৮. দুট্ঠদোসসিক্খাপদং

৩৮০. [ইদং ৰত্থু চূল়ৰ. ১৮৯] তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আযস্মতা দব্বেন মল্লপুত্তেন জাতিযা সত্তৰস্সেন অরহত্তং সচ্ছিকতং হোতি. যং কিঞ্চি [যঞ্চ কিঞ্চি (সী. ক.)] সাৰকেন পত্তব্বং সব্বং তেন অনুপ্পত্তং হোতি. নত্থি চস্স কিঞ্চি উত্তরি করণীযং, কতস্স ৰা পতিচযো. অথ খো আযস্মতো দব্বস্স মল্লপুত্তস্স রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘মযা খো জাতিযা সত্তৰস্সেন অরহত্তং সচ্ছিকতং. যং কিঞ্চি সাৰকেন পত্তব্বং সব্বং মযা অনুপ্পত্তং. নত্থি চ মে কিঞ্চি উত্তরি করণীযং, কতস্স ৰা পতিচযো. কিন্নু খো অহং সঙ্ঘস্স ৰেয্যাৰচ্চং করেয্য’’ন্তি?

অথ খো আযস্মতো দব্বস্স মল্লপুত্তস্স এতদহোসি – ‘‘যংনূনাহং সঙ্ঘস্স সেনাসনঞ্চ পঞ্ঞপেয্যং ভত্তানি চ উদ্দিসেয্য’’ন্তি. অথ খো আযস্মা দব্বো মল্লপুত্তো সাযন্হসমযং পটিসল্লানা ৰুট্ঠিতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা দব্বো মল্লপুত্তো ভগৰন্তং এতদৰোচ – ‘‘ইধ ময্হং, ভন্তে, রহোগতস্স পটিসল্লীনস্স এৰং চেতসো পরিৰিতক্কো উদপাদি মযা খো জাতিযা সত্তৰস্সেন অরহত্তং সচ্ছিকতং, যং কিঞ্চি সাৰকেন পত্তব্বং, সব্বং মযা অনুপত্তং, নত্থি চ মে কিঞ্চি উত্তরি করণীযং, কতস্স ৰা পতিচযো, কিং নু খো অহং সঙ্ঘস্স ৰেয্যাৰচ্চং করেয্য’’ন্তি. তস্স ময্হং ভন্তে, এতদহোসি যংনূনাহং ‘‘সঙ্ঘস্স সেনাসনঞ্চ পঞ্ঞপেয্যং ভত্তানি চ উদ্দিসেয্যন্তি. ইচ্ছামহং, ভন্তে, সঙ্ঘস্স সেনাসনঞ্চ পঞ্ঞপেতুং ভত্তানি চ উদ্দিসিতু’’ন্তি. ‘‘সাধু সাধু, দব্ব. তেন হি ত্ৰং, দব্ব, সঙ্ঘস্স সেনাসনঞ্চ পঞ্ঞপেহি ভত্তানি চ উদ্দিসা’’তি. ‘‘এৰং, ভন্তে’’তি খো আযস্মা দব্বো মল্লপুত্তো ভগৰতো পচ্চস্সোসি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, সঙ্ঘো দব্বং মল্লপুত্তং সেনাসনপঞ্ঞাপকঞ্চ ভত্তুদ্দেসকঞ্চ সম্মন্নতু. এৰঞ্চ পন, ভিক্খৰে, সম্মন্নিতব্বো. পঠমং দব্বো মল্লপুত্তো যাচিতব্বো. যাচিত্ৰা ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৮১. ‘‘সুণাতু মে, ভন্তে, সঙ্ঘো. যদি সঙ্ঘস্স পত্তকল্লং সঙ্ঘো আযস্মন্তং দব্বং মল্লপুত্তং সেনাসনপঞ্ঞাপকঞ্চ ভত্তুদ্দেসকঞ্চ সম্মন্নেয্য. এসা ঞত্তি.

‘‘সুণাতু মে, ভন্তে, সঙ্ঘো. সঙ্ঘো আযস্মন্তং দব্বং মল্লপুত্তং সেনাসনপঞ্ঞাপকঞ্চ ভত্তুদ্দেসকঞ্চ সম্মন্নতি. যস্সাযস্মতো খমতি আযস্মতো দব্বস্স মল্লপুত্তস্স সেনাসনপঞ্ঞাপকস্স চ ভত্তুদ্দেসকস্স চ সম্মুতি, সো তুণ্হস্স; যস্স নক্খমতি, সো ভাসেয্য.

