৬. কুটিকারসিক্খাপদং

৩৪২. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন আল়ৰকা ভিক্খূ সঞ্ঞাচিকাযো কুটিযো কারাপেন্তি অস্সামিকাযো অত্তুদ্দেসিকাযো অপ্পমাণিকাযো. তাযো ন নিট্ঠানং গচ্ছন্তি. তে যাচনবহুলা ৰিঞ্ঞত্তিবহুলা ৰিহরন্তি – ‘‘পুরিসং দেথ, পুরিসত্থকরং দেথ, গোণং দেথ, সকটং দেথ, ৰাসিং দেথ, পরসুং দেথ, কুঠারিং দেথ, কুদালং দেথ, নিখাদনং দেথ, ৰল্লিং দেথ, ৰেল়ুং দেথ, মুঞ্জং দেথ, পব্বজং দেথ, তিণং দেথ, মত্তিকং দেথা’’তি. মনুস্সা উপদ্দুতা যাচনায উপদ্দুতা ৰিঞ্ঞত্তিযা ভিক্খূ দিস্ৰা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং করোন্তি দ্ৰারম্পি থকেন্তি, গাৰিম্পি দিস্ৰা পলাযন্তি ভিক্খূতি মঞ্ঞমানা.

অথ খো আযস্মা মহাকস্সপো রাজগহে ৰস্সংৰুট্ঠো যেন আল়ৰী তেন পক্কামি. অনুপুব্বেন যেন আল়ৰী তদৰসরি. তত্র সুদং আযস্মা মহাকস্সপো আল়ৰিযং ৰিহরতি অগ্গাল়ৰে চেতিযে. অথ খো আযস্মা মহাকস্সপো পুব্বণ্হসমযং নিৰাসেত্ৰা পত্তচীৰরমাদায আল়ৰিং পিণ্ডায পাৰিসি. মনুস্সা আযস্মন্তং মহাকস্সপং পস্সিত্ৰা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং করোন্তি দ্ৰারম্পি থকেন্তি. অথ খো আযস্মা মহাকস্সপো আল়ৰিযং পিণ্ডায চরিত্ৰা পচ্ছাভত্তং পিণ্ডপাতপ্পটিক্কন্তো ভিক্খূ আমন্তেসি – ‘‘পুব্বাযং, আৰুসো, আল়ৰী সুভিক্খা অহোসি সুলভপিণ্ডা সুকরা উঞ্ছেন পগ্গহেন যাপেতুং; এতরহি পনাযং আল়ৰী দুব্ভিক্খা দুল্লভপিণ্ডা, ন সুকরা উঞ্ছেন পগ্গহেন যাপেতুং. কো নু খো, আৰুসো, হেতু কো পচ্চযো, যেনাযং আল়ৰী দুব্ভিক্খা দুল্লভপিণ্ডা, ন সুকরা উঞ্ছেন পগ্গহেন যাপেতু’’ন্তি? অথ খো তে ভিক্খূ আযস্মতো মহাকস্সপস্স এতমত্থং আরোচেসুং.

৩৪৩. অথ খো ভগৰা রাজগহে যথাভিরন্তং ৰিহরিত্ৰা যেন আল়ৰী তেন চারিকং পক্কামি. অনুপুব্বেন চারিকং চরমানো যেন আল়ৰী তদৰসরি. তত্র সুদং ভগৰা আল়ৰিযং ৰিহরতি অগ্গাল়ৰে চেতিযে. অথ খো আযস্মা মহাকস্সপো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা মহাকস্সপো ভগৰতো এতমত্থং আরোচেসি. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আল়ৰকে ভিক্খূ পটিপুচ্ছি – ‘‘সচ্চং কির তুম্হে, ভিক্খৰে, সঞ্ঞাচিকাযো কুটিযো কারাপেথ অস্সামিকাযো অত্তুদ্দেসিকাযো অপ্পমাণিকাযো. তাযো ন নিট্ঠানং গচ্ছন্তি. তে তুম্হে যাচনবহুলা ৰিঞ্ঞত্তিবহুলা ৰিহরথ – ‘পুরিসং দেথ পুরিসত্থকরং দেথ…পে… তিণং দেথ মত্তিকং দেথা’তি. মনুস্সা উপদ্দুতা যাচনায উপদ্দুতা ৰিঞ্ঞত্তিযা ভিক্খূ দিস্ৰা উব্বিজ্জন্তিপি উত্তসন্তিপি পলাযন্তিপি অঞ্ঞেনপি গচ্ছন্তি অঞ্ঞেনপি মুখং করোন্তি দ্ৰারম্পি থকেন্তি, গাৰিম্পি দিস্ৰা পলাযন্তি ভিক্খূতি মঞ্ঞমানা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম তুম্হে, মোঘপুরিসা, সংযাচিকাযো কুটিযো কারাপেস্সথ অস্সামিকাযো অত্তুদ্দেসিকাযো অপ্পমাণিকাযো! তাযো ন নিট্ঠানং গচ্ছন্তি. তে তুম্হে যাচনবহুলা ৰিঞ্ঞত্তিবহুলা ৰিহরিস্সথ – ‘পুরিসং দেথ পুরিসত্থকরং দেথ…পে… তিণং দেথ মত্তিকং দেথা’তি! নেতং মোঘপুরিসা, অপ্পসন্নানং ৰা পসাদায…পে…’’ ৰিগরহিত্ৰা ধম্মিং কথং কত্ৰা ভিক্খূ আমন্তেসি –

