৭. ৰিহারকারসিক্খাপদং

৩৬৫. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে. তেন খো পন সমযেন আযস্মতো ছন্নস্স উপট্ঠাকো গহপতি আযস্মন্তং ছন্নং এতদৰোচ – ‘‘ৰিহারৰত্থুং, ভন্তে, জানাহি অয্যস্স ৰিহারং কারাপেস্সামী’’তি. অথ খো আযস্মা ছন্নো ৰিহারৰত্থুং সোধেন্তো অঞ্ঞতরং চেতিযরুক্খং ছেদাপেসি গামপূজিতং নিগমপূজিতং নগরপূজিতং জনপদপূজিতং রট্ঠপূজিতং. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা চেতিযরুক্খং ছেদাপেস্সন্তি গামপূজিতং নিগমপূজিতং নগরপূজিতং জনপদপূজিতং রট্ঠপূজিতং! একিন্দ্রিযং সমণা সক্যপুত্তিযা জীৰং ৰিহেঠেন্তী’’ [ৰিহেঠেস্সন্তি (কত্থচি)] তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ছন্নো চেতিযরুক্খং ছেদাপেস্সতি গামপূজিতং…পে… রট্ঠপূজিত’’ন্তি! অথ খো তে ভিক্খূ আযস্মন্তং ছন্নং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, ছন্ন, চেতিযরুক্খং ছেদাপেসি গামপূজিতং…পে… রট্ঠপূজিত’’ন্তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম ত্ৰং, মোঘপুরিস, চেতিযরুক্খং ছেদাপেস্সসি গামপূজিতং নিগমপূজিতং নগরপূজিতং জনপদপূজিতং রট্ঠপূজিতং! জীৰসঞ্ঞিনো হি, মোঘপুরিস, মনুস্সা রুক্খস্মিং. নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৬৬. ‘‘মহল্লকং পন ভিক্খুনা ৰিহারং কারযমানেন সস্সামিকং অত্তুদ্দেসং ভিক্খূ অভিনেতব্বা ৰত্থুদেসনায. তেহি ভিক্খূহি ৰত্থু দেসেতব্বং অনারম্ভং সপরিক্কমনং. সারম্ভে চে ভিক্খু ৰত্থুস্মিং অপরিক্কমনে মহল্লকং ৰিহারং কারেয্য ভিক্খূ ৰা অনভিনেয্য ৰত্থুদেসনায, সঙ্ঘাদিসেসো’’তি.

৩৬৭. মহল্লকো নাম ৰিহারো সস্সামিকো ৰুচ্চতি.

ৰিহারো নাম উল্লিত্তো ৰা হোতি অৰলিত্তো ৰা উল্লিত্তাৰলিত্তো ৰা.

কারযমানেনাতি করোন্তো ৰা কারাপেন্তো ৰা.

সস্সামিকন্তি অঞ্ঞো কোচি সামিকো হোতি ইত্থী ৰা পুরিসো ৰা গহট্ঠো ৰা পব্বজিতো ৰা.

অত্তুদ্দেসন্তি অত্তনো অত্থায.

ভিক্খূ অভিনেতব্বা ৰত্থুদেসনাযাতি তেন ৰিহারকারকেন ভিক্খুনা ৰিহারৰত্থুং সোধেত্ৰা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, মহল্লকং ৰিহারং কত্তুকামো সস্সামিকং অত্তুদ্দেসং. সোহং, ভন্তে, সঙ্ঘং ৰিহারৰত্থুওলোকনং যাচামী’’তি. দুতিযম্পি যাচিতব্বা. ততিযম্পি যাচিতব্বা. সচে সব্বো সঙ্ঘো উস্সহতি ৰিহারৰত্থুং ওলোকেতুং সব্বেন সঙ্ঘেন ওলোকেতব্বং. নো চে সব্বো সঙ্ঘো উস্সহতি ৰিহারৰত্থুং ওলোকেতুং, যে তত্থ হোন্তি ভিক্খূ ব্যত্তা পটিবলা সারম্ভং অনারম্ভং সপরিক্কমনং অপরিক্কমনং জানিতুং তে যাচিত্ৰা সম্মন্নিতব্বা. এৰঞ্চ পন, ভিক্খৰে, সম্মন্নিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৬৮. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৰিহারং কত্তুকামো সস্সামিকং অত্তুদ্দেসং. সো সঙ্ঘং ৰিহারৰত্থুওলোকনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খু সম্মন্নেয্য ইত্থন্নামস্স ভিক্খুনো ৰিহারৰত্থুং ওলোকেতুং. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৰিহারং কত্তুকামো সস্সামিকং অত্তুদ্দেসং. সো সঙ্ঘং ৰিহারৰত্থুওলোকনং যাচতি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নতি ইত্থন্নামস্স ভিক্খুনো ৰিহারৰত্থুং ওলোকেতুং. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সম্মুতি ইত্থন্নামস্স ভিক্খুনো ৰিহারৰত্থুং ওলোকেতুং, সো তুণ্হস্স; যস্স নক্খমতি, সো ভাসেয্য.