‘‘সম্মতো সঙ্ঘেন আযস্মা দব্বো মল্লপুত্তো সেনাসনপঞ্ঞাপকো চ ভত্তুদ্দেসকো চ. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৮২. সম্মতো চ পনাযস্মা দব্বো মল্লপুত্তো সভাগানং ভিক্খূনং একজ্ঝং সেনাসনং পঞ্ঞপেতি. যে তে ভিক্খূ সুত্তন্তিকা তেসং একজ্ঝং সেনাসনং পঞ্ঞপেতি – ‘‘তে অঞ্ঞমঞ্ঞং সুত্তন্তং সঙ্গাযিস্সন্তী’’তি. যে তে ভিক্খূ ৰিনযধরা তেসং একজ্ঝং সেনাসনং পঞ্ঞপেতি – ‘‘তে অঞ্ঞমঞ্ঞং ৰিনযং ৰিনিচ্ছিনিস্সন্তী’’তি [ৰিনিচ্ছিস্সন্তীতি (ক.)]. যে তে ভিক্খূ ধম্মকথিকা তেসং একজ্ঝং সেনাসনং পঞ্ঞপেতি – ‘‘তে অঞ্ঞমঞ্ঞং ধম্মং সাকচ্ছিস্সন্তী’’তি. যে তে ভিক্খূ ঝাযিনো তেসং একজ্ঝং সেনাসনং পঞ্ঞপেতি – ‘‘তে অঞ্ঞমঞ্ঞং ন ব্যাবাধিস্সন্তী’’তি [ন ব্যাবাহিস্সন্তীতি (ক.)]. যে তে ভিক্খূ তিরচ্ছানকথিকা কাযদল়্হিবহুলা [কাযদড্ঢিবহুলা (সী.)] ৰিহরন্তি তেসম্পি একজ্ঝং সেনাসনং পঞ্ঞপেতি – ‘‘ইমাযপিমে আযস্মন্তো রতিযা অচ্ছিস্সন্তী’’তি. যেপি তে ভিক্খূ ৰিকালে আগচ্ছন্তি তেসম্পি তেজোধাতুং সমাপজ্জিত্ৰা তেনেৰ আলোকেন সেনাসনং পঞ্ঞপেতি. অপিসু ভিক্খূ সঞ্চিচ্চ ৰিকালে আগচ্ছন্তি – ‘‘মযং আযস্মতো দব্বস্স মল্লপুত্তস্স ইদ্ধিপাটিহারিযং পস্সিস্সামা’’তি.

তে আযস্মন্তং দব্বং মল্লপুত্তং উপসঙ্কমিত্ৰা এৰং ৰদন্তি – ‘‘অম্হাকং, আৰুসো দব্ব, সেনাসনং পঞ্ঞপেহী’’তি. তে আযস্মা দব্বো মল্লপুত্তো এৰং ৰদেতি – ‘‘কত্থাযস্মন্তা ইচ্ছন্তি, কত্থ পঞ্ঞপেমী’’তি? তে সঞ্চিচ্চ দূরে অপদিসন্তি – ‘‘অম্হাকং, আৰুসো দব্ব, গিজ্ঝকূটে পব্বতে সেনাসনং পঞ্ঞপেহি. অম্হাকং, আৰুসো, চোরপপাতে সেনাসনং পঞ্ঞপেহি. অম্হাকং, আৰুসো, ইসিগিলিপস্সে কাল়সিলাযং সেনাসনং পঞ্ঞপেহি. অম্হাকং, আৰুসো, ৰেভারপস্সে সত্তপণ্ণিগুহাযং সেনাসনং পঞ্ঞপেহি. অম্হাকং, আৰুসো, সীতৰনে সপ্পসোণ্ডিকপব্ভারে সেনাসনং পঞ্ঞপেহি. অম্হাকং, আৰুসো, গোতমককন্দরাযং সেনাসনং পঞ্ঞপেহি. অম্হাকং, আৰুসো, তিন্দুককন্দরাযং সেনাসনং পঞ্ঞপেহি. অম্হাকং, আৰুসো, তপোদকন্দরাযং সেনাসনং পঞ্ঞপেহি. অম্হাকং, আৰুসো, তপোদারামে সেনাসনং পঞ্ঞপেহি. অম্হাকং, আৰুসো, জীৰকম্বৰনে সেনাসনং পঞ্ঞপেহি. অম্হাকং, আৰুসো, মদ্দকুচ্ছিস্মিং মিগদাযে সেনাসনং পঞ্ঞপেহী’’তি.