৩৪৪. ‘‘ভূতপুব্বং, ভিক্খৰে, দ্ৰে ভাতরো ইসযো গঙ্গং নদিং উপনিস্সায ৰিহরিংসু. অথ খো, ভিক্খৰে, মণিকণ্ঠো নাগরাজা গঙ্গং নদিং উত্তরিত্ৰা যেন কনিট্ঠো ইসি তেনুপসঙ্কমি; উপসঙ্কমিত্ৰা কনিট্ঠং ইসিং সত্তক্খত্তুং ভোগেহি পরিক্খিপিত্ৰা উপরিমুদ্ধনি মহন্তং ফণং করিত্ৰা অট্ঠাসি. অথ খো, ভিক্খৰে, কনিট্ঠো ইসি তস্স নাগস্স ভযা কিসো অহোসি লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো. অদ্দস খো, ভিক্খৰে, জেট্ঠো ইসি কনিট্ঠং ইসিং কিসং লূখং দুব্বণ্ণং উপ্পণ্ডুপ্পণ্ডুকজাতং ধমনিসন্থতগত্তং. দিস্ৰান কনিট্ঠং ইসিং এতদৰোচ – ‘‘কিস্স ত্ৰং, ভো, কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি? ‘‘ইধ, ভো, মণিকণ্ঠো নাগরাজা গঙ্গং নদিং উত্তরিত্ৰা যেনাহং তেনুপসঙ্কমি; উপসঙ্কমিত্ৰা মং সত্তক্খত্তুং ভোগেহি পরিক্খিপিত্ৰা উপরিমুদ্ধনি মহন্তং ফণং করিত্ৰা অট্ঠাসি. তস্সাহং, ভো, নাগস্স ভযা [ভযাম্হি (সী.)] কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি. ‘‘ইচ্ছসি পন ত্ৰং, ভো, তস্স নাগস্স অনাগমন’’ন্তি? ‘‘ইচ্ছামহং, ভো, তস্স নাগস্স অনাগমন’’ন্তি. ‘‘অপি পন ত্ৰং, ভো, তস্স নাগস্স কিঞ্চি পস্সসী’’তি? ‘‘পস্সামহং, ভো, মণিমস্স [মণিস্স (সী. ক.)] কণ্ঠে পিলন্ধন’’ন্তি. ‘‘তেন হি ত্ৰং, ভো, তং নাগং মণিং যাচ – ‘মণিং মে, ভো, দেহি; মণিনা মে অত্থো’’’তি.

অথ খো, ভিক্খৰে, মণিকণ্ঠো নাগরাজা গঙ্গং নদিং উত্তরিত্ৰা যেন কনিট্ঠো ইসি তেনুপসঙ্কমি; উপসঙ্কমিত্ৰা একমন্তং অট্ঠাসি. একমন্তং ঠিতং খো, ভিক্খৰে, মণিকণ্ঠং নাগরাজানং কনিট্ঠো ইসি এতদৰোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৰে, মণিকণ্ঠো নাগরাজা – ‘ভিক্খু মণিং যাচতি, ভিক্খুস্স মণিনা অত্থো’তি খিপ্পঞ্ঞেৰ অগমাসি. দুতিযম্পি খো, ভিক্খৰে, মণিকণ্ঠো নাগরাজা গঙ্গং নদিং উত্তরিত্ৰা যেন কনিট্ঠো ইসি তেনুপসঙ্কমি. অদ্দস খো, ভিক্খৰে, কনিট্ঠো ইসি মণিকণ্ঠং নাগরাজানং দূরতোৰ আগচ্ছন্তং. দিস্ৰান মণিকণ্ঠং নাগরাজানং এতদৰোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৰে, মণিকণ্ঠো নাগরাজা – ‘‘ভিক্খু মণিং যাচতি, ভিক্খুস্স মণিনা অত্থো’’তি ততোৰ পটিনিৰত্তি. ততিযম্পি খো, ভিক্খৰে, মণিকণ্ঠো নাগরাজা গঙ্গং নদিং উত্তরতি. অদ্দস খো, ভিক্খৰে, কনিট্ঠো ইসি মণিকণ্ঠং নাগরাজানং গঙ্গং নদিং উত্তরন্তং. দিস্ৰান মণিকণ্ঠং নাগরাজানং এতদৰোচ – ‘‘মণিং মে, ভো, দেহি; মণিনা মে অত্থো’’তি. অথ খো, ভিক্খৰে, মণিকণ্ঠো নাগরাজা কনিট্ঠং ইসিং গাথাহি অজ্ঝভাসি –

[জা. ১.৩.৭ মণিকণ্ঠজাতকেপি] ‘‘মমন্নপানং ৰিপুলং উল়ারং,

উপ্পজ্জতীমস্স মণিস্স হেতু;

তং তে ন দস্সং অতিযাচকোসি;

ন চাপি তে অস্সমমাগমিস্সং.

[জা. ১.৩.৮ মণিকণ্ঠজাতকেপি] ‘‘সুসূ যথা সক্খরধোতপাণী;

তাসেসি মং সেলমাযাচমানো;

তং তে ন দস্সং অতিযাচকোসি;

ন চাপি তে অস্সমমাগমিস্স’’ন্তি.

