৫. সঞ্চরিত্তসিক্খাপদং

২৯৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী সাৰত্থিযং কুলূপকো হোতি. বহুকানি কুলানি উপসঙ্কমতি. যত্থ পস্সতি কুমারকং ৰা অপজাপতিকং, কুমারিকং ৰা অপতিকং, কুমারকস্স মাতাপিতূনং সন্তিকে কুমারিকায ৰণ্ণং ভণতি – ‘‘অমুকস্স কুলস্স কুমারিকা অভিরূপা দস্সনীযা পাসাদিকা পণ্ডিতা ব্যত্তা মেধাৰিনী দক্খা অনলসা. ছন্না সা কুমারিকা ইমস্স কুমারকস্সা’’তি. তে এৰং ৰদন্তি – ‘‘এতে খো, ভন্তে, অম্হে ন জানন্তি – ‘কে ৰা ইমে কস্স ৰা’তি. সচে, ভন্তে, অয্যো দাপেয্য আনেয্যাম মযং তং কুমারিকং ইমস্স কুমারকস্সা’’তি. কুমারিকায মাতাপিতূনং সন্তিকে কুমারকস্স ৰণ্ণং ভণতি – ‘‘অমুকস্স কুলস্স কুমারকো অভিরূপো দস্সনীযো পাসাদিকো পণ্ডিতো ব্যত্তো মেধাৰী দক্খো অনলসো. ছন্নাযং কুমারিকা তস্স কুমারকস্সা’’তি [ছন্নো সো কুমারকো ইমিস্সা কুমারিকাযাতি (স্যা.)]. তে এৰং ৰদন্তি – ‘‘এতে খো, ভন্তে, অম্হে ন জানন্তি – ‘কে ৰা ইমে কস্স ৰা’তি, কিস্মিং ৰিয কুমারিকায ৰত্তুং. সচে, ভন্তে, অয্যো যাচাপেয্য দজ্জেয্যাম মযং ইমং কুমারিকং তস্স কুমারকস্সা’’তি. এতেনেৰ উপাযেন আৰাহানিপি কারাপেতি, ৰিৰাহানিপি কারাপেতি, ৰারেয্যানিপি কারাপেতি.

২৯৭. তেন খো পন সমযেন অঞ্ঞতরিস্সা পুরাণগণকিযা ধীতা অভিরূপা হোতি দস্সনীযা পাসাদিকা. তিরোগামকা আজীৰকসাৰকা আগন্ত্ৰা তং গণকিং এতদৰোচুং – ‘‘দেহায্যে, ইমং কুমারিকং অম্হাকং কুমারকস্সা’’তি. সা এৰমাহ – ‘‘অহং খ্ৰয্যো [খ্ৰয্যা (স্যা.), খ্ৰায্যো (ক.)] তুম্হে ন জানামি – ‘কে ৰা ইমে কস্স ৰা’তি. অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি. মনুস্সা তে আজীৰকসাৰকে এতদৰোচুং – ‘‘কিস্স তুম্হে, অয্যো, আগতত্থা’’তি? ‘‘ইধ মযং, অয্যো, অমুকং নাম গণকিং ধীতরং যাচিম্হা অম্হাকং কুমারকস্স. সা এৰমাহ – ‘অহং, খ্ৰয্যো তুম্হে ন জানামি – কে ৰা ইমে কস্স ৰা’তি. অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি. ‘‘কিস্স তুম্হে, অয্যো, তং গণকিং ধীতরং যাচিত্থ? ননু অয্যো উদাযী ৰত্তব্বো. অয্যো উদাযী দাপেস্সতী’’তি.

