৯. দুতিযদুট্ঠদোসসিক্খাপদং

৩৯১. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন মেত্তিযভূমজকা ভিক্খূ গিজ্ঝকূটা পব্বতা ওরোহন্তা অদ্দসংসু ছগলকং [ছকলকং (স্যা.)] অজিকায ৰিপ্পটিপজ্জন্তং. দিস্ৰান এৰমাহংসু – ‘‘হন্দ মযং, আৰুসো, ইমং ছগলকং দব্বং মল্লপুত্তং নাম করোম. ইমং অজিকং মেত্তিযং নাম ভিক্খুনিং করোম. এৰং মযং ৰোহরিস্সাম. পুব্বে মযং, আৰুসো, দব্বং মল্লপুত্তং সুতেন অৰোচুম্হা. ইদানি পন অম্হেহি সামং দিট্ঠো মেত্তিযায ভিক্খুনিযা ৰিপ্পটিপজ্জন্তো’’তি. তে তং ছগলকং দব্বং মল্লপুত্তং নাম অকংসু. তং অজিকং মেত্তিযং নাম ভিক্খুনিং অকংসু. তে ভিক্খূনং আরোচেসুং – ‘‘পুব্বে মযং, আৰুসো, দব্বং মল্লপুত্তং সুতেন অৰোচুম্হা. ইদানি পন অম্হেহি সামং দিট্ঠো মেত্তিযায ভিক্খুনিযা ৰিপ্পটিপজ্জন্তো’’তি. ভিক্খূ এৰমাহংসু – ‘‘মাৰুসো, এৰং অৰচুত্থ. নাযস্মা দব্বো মল্লপুত্তো এৰং করিস্সতী’’তি.

অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং দব্বং মল্লপুত্তং পটিপুচ্ছি – ‘‘সরসি ত্ৰং, দব্ব, এৰরূপং কত্তা যথযিমে ভিক্খূ আহংসূ’’তি? ‘‘যথা মং, ভন্তে, ভগৰা জানাতী’’তি. দুতিযম্পি খো ভগৰা…পে… ততিযম্পি খো ভগৰা আযস্মন্তং দব্বং মল্লপুত্তং এতদৰোচ – ‘‘সরসি ত্ৰং, দব্ব, এৰরূপং কত্তা যথযিমে ভিক্খূ আহংসূ’’তি? ‘‘যথা মং, ভন্তে, ভগৰা জানাতী’’তি. ‘‘ন খো, দব্ব, দব্বা এৰং নিব্বেঠেন্তি. সচে তযা কতং কতন্তি ৰদেহি, সচে তযা অকতং অকতন্তি ৰদেহী’’তি. ‘‘যতো অহং, ভন্তে, জাতো নাভিজানামি সুপিনন্তেনপি মেথুনধম্মং পটিসেৰিতা, পগেৰ জাগরো’’তি! অথ খো ভগৰা ভিক্খূ আমন্তেসি – ‘‘তেন হি, ভিক্খুৰে, ইমে ভিক্খূ অনুযুঞ্জথা’’তি. ইদং ৰত্ৰা ভগৰা উট্ঠাযাসনা ৰিহারং পাৰিসি.

অথ খো তে ভিক্খূ মেত্তিযভূমজকে ভিক্খূ অনুযুঞ্জিংসু. তে ভিক্খূহি অনুযুঞ্জীযমানা ভিক্খূনং এতমত্থং আরোচেসুং – ‘‘কিং পন তুম্হে, আৰুসো, আযস্মন্তং দব্বং মল্লপুত্তং অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেথা’’তি? ‘‘এৰমাৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম মেত্তিযভূমজকা ভিক্খূ আযস্মন্তং দব্বং মল্লপুত্তং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেস্সন্তী’’তি! অথ খো তে ভিক্খূ মেত্তিযভূমজকে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, দব্বং মল্লপুত্তং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম তুম্হে, মোঘপুরিসা, দব্বং মল্লপুত্তং অঞ্ঞভাগিযস্স অধিকরণস্স কিঞ্চি দেসং লেসমত্তং উপাদায পারাজিকেন ধম্মেন অনুদ্ধংসেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৯২. ‘‘যো পন ভিক্খু ভিক্খুং দুট্ঠো দোসো অপ্পতীতো অঞ্ঞভাগিযস্স অধিকরণস্স কিঞ্চিদেসং লেসমত্তং উপাদায পারাজিকেন ধম্মেন অনুদ্ধংসেয্য – ‘অপ্পেৰ নাম নং ইমম্হা ব্রহ্মচরিযা চাৰেয্য’ন্তি. ততো অপরেন সমযেন সমনুগ্গাহীযমানো ৰা অসমনুগ্গাহীযমানো ৰা অঞ্ঞভাগিযঞ্চেৰ তং অধিকরণং হোতি কোচিদেসো লেসমত্তো উপাদিন্নো, ভিক্খু চ দোসং পতিট্ঠাতি, সঙ্ঘাদিসেসো’’তি.