তেসং আযস্মা দব্বো মল্লপুত্তো তেজোধাতুং সমাপজ্জিত্ৰা অঙ্গুলিযা জলমানায পুরতো পুরতো গচ্ছতি. তেপি তেনেৰ আলোকেন আযস্মতো দব্বস্স মল্লপুত্তস্স পিট্ঠিতো পিট্ঠিতো গচ্ছন্তি. তেসং আযস্মা দব্বো মল্লপুত্তো এৰং সেনাসনং পঞ্ঞপেতি – ‘‘অযং মঞ্চো, ইদং পীঠং, অযং ভিসি, ইদং বিম্বোহনং, ইদং ৰচ্চট্ঠানং, ইদং পস্সাৰট্ঠানং, ইদং পানীযং, ইদং পরিভোজনীযং, অযং কত্তরদণ্ডো, ইদং সঙ্ঘস্স কতিকসণ্ঠানং, ইমং কালং পৰিসিতব্বং, ইমং কালং নিক্খমিতব্ব’’ন্তি. তেসং আযস্মা দব্বো মল্লপুত্তো এৰং সেনাসনং পঞ্ঞপেত্ৰা পুনদেৰ ৰেল়ুৰনং পচ্চাগচ্ছতি.

৩৮৩. তেন খো পন সমযেন মেত্তিযভূমজকা [ভুম্মজকা (সী. স্যা.)] ভিক্খূ নৰকা চেৰ হোন্তি অপ্পপুঞ্ঞা চ. যানি সঙ্ঘস্স লামকানি সেনাসনানি তানি তেসং পাপুণন্তি লামকানি চ ভত্তানি. তেন খো পন সমযেন রাজগহে মনুস্সা ইচ্ছন্তি থেরানং ভিক্খূনং অভিসঙ্খারিকং পিণ্ডপাতং দাতুং সপ্পিম্পি তেলম্পি উত্তরিভঙ্গম্পি. মেত্তিযভূমজকানং পন ভিক্খূনং পাকতিকং দেন্তি যথারন্ধং কণাজকং বিলঙ্গদুতিযং. তে পচ্ছাভত্তং পিণ্ডপাতপ্পটিক্কন্তা থেরে ভিক্খূ পুচ্ছন্তি – ‘‘তুম্হাকং, আৰুসো, ভত্তগ্গে কিং অহোসি? তুম্হাকং, আৰুসো, ভত্তগ্গে কিং অহোসী’’তি? একচ্চে থেরা এৰং ৰদন্তি – ‘‘অম্হাকং, আৰুসো, সপ্পি অহোসি তেলং অহোসি উত্তরিভঙ্গং অহোসী’’তি. মেত্তিযভূমজকা পন ভিক্খূ এৰং ৰদন্তি – ‘‘অম্হাকং, আৰুসো, ন কিঞ্চি অহোসি, পাকতিকং যথারন্ধং কণাজকং বিলঙ্গদুতিয’’ন্তি.

তেন খো পন সমযেন কল্যাণভত্তিকো গহপতি সঙ্ঘস্স চতুক্কভত্তং দেতি নিচ্চভত্তং. সো ভত্তগ্গে সপুত্তদারো উপতিট্ঠিত্ৰা পরিৰিসতি. অঞ্ঞে ওদনেন পুচ্ছন্তি, অঞ্ঞে সূপেন পুচ্ছন্তি, অঞ্ঞে তেলেন পুচ্ছন্তি, অঞ্ঞে উত্তরিভঙ্গেন পুচ্ছন্তি. তেন খো পন সমযেন কল্যাণভত্তিকস্স গহপতিনো ভত্তং স্ৰাতনায মেত্তিযভূমজকানং ভিক্খূনং উদ্দিট্ঠং হোতি. অথ খো কল্যাণভত্তিকো গহপতি আরামং অগমাসি কেনচিদেৰ করণীযেন. সো যেনাযস্মা দব্বো মল্লপুত্তো তেনুপসঙ্কমি; উপসঙ্কমিত্ৰা আযস্মন্তং দব্বং মল্লপুত্তং অভিৰাদেত্ৰা একমন্তং নিসীদি. একমন্তং নিসিন্নং খো কল্যাণভত্তিকং গহপতিং আযস্মা দব্বো মল্লপুত্তো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো কল্যাণভত্তিকো গহপতি আযস্মতা দব্বেন মল্লপুত্তেন ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো আযস্মন্তং দব্বং মল্লপুত্তং এতদৰোচ – ‘‘কস্স, ভন্তে, অম্হাকং ঘরে স্ৰাতনায ভত্তং উদ্দিট্ঠ’’ন্তি? ‘‘মেত্তিযভূমজকানং খো, গহপতি, ভিক্খূনং তুম্হাকং ঘরে স্ৰাতনায ভত্তং উদ্দিট্ঠ’’ন্তি. অথ খো কল্যাণভত্তিকো গহপতি অনত্তমনো অহোসি – ‘‘কথঞ্হি নাম পাপভিক্খূ অম্হাকং ঘরে ভুঞ্জিস্সন্তী’’তি! ঘরং গন্ত্ৰা দাসিং আণাপেসি – ‘‘যে, জে, স্ৰে ভত্তিকা আগচ্ছন্তি তে কোট্ঠকে আসনং পঞ্ঞপেত্ৰা কণাজকেন বিলঙ্গদুতিযেন পরিৰিসা’’তি. ‘‘এৰং অয্যা’’তি খো সা দাসী কল্যাণভত্তিকস্স গহপতিনো পচ্চস্সোসি.