অথ খো তে আজীৰকসাৰকা যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইধ মযং, ভন্তে, অমুকং নাম গণকিং ধীতরং যাচিম্হা অম্হাকং কুমারকস্স. সা এৰমাহ – ‘অহং খ্ৰয্যো তুম্হে ন জানামি – কে ৰা ইমে কস্স ৰাতি. অযঞ্চ মে একধীতিকা, তিরোগামো চ গন্তব্বো, নাহং দস্সামী’তি. সাধু, ভন্তে, অয্যো তং গণকিং ধীতরং দাপেতু অম্হাকং কুমারকস্সা’’তি. অথ খো আযস্মা উদাযী যেন সা গণকী তেনুপসঙ্কমি; উপসঙ্কমিত্ৰা তং গণকিং এতদৰোচ – ‘‘কিস্সিমেসং ধীতরং ন দেসী’’তি? ‘‘অহং খ্ৰয্য, ইমে ন জানামি – ‘কে ৰা ইমে কস্স ৰা’তি. অযঞ্চ মে একধীতিকা, তিরোগামো চ গন্তব্বো, নাহং দস্সামী’’তি. ‘‘দেহিমেসং. অহং ইমে জানামী’’তি. ‘‘সচে, ভন্তে, অয্যো জানাতি, দস্সামী’’তি. অথ খো সা গণকী তেসং আজীৰকসাৰকানং ধীতরং অদাসি. অথ খো তে আজীৰকসাৰকা তং কুমারিকং নেত্ৰা মাসংযেৰ সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি.

অথ খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৰ মং সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. অথ খো সা গণকী যেন তে আজীৰকসাৰকা তেনুপসঙ্কমি; উপসঙ্কমিত্ৰা তে আজীৰকসাৰকে এতদৰোচ – ‘‘মায্যো, ইমং কুমারিকং দাসিভোগেন ভুঞ্জিত্থ. সুণিসভোগেন ইমং কুমারিকং ভুঞ্জথা’’তি. তে এৰমাহংসু – ‘‘নত্থম্হাকং তযা সদ্ধিং আহারূপহারো, সমণেন সদ্ধিং অম্হাকং আহারূপহারো. গচ্ছ ত্ৰং. ন মযং তং জানামা’’তি. অথ খো সা গণকী তেহি আজীৰকসাৰকেহি অপসাদিতা পুনদেৰ সাৰত্থিং পচ্চাগঞ্ছি. দুতিযম্পি খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৰ মং সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. অথ খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘সা কির, ভন্তে, কুমারিকা দুগ্গতা দুক্খিতা, ন সুখং লভতি. মাসংযেৰ নং সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি. ৰদেয্যাথ, ভন্তে – ‘মায্যো, ইমং কুমারিকং দাসিভোগেন ভুঞ্জিত্থ. সুণিসভোগেন ইমং কুমারিকং ভুঞ্জিথা’’’তি.

অথ খো আযস্মা উদাযী যেন তে আজীৰকসাৰকা তেনুপসঙ্কমি; উপসঙ্কমিত্ৰা তে আজীৰকসাৰকে এতদৰোচ – ‘‘মায্যো, ইমং কুমারিকং দাসিভোগেন ভুজ্জিত্থ. সুণিসভোগেন ইমং কুমারিকং ভুঞ্জথা’’তি. তে এৰমাহংসু – ‘‘নত্থম্হাকং তযা সদ্ধিং আহারূপহারো, গণকিযা সদ্ধিং অম্হাকং আহারূপহারো. সমণেন ভৰিতব্বং অব্যাৰটেন. সমণো অস্স সুসমণো, গচ্ছ ত্ৰং, ন মযং তং জানামা’’তি. অথ খো আযস্মা উদাযী তেহি আজীৰকসাৰকেহি অপসাদিতো পুনদেৰ সাৰত্থিং পচ্চাগঞ্ছি. ততিযম্পি খো সা কুমারিকা মাতুযা সন্তিকে দূতং পাহেসি – ‘‘অহম্হি দুগ্গতা দুক্খিতা, ন সুখং লভামি. মাসংযেৰ মং সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি. আগচ্ছতু মে মাতা, মং নেস্সতূ’’তি. দুতিযম্পি খো সা গণকী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘সা কির, ভন্তে, কুমারিকা দুগ্গতা দুক্খিতা, ন সুখং লভতি. মাসংযেৰ নং সুণিসভোগেন ভুঞ্জিংসু. ততো অপরেন দাসিভোগেন ভুঞ্জন্তি. ৰদেয্যাথ, ভন্তে – ‘মায্যো, ইমং কুমারিকং দাসিভোগেন ভুঞ্জিত্থ, সুণিসভোগেন ইমং কুমারিকং ভুঞ্জথা’’’তি. ‘‘পঠমংপাহং তেহি আজীৰকসাৰকেহি অপসাদিতো. গচ্ছ ত্ৰং. নাহং গমিস্সামী’’তি.