৩৯৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুন্তি অঞ্ঞং ভিক্খুং.

দুট্ঠো দোসোতি কুপিতো অনত্তমনো অনভিরদ্ধো আহতচিত্তো খিলজাতো.

অপ্পতীতোতি তেন চ কোপেন, তেন চ দোসেন, তায চ অনত্তমনতায, তায চ অনভিরদ্ধিযা অপ্পতীতো হোতি.

অঞ্ঞভাগিযস্স অধিকরণস্সাতি আপত্তঞ্ঞভাগিযং ৰা হোতি অধিকরণঞ্ঞভাগিযং ৰা. কথং অধিকরণং অধিকরণস্স অঞ্ঞভাগিযং? ৰিৰাদাধিকরণং অনুৰাদাধিকরণস্স আপত্তাধিকরণস্স কিচ্চাধিকরণস্স অঞ্ঞভাগিযং. অনুৰাদাধিকরণং আপত্তাধিকরণস্স কিচ্চাধিকরণস্স ৰিৰাদাধিকরণস্স অঞ্ঞভাগিযং. আপত্তাধিকরণং কিচ্চাধিকরণস্স ৰিৰাদাধিকরণস্স অনুৰাদাধিকরণস্স অঞ্ঞভাগিযং. কিচ্চাধিকরণং ৰিৰাদাধিকরণস্স অনুৰাদাধিকরণস্স আপত্তাধিকরণস্স অঞ্ঞভাগিযং. এৰং অধিকরণং অধিকরণস্স অঞ্ঞভাগিযং.

কথং অধিকরণং অধিকরণস্স তব্ভাগিযং? ৰিৰাদাধিকরণং ৰিৰাদাধিকরণস্স তব্ভাগিযং. অনুৰাদাধিকরণং অনুৰাদাধিকরণস্স তব্ভাগিযং. আপত্তাধিকরণং আপত্তাধিকরণস্স সিযা তব্ভাগিযং সিযা অঞ্ঞভাগিযং.

কথং আপত্তাধিকরণং আপত্তাধিকরণস্স অঞ্ঞভাগিযং? মেথুনধম্মপারাজিকাপত্তি অদিন্নাদানপারাজিকাপত্তিযা মনুস্সৰিগ্গহপারাজিকাপত্তিযা উত্তরিমনুস্সধম্মপারাজিকাপত্তিযা অঞ্ঞভাগিযা. অদিন্নাদানপারাজিকাপত্তি মনুস্সৰিগ্গহপারাজিকাপত্তিযা উত্তরিমনুস্সধম্মপারাজিকাপত্তিযা মেথুনধম্মপারাজিকাপত্তিযা অঞ্ঞভাগিযা. মনুস্সৰিগ্গহপারাজিকাপত্তি উত্তরিমনুস্সধম্মপারাজিকাপত্তিযা মেথুনধম্মপারাজিকাপত্তিযা অদিন্নাদানপারাজিকাপত্তিযা অঞ্ঞভাগিযা. উত্তরিমনুস্সধম্মপারাজিকাপত্তি মেথুনধম্মপারাজিকাপত্তিযা অদিন্নাদানপারাজিকাপত্তিযা মনুস্সৰিগ্গহপারাজিকাপত্তিযা অঞ্ঞভাগিযা. এৰং আপত্তাধিকরণং আপত্তাধিকরণস্স অঞ্ঞভাগিযং.

কথং আপত্তাধিকরণং আপত্তাধিকরণস্স তব্ভাগিযং? মেথুনধম্মপারাজিকাপত্তি মেথুনধম্মপারাজিকাপত্তিযা তব্ভাগিযা. অদিন্নাদানপারাজিকাপত্তি অদিন্নাদানপারাজিকাপত্তিযা তব্ভাগিযা. মনুস্সৰিগ্গহপারাজিকাপত্তি মনুস্সৰিগ্গহপারাজিকাপত্তিযা তব্ভাগিযা. উত্তরিমনুস্সধম্মপারাজিকাপত্তি উত্তরিমনুস্সধম্মপারাজিকাপত্তিযা তব্ভাগিযা. এৰং আপত্তাধিকরণং আপত্তাধিকরণস্স তব্ভাগিযং.

কিচ্চাধিকরণং কিচ্চাধিকরণস্স তব্ভাগিযং. এৰং অধিকরণং অধিকরণস্স তব্ভাগিযং.