অথ খো মেত্তিযভূমজকা ভিক্খূ – ‘‘হিয্যো খো, আৰুসো, অম্হাকং কল্যাণভত্তিকস্স গহপতিনো ঘরে ভত্তং উদ্দিট্ঠং, স্ৰে অম্হে কল্যাণভত্তিকো গহপতি সপুত্তদারো উপতিট্ঠিত্ৰা পরিৰিসিস্সতি; অঞ্ঞে ওদনেন পুচ্ছিস্সন্তি, অঞ্ঞে সূপেন পুচ্ছিস্সন্তি, অঞ্ঞে তেলেন পুচ্ছিস্সন্তি, অঞ্ঞে উত্তরিভঙ্গেন পুচ্ছিস্সন্তী’’তি. তে তেনেৰ সোমনস্সেন ন চিত্তরূপং রত্তিযা সুপিংসু. অথ খো মেত্তিযভূমজকা ভিক্খূ পুব্বণ্হসমযং নিৰাসেত্ৰা পত্তচীৰরং আদায যেন কল্যাণভত্তিকস্স গহপতিনো নিৰেসনং তেনুপসঙ্কমিংসু. অদ্দসা খো সা দাসী মেত্তিযভূমজকে ভিক্খূ দূরতোৰ আগচ্ছন্তে. দিস্ৰান কোট্ঠকে আসনং পঞ্ঞপেত্ৰা মেত্তিযভূমজকে ভিক্খূ এতদৰোচ – ‘‘নিসীদথ, ভন্তে’’তি. অথ খো মেত্তিযভূমজকানং ভিক্খূনং এতদহোসি – ‘‘নিস্সংসযং খো ন তাৰ ভত্তং সিদ্ধং ভৰিস্সতি! যথা [যাৰ (সী.)] মযং কোট্ঠকে নিসীদেয্যামা’’তি [নিসীদাপীযেয্যামাতি (সী.), নিসীদাপীযামাতি (স্যা.)]. অথ খো সা দাসী কণাজকেন বিলঙ্গদুতিযেন উপগচ্ছি – ‘‘ভুঞ্জথ, ভন্তে’’তি. ‘‘মযং খো, ভগিনি, নিচ্চভত্তিকা’’তি. ‘‘জানামি অয্যা নিচ্চভত্তিকাত্থ. অপিচাহং হিয্যোৰ গহপতিনা আণত্তা – ‘যে, জে, স্ৰে ভত্তিকা আগচ্ছন্তি তে কোট্ঠকে আসনং পঞ্ঞপেত্ৰা কণাজকেন বিলঙ্গদুতিযেন পরিৰিসা’তি. ভুঞ্জথ, ভন্তে’’তি. অথ খো মেত্তিযভূমজকা ভিক্খূ – ‘‘হিয্যো খো, আৰুসো, কল্যাণভত্তিকো গহপতি আরামং অগমাসি দব্বস্স মল্লপুত্তস্স সন্তিকে. নিস্সংসযং খো মযং দব্বেন মল্লপুত্তেন গহপতিনো অন্তরে [সন্তিকে (স্যা. কং. ক.)] পরিভিন্না’’তি. তে তেনেৰ দোমনস্সেন ন চিত্তরূপং ভুঞ্জিংসু. অথ খো মেত্তিযভূমজকা ভিক্খূ পচ্ছাভত্তং পিণ্ডপাতপ্পটিক্কন্তা আরামং গন্ত্ৰা পত্তচীৰরং পটিসামেত্ৰা বহারামকোট্ঠকে সঙ্ঘাটিপল্লত্থিকায নিসীদিংসু তুণ্হীভূতা মঙ্কুভূতা পত্তক্খন্ধা অধোমুখা পজ্ঝাযন্তা অপ্পটিভানা.

