২. দুতিযঅনিযতসিক্খাপদং

৪৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী – ‘‘ভগৰতা পটিক্খিত্তং মাতুগামেন সদ্ধিং একো একায রহো পটিচ্ছন্নে আসনে অলংকম্মনিযে নিসজ্জং কপ্পেতু’’ন্তি তস্সাযেৰ কুমারিকায সদ্ধিং একো একায রহো নিসজ্জং কপ্পেসি কালযুত্তং সমুল্লপন্তো কালযুত্তং ধম্মং ভণন্তো. দুতিযম্পি খো ৰিসাখা মিগারমাতা নিমন্তিতা তং কুলং অগমাসি. অদ্দসা খো ৰিসাখা মিগারমাতা আযস্মন্তং উদাযিং তস্সাযেৰ কুমারিকায সদ্ধিং একং একায রহো নিসিন্নং. দিস্ৰান আযস্মন্তং উদাযিং এতদৰোচ – ‘‘ইদং, ভন্তে, নচ্ছন্নং নপ্পতিরূপং যং অয্যো মাতুগামেন সদ্ধিং একো একায রহো নিসজ্জং কপ্পেতি. কিঞ্চাপি, ভন্তে, অয্যো অনত্থিকো তেন ধম্মেন, অপিচ দুস্সদ্ধাপযা অপ্পসন্না মনুস্সা’’তি. এৰম্পি খো আযস্মা উদাযী ৰিসাখায মিগারমাতুযা ৰুচ্চমানো নাদিযি. অথ খো ৰিসাখা মিগারমাতা নিক্খমিত্ৰা ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামেন সদ্ধিং একো একায রহো নিসজ্জং কপ্পেস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং …পে… ‘‘সচ্চং কির ত্ৰং, উদাযি, মাতুগামেন সদ্ধিং একো একায রহো নিসজ্জং কপ্পেসী’’তি? ‘‘সচ্চং ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, মাতুগামেন সদ্ধিং একো একায রহো নিসজ্জং কপ্পেস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৪৫৩. ‘‘ন হেৰ খো পন পটিচ্ছন্নং আসনং হোতি নালং কম্মনিযং, অলঞ্চ খো হোতি মাতুগামং দুট্ঠুল্লাহি ৰাচাহি ওভাসিতুং. যো পন ভিক্খু তথারূপে আসনে মাতুগামেন সদ্ধিং একো একায রহো নিসজ্জং কপ্পেয্য, তমেনং সদ্ধেয্যৰচসা উপাসিকা দিস্ৰা দ্ৰিন্নং ধম্মানং অঞ্ঞতরেন ৰদেয্য – সঙ্ঘাদিসেসেন ৰা পাচিত্তিযেন ৰা. নিসজ্জং ভিক্খু পটিজানমানো দ্ৰিন্নং ধম্মানং অঞ্ঞতরেন কারেতব্বো – সঙ্ঘাদিসেসেন ৰা পাচিত্তিযেন ৰা. যেন ৰা সা সদ্ধেয্যৰচসা উপাসিকা ৰদেয্য তেন সো ভিক্খু কারেতব্বো. অযম্পি ধম্মো অনিযতো’’তি.

৪৫৪. ন হেৰ খো পন পটিচ্ছন্নং আসনং হোতীতি অপ্পটিচ্ছন্নং হোতি কুট্টেন ৰা কৰাটেন ৰা কিলঞ্জেন ৰা সাণিপাকারেন ৰা রুক্খেন ৰা থম্ভেন ৰা কোত্থল়িযা ৰা যেন কেনচি অপ্পটিচ্ছন্নং হোতি.

নালং কম্মনিযন্তি ন সক্কা হোতি মেথুনং ধম্মং পটিসেৰিতুং.

অলঞ্চ খো হোতি মাতুগামং দুট্ঠুল্লাহি ৰাচাহি ওভাসিতুন্তি সক্কা হোতি মাতুগামং দুট্ঠুল্লাহি ৰাচাহি ওভাসিতুং.

যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

তথারূপে আসনেতি এৰরূপে আসনে.