‘‘সম্মতা সঙ্ঘেন ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো ৰিহারৰত্থুং ওলোকেতুং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৬৯. তেহি সম্মতেহি ভিক্খূহি তত্থ গন্ত্ৰা ৰিহারৰত্থু ওলোকেতব্বং; সারম্ভং অনারম্ভং সপরিক্কমনং অপরিক্কমনং জানিতব্বং. সচে সারম্ভং হোতি অপরিক্কমনং, ‘মাযিধ করী’তি ৰত্তব্বো. সচে অনারম্ভং হোতি সপরিক্কমনং, সঙ্ঘস্স আরোচেতব্বং – ‘অনারম্ভং সপরিক্কমন’ন্তি. তেন ৰিহারকারকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, মহল্লকং ৰিহারং কত্তুকামো সস্সামিকং অত্তুদ্দেসং. সোহং, ভন্তে, সঙ্ঘং ৰিহারৰত্থুদেসনং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৭০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৰিহারং কত্তুকামো সস্সামিকং অত্তুদ্দেসং. সো সঙ্ঘং ৰিহারৰত্থুদেসনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো ৰিহারৰত্থুং দেসেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু মহল্লকং ৰিহারং কত্তুকামো সস্সামিকং অত্তুদ্দেসং. সো সঙ্ঘং ৰিহারৰত্থুদেসনং যাচতি. সঙ্ঘো ইত্থন্নামস্স ভিক্খুনো ৰিহারৰত্থুং দেসেতি. যস্সাযস্মতো খমতি ইত্থন্নামস্স ভিক্খুনো ৰিহারৰত্থুস্স দেসনা, সো তুণ্হস্স; যস্স নক্খমতি, সো ভাসেয্য.

‘‘দেসিতং সঙ্ঘেন ইত্থন্নামস্স ভিক্খুনো ৰিহারৰত্থুং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৭১. সারম্ভং নাম কিপিল্লিকানং ৰা আসযো হোতি, উপচিকানং ৰা আসযো হোতি, উন্দূরানং ৰা…পে… অহীনং ৰা ৰিচ্ছিকানং ৰা সতপদীনং ৰা হত্থীনং ৰা অস্সানং ৰা সীহানং ৰা ব্যগ্ঘানং ৰা দীপীনং ৰা অচ্ছানং ৰা তরচ্ছানং ৰা আসযো হোতি, যেসং কেসঞ্চি তিরচ্ছানগতানং পাণানং আসযো হোতি, পুব্বণ্ণনিস্সিতং ৰা হোতি, অপরণ্ণনিস্সিতং ৰা হোতি, অব্ভাঘাতনিস্সিতং ৰা হোতি, আঘাতননিস্সিতং ৰা হোতি, সুসাননিস্সিতং ৰা হোতি, উয্যাননিস্সিতং ৰা হোতি, রাজৰত্থুনিস্সিতং ৰা হোতি, হত্থিসালানিস্সিতং ৰা হোতি, অস্সসালানিস্সিতং ৰা হোতি, বন্ধনাগারনিস্সিতং ৰা হোতি, পানাগারনিস্সিতং ৰা হোতি, সূননিস্সিতং ৰা হোতি, রচ্ছানিস্সিতং ৰা হোতি, চচ্চরনিস্সিতং ৰা হোতি, সভানিস্সিতং ৰা হোতি, সংসরণনিস্সিতং ৰা হোতি. এতং সারম্ভং নাম.

অপরিক্কমনং নাম ন সক্কা হোতি যথাযুত্তেন সকটেন অনুপরিগন্তুং, সমন্তা নিস্সেণিযা অনুপরিগন্তুং. এতং অপরিক্কমনং নাম.

অনারম্ভং নাম ন কিপিল্লিকানং ৰা আসযো হোতি…পে… ন সংসরণনিস্সিতং ৰা হোতি. এতং অনারম্ভং নাম.

সপরিক্কমনং নাম সক্কা হোতি যথাযুত্তেন সকটেন অনুপরিগন্তুং, সমন্তা নিস্সেণিযা অনুপরিগন্তুং. এতং সপরিক্কমনং নাম.

মহল্লকো নাম ৰিহারো সস্সামিকো ৰুচ্চতি.

ৰিহারো নাম উল্লিত্তো ৰা হোতি অৰলিত্তো ৰা উল্লিত্তাৰলিত্তো ৰা.

কারেয্যাতি করোতি ৰা কারাপেতি ৰা.

ভিক্খূ ৰা অনভিনেয্য ৰত্থুদেসনাযাতি ঞত্তিদুতিযেন কম্মেন ৰিহারৰত্থুং ন দেসাপেত্ৰা করোতি ৰা কারাপেতি ৰা, পযোগে দুক্কটং. একং পিণ্ডং অনাগতে, আপত্তি থুল্লচ্চযস্স. তস্মিং পিণ্ডে আগতে, আপত্তি সঙ্ঘাদিসেসস্স.