অথ খো মেত্তিযা ভিক্খুনী যেন মেত্তিযভূমজকা ভিক্খূ তেনুপসঙ্কমি; উপসঙ্কমিত্ৰা মেত্তিযভূমজকে ভিক্খূ এতদৰোচ – ‘‘ৰন্দামি, অয্যা’’তি. এৰং ৰুত্তে মেত্তিযভূমজকা ভিক্খূ নালপিংসু. দুতিযম্পি খো…পে… ততিযম্পি খো মেত্তিযা ভিক্খুনী মেত্তিযভূমজকে ভিক্খূ এতদৰোচ – ‘‘ৰন্দামি, অয্যা’’তি. ততিযম্পি খো মেত্তিযভূমজকা ভিক্খূ নালপিংসু. ‘‘ক্যাহং অয্যানং অপরজ্ঝামি? কিস্স মং অয্যা নালপন্তী’’তি? ‘‘তথা হি পন ত্ৰং, ভগিনি, অম্হে দব্বেন মল্লপুত্তেন ৰিহেঠীযমানে অজ্ঝুপেক্খসী’’তি? ‘‘ক্যাহং, অয্যা, করোমী’’তি? ‘‘সচে খো ত্ৰং, ভগিনি, ইচ্ছেয্যাসি অজ্জেৰ ভগৰা দব্বং মল্লপুত্তং নাসাপেয্যা’’তি. ‘‘ক্যাহং, অয্যা, করোমি, কিং মযা সক্কা কাতু’’ন্তি? ‘‘এহি ত্ৰং, ভগিনি, যেন ভগৰা তেনুপসঙ্কম; উপসঙ্কমিত্ৰা ভগৰন্তং এৰং ৰদেহি – ‘ইদং, ভন্তে, নচ্ছন্নং নপ্পতিরূপং. যাযং, ভন্তে, দিসা অভযা অনীতিকা অনুপদ্দৰা সাযং দিসা সভযা সঈতিকা সউপদ্দৰা. যতো নিৰাতং ততো সৰাতং [পৰাতং (সী. স্যা.)]. উদকং মঞ্ঞে আদিত্তং. অয্যেনম্হি দব্বেন মল্লপুত্তেন দূসিতা’’’তি. ‘‘এৰং, অয্যা’’তি খো মেত্তিযা ভিক্খুনী মেত্তিযভূমজকানং ভিক্খূনং পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতা খো মেত্তিযা ভিক্খুনী ভগৰন্তং এতদৰোচ – ‘‘ইদং, ভন্তে, নচ্ছন্নং নপ্পতিরূপং. যাযং, ভন্তে, দিসা অভযা অনীতিকা অনুপদ্দৰা সাযং দিসা সভযা সঈতিকা সউপদ্দৰা. যতো নিৰাতং ততো সৰাতং. উদকং মঞ্ঞে আদিত্তং! অয্যেনম্হি দব্বেন মল্লপুত্তেন দূসিতা’’তি.

৩৮৪. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং দব্বং মল্লপুত্তং পটিপুচ্ছি – ‘‘সরসি ত্ৰং, দব্ব, এৰরূপং কত্তা যথাযং ভিক্খুনী আহা’’তি? ‘‘যথা মং, ভন্তে, ভগৰা জানাতী’’তি. দুতিযম্পি খো ভগৰা…পে… ততিযম্পি খো ভগৰা আযস্মন্তং দব্বং মল্লপুত্তং এতদৰোচ – ‘‘সরসি ত্ৰং, দব্ব, এৰরূপং কত্তা যথাযং ভিক্খুনী আহা’’তি? ‘‘যথা মং, ভন্তে, ভগৰা জানাতী’’তি. ‘‘ন খো, দব্ব, দব্বা এৰং নিব্বেঠেন্তি. সচে তযা কতং কতন্তি ৰদেহি, সচে তযা অকতং অকতন্তি ৰদেহী’’তি. ‘‘যতো অহং, ভন্তে, জাতো নাভিজানামি সুপিনন্তেনপি মেথুনং ধম্মং পটিসেৰিতা, পগেৰ জাগরো’’তি! অথ খো ভগৰা ভিক্খূ আমন্তেসি – ‘‘তেন হি, ভিক্খৰে, মেত্তিযং ভিক্খুনিং নাসেথ. ইমে চ ভিক্খূ অনুযুঞ্জথা’’তি. ইদং ৰত্ৰা ভগৰা উট্ঠাযাসনা ৰিহারং পাৰিসি.