২৯৮. অথ খো সা গণকী উজ্ঝাযতি খিয্যতি ৰিপাচেতি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথা মে কুমারিকা দুগ্গতা দুক্খিতা ন সুখং লভতি পাপিকায সস্সুযা পাপকেন সসুরেন পাপকেন সামিকেনা’’তি. সাপি খো কুমারিকা উজ্ঝাযতি খিয্যতি ৰিপাচেতি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথাহং দুগ্গতা দুক্খিতা ন সুখং লভামি পাপিকায সস্সুযা পাপকেন সসুরেন পাপকেন সামিকেনা’’তি. অঞ্ঞাপি ইত্থিযো অসন্তুট্ঠা সস্সূহি ৰা সসুরেহি ৰা সামিকেহি ৰা, তা এৰং ওযাচন্তি – ‘‘এৰং দুগ্গতো হোতু অয্যো উদাযী, এৰং দুক্খিতো হোতু অয্যো উদাযী, এৰং মা সুখং লভতু অয্যো উদাযী, যথা মযং দুগ্গতা দুক্খিতা ন সুখং লভাম পাপিকাহি সস্সূহি পাপকেহি সসুরেহি পাপকেহি সামিকেহী’’তি. যা পন তা ইত্থিযো সন্তুট্ঠা সস্সূহি ৰা সসুরেহি ৰা সামিকেহি ৰা তা এৰং আযাচন্তি – ‘‘এৰং সুখিতো হোতু অয্যো উদাযী, এৰং সজ্জিতো হোতু অয্যো উদাযী, এৰং সুখমেধো [সুখমেধিতো (সী. ক.)] হোতু অয্যো উদাযী, যথা মযং সুখিতা সজ্জিতা সুখমেধা ভদ্দিকাহি সস্সূহি ভদ্দকেহি সসুরেহি ভদ্দকেহি সামিকেহী’’তি.

অস্সোসুং খো ভিক্খূ একচ্চানং ইত্থীনং ওযাচন্তীনং একচ্চানং ইত্থীনং আযাচন্তীনং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী সঞ্চরিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং উদাযিং পটিপুচ্ছি – ‘‘সচ্চং কির ত্ৰং, উদাযি, সঞ্চরিত্তং সমাপজ্জসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, সঞ্চরিত্তং সমাপজ্জসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

২৯৯. ‘‘যো পন ভিক্খু সঞ্চরিত্তং সমাপজ্জেয্য, ইত্থিযা ৰা পুরিসমতিং পুরিসস্স ৰা ইত্থিমতিং, জাযত্তনে ৰা জারত্তনে ৰা, সঙ্ঘাদিসেসো’’তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৩০০. তেন খো পন সমযেন সম্বহুলা ধুত্তা উয্যানে পরিচারেন্তা অঞ্ঞতরিস্সা ৰেসিযা সন্তিকে দূতং পাহেসুং – ‘‘আগচ্ছতু উয্যানে, পরিচারেস্সামা’’তি. সা এৰমাহ – ‘‘অহং খ্ৰয্যো তুম্হে ন জানামি – ‘কে ৰা ইমে কস্স ৰা’তি. অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং. নাহং গমিস্সামী’’তি. অথ খো সো দূতো তেসং ধুত্তানং এতমত্থং আরোচেসি. এৰং ৰুত্তে, অঞ্ঞতরো পুরিসো তে ধুত্তে এতদৰোচ – ‘‘কিস্স তুম্হে অয্যো এতং ৰেসিং যাচিত্থ? ননু অয্যো উদাযী ৰত্তব্বো! অয্যো উদাযী উয্যোজেস্সতী’’তি. এৰং ৰুত্তে, অঞ্ঞতরো উপাসকো তং পুরিসং এতদৰোচ – ‘‘মায্যো এৰং অৰচ. ন কপ্পতি সমণানং সক্যপুত্তিযানং এৰরূপং কাতুং. নায্যো উদাযী এৰং করিস্সতী’’তি. এৰং ৰুত্তে, ‘‘করিস্সতি ন করিস্সতী’’তি অব্ভুতমকংসু. অথ খো তে ধুত্তা যেনাযস্মা উদাযী তেনুপসঙ্কমিংসু; উপসঙ্কমিত্ৰা আযস্মন্তং উদাযিং এতদৰোচুং – ‘‘ইধ মযং, ভন্তে, উয্যানে পরিচারেন্তা অসুকায নাম ৰেসিযা সন্তিকে দূতং পহিণিম্হা – ‘আগচ্ছতু উয্যানে, পরিচারেস্সামা’তি. সা এৰমাহ – ‘অহং খ্ৰয্যো তুম্হে ন জানামি – কে ৰা ইমে কস্স ৰাতি, অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং. নাহং গমিস্সামী’তি. সাধু, ভন্তে, অয্যো তং ৰসিং উয্যোজেতূ’’তি.