সঙ্ঘাদিসেসোতি…পে… তেনপি ৰুচ্চতি – ‘সঙ্ঘাদিসেসো’তি.

৩৭২. ভিক্খু ৰিহারং করোতি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং. ভিক্খু ৰিহারং করোতি অদেসিতৰত্থুকং সারম্ভং সপরিক্কমনং, আপত্তি সঙ্ঘাদিসেসেন দুক্কটস্স. ভিক্খু ৰিহারং করোতি অদেসিতৰত্থুকং অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স. ভিক্খু ৰিহারং করোতি অদেসিতৰত্থুকং অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু ৰিহারং করোতি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং. ভিক্খু ৰিহারং করোতি দেসিতৰত্থুকং সারম্ভং সপরিক্কমনং, আপত্তি দুক্কটস্স. ভিক্খু ৰিহারং করোতি দেসিতৰত্থুকং অনারম্ভং অপরিক্কমনং, আপত্তি দুক্কটস্স. ভিক্খু ৰিহারং করোতি দেসিতৰত্থুকং অনারম্ভং সপরিক্কমনং, অনাপত্তি.

৩৭৩. ভিক্খু সমাদিসতি – ‘‘ৰিহারং মে করোথা’’তি. তস্স ৰিহারং করোন্তি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘ৰিহারং মে করোথা’’তি. তস্স ৰিহারং করোন্তি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৭৪. ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. ন চ সমাদিসতি – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. ন চ সমাদিসতি – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৭৫. ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. সমাদিসতি চ – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি অদেসিতৰত্থুকং সারম্ভং অপরিক্কমনং. সো সুণাতি – ‘‘ৰিহারো কির মে কযিরতি অদেসিতৰত্থুকো সারম্ভো অপরিক্কমনো’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি …পে… ‘‘দেসিতৰত্থুকো চ হোতু অনারম্ভো চা’’তি…পে… ‘‘দেসিতৰত্থুকো চ হোতু সপরিক্কমনো চা’’তি …পে… ‘‘দেসিতৰত্থুকো হোতূ’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. সমাদিসতি চ – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি দেসিতৰত্থুকং সারম্ভং অপরিক্কমনং. সো সুণাতি – ‘‘ৰিহারো কির মে কযিরতি দেসিতৰত্থুকো সারম্ভো অপরিক্কমনো’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘অনারম্ভো চ হোতু সপরিক্কমনো চা’’তি…পে… ‘‘অনারম্ভো হোতূ’’তি ‘‘সপরিক্কমনো হোতূ’’তি, অনাপত্তি.

৩৭৬. ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. সমাদিসতি চ – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি অদেসিতৰত্থুকং সারম্ভং অপরিক্কমনং, আপত্তি কারুকানং তিণ্ণং দুক্কটানং…পে… সারম্ভং সপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং সপরিক্কমনং, আপত্তি কারুকানং দুক্কটস্স.

ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. সমাদিসতি চ – ‘‘দেসিতৰত্থুকো চ হোতু অনারম্ভো চ সপরিক্কমনো চা’’তি. তস্স ৰিহারং করোন্তি দেসিতৰত্থুকং সারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… সারম্ভং সপরিক্কমনং, আপত্তি কারুকানং দুক্কটস্স…পে… অনারম্ভং অপরিক্কমনং, আপত্তি কারুকানং দুক্কটস্স…পে… অনারম্ভং সপরিক্কমনং, অনাপত্তি.

৩৭৭. ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. তস্স ৰিহারং করোন্তি অদেসিতৰত্থুকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সো ৰিহারো অঞ্ঞস্স ৰা দাতব্বো ভিন্দিত্ৰা ৰা পুন কাতব্বো. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘ৰিহারং মে করোথা’’তি. তস্স ৰিহারং করোন্তি দেসিতৰত্থুকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সো ৰিহারো অঞ্ঞস্স ৰা দাতব্বো ভিন্দিত্ৰা ৰা পুন কাতব্বো. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৭৮. অত্তনা ৰিপ্পকতং অত্তনা পরিযোসাপেতি, আপত্তি সঙ্ঘাদিসেসস্স.

অত্তনা ৰিপ্পকতং পরেহি পরিযোসাপেতি, আপত্তি সঙ্ঘাদিসেসস্স.

পরেহি ৰিপ্পকতং অত্তনা পরিযোসাপেতি, আপত্তি সঙ্ঘাদিসেসস্স.

পরেহি ৰিপ্পকতং পরেহি পরিযোসাপেতি, আপত্তি সঙ্ঘাদিসেসস্স.

৩৭৯. অনাপত্তি লেণে গুহায তিণকুটিকায অঞ্ঞস্সত্থায ৰাসাগারং ঠপেত্ৰা সব্বত্থ. অনাপত্তি উম্মত্তকস্স, আদিকম্মিকস্সাতি.

ৰিহারকারসিক্খাপদং নিট্ঠিতং সত্তমং.