মাতুগামো নাম মনুস্সিত্থী, ন যক্খী ন পেতী ন তিরচ্ছানগতা, ৰিঞ্ঞূ পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

সদ্ধিন্তি একতো.

একো একাযাতি ভিক্খু চেৰ হোতি মাতুগামো চ.

রহো নাম চক্খুস্স রহো, সোতস্স রহো. চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং. সোতস্স রহো নাম ন সক্কা হোতি পকতিকথা সোতুং.

নিসজ্জং কপ্পেয্যাতি মাতুগামে নিসিন্নে ভিক্খু উপনিসিন্নো ৰা হোতি উপনিপন্নো ৰা. ভিক্খু নিসিন্নে মাতুগামো উপনিসিন্নো ৰা হোতি উপনিপন্নো ৰা. উভো ৰা নিসিন্না হোন্তি উভো ৰা নিপন্না.

সদ্ধেয্যৰচসা নাম আগতফলা অভিসমেতাৰিনী ৰিঞ্ঞাতসাসনা.

উপাসিকা নাম বুদ্ধং সরণং গতা, ধম্মং সরণং গতা, সঙ্ঘং সরণং গতা.

দিস্ৰাতি পস্সিত্ৰা.

দ্ৰিন্নং ধম্মানং অঞ্ঞতরেন ৰদেয্য সঙ্ঘাদিসেসেন ৰা পাচিত্তিযেন ৰা. নিসজ্জং ভিক্খু পটিজানমানো দ্ৰিন্নং ধম্মানং অঞ্ঞতরেন কারেতব্বো – সঙ্ঘাদিসেসেন ৰা পাচিত্তিযেন ৰা. যেন ৰা সা সদ্ধেয্যৰচসা উপাসিকা ৰদেয্য, তেন সো ভিক্খু কারেতব্বো.

৪৫৫. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো. সা চে এৰং ৰদেয্য – ‘‘অয্যো মযা দিট্ঠো নিসিন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চে এৰং ৰদেয্য – ‘‘সচ্চাহং নিসিন্নো, নো চ খো কাযসংসগ্গং সমাপজ্জি’’ন্তি, নিসজ্জায কারেতব্বো…পে… নাহং নিসিন্নো, অপিচ খো নিপন্নোতি, নিপজ্জায কারেতব্বো…পে… নাহং নিসিন্নো, অপিচ খো ঠিতোতি, ন কারেতব্বো.

সা চে এৰং ৰদেয্য – ‘‘অয্যো মযা দিট্ঠো নিপন্নো মাতুগামেন সদ্ধিং কাযসংসগ্গং সমাপজ্জন্তো’’তি, সো চ তং পটিজানাতি, আপত্তিযা কারেতব্বো…পে… সচ্চাহং নিপন্নো, নো চ খো কাযসংসগ্গং সমাপজ্জিন্তি, নিপজ্জায কারেতব্বো…পে… নাহং নিপন্নো, অপিচ খো নিসিন্নোতি, নিসজ্জায কারেতব্বো …পে… নাহং নিপন্নো, অপিচ খো ঠিতোতি, ন কারেতব্বো.

সা চে এৰং ৰদেয্য – ‘‘অয্যস্স মযা সুতং নিসিন্নস্স মাতুগামং দুট্ঠুল্লাহি ৰাচাহি ওভাসন্তস্সা’’তি, সো চ তং পটিজানাতি, আপত্তিযা কারেতব্বো. সা চে এৰং ৰদেয্য – ‘‘অয্যস্স মযা সুতং নিসিন্নস্স মাতুগামং দুট্ঠুল্লাহি ৰাচাহি ওভাসন্তস্সা’’তি, সো চে এৰং ৰদেয্য – ‘‘সচ্চাহং নিসিন্নো, নো চ খো দুট্ঠুল্লাহি ৰাচাহি ওভাসি’’ন্তি, নিসজ্জায কারেতব্বো…পে… নাহং নিসিন্নো, অপিচ খো নিপন্নোতি, নিপজ্জায কারেতব্বো…পে… নাহং নিসিন্নো, অপিচ খো ঠিতোতি, ন কারেতব্বো.

