, পৰারিতানং, অঞ্ঞস্সত্থায, অত্তনো ধনেন, মহগ্ঘং চেতাপেতুকামানং অপ্পগ্ঘং চেতাপেতি, উম্মত্তকস্স, আদিকম্মিকস্সাতি.

দুতিযউপক্খটসিক্খাপদং নিট্ঠিতং নৰমং.