অথ খো আযস্মা উদাযী যেন সা ৰেসী তেনুপসঙ্কমি; উপসঙ্কমিত্ৰা তং ৰেসিং এতদৰোচ – ‘‘কিস্সিমেসং ন গচ্ছসী’’তি? ‘‘অহং খ্ৰয্য ইমে ন জানামি – ‘কে ৰা ইমে কস্স ৰা’তি. অহঞ্চম্হি বহুভণ্ডা বহুপরিক্খারা, বহিনগরঞ্চ গন্তব্বং. নাহং গমিস্সামী’’তি. ‘‘গচ্ছিমেসং. অহং ইমে জানামী’’তি. ‘‘সচে, ভন্তে, অয্যো জানাতি অহং গমিস্সামী’’তি. অথ খো তে ধুত্তা তং ৰেসিং আদায উয্যানং অগমংসু. অথ খো সো উপাসকো উজ্ঝাযতি খিয্যতি ৰিপাচেতি – ‘‘কথঞ্হি নাম অয্যো উদাযী তঙ্খণিকং সঞ্চরিত্তং সমাপজ্জিস্সতী’’তি. অস্সোসুং খো ভিক্খূ তস্স উপাসকস্স উজ্ঝাযন্তস্স খিয্যন্তস্স ৰিপাচেন্তস্স. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী তঙ্খণিকং সঞ্চরিত্তং সমাপজ্জিস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উদাযি, তঙ্খণিকং সঞ্চরিত্তং সমাপজ্জসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম ত্ৰং, মোঘপুরিস, তঙ্খণিকং সঞ্চরিত্তং সমাপজ্জিস্সসি? নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩০১. ‘‘যো পন ভিক্খু সঞ্চরিত্তং সমাপজ্জেয্য, ইত্থিযা ৰা পুরিসমতিং পুরিসস্স ৰা ইত্থিমতিং, জাযত্তনে ৰা জারত্তনে ৰা, অন্তমসো তঙ্খণিকাযপি, সঙ্ঘাদিসেসো’’তি.

৩০২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

সঞ্চরিত্তং সমাপজ্জেয্যাতি ইত্থিযা ৰা পহিতো পুরিসস্স সন্তিকে গচ্ছতি, পুরিসেন ৰা পহিতো ইত্থিযা সন্তিকে গচ্ছতি.

ইত্থিযা ৰা পুরিসমতিন্তি পুরিসস্স মতিং ইত্থিযা আরোচেতি.

পুরিসস্স ৰা ইত্থিমতিন্তি ইত্থিযা মতিং পুরিসস্স আরোচেতি.

জাযত্তনে ৰাতি জাযা ভৰিস্সসি.

জারত্তনে ৰাতি জারী ভৰিস্সসি.

অন্তমসো তঙ্খণিকাযপীতি মুহুত্তিকা ভৰিস্সসি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৩০৩. দস ইত্থিযো – মাতুরক্খিতা পিতুরক্খিতা মাতাপিতুরক্খিতা ভাতুরক্খিতা ভগিনিরক্খিতা ঞাতিরক্খিতা গোত্তরক্খিতা ধম্মরক্খিতা সারক্খা সপরিদণ্ডা.

দস ভরিযাযো – ধনক্কীতা ছন্দৰাসিনী ভোগৰাসিনী পটৰাসিনী ওদপত্তকিনী ওভটচুম্বটা দাসী চ ভরিযা চ কম্মকারী চ ভরিযা চ ধজাহটা মুহুত্তিকা.

৩০৪. মাতুরক্খিতা নাম মাতা রক্খতি গোপেতি ইস্সরিযং কারেতি ৰসং ৰত্তেতি.

পিতুরক্খিতা নাম পিতা রক্খতি গোপেতি ইস্সরিযং কারেতি ৰসং ৰত্তেতি.