৩৯৪. কিঞ্চি দেসং লেসমত্তং উপাদাযাতি লেসো নাম দস লেসা – জাতিলেসো, নামলেসো, গোত্তলেসো, লিঙ্গলেসো, আপত্তিলেসো, পত্তলেসো, চীৰরলেসো, উপজ্ঝাযলেসো, আচরিযলেসো, সেনাসনলেসো.

৩৯৫. জাতিলেসো নাম খত্তিযো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং খত্তিযং পস্সিত্ৰা চোদেতি – ‘‘খত্তিযো মযা দিট্ঠো [এত্থ ‘‘পারাজিকং ধম্মং অজ্ঝাপজ্জন্তো’’তি পাঠো ঊনো মঞ্ঞে, অট্ঠকথাযং হি ‘‘খত্তিযো মযা দিট্ঠো পারাজিকং ধম্মং অজ্ঝাপজ্জন্তো’’তি দিস্সতি]. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

ব্রাহ্মণো দিট্ঠো হোতি…পে… ৰেস্সো দিট্ঠো হোতি…পে… সুদ্দো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং সুদ্দং পস্সিত্ৰা চোদেতি – ‘‘সুদ্দো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৩৯৬. নামলেসো নাম বুদ্ধরক্খিতো দিট্ঠো হোতি…পে… ধম্মরক্খিতো দিট্ঠো হোতি…পে… সঙ্ঘরক্খিতো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং সঙ্ঘরক্খিতং পস্সিত্ৰা চোদেতি – ‘‘সঙ্ঘরক্খিতো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৩৯৭. গোত্তলেসো নাম গোতমো দিট্ঠো হোতি…পে… মোগ্গল্লানো দিট্ঠো হোতি…পে… কচ্চাযনো দিট্ঠো হোতি…পে… ৰাসিট্ঠো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং ৰাসিট্ঠং পস্সিত্ৰা চোদেতি – ‘‘ৰাসিট্ঠো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৩৯৮. লিঙ্গলেসো নাম দীঘো দিট্ঠো হোতি…পে… রস্সো দিট্ঠো হোতি…পে… কণ্হো দিট্ঠো হোতি…পে… ওদাতো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং ওদাতং পস্সিত্ৰা চোদেতি – ‘‘ওদাতো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৩৯৯. আপত্তিলেসো নাম লহুকং আপত্তিং আপজ্জন্তো দিট্ঠো হোতি. তঞ্চে পারাজিকেন চোদেতি – ‘‘অস্সমণোসি, অসক্যপুত্তিযোসি…পে… আপত্তি ৰাচায, ৰাচায সঙ্ঘাদিসেসস্স.

৪০০. পত্তলেসো নাম লোহপত্তধরো দিট্ঠো হোতি…পে… সাটকপত্তধরো দিট্ঠো হোতি…পে… সুম্ভকপত্তধরো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং সুম্ভকপত্তধরং পস্সিত্ৰা চোদেতি – ‘‘সুম্ভকপত্তধরো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৪০১. চীৰরলেসো নাম পংসুকূলিকো দিট্ঠো হোতি…পে… গহপতিচীৰরধরো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং গহপতিচীৰরধরং পস্সিত্ৰা চোদেতি – ‘‘গহপতিচীৰরধরো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৪০২. উপজ্ঝাযলেসো নাম ইত্থন্নামস্স সদ্ধিৰিহারিকো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং ইত্থন্নামস্স সদ্ধিৰিহারিকং পস্সিত্ৰা চোদেতি – ‘‘ইত্থন্নামস্স সদ্ধিৰিহারিকো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৪০৩. আচরিযলেসো নাম ইত্থন্নামস্স অন্তেৰাসিকো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং ইত্থন্নামস্স অন্তেৰাসিকং পস্সিত্ৰা চোদেতি – ‘‘ইত্থন্নামস্স অন্তেৰাসিকো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

৪০৪. সেনাসনলেসো নাম ইত্থন্নামসেনাসনৰাসিকো দিট্ঠো হোতি পারাজিকং ধম্মং অজ্ঝাপজ্জন্তো. অঞ্ঞং ইত্থন্নামসেনাসনৰাসিকং পস্সিত্ৰা চোদেতি – ‘‘ইত্থন্নামসেনাসনৰাসিকো মযা দিট্ঠো. পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

৪০৫. পারাজিকেন ধম্মেনাতি চতুন্নং অঞ্ঞতরেন.

অনুদ্ধংসেয্যাতি চোদেতি ৰা চোদাপেতি ৰা.

অপ্পেৰ নাম নং ইমম্হা ব্রহ্মচরিযাচাৰেয্যন্তি ভিক্খুভাৰা চাৰেয্যং, সমণধম্মা চাৰেয্যং, সীলক্খন্ধা চাৰেয্যং, তপোগুণা চাৰেয্যং.