অথ খো, ভিক্খৰে, মণিকণ্ঠো নাগরাজা – ‘‘ভিক্খু মণিং যাচতি, ভিক্খুস্স মণিনা অত্থো’’তি পক্কামি. তথা পক্কন্তোৰ [তদাপক্কন্তোৰ (ক.)] অহোসি, ন পুন পচ্চাগঞ্ছি. অথ খো, ভিক্খৰে, কনিট্ঠো ইসি তস্স নাগস্স দস্সনীযস্স অদস্সনেন ভিয্যোসোমত্তায কিসো অহোসি লূখো দুব্বণ্ণো, উপ্পণ্ডুপ্পণ্ডুকজাতো ধমনিসন্থতগত্তো. অদ্দস খো, ভিক্খৰে, জেট্ঠো ইসি কনিট্ঠং ইসিং ভিয্যোসোমত্তায কিসং লূখং দুব্বণ্ণং উপ্পণ্ডুপ্পণ্ডুকজাতং ধমনিসন্থতগত্তং. দিস্ৰান কনিট্ঠং ইসিং এতদৰোচ – ‘‘কিস্স ত্ৰং, ভো, ভিয্যোসোমত্তায কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি? ‘‘তস্সাহং, ভো, নাগস্স দস্সনীযস্স অদস্সনেন ভিয্যোসোমত্তায কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি. অথ খো, ভিক্খৰে, জেট্ঠো ইসি কনিট্ঠং ইসিং গাথায অজ্ঝভাসি –

[জা. ১.৩.৯ মণিকণ্ঠজাতকেপি] ‘‘ন তং যাচে যস্স পিযং জিগীসে,

ৰিদেস্সো [দেস্সো (সী.), দেস্সো চ (স্যা.)] হোতি অতিযাচনায;

নাগো মণিং যাচিতো ব্রাহ্মণেন;

অদস্সনঞ্ঞেৰ তদজ্ঝগমা’’তি.

তেসঞ্হি নাম, ভিক্খৰে, তিরচ্ছানগতানং পাণানং অমনাপা ভৰিস্সতি যাচনা অমনাপা ৰিঞ্ঞত্তি. কিমঙ্গং [কিমঙ্গ (সী.)] পন মনুস্সভূতানং!

৩৪৫. ‘‘ভূতপুব্বং, ভিক্খৰে, অঞ্ঞতরো ভিক্খু হিমৰন্তপস্সে ৰিহরতি অঞ্ঞতরস্মিং ৰনসণ্ডে. তস্স খো, ভিক্খৰে, ৰনসণ্ডস্স অৰিদূরে মহন্তং নিন্নং পল্ললং. অথ খো,

ৰাসায উপগচ্ছতি. অথ খো, ভিক্খৰে, সো ভিক্খু তস্স সকুণসঙ্ঘস্স সদ্দেন উব্বাল়্হো যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং নিসীদি. একমন্তং নিসিন্নং খো অহং, ভিক্খৰে, তং ভিক্খুং এতদৰোচ – ‘কচ্চি, ভিক্খু, খমনীযং কচ্চি যাপনীযং কচ্চিসি অপ্পকিলমথেন অদ্ধানং আগতো? কুতো চ ত্ৰং, ভিক্খু, আগচ্ছসী’তি? ‘খমনীযং, ভগৰা, যাপনীযং, ভগৰা. অপ্পকিলমথেন চাহং, ভন্তে, অদ্ধানং আগতো. অত্থি, ভন্তে, হিমৰন্তপস্সে মহাৰনসণ্ডো. তস্স খো পন, ভন্তে, ৰনসণ্ডস্স অৰিদূরে মহন্তং নিন্নং পল্ললং. অথ খো, ভন্তে, মহাসকুণসঙ্ঘো তস্মিং পল্ললে দিৰসং গোচরং চরিত্ৰা সাযং তং ৰনসণ্ডং ৰাসায উপগচ্ছতি. ততো অহং, ভগৰা, আগচ্ছামি – তস্স সকুণসঙ্ঘস্স সদ্দেন উব্বাল়্হো’তি. ‘ইচ্ছসি পন ত্ৰং, ভিক্খু, তস্স সকুণসঙ্ঘস্স অনাগমন’ন্তি? ‘ইচ্ছামহং, ভগৰা, তস্স সকুণসঙ্ঘস্স অনাগমন’ন্তি. ‘তেন হি ত্ৰং, ভিক্খু, তত্থ গন্ত্ৰা তং ৰনসণ্ডং অজ্ঝোগাহেত্ৰা রত্তিযা পঠমং যামং তিক্খত্তুং সদ্দমনুস্সাৰেহি – সুণন্তু মে, ভোন্তো সকুণা, যাৰতিকা ইমস্মিং ৰনসণ্ডে ৰাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. রত্তিযা মজ্ঝিমং যামং… রত্তিযা পচ্ছিমং যামং তিক্খত্তুং সদ্দমনুস্সাৰেহি – ‘সুণন্তু মে, ভোন্তো সকুণা, যাৰতিকা ইমস্মিং ৰনসণ্ডে ৰাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি.