মাতাপিতুরক্খিতা নাম মাতাপিতরো রক্খন্তি গোপেন্তি ইস্সরিযং কারেন্তি ৰসং ৰত্তেন্তি.

ভাতুরক্খিতা নাম ভাতা রক্খতি গোপেতি ইস্সরিযং কারেতি ৰসং ৰত্তেতি.

ভগিনিরক্খিতা নাম ভগিনী রক্খতি গোপেতি ইস্সরিযং কারেতি ৰসং ৰত্তেতি.

ঞাতিরক্খিতা নাম ঞাতকা রক্খন্তি গোপেন্তি ইস্সরিযং কারেন্তি ৰসং ৰত্তেন্তি.

গোত্তরক্খিতা নাম সগোত্তা রক্খন্তি গোপেন্তি ইস্সরিযং কারেন্তি ৰসং ৰত্তেন্তি.

ধম্মরক্খিতা নাম সহধম্মিকা রক্খন্তি গোপেন্তি ইস্সরিযং কারেন্তি ৰসং ৰত্তেন্তি.

সারক্খা নাম গব্ভেপি পরিগ্গহিতা হোতি – ময্হং এসাতি. অন্তমসো মালাগুল়পরিক্খিত্তাপি.

সপরিদণ্ডা নাম কেহিচি দণ্ডো ঠপিতো হোতি – যো ইত্থন্নামং ইত্থিং গচ্ছতি এত্তকো দণ্ডোতি.

ধনক্কীতা নাম ধনেন কিণিত্ৰা ৰাসেতি.

ছন্দৰাসিনী নাম পিযো পিযং ৰাসেতি.

ভোগৰাসিনী নাম ভোগং দত্ৰা ৰাসেতি.

পটৰাসিনী নাম পটং দত্ৰা ৰাসেতি.

ওদপত্তকিনী নাম উদকপত্তং আমসিত্ৰা ৰাসেতি.

ওভটচুম্বটা নাম চুম্বটং ওরোপেত্ৰা ৰাসেতি.

দাসী নাম দাসী চেৰ হোতি ভরিযা চ.

কম্মকারী নাম কম্মকারী চেৰ হোতি ভরিযা চ.

ধজাহটা নাম করমরানীতা ৰুচ্চতি.

মুহুত্তিকা নাম তঙ্খণিকা ৰুচ্চতি.

৩০৫. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং ব্রূহি…পে… মাতাপিতুরক্খিতং ব্রূহি… ভাতুরক্খিতং ব্রূহি… ভগিনিরক্খিতং ব্রূহি… ঞাতিরক্খিতং ব্রূহি… গোত্তরক্খিতং ব্রূহি… ধম্মরক্খিতং ব্রূহি… সারক্খং ব্রূহি… সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩০৬. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ মাতাপিতুরঅখতঞ্চ…পে…

মাতুরক্খিতঞ্চ ভাতুরক্খিতঞ্চ… মাতুরক্খিতঞ্চ ভগিনিরক্খিতঞ্চ… মাতুরক্খিতঞ্চ ঞাতিরক্খিতঞ্চ… মাতুরক্খিতঞ্চ গোত্তরক্খিতঞ্চ… মাতুরক্খিতঞ্চ ধম্মরক্খিতঞ্চ… মাতুরক্খিতঞ্চ সারক্খঞ্চ… মাতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩০৭. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতাপিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ ভাতুরক্খিতঞ্চ…পে… পিতুরক্খিতঞ্চ ভগিনিরক্খিতঞ্চ… পিতুরক্খিতঞ্চ ঞাতিরক্খিতঞ্চ… পিতুরক্খিতঞ্চ গোত্তরক্খিতঞ্চ… পিতুরক্খিতঞ্চ ধম্মরক্খিতঞ্চ… পিতুরক্খিতঞ্চ সারক্খঞ্চ… পিতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩০৮. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ পিতুরঅখতঞ্চ…পে…

সপরিদণ্ডঞ্চ মাতাপিতুরক্খিতঞ্চ… সপরিদণ্ডঞ্চ ভাতুরক্খিতঞ্চ… সপরিদণ্ডঞ্চ ভগিনিরক্খিতঞ্চ… সপরিদণ্ডঞ্চ ঞাতিরক্খিতঞ্চ… সপরিদণ্ডঞ্চ গোত্তরক্খিতঞ্চ… সপরিদণ্ডঞ্চ ধম্মরক্খিতঞ্চ… সপরিদণ্ডঞ্চ সারক্খঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

এৰং দুমূলকম্পি তিমূলকম্পি যাৰ নৰমূলকং কাতব্বং.