ততো অপরেন সমযেনাতি যস্মিং খণে অনুদ্ধংসিতো হোতি, তং খণং তং লযং তং মুহুত্তং ৰীতিৰত্তে.

সমনুগ্গাহীযমানোতি যেন ৰত্থুনা অনুদ্ধংসিতো হোতি তস্মিং ৰত্থুস্মিং সমনুগ্গাহীযমানো.

অসমনুগ্গাহীযমানোতি ন কেনচি ৰুচ্চমানো.

অধিকরণং নাম চত্তারি অধিকরণানি – ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং.

কোচি দেসো লেসমত্তো উপাদিন্নোতি তেসং দসন্নং লেসানং অঞ্ঞতরো লেসো উপাদিন্নো হোতি.

ভিক্খু চ দোসং পতিট্ঠাতীতি তুচ্ছকং মযা ভণিতং, মুসা মযা ভণিতং, অভূতং মযা ভণিতং, অজানন্তেন মযা ভণিতং.

সঙ্ঘাদিসেসোতি …পে… তেনপি ৰুচ্চতি সঙ্ঘাদিসেসোতি.

৪০৬. ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে সঙ্ঘাদিসেসদিট্ঠি হোতি. তঞ্চে পারাজিকেন চোদেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে থুল্লচ্চযদিট্ঠি হোতি…পে… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি. তঞ্চে পারাজিকেন চোদেতি – ‘‘অস্সমণোসি’’…পে… এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু থুল্লচ্চযং অজ্ঝাপজ্জন্তো দিট্ঠো হোতি থুল্লচ্চযে থুল্লচ্চযদিট্ঠি হোতি…পে… থুল্লচ্চযে পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি… সঙ্ঘাদিসেসদিট্ঠি হোতি. তঞ্চে পারাজিকেন চোদেতি – ‘‘অস্সমণোসি’’ …পে… এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু পাচিত্তিযং…পে… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো হোতি, দুব্ভাসিতে দুব্ভাসিতদিট্ঠি হোতি…পে… দুব্ভাসিতে সঙ্ঘাদিসেসদিট্ঠি হোতি… থুল্লচ্চযদিট্ঠি হোতি… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি. তঞ্চে পারাজিকেন চোদেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

একেকং মূলং কাতুন চক্কং বন্ধিতব্বং.

৪০৭. ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি সঙ্ঘাদিসেসে সঙ্ঘাদিসেসদিট্ঠি হোতি. তঞ্চে পারাজিকেন চোদাপেতি – ‘‘অস্সমণোসি’’…পে… এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু সঙ্ঘাদিসেসং অজ্ঝাপজ্জন্তো দিট্ঠো হোতি, সঙ্ঘাদিসেসে থুল্লচ্চযদিট্ঠি হোতি…পে… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি. তঞ্চে পারাজিকেন চোদাপেতি – ‘‘অস্সমণোসি’’…পে… এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু থুল্লচ্চযং অজ্ঝাপজ্জন্তো দিট্ঠো হোতি থুল্লচ্চযে থুল্লচ্চযদিট্ঠি হোতি…পে… থুল্লচ্চযে পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি… দুব্ভাসিতদিট্ঠি হোতি… সঙ্ঘাদিসেসদিট্ঠি হোতি. তঞ্চে পারাজিকেন চোদাপেতি – ‘‘অস্সমণোসি’’…পে… এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

ভিক্খু পাচিত্তিযং…পে… পাটিদেসনীযং… দুক্কটং… দুব্ভাসিতং অজ্ঝাপজ্জন্তো দিট্ঠো হোতি দুব্ভাসিতে দুব্ভাসিতদিট্ঠি হোতি…পে… দুব্ভাসিতে সঙ্ঘাদিসেসদিট্ঠি হোতি… থুল্লচ্চযদিট্ঠি হোতি… পাচিত্তিযদিট্ঠি হোতি… পাটিদেসনীযদিট্ঠি হোতি… দুক্কটদিট্ঠি হোতি. তঞ্চে পারাজিকেন চোদাপেতি – ‘‘অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, এৰম্পি আপত্তঞ্ঞভাগিযং হোতি লেসো চ উপাদিন্নো, আপত্তি ৰাচায, ৰাচায সঙ্ঘাদিসেসস্স.

৪০৮. অনাপত্তি তথাসঞ্ঞী চোদেতি ৰা চোদাপেতি ৰা, উম্মত্তকস্স, আদিকম্মিকস্সাতি.

দুতিযদুট্ঠদোসসিক্খাপদং নিট্ঠিতং নৰমং.