‘‘অথ খো, ভিক্খৰে, সো ভিক্খু তত্থ গন্ত্ৰা তং ৰনসণ্ডং অজ্ঝোগাহেত্ৰা রত্তিযা পঠমং যামং তিক্খত্তুং সদ্দমনুস্সাৰেসি – ‘সুণন্তু মে, ভোন্তো সকুণা, যাৰতিকা ইমস্মিং ৰনসণ্ডে ৰাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. রত্তিযা মজ্ঝিম যামং… রত্তিযা পচ্ছিমং যামং তিক্খত্তুং সদ্দমনুস্সাৰেসি – ‘সুণন্তু মে, ভোন্তো সকুণা, যাৰতিকা ইমস্মিং ৰনসণ্ডে ৰাসং উপগতা, পত্তেন মে অত্থো. একেকং মে, ভোন্তো, পত্তং দদন্তূ’তি. অথ খো, ভিক্খৰে, সো সকুণসঙ্ঘো – ‘ভিক্খু পত্তং যাচতি ভিক্খুস্স পত্তেন অত্থো’তি তম্হা ৰনসণ্ডা পক্কামি. তথা পক্কন্তোৰ অহোসি ন পুন পচ্চাগঞ্ছি. তেসঞ্হি নাম, ভিক্খৰে, তিরচ্ছানগতানং পাণানং অমনাপা ভৰিস্সতি যাচনা অমনাপা ৰিঞ্ঞত্তি. কিমঙ্গং পন মনুস্সভূতানং’’!

৩৪৬. ‘‘ভূতপুব্বং, ভিক্খৰে, রট্ঠপালস্স কুলপুত্তস্স পিতা রট্ঠপালং কুলপুত্তং গাথায অজ্ঝভাসি –

‘অপাহং তে ন জানামি, রট্ঠপাল বহূ জনা;

[জা. ১.৭.৫৪] তে মং সঙ্গম্ম যাচন্তি, কস্মা মং ত্ৰং ন যাচসী’তি.

[জা. ১.৭.৫৫] ‘যাচকো অপ্পিযো হোতি, যাচং অদদমপ্পিযো;

তস্মাহং তং ন যাচামি, মা মে ৰিদেস্সনা অহূ’তি.

‘‘সো হি নাম, ভিক্খৰে, রট্ঠপালো কুলপুত্তো সকং পিতরং এৰং ৰক্খতি. কিমঙ্গং পন জনো জনং!

৩৪৭. ‘‘গিহীনং, ভিক্খৰে, দুস্সংহরানি ভোগানি সম্ভতানিপি দুরক্খিযানি. তত্থ নাম তুম্হে, মোঘপুরিসা, এৰং দুস্সংহরেসু ভোগেসু সম্ভতেসুপি দুরক্খিযেসু যাচনবহুলা ৰিঞ্ঞত্তিবহুলা ৰিহরিস্সথ – ‘পুরিসং দেথ, পুরিসত্থকরং দেথ, গোণং দেথ, সকটং দেথ, ৰাসিং দেথ, পরসুং দেথ, কুঠারিং দেথ, কুদালং দেথ, নিখাদনং দেথ, ৰল্লিং দেথ, ৰেল়ুং দেথ, মুঞ্জং দেথ, পব্বজং দেথ, তিণং দেথ, মত্তিকং দেথা’’তি! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৪৮. ‘‘সঞ্ঞাচিকায পন ভিক্খুনা কুটিং কারযমানেন অস্সামিকং অত্তুদ্দেসং পমাণিকা কারেতব্বা. তত্রিদং পমাণং – দীঘসো দ্ৰাদস ৰিদত্থিযো, সুগতৰিদত্থিযা; তিরিযং সত্তন্তরা. ভিক্খূ অভিনেতব্বা ৰত্থুদেসনায. তেহি ভিক্খূহি ৰত্থু দেসেতব্বং – অনারম্ভং [অনারব্ভং (ক.)] সপরিক্কমনং. সারম্ভে [সারব্ভে (ক.)] চে ভিক্খু ৰত্থুস্মিং অপরিক্কমনে সঞ্ঞাচিকায কুটিং কারেয্য, ভিক্খূ ৰা অনভিনেয্য ৰত্থুদেসনায, পমাণং ৰা অতিক্কামেয্য, সঙ্ঘাদিসেসো’’তি.

৩৪৯. সঞ্ঞাচিকা নাম সযং যাচিত্ৰা পুরিসম্পি পুরিসত্থকরম্পি গোণম্পি সকটম্পি ৰাসিম্পি পরসুম্পি কুঠারিম্পি কুদালম্পি নিখাদনম্পি ৰল্লিম্পি ৰেল়ুম্পি মুঞ্জম্পি পব্বজম্পি তিণম্পি মত্তিকম্পি.

কুটি নাম উল্লিত্তা ৰা হোতি অৰলিত্তা ৰা উল্লিত্তাৰলিত্তা ৰা.

কারযমানেনাতি করোন্তো ৰা কারাপেন্তো ৰা.

অস্সামিকন্তি ন অঞ্ঞো কোচি সামিকো হোতি, ইত্থী ৰা পুরিসো ৰা গহট্ঠো ৰা পব্বজিতো ৰা.

অত্তুদ্দেসন্তি অত্তনো অত্থায.

পমাণিকা কারেতব্বা. তত্রিদং পমাণং – দীঘসো দ্ৰাদস ৰিদত্থিযো, সুগতৰিদত্থিযাতি বাহিরিমেন মানেন.

তিরিযং সত্তন্তরাতি অব্ভন্তরিমেন মানেন.