অথ খো তে ভিক্খূ মেত্তিযং ভিক্খুনিং নাসেসুং. অথ খো মেত্তিযভূমজকা ভিক্খূ তে ভিক্খূ এতদৰোচুং – ‘‘মাৰুসো, মেত্তিযং ভিক্খুনিং নাসেথ. ন সা কিঞ্চি অপরজ্ঝতি. অম্হেহি সা উস্সাহিতা কুপিতেহি অনত্তমনেহি চাৰনাধিপ্পাযেহী’’তি. ‘‘কিং পন তুম্হে, আৰুসো, আযস্মন্তং দব্বং মল্লপুত্তং অমূলকেন পারাজিকেন ধম্মেন অনুদ্ধংসেথা’’তি? ‘‘এৰমাৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম মেত্তিযভূমজকা ভিক্খূ আযস্মন্তং দব্বং মল্লপুত্তং অমূলকেন পারাজিকেন ধম্মেন অনুদ্ধংসেস্সন্তী’’তি! অথ খো তে ভিক্খূ মেত্তিযভূমজকে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, দব্বং মল্লপুত্তং অমূলকেন পারাজিকেন ধম্মেন অনুদ্ধংসেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম তুম্হে, মোঘপুরিসা, দব্বং মল্লপুত্তং অমূলকেন পারাজিকেন ধম্মেন অনুদ্ধংসেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৮৫. যো পন ভিক্খু ভিক্খুং দুট্ঠো দোসো অপ্পতীতো অমূলকেন পারাজিকেন ধম্মেন অনুদ্ধংসেয্য – ‘অপ্পেৰ নাম নং ইমম্হা ব্রহ্মচরিযা চাৰেয্য’ন্তি, ততো অপরেন সমযেন সমনুগ্গাহীযমানো ৰা অসমনুগ্গাহীযমানো ৰা অমূলকঞ্চেৰ তং অধিকরণং হোতি ভিক্খু চ দোসং পতিট্ঠাতি, সঙ্ঘাদিসেসো’’তি.

৩৮৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুন্তি অঞ্ঞং ভিক্খুং.

দুট্ঠো দোসোতি কুপিতো অনত্তমনো অনভিরদ্ধো আহতচিত্তো খিলজাতো.

অপ্পতীতোতি তেন চ কোপেন তেন চ দোসেন তায চ অনত্তমনতায তায চ অনভিরদ্ধিযা অপ্পতীতো হোতি.

অমূলকং নাম অদিট্ঠং অসুতং অপরিসঙ্কিতং.

পারাজিকেন ধম্মেনাতি চতুন্নং অঞ্ঞতরেন.

অনুদ্ধংসেয্যাতি চোদেতি ৰা চোদাপেতি ৰা.

অপ্পেৰ নাম নং ইমম্হা ব্রহ্মচরিযা চাৰেয্যন্তি ভিক্খুভাৰা চাৰেয্যং, সমণধম্মা চাৰেয্যং, সীলক্খন্ধা চাৰেয্যং, তপোগুণা চাৰেয্যং.

ততো অপরেন সমযেনাতি যস্মিং খণে অনুদ্ধংসিতো হোতি তং খণং তং লযং তং মুহুত্তং ৰীতিৰত্তে.

সমনুগ্গাহীযমানোতি যেন ৰত্থুনা অনুদ্ধংসিতো হোতি তস্মিং ৰত্থুস্মিং সমনুগ্গাহীযমানো.

অসমনুগ্গাহীযমানোতি ন কেনচি ৰুচ্চমানো.

অধিকরণং নাম চত্তারি অধিকরণানি – ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং.