ইদং দসমূলকং

৩০৯. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ভাতুরক্খিতঞ্চ ভগিনিরক্খিতঞ্চ ঞাতিরক্খিতঞ্চ গোত্তরক্খিতঞ্চ ধম্মরক্খিতঞ্চ সারক্খঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

ধনক্কীতাচক্কং নিট্ঠিতং.

৩১০. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং ব্রূহি…পে… মাতাপিতুরক্খিতং ব্রূহি… ভাতুরক্খিতং ব্রূহি… ভগিনিরক্খিতং ব্রূহি… ঞাতিরক্খিতং ব্রূহি… গোত্তরক্খিতং ব্রূহি… ধম্মরক্খিতং ব্রূহি… সারক্খং ব্রূহি… সপরিদণ্ডং ব্রূহি – ‘হোহি কির ইত্থন্নামস্স ভরিযা মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩১১. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ মাতাপিতুরক্খিতঞ্চ…পে… মাতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩১২. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতাপিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ ভাতুরক্খিতঞ্চ…পে… পিতুরক্খিতঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩১৩. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ মাতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডঞ্চ পিতুরক্খিতঞ্চ…পে… সপরিদণ্ডঞ্চ সারক্খঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকাদীনিপি এৰমেৰ কাতব্বানি.

ইদং দসমূলকং

৩১৪. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ভাতুরক্খিতঞ্চ ভগিনিরক্খিতঞ্চ ঞাতিরক্খিতঞ্চ গোত্তরক্খিতঞ্চ ধম্মরক্খিতঞ্চ সারক্খঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মুহুত্তিকাচক্কং নিট্ঠিতং.

৩১৫. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩১৬. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ভোগৰাসিনী চ…পে… ধনক্কীতা চ পটৰাসিনী চ… ধনক্কীতা চ ওদপত্তকিনী চ… ধনক্কীতা চ ওভটচুম্বটা চ… ধনক্কীতা চ দাসী চ ভরিযা চ… ধনক্কীতা চ কম্মকারী চ ভরিযা চ… ধনক্কীতা চ ধজাহটা চ… ধনক্কীতা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩১৭. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ছন্দৰাসিনী চ ভোগৰাসিনী চ…পে… ছন্দৰাসিনী চ মুহুত্তিকা চ… ছন্দৰাসিনী চ ধনক্কীতা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩১৮. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা মুহুত্তিকা চ ধনক্কীতা চ…পে… মুহুত্তিকা চ ছন্দৰাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকাদীনিপি এৰমেৰ কাতব্বানি.

ইদং দসমূলকং

৩১৯. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মাতুরক্খিতাচক্কং নিট্ঠিতং.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং পিতুরক্খিতং…পে… মাতাপিতুরক্খিতং… ভাতুরক্খিতং… ভগিনিরক্খিতং … ঞাতিরক্খিতং… গোত্তরক্খিতং… ধম্মরক্খিতং … সারক্খং… সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ছন্দৰাসিনী…পে… ভোগৰাসিনী, পটৰাসিনী, ওদপত্তকিনী, ওভটচুম্বটা, দাসী চ ভরিযা চ, কম্মকারী চ ভরিযা চ, ধজাহটা, মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩২০. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা চ ভোগৰাসিনী চ…পে… ধনক্কীতা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ছন্দৰাসিনী চ ভোগৰাসিনী চ…পে… ছন্দৰাসিনী চ মুহুত্তিকা চ, ছন্দৰাসিনী চ ধনক্কীতা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা মুহুত্তিকা চ ধনক্কীতা চ…পে… মুহুত্তিকা চ ছন্দৰাসিনী চ, মুহুত্তিকা চ ধজাহটা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৰ নৰমূলকং এৰমেৰ কাতব্বং.

ইদং দসমূলকং.

৩২১. পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং সপরিদণ্ডং ব্রূহি – ‘হোহি কির ইত্থন্নামস্স ভরিযা ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

সপরিদণ্ডাচক্কং নিট্ঠিতং.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতং ব্রূহি – ‘হোহি কির ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা চ ছন্দৰাসিনী চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা চ ছন্দৰাসিনী চ ভোগৰাসিনী চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

এৰং উভতোৰড্ঢকং কাতব্বং.