ভিক্খূ অভিনেতব্বা ৰত্থুদেসনাযাতি তেন কুটিকারকেন ভিক্খুনা কুটিৰত্থুং সোধেত্ৰা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, সঞ্ঞাচিকায কুটিং কত্তুকামো অস্সামিকং অত্তুদ্দেসং. সোহং, ভন্তে, সঙ্ঘং কুটিৰত্থুওলোকনং যাচামী’’তি. দুতিযম্পি যাচিতব্বা. ততিযম্পি যাচিতব্বা. সচে সব্বো সঙ্ঘো উস্সহতি কুটিৰত্থুং ওলোকেতুং, সব্বেন সঙ্ঘেন ওলোকেতব্বং. নো চে সব্বো সঙ্ঘো উস্সহতি কুটিৰত্থুং ওলোকেতুং, যে তত্থ হোন্তি ভিক্খূ ব্যত্তা পটিবলা সারম্ভং অনারম্ভং সপরিক্কমনং অপরিক্কমনং জানিতুং তে যাচিত্ৰা সম্মন্নিতব্বা. এৰঞ্চ পন, ভিক্খৰে, সম্মন্নিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৫০. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৰত্থুওলোকনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নেয্য ইত্থন্নামস্স ভিক্খুনো কুটিৰত্থুং ওলোকেতুং. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৰত্থুওলোকনং যাচতি. সঙ্ঘো ইত্থন্নামঞ্চ ইত্থন্নামঞ্চ ভিক্খূ সম্মন্নতি ইত্থন্নামস্স ভিক্খুনো কুটিৰত্থুং ওলোকেতুং. যস্সাযস্মতো খমতি ইত্থন্নামস্স চ ইত্থন্নামস্স চ ভিক্খূনং সম্মুতি [সম্মতি (স্যা.)] ইত্থন্নামস্স ভিক্খুনো কুটিৰত্থুং ওলোকেতুং, সো তুণ্হস্স; যস্স নক্খমতি, সো ভাসেয্য.

‘‘সম্মতা সঙ্ঘেন ইত্থন্নামো চ ইত্থন্নামো চ ভিক্খূ ইত্থন্নামস্স ভিক্খুনো কুটিৰত্থুং ওলোকেতুং. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৫১. তেহি সম্মতেহি ভিক্খূহি তত্থ গন্ত্ৰা কুটিৰত্থু ওলোকেতব্বং, সারম্ভং অনারম্ভং সপরিক্কমনং অপরিক্কমনং জানিতব্বং. সচে সারম্ভং হোতি অপরিক্কমনং, ‘মা ইধ করী’তি ৰত্তব্বো. সচে অনারম্ভং হোতি সপরিক্কমনং, সঙ্ঘস্স আরোচেতব্বং – ‘অনারম্ভং সপরিক্কমন’ন্তি. তেন কুটিকারকেন ভিক্খুনা সঙ্ঘং উপসঙ্কমিত্ৰা একংসং উত্তরাসঙ্গং করিত্ৰা ৰুড্ঢানং ভিক্খূনং পাদে ৰন্দিত্ৰা উক্কুটিকং নিসীদিত্ৰা অঞ্জলিং পগ্গহেত্ৰা এৰমস্স ৰচনীযো – ‘‘অহং, ভন্তে, সঞ্ঞাচিকায কুটিং কত্তুকামো অস্সামিকং অত্তুদ্দেসং. সোহং, ভন্তে, সঙ্ঘং কুটিৰত্থুদেসনং যাচামী’’তি. দুতিযম্পি যাচিতব্বা. ততিযম্পি যাচিতব্বা. ব্যত্তেন ভিক্খুনা পটিবলেন সঙ্ঘো ঞাপেতব্বো –

৩৫২. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৰত্থুদেসনং যাচতি. যদি সঙ্ঘস্স পত্তকল্লং, সঙ্ঘো ইত্থন্নামস্স ভিক্খুনো কুটিৰত্থুং দেসেয্য. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু সঞ্ঞাচিকায কুটিং কত্তুকামো অস্সামিকং অত্তুদ্দেসং. সো সঙ্ঘং কুটিৰত্থুদেসনং যাচতি. সঙ্ঘো ইত্থন্নামস্স ভিক্খুনো কুটিৰত্থুং দেসেতি. যস্সাযস্মতো খমতি ইত্থন্নামস্স ভিক্খুনো কুটিৰত্থুস্স দেসনা, সো তুণ্হস্স; যস্স নক্খমতি, সো ভাসেয্য.