সা চে এৰং ৰদেয্য – ‘‘অয্যস্স মযা সুতং নিপন্নস্স মাতুগামং দুট্ঠুল্লাহি ৰাচাহি ওভাসন্তস্সা’’তি, সো চ তং পটিজানাতি, আপত্তিযা কারেতব্বো…পে… সচ্চাহং নিপন্নো নো চ খো দুট্ঠুল্লাহি ৰাচাহি ওভাসিন্তি, নিপজ্জায কারেতব্বো…পে… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে… নাহং নিপন্নো, অপিচ খো ঠিতোতি, ন কারেতব্বো.

৪৫৬. সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো নিসিন্নো’’তি, সো চ তং পটিজানাতি, নিসজ্জায কারেতব্বো…পে… নাহং নিসিন্নো, অপিচ খো নিপন্নোতি, নিপজ্জায কারেতব্বো…পে… নাহং নিসিন্নো, অপিচ খো ঠিতোতি, ন কারেতব্বো.

সা চে এৰং ৰদেয্য – ‘‘অয্যো মযা দিট্ঠো মাতুগামেন সদ্ধিং একো একায রহো নিপন্নো’’তি, সো চ তং পটিজানাতি, নিপজ্জায কারেতব্বো…পে… নাহং নিপন্নো, অপিচ খো নিসিন্নোতি, নিসজ্জায কারেতব্বো…পে… নাহং নিপন্নো, অপিচ খো ঠিতোতি, ন কারেতব্বো.

অযম্পীতি পুরিমং উপাদায ৰুচ্চতি.

অনিযতোতি ন নিযতো, সঙ্ঘাদিসেসো ৰা পাচিত্তিযং ৰা.

৪৫৭. গমনং পটিজানাতি নিসজ্জং পটিজানাতি আপত্তিং পটিজানাতি, আপত্তিযা কারেতব্বো. গমনং পটিজানাতি নিসজ্জং ন পটিজানাতি আপত্তিং পটিজানাতি, আপত্তিযা কারেতব্বো. গমনং পটিজানাতি নিসজ্জং পটিজানাতি আপত্তিং ন পটিজানাতি, নিসজ্জায কারেতব্বো. গমনং পটিজানাতি নিসজ্জং ন পটিজানাতি আপত্তিং ন পটিজানাতি, ন কারেতব্বো.

গমনং ন পটিজানাতি নিসজ্জং পটিজানাতি আপত্তিং পটিজানাতি, আপত্তিযা কারেতব্বো. গমনং ন পটিজানাতি নিসজ্জং ন পটিজানাতি আপত্তিং পটিজানাতি, আপত্তিযা কারেতব্বো. গমনং ন পটিজানাতি নিসজ্জং পটিজানাতি আপত্তিং ন পটিজানাতি, নিসজ্জায কারেতব্বো. গমনং ন পটিজানাতি নিসজ্জং ন পটিজানাতি আপত্তিং ন পটিজানাতি, ন কারেতব্বোতি.

দুতিযো অনিযতো নিট্ঠিতো.

৪৫৮. উদ্দিট্ঠা খো আযস্মন্তো দ্ৰে অনিযতা ধম্মা. তত্থাযস্মন্তে পুচ্ছামি – ‘‘কচ্চিত্থ পরিসুদ্ধা’’? দুতিযম্পি পুচ্ছামি – ‘‘কচ্চিত্থ পরিসুদ্ধা’’? ততিযম্পি পুচ্ছামি – ‘‘কচ্চিত্থ পরিসুদ্ধা’’? পরিসুদ্ধেত্থাযস্মন্তো; তস্মা তুণ্হী, এৰমেতং ধারযামীতি.

তস্সুদ্দানং –

অলং কম্মনিযঞ্চেৰ, তথেৰ চ নহেৰ খো;

অনিযতা সুপঞ্ঞত্তা, বুদ্ধসেট্ঠেন তাদিনাতি.

অনিযতকণ্ডং নিট্ঠিতং.