১. পঠমঅনিযতসিক্খাপদং

ইমে খো পনাযস্মন্তো দ্ৰে অনিযতা ধম্মা

উদ্দেসং আগচ্ছন্তি.

৪৪৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী সাৰত্থিযং কুলূপকো হোতি, বহুকানি কুলানি উপসঙ্কমতি. তেন খো পন সমযেন আযস্মতো উদাযিস্স উপট্ঠাককুলস্স কুমারিকা অঞ্ঞতরস্স কুলস্স কুমারকস্স দিন্না হোতি. অথ খো আযস্মা উদাযী পুব্বণ্হসমযং নিৰাসেত্ৰা পত্তচীৰরমাদায যেন তং কুলং তেনুপসঙ্কমি; উপসঙ্কমিত্ৰা মনুস্সে পুচ্ছি – ‘‘কহং ইত্থন্নামা’’তি? তে এৰমাহংসু – ‘‘দিন্না, ভন্তে, অমুকস্স কুলস্স কুমারকস্সা’’তি. তম্পি খো কুলং আযস্মতো উদাযিস্স উপট্ঠাকং হোতি. অথ খো আযস্মা উদাযী যেন তং কুলং তেনুপসঙ্কমি; উপসঙ্কমিত্ৰা মনুস্সে পুচ্ছি – ‘‘কহং ইত্থন্নামা’’তি? তে এৰমাহংসু – ‘‘এসায্য, ওৰরকে নিসিন্না’’তি. অথ খো আযস্মা উদাযী যেন সা কুমারিকা তেনুপসঙ্কমি; উপসঙ্কমিত্ৰা তস্সা কুমারিকায সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেসি কালযুত্তং সমুল্লপন্তো কালযুত্তং ধম্মং ভণন্তো.

তেন খো পন সমযেন ৰিসাখা মিগারমাতা বহুপুত্তা হোতি বহুনত্তা অরোগপুত্তা অরোগনত্তা অভিমঙ্গলসম্মতা. মনুস্সা যঞ্ঞেসু ছণেসু উস্সৰেসু ৰিসাখং মিগারমাতরং পঠমং ভোজেন্তি. অথ খো ৰিসাখা মিগারমাতা নিমন্তিতা তং কুলং অগমাসি. অদ্দসা খো ৰিসাখা মিগারমাতা আযস্মন্তং উদাযিং তস্সা কুমারিকায সদ্ধিং একং একায রহো পটিচ্ছন্নে আসনে অলংকম্মনিযে নিসিন্নং. দিস্ৰান আযস্মন্তং উদাযিং এতদৰোচ – ‘‘ইদং, ভন্তে, নচ্ছন্নং নপ্পতিরূপং যং অয্যো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেতি. কিঞ্চাপি, ভন্তে, অয্যো অনত্থিকো তেন ধম্মেন, অপিচ দুস্সদ্ধাপযা অপ্পসন্না মনুস্সা’’তি. এৰম্পি খো আযস্মা উদাযী ৰিসাখায মিগারমাতুযা ৰুচ্চমানো নাদিযি. অথ খো ৰিসাখা মিগারমাতা নিক্খমিত্ৰা ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উদাযি, মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৪৪৪. ‘‘যো পন ভিক্খু মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেয্য, তমেনং সদ্ধেয্যৰচসা উপাসিকা দিস্ৰা তিণ্ণং ধম্মানং অঞ্ঞতরেন ৰদেয্য – পারাজিকেন ৰা সঙ্ঘাদিসেসেন ৰা পাচিত্তিযেন ৰা, নিসজ্জং ভিক্খু পটিজানমানো তিণ্ণং ধম্মানং অঞ্ঞতরেন কারেতব্বো – পারাজিকেন ৰা সঙ্ঘাদিসেসেন ৰা পাচিত্তিযেন ৰা যেন ৰা সা সদ্ধেয্যৰচসা উপাসিকা ৰদেয্য, তেন সো ভিক্খু কারেতব্বো. অযং ধম্মো অনিযতো’’তি.

৪৪৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী, ন যক্খী ন পেতী ন তিরচ্ছানগতা. অন্তমসো তদহুজাতাপি দারিকা, পগেৰ মহত্তরী.

সদ্ধিন্তি একতো.

একো একাযাতি ভিক্খু চেৰ হোতি মাতুগামো চ.

রহো নাম চক্খুস্স রহো, সোতস্স রহো. চক্খুস্স রহোনাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং. সোতস্স রহোনাম ন সক্কা হোতি পকতিকথা সোতুং.

পটিচ্ছন্নং নাম আসনং কুট্টেন ৰা [কুড্ডেন ৰা (সী. স্যা.)] কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা ৰা যেন কেনচি পটিচ্ছন্নং হোতি.