‘‘দেসিতং সঙ্ঘেন ইত্থন্নামস্স ভিক্খুনো কুটিৰত্থু. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৩৫৩. সারম্ভং নাম কিপিল্লিকানং ৰা আসযো হোতি, উপচিকানং ৰা আসযো হোতি, উন্দুরানং ৰা আসযো হোতি, অহীনং ৰা আসযো হোতি, ৰিচ্ছিকানং ৰা আসযো হোতি, সতপদীনং ৰা আসযো হোতি, হত্থীনং ৰা আসযো হোতি, অস্সানং ৰা আসযো হোতি, সীহানং ৰা আসযো হোতি, ব্যগ্ঘানং ৰা আসযো হোতি, দীপীনং ৰা আসযো হোতি, অচ্ছানং ৰা আসযো হোতি, তরচ্ছানং ৰা আসযো হোতি, যেসং কেসঞ্চি তিরচ্ছানগতানং পাণানং আসযো হোতি, পুব্বণ্ণনিস্সিতং ৰা হোতি, অপরণ্ণনিস্সিতং ৰা হোতি, অব্ভাঘাতনিস্সিতং ৰা হোতি, আঘাতননিস্সিতং ৰা হোতি, সুসাননিস্সিতং ৰা হোতি, উয্যাননিস্সিতং ৰা হোতি, রাজৰত্থুনিস্সিতং ৰা হোতি, হত্থিসালানিস্সিতং ৰা হোতি, অস্সসালানিস্সিতং ৰা হোতি, বন্ধনাগারনিস্সিতং ৰা হোতি, পানাগারনিস্সিতং ৰা হোতি, সূননিস্সিতং ৰা হোতি, রচ্ছানিস্সিতং ৰা হোতি, চচ্চরনিস্সিতং ৰা হোতি, সভানিস্সিতং ৰা হোতি, সংসরণনিস্সিতং ৰা [সঞ্চরণনিস্সিতং ৰা (ক.)] হোতি. এতং সারম্ভং নাম.

অপরিক্কমনং নাম ন সক্কা হোতি যথাযুত্তেন সকটেন অনুপরিগন্তুং সমন্তা নিস্সেণিযা অনুপরিগন্তুং. এতং অপরিক্কমনং নাম.

অনারম্ভং নাম ন কিপিল্লিকানং ৰা আসযো হোতি, ন উপচিকানং ৰা আসযো হোতি, ন উন্দুরানং ৰা আসযো হোতি, ন অহীনং ৰা আসযো হোতি, ন ৰিচ্ছিকানং ৰা আসযো হোতি, ন সতপদীনং ৰা আসযো হোতি…পে… ন সংসরণনিস্সিতং ৰা হোতি. এতং অনারম্ভং নাম.

সপরিক্কমনং নাম সক্কা হোতি যথাযুত্তেন সকটেন অনুপরিগন্তুং, সমন্তা নিস্সেণিযা অনুপরিগন্তুং. এতং সপরিক্কমনং নাম.

সঞ্ঞাচিকা নাম সযং যাচিত্ৰা পুরিসম্পি পুরিসত্থকরম্পি…পে… মত্তিকম্পি.

কুটি নাম উল্লিত্তা ৰা হোতি ৰা অৰলিত্তা ৰা উল্লিত্তাৰলিত্তা ৰা.

কারেয্যাতি করোতি ৰা কারাপেতি ৰা.

ভিক্খূ ৰা অনভিনেয্য, ৰত্থুদেসনায পমাণং ৰা অতিক্কামেয্যাতি ঞত্তিদুতিযেন কম্মেন কুটিৰত্থুং ন দেসাপেত্ৰা, আযামতো ৰা ৰিত্থারতো ৰা অন্তমসো কেসগ্গমত্তম্পি অতিক্কামেত্ৰা করোতি ৰা কারাপেতি ৰা, পযোগে পযোগে দুক্কটং. একং পিণ্ডং অনাগতে আপত্তি থুল্লচ্চযস্স. তস্মিং পিণ্ডে আগতে আপত্তি সঙ্ঘাদিসেসস্স.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৩৫৪. ভিক্খু কুটিং করোতি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং. ভিক্খু কুটিং করোতি অদেসিতৰত্থুকং সারম্ভং সপরিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং করোতি অদেসিতৰত্থুকং অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং করোতি অদেসিতৰত্থুকং অনারম্ভং সপরিক্কমনং, আপত্তি সঙ্ঘাদিসেসস্স.

৩৫৫. ভিক্খু কুটিং করোতি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং. ভিক্খু কুটিং করোতি দেসিতৰত্থুকং সারম্ভং সপরিক্কমনং, আপত্তি দুক্কটস্স. ভিক্খু কুটিং করোতি দেসিতৰত্থুকং অনারম্ভং অপরিক্কমনং, আপত্তি দুক্কটস্স. ভিক্খু কুটিং করোতি দেসিতৰত্থুকং অনারম্ভং সপরিক্কমনং, অনাপত্তি.

ভিক্খু কুটিং করোতি পমাণাতিক্কন্তং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং. ভিক্খু কুটিং করোতি পমাণাতিক্কন্তং সারম্ভং সপরিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং করোতি পমাণাতিক্কন্তং অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স. ভিক্খু কুটিং করোতি পমাণাতিক্কন্তং অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু কুটিং করোতি পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং. ভিক্খু কুটিং করোতি পমাণিকং সারম্ভং সপরিক্কমনং, আপত্তি দুক্কটস্স. ভিক্খু কুটিং করোতি পমাণিকং অনারম্ভং অপরিক্কমনং, আপত্তি দুক্কটস্স. ভিক্খু কুটিং করোতি পমাণিকং অনারম্ভং সপরিক্কমনং, অনাপত্তি.

ভিক্খু কুটিং করোতি অদেসিতৰত্থুকং পমাণাতিক্কন্তং সারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দ্ৰিন্নং দুক্কটানং. ভিক্খু কুটিং করোতি অদেসিতৰত্থুকং পমাণাতিক্কন্তং সারম্ভং সপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স. ভিক্খু কুটিং করোতি অদেসিতৰত্থুকং পমাণাতিক্কন্তং অনারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স. ভিক্খু কুটিং করোতি অদেসিতৰত্থুকং পমাণাতিক্কন্তং অনারম্ভং সপরিক্কমনং, আপত্তি দ্ৰিন্নং সঙ্ঘাদিসেসানং.