ভিক্খু চ দোসং পতিট্ঠাতীতি তুচ্ছকং মযা ভণিতং, মুসা মযা ভণিতং, অভূতং মযা ভণিতং, অজানন্তেন মযা ভণিতং.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৩৮৭. অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘দিট্ঠো মযা, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

অসুতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘সুতো মযা, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

অপরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘পরিসঙ্কিতো মযা, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘দিট্ঠো মযা সুতো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘দিট্ঠো মযা পরিসঙ্কিতো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘দিট্ঠো মযা সুতো চ পরিসঙ্কিতো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

অসুতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘সুতো মযা পরিসঙ্কিতো চ…পে… সুতো মযা দিট্ঠো চ…পে… সুতো মযা পরিসঙ্কিতো চ দিট্ঠো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

অপরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘পরিসঙ্কিতো মযা দিট্ঠো চ…পে… পরিসঙ্কিতো মযা সুতো চ…পে… পরিসঙ্কিতো মযা দিট্ঠো চ সুতো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

দিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘সুতো মযা পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

দিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদেতি – ‘‘পরিসঙ্কিতো মযা, পারাজিকং ধম্মং অজ্ঝাপন্নোসি’’…পে… ‘‘সুতো মযা পরিসঙ্কিতো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

সুতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘পরিসঙ্কিতো মযা, পারাজিকং ধম্মং অজ্ঝাপন্নোসি…পে… দিট্ঠো মযা, পারাজিকং ধম্মং অজ্ঝাপন্নোসি…পে… পরিসঙ্কিতো মযা দিট্ঠো চ, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

পরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদেতি – ‘‘দিট্ঠো মযা, পারাজিকং ধম্মং অজ্ঝাপন্নোসি…পে… সুতো মযা, পারাজিকং ধম্মং অজ্ঝাপন্নোসি…পে… দিট্ঠো মযা সুতো চ, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি’’…পে… আপত্তি ৰাচায, ৰাচায সঙ্ঘাদিসেসস্স.

দিট্ঠস্স হোতি পারাজিকং ধম্মং অজ্ঝাপজ্জন্তো. দিট্ঠে ৰেমতিকো দিট্ঠং নো কপ্পেতি দিট্ঠং নস্সরতি দিট্ঠং পমুট্ঠো হোতি…পে… সুতে ৰেমতিকো সুতং নো কপ্পেতি সুতং নস্সরতি সুতং পমুট্ঠো হোতি…পে… পরিসঙ্কিতে ৰেমতিকো পরিসঙ্কিতং নো কপ্পেতি পরিসঙ্কিতং নস্সরতি পরিসঙ্কিতং পমুট্ঠো হোতি. তঞ্চে চোদেতি – ‘‘পরিসঙ্কিতো মযা দিট্ঠো চ…পে… পরিসঙ্কিতো মযা সুতো চ…পে… পরিসঙ্কিতো মযা দিট্ঠো চ সুতো চ, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

৩৮৮. অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদাপেতি – ‘‘দিট্ঠোসি, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

অসুতস্স হোতি – ‘‘পারাজিকং ধম্মং অজ্ঝাপন্নো’’তি…পে… অপরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদাপেতি – ‘‘পরিসঙ্কিতোসি, পারাজিকং ধম্মং অজ্ঝাপন্নোসি’’…পে… আপত্তি ৰাচায, ৰাচায সঙ্ঘাদিসেসস্স.

অদিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদাপেতি – ‘‘দিট্ঠোসি সুতোসি…পে… দিট্ঠোসি পরিসঙ্কিতোসি…পে… দিট্ঠোসি সুতোসি পরিসঙ্কিতোসি, পারাজিকং ধম্মং অজ্ঝাপন্নোসি’’…পে… অসুতস্স হোতি – ‘‘পারাজিকং ধম্মং অজ্ঝাপন্নো’’তি…পে… অপরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে চোদাপেতি – ‘‘পরিসঙ্কিতোসি, দিট্ঠোসি…পে… পরিসঙ্কিতোসি, সুতোসি…পে… পরিসঙ্কিতোসি, দিট্ঠোসি, সুতোসি, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

দিট্ঠস্স হোতি পারাজিকং ধম্মং অজ্ঝাপজ্জন্তো. তঞ্চে চোদাপেতি – ‘‘সুতোসি’’…পে… তঞ্চে চোদাপেতি – ‘‘পরিসঙ্কিতোসি’’…পে… তঞ্চে চোদাপেতি – ‘‘সুতোসি, পরিসঙ্কিতোসি, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

সুতস্স হোতি – ‘‘পারাজিকং ধম্মং অজ্ঝাপন্নো’’তি…পে… পরিসঙ্কিতস্স হোতি – ‘‘পারাজিকং ধম্মং অজ্ঝাপন্নো’’তি. তঞ্চে ‘‘দিট্ঠোসি’’…পে… তঞ্চে চোদাপেতি – ‘‘সুতোসি’’…পে… তঞ্চে চোদাপেতি – ‘‘দিট্ঠোসি, সুতোসি, পারাজিকং ধম্মং অজ্ঝাপন্নোসি, অস্সমণোসি’’…পে… আপত্তি ৰাচায, ৰাচায সঙ্ঘাদিসেসস্স.