অলংকম্মনিযেতি সক্কা হোতি মেথুনং ধম্মং পটিসেৰিতুং.

নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা. ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা. উভো ৰা নিসিন্না হোন্তি উভো ৰা নিপন্না.

সদ্ধেয্যৰচসা নাম আগতফলা অভিসমেতাৰিনী ৰিঞ্ঞাতসাসনা.

উপাসিকা নাম বুদ্ধং সরণং গতা, ধম্মং সরণং গতা, সঙ্ঘং সরণং গতা.

দিস্ৰাতি পস্সিত্ৰা.

তিণ্ণং ধম্মানং অঞ্ঞতরেন ৰদেয্য – পারাজিকেন ৰা সঙ্ঘাদিসেসেন ৰা পাচিত্তিযেন ৰা. নিসজ্জং ভিক্খু পটিজানমানো তিণ্ণং ধম্মানং অঞ্ঞতরেন কারেতব্বো – পারাজিকেন ৰা সঙ্ঘাদিসেসেন ৰা পাচিত্তিযেন ৰা. যেন ৰা সা সদ্ধেয্যৰচসা উপাসিকা ৰদেয্য তেন সো ভিক্খু কারেতব্বো.

৪৪৬. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চ তং পটিজানাতি, আপত্তিযা কারেতব্বো. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘সচ্চাহং নিসিন্নো, নো চ খো মেথুনং ধম্মং পটিসেৰি’’ন্তি, নিসজ্জায কারেতব্বো. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিসিন্নো, অপিচ খো নিপন্নো’’তি, নিপজ্জায কারেতব্বো. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিসিন্নো অপিচ খো ঠিতো’’তি, ন কারেতব্বো.

৪৪৭. সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চ তং পটিজানাতি, আপত্তিযা কারেতব্বো. সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘সচ্চাহং নিপন্নো, নো চ খো মেথুনং ধম্মং পটিসেৰি’’ন্তি, নিপজ্জায কারেতব্বো. সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিপন্নো, অপিচ খো নিসিন্নো’’তি, নিসজ্জায কারেতব্বো. সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামস্স মেথুনং ধম্মং পটিসেৰন্তো’’তি, সো চে এৰং ৰদেয্য – ‘‘নাহং নিপন্নো অপিচ খো ঠিতো’’তি, ন কারেতব্বো.

৪৪৮. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো…পে… সচ্চাহং নিসিন্নো নো চ খো কাযসংসগ্গং সমাপজ্জিন্তি, নিসজ্জায কারেতব্বো…পে… নাহং নিসিন্নো অপিচ খো নিপন্নোতি, নিপজ্জায কারেতব্বো…পে… নাহং নিসিন্নো অপিচ খো ঠিতোতি, ন কারেতব্বো.

সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো…পে… সচ্চাহং নিপন্নো, নো চ খো কাযসংসগ্গং সমাপজ্জিন্তি, নিপজ্জায কারেতব্বো…পে… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে… নাহং নিপন্নো, অপিচ খো ঠিতোতি, ন কারেতব্বো.

৪৪৯. সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসিন্নো’’তি, সো চ তং পটিজানাতি, নিসজ্জায কারেতব্বো…পে… নাহং নিসিন্নো অপিচ খো নিপন্নোতি, নিপজ্জায কারেতব্বো…পে… নাহং নিসিন্নো, অপিচ খো ঠিতোতি, ন কারেতব্বো.

৪৫০. সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিপন্নো’’তি, সো চ তং পটিজানাতি, নিপজ্জায কারেতব্বো…পে… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে… নাহং নিপন্নো, অপিচ খো ঠিতোতি, ন কারেতব্বো.

অনিযতোতি ন নিযতো, পারাজিকং ৰা সঙ্ঘাদিসেসো ৰা পাচিত্তিযং ৰা.

৪৫১. গমনং পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা কারেতব্বো. গমনং পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কারেতব্বো. গমনং পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কারেতব্বো. গমনং পটিজানাতি, নিসজ্জং ন পটিজানাতি, আপত্তিং ন পটিজানাতি, ন কারেতব্বো.

গমনং ন পটিজানাতি, নিসজ্জং পটিজানাতি, আপত্তিং পটিজানাতি, আপত্তিযা

কারেতব্বো. গমনং ন পটিজানাতি, নিসজ্জং ন পটিজানাতি, আপত্তিং পটিজানাতি, আপত্তিযা কারেতব্বো. গমনং ন পটিজানাতি, নিসজ্জং পটিজানাতি, আপত্তিং ন পটিজানাতি, নিসজ্জায কারেতব্বো. গমনং ন পটিজানাতি, নিসজ্জং ন পটিজানাতি, আপত্তিং ন পটিজানাতি, ন কারেতব্বোতি.

পঠমো অনিযতো নিট্ঠিতো.