ভিক্খু কুটিং করোতি দেসিতৰত্থুকং পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং. ভিক্খু কুটিং করোতি দেসিতৰত্থুকং পমাণিকং সারম্ভং সপরিক্কমনং, আপত্তি দুক্কটস্স. ভিক্খু কুটিং করোতি দেসিতৰত্থুকং পমাণিকং অনারম্ভং অপরিক্কমনং, আপত্তি দুক্কটস্স. ভিক্খু কুটিং করোতি দেসিতৰত্থুকং পমাণিকং অনারম্ভং সপরিক্কমনং, অনাপত্তি.

৩৫৬. ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি পমাণাতিক্কন্তং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি দ্ৰিন্নং সঙ্ঘাদিসেসানং.

ভিক্খু সমাদিসতি – ‘‘কুটিং মে করোথা’’তি. তস্স কুটিং করোন্তি দেসিতৰত্থুকং পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৫৭. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণাতিক্কন্তং সারম্ভং অপরিক্কমনং, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স …পে… অনারম্ভং সপরিক্কমনং, আপত্তি দ্ৰিন্নং সঙ্ঘাদিসেসানং.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. ন চ সমাদিসতি – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং পমাণিকং সারম্ভং অপরিক্কমনং, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৫৮. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং সারম্ভং অপরিক্কমনং. সো সুণাতি – ‘‘কুটি কির মে কযিরতি অদেসিতৰত্থুকা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং সারম্ভং সপরিক্কমনং. সো সুণাতি – ‘‘কুটি কির মে কযিরতি অদেসিতৰত্থুকা সারম্ভা সপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকা চ হোতু অনারম্ভা চা’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং অনারম্ভং অপরিক্কমনং. সো সুণাতি – ‘‘কুটি কির মে কযিরতি অদেসিতৰত্থুকা অনারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকা চ হোতু সপরিক্কমনা চা’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং অনারম্ভং সপরিক্কমনং. সো সুণাতি – ‘‘কুটি কির মে কযিরতি অদেসিতৰত্থুকা অনারম্ভা সপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকা হোতূ’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং সারম্ভং অপরিক্কমনং. সো সুণাতি – ‘‘কুটি কির মে কযিরতি দেসিতৰত্থুকা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘অনারম্ভা চ হোতু সপরিক্কমনা চা’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং সারম্ভং সপরিক্কমনং. সো সুণাতি – ‘‘কুটি কির মে কযিরতি দেসিতৰত্থুকা সারম্ভা সপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘অনারম্ভা হোতূ’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং অনারম্ভং অপরিক্কমনং. সো সুণাতি – ‘‘কুটি কির মে কযিরতি দেসিতৰত্থুকা অনারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘সপরিক্কমনা হোতূ’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং অনারম্ভং সপরিক্কমনং, অনাপত্তি.

৩৫৯. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণাতিক্কন্তং সারম্ভং অপরিক্কমনং. সো সুণাতি – ‘‘কুটি কির মে কযিরতি পমাণাতিক্কন্তা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘পমাণিকা চ হোতু অনারম্ভা চ সপরিক্কমনা চা’’তি…পে… ‘‘পমাণিকা চ হোতু অনারম্ভা চা’’তি…পে… ‘‘পমাণিকা চ হোতু সপরিক্কমনা চা’’তি…পে… ‘‘পমাণিকা হোতূ’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণিকং সারম্ভং অপরিক্কমনং. সো সুণাতি – ‘‘কুটি কির মে কযিরতি পমাণিকা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘অনারম্ভা চ হোতু সপরিক্কমনা চা’’তি…পে… ‘‘অনারম্ভা হোতূ’’তি…পে… ‘‘সপরিক্কমনা হোতূ’’তি…পে… অনাপত্তি.