দিট্ঠস্স হোতি পারাজিকং ধম্মং অজ্ঝাপজ্জন্তো. দিট্ঠে ৰেমতিকো দিট্ঠং নো কপ্পেতি দিট্ঠং নস্সরতি দিট্ঠং পমুট্ঠো হোতি…পে… সুতে ৰেমতিকো সুতং নো কপ্পেতি সুতং নস্সরতি সুতং পমুট্ঠো হোতি…পে… পরিসঙ্কিতে ৰেমতিকো পরিসঙ্কিতং নো কপ্পেতি পরিসঙ্কিতং নস্সরতি পরিসঙ্কিতং পমুট্ঠো হোতি. তঞ্চে চোদাপেতি – ‘‘পরিসঙ্কিতোসি, দিট্ঠোসি’’…পে… পরিসঙ্কিতং পমুট্ঠো হোতি, তঞ্চে চোদাপেতি – ‘‘পরিসঙ্কিতোসি সুতোসি’’…পে… পরিসঙ্কিতং পমুট্ঠো হোতি, তঞ্চে চোদাপেতি – ‘‘পরিসঙ্কিতোসি, দিট্ঠোসি, সুতোসি, পারাজিকং ধম্মং অজ্ঝাপন্নোসি, অস্সমণোসি, অসক্যপুত্তিযোসি, নত্থি তযা সদ্ধিং উপোসথো ৰা পৰারণা ৰা সঙ্ঘকম্মং ৰা’’তি, আপত্তি ৰাচায, ৰাচায সঙ্ঘাদিসেসস্স.

৩৮৯. অসুদ্ধে সুদ্ধদিট্ঠি, সুদ্ধে অসুদ্ধদিট্ঠি, অসুদ্ধে অসুদ্ধদিট্ঠি, সুদ্ধে সুদ্ধদিট্ঠি.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে সুদ্ধদিট্ঠি সমানো অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে সুদ্ধদিট্ঠি সমানো ওকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে সুদ্ধদিট্ঠি সমানো অনোকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদেন দুক্কটস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে সুদ্ধদিট্ঠি সমানো ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে অসুদ্ধদিট্ঠি সমানো অনোকাসং কারাপেত্ৰা চাৰনাধিপ্পাযো ৰদেতি, আপত্তি দুক্কটস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে অসুদ্ধদিট্ঠি সমানো ওকাসং কারাপেত্ৰা চাৰনাধিপ্পাযো ৰদেতি, অনাপত্তি.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে অসুদ্ধদিট্ঠি সমানো অনোকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদেন দুক্কটস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে অসুদ্ধদিট্ঠি সমানো ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে অসুদ্ধদিট্ঠি সমানো অনোকাসং কারাপেত্ৰা চাৰনাধিপ্পাযো ৰদেতি, আপত্তি দুক্কটস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে অসুদ্ধদিট্ঠি সমানো ওকাসং কারাপেত্ৰা চাৰনাধিপ্পাযো ৰদেতি, অনাপত্তি.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে অসুদ্ধদিট্ঠি সমানো অনোকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদেন দুক্কটস্স.

অসুদ্ধো হোতি পুগ্গলো অঞ্ঞতরং পারাজিকং ধম্মং অজ্ঝাপন্নো. তঞ্চে অসুদ্ধদিট্ঠি সমানো ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে সুদ্ধদিট্ঠি সমানো অনোকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসেন দুক্কটস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে সুদ্ধদিট্ঠি সমানো ওকাসং কারাপেত্ৰা চাৰনাধিপ্পাযো ৰদেতি, আপত্তি সঙ্ঘাদিসেসস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো. তঞ্চে সুদ্ধদিট্ঠি সমানো অনোকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদেন দুক্কটস্স.

সুদ্ধো হোতি পুগ্গলো অঞ্ঞতরং পারাজিকং ধম্মং অনজ্ঝাপন্নো তঞ্চে সুদ্ধদিট্ঠি সমানো ওকাসং কারাপেত্ৰা অক্কোসাধিপ্পাযো ৰদেতি, আপত্তি ওমসৰাদস্স.

৩৯০. অনাপত্তি সুদ্ধে অসুদ্ধদিট্ঠিস্স, অসুদ্ধে অসুদ্ধদিট্ঠিস্স, উম্মত্তকস্স, আদিকম্মিকস্সাতি.

দুট্ঠদোসসিক্খাপদং নিট্ঠিতং অট্ঠমং.