৩৬০. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং. সো সুণাতি – ‘‘কুটি কির মে কযিরতি অদেসিতৰত্থুকা পমাণাতিক্কন্তা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি…পে… ‘‘দেসিতৰত্থুকা চ হোতু পমাণিকা চ অনারম্ভা চা’’তি…পে… ‘‘দেসিতৰত্থুকা চ হোতু পমাণিকা চ সপরিক্কমনা চা’’তি…পে… ‘‘দেসিতৰত্থুকা চ হোতু পমাণিকা চা’’তি. নো চে সামং ৰা গচ্ছেয্য দূতং ৰা পহিণেয্য, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং পমাণিকং সারম্ভং অপরিক্কমনং. সো সুণাতি – ‘‘কুটি কির মে কযিরতি দেসিতৰত্থুকা পমাণিকা সারম্ভা অপরিক্কমনা’’তি. তেন ভিক্খুনা সামং ৰা গন্তব্বং দূতো ৰা পাহেতব্বো – ‘‘অনারম্ভা চ হোতু সপরিক্কমনা চা’’তি…পে… ‘‘অনারম্ভা হোতূ’’তি…পে… ‘‘সপরিক্কমনা হোতূ’’তি…পে… অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং সারম্ভং অপরিক্কমনং, আপত্তি কারুকানং তিণ্ণং দুক্কটানং…পে… সারম্ভং সপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং সপরিক্কমনং, আপত্তি কারুকানং দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং সারম্ভং অপরিক্কমনং, আপত্তি কারুকানং দ্ৰিন্নং দুক্কাটনং…পে… সারম্ভং সপরিক্কমনং, আপত্তি কারুকানং দুক্কটস্স…পে… অনারম্ভং অপরিক্কমনং, আপত্তি কারুকানং দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণাতিক্কন্তং সারম্ভং অপরিক্কমনং, আপত্তি কারুকানং তিণ্ণং দুক্কটানং…পে… সারম্ভং সপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… অনারম্ভং সপরিক্কমনং আপত্তি কারুকানং দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘পমাণিকা চ হোতু অনারম্ভা চ সপরিক্কমনা চা’’তি. তস্স কুটিং করোন্তি পমাণিকং সারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… সারম্ভং সপরিক্কমনং, আপত্তি কারুকানং দুক্কটস্স…পে… অনারম্ভং অপরিক্কমনং, আপত্তি কারুকানং দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং, আপত্তি কারুকানং চতুন্নং দুক্কটানং…পে… সারম্ভং সপরিক্কমনং, আপত্তি কারুকানং তিণ্ণং দুক্কটানং…পে… অনারম্ভং অপরিক্কমনং, আপত্তি কারুকানং তিণ্ণং দুক্কটানং…পে… অনারম্ভং সপরিক্কমনং, আপত্তি কারুকানং দ্ৰিন্নং দুক্কটানং.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. সমাদিসতি চ – ‘‘দেসিতৰত্থুকা চ হোতু পমাণিকা চ অনারম্ভা চ সপরিক্কমনা চা’’তি. তস্স কুটিং করোন্তি দেসিতৰত্থুকং পমাণিকং সারম্ভং অপরিক্কমনং, আপত্তি কারুকানং দ্ৰিন্নং দুক্কটানং…পে… সারম্ভং সপরিক্কমনং, আপত্তি কারুকানং দুক্কটস্স…পে… অনারম্ভং অপরিক্কমনং, আপত্তি কারুকানং দুক্কটস্স…পে… অনারম্ভং সপরিক্কমনং, অনাপত্তি.

৩৬১. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি সঙ্ঘাদিসেসেন দ্ৰিন্নং দুক্কটানং.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং সারম্ভং সপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং…পে… আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং…পে… আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি দেসিতৰত্থুকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

৩৬২. ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি পমাণাতিক্কন্তং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি সঙ্ঘাদিসেসস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি পমাণিকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি দ্ৰিন্নং দুক্কটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স…পে… অনারম্ভং সপরিক্কমনং, অনাপত্তি.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি অদেসিতৰত্থুকং পমাণাতিক্কন্তং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি দ্ৰিন্নং সঙ্ঘাদিসেসেন দ্ৰিন্নং দুক্কটানং…পে… সারম্ভং সপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স…পে… অনারম্ভং অপরিক্কমনং, আপত্তি দ্ৰিন্নং সঙ্ঘাদিসেসেন দুক্কটস্স…পে… অনারম্ভং সপরিক্কমনং, আপত্তি দ্ৰিন্নং সঙ্ঘাদিসেসানং.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি দেসিতৰত্থুকং পমাণিকং সারম্ভং অপরিক্কমনং. সো চে ৰিপ্পকতে আগচ্ছতি, তেন ভিক্খুনা সা কুটি অঞ্ঞস্স ৰা দাতব্বা ভিন্দিত্ৰা ৰা পুন কাতব্বা. নো চে অঞ্ঞস্স ৰা দদেয্য ভিন্দিত্ৰা ৰা পুন কারেয্য, আপত্তি দ্ৰিন্নং দুক্কাটানং…পে… সারম্ভং সপরিক্কমনং, আপত্তি দুক্কটস্স…পে… অনারম্ভং অপরিক্কমনং, আপত্তি দুক্কটস্স.

ভিক্খু সমাদিসিত্ৰা পক্কমতি – ‘‘কুটিং মে করোথা’’তি. তস্স কুটিং করোন্তি দেসিতৰত্থুকং পমাণিকং অনারম্ভং সপরিক্কমনং, অনাপত্তি.

৩৬৩. অত্তনা ৰিপ্পকতং অত্তনা পরিযোসাপেতি, আপত্তি সঙ্ঘাদিসেসস্স.

অত্তনা ৰিপ্পকতং পরেহি পরিযোসাপেতি [পরিযোসাৰাপেতি (ক.)], আপত্তি সঙ্ঘাদিসেসস্স.

পরেহি ৰিপ্পকতং অত্তনা পরিযোসাপেতি, আপত্তি সঙ্ঘাদিসেসস্স.

পরেহি ৰিপ্পকতং পরেহি পরিযোসাপেতি [পরিযোসাৰাপেতি (ক.)], আপত্তি সঙ্ঘাদিসেসস্স.

৩৬৪. অনাপত্তি লেণে গুহায তিণকুটিকায অঞ্ঞস্সত্থায ৰাসাগারং ঠপেত্ৰা সব্বত্থ, অনাপত্তি উম্মত্তকস্স আদিকম্মিকস্সাতি.

কুটিকারসিক্খাপদং নিট্ঠিতং ছট্ঠং.