পুরিসো ভিক্খুং পহিণতি – ‘‘গচ্ছ, ভন্তে, ইত্থন্নামং মাতুরক্খিতঞ্চ পিতুরক্খিতঞ্চ মাতাপিতুরক্খিতঞ্চ ভাতুরক্খিতঞ্চ ভগিনিরক্খিতঞ্চ ঞাতিরক্খিতঞ্চ গোত্তরক্খিতঞ্চ ধম্মরক্খিতঞ্চ সারক্খঞ্চ সপরিদণ্ডঞ্চ ব্রূহি – ‘হোথ কির ইত্থন্নামস্স ভরিযাযো ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

উভতোৰড্ঢকং নিট্ঠিতং.

পুরিসস্স মাতা ভিক্খুং পহিণতি…পে… পুরিসস্স পিতা ভিক্খুং পহিণতি…পে… পুরিসস্স মাতাপিতরো ভিক্খুং পহিণন্তি…পে… পুরিসস্স ভাতা ভিক্খুং পহিণতি…পে… পুরিসস্স ভগিনী ভিক্খুং পহিণতি…পে… পুরিসস্স ঞাতকা ভিক্খুং পহিণন্তি…পে… পুরিসস্স গোত্তা ভিক্খুং পহিণন্তি…পে… পুরিসস্স সহধম্মিকা ভিক্খুং পহিণন্তি…পে….

পুরিসস্স পেয্যালো ৰিত্থারেতব্বো.

উভতোৰড্ঢকং যথা পুরিমনযো তথেৰ ৰিত্থারেতব্বং.

৩২২. মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ছন্দৰাসিনী…পে… ভোগৰাসিনী, পটৰাসিনী, ওদপত্তকিনী, ওভটচুম্বটা, দাসী চ ভরিযা চ, কম্মকারী চ ভরিযা চ, ধজাহটা, মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩২৩. মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা চ ছন্দৰাসিনী চ…পে… ধনক্কীতা চ ভোগৰাসিনী চ, ধনক্কীতা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩২৪. মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ছন্দৰাসিনী চ ভোগৰাসিনী চ…পে… ছন্দৰাসিনী চ মুহুত্তিকা চ, ছন্দৰাসিনী চ ধনক্কীতা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩২৫. মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা মুহুত্তিকা চ ধনক্কীতা চ…পে… মুহুত্তিকা চ ছন্দৰাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৰ নৰমূলকং এৰমেৰ কাতব্বং.

ইদং দসমূলকং

৩২৬. মাতুরক্খিতায মাতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মাতুচক্কং নিট্ঠিতং.

পিতুরক্খিতায পিতা ভিক্খুং পহিণতি…পে… মাতাপিতুরক্খিতায মাতাপিতরো ভিক্খুং পহিণন্তি… ভাতুরক্খিতায ভাতা ভিক্খুং পহিণতি… ভগিনিরক্খিতায ভগিনী ভিক্খুং পহিণতি… ঞাতিরক্খিতায ঞাতকা ভিক্খুং পহিণন্তি… গোত্তরক্খিতায গোত্তা [সগোত্তা (?)] ভিক্খুং পহিণন্তি… ধম্মরক্খিতায সহধম্মিকা ভিক্খুং পহিণন্তি… সারক্খায যেন পরিগ্গহিতা হোতি সো ভিক্খুং পহিণতি… সপরিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

সপরিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ছন্দৰাসিনী…পে… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩২৭. সপরিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা চ ছন্দৰাসিনী চ…পে… ধনক্কীতা চ ভোগৰাসিনী চ… ধনক্কীতা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩২৮. সপরিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ছন্দৰাসিনী চ ভোগৰাসিনী চ…পে… ছন্দৰাসিনী চ মুহুত্তিকা চ… ছন্দৰাসিনী চ ধনক্কীতা চা’’’ তি. পটিগ্গণ্হাতি ৰীমংসতি পচ্চাহরতি আপত্তি সঙ্ঘাদিসেসস্স.

বদ্ধচক্কং মূলং সংখিত্তং.

৩২৯. সপরিদণ্ডায যেন দণ্ডো, ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা মুহুত্তিকা চ ধনক্কীতা চ…পে… মুহুত্তিকা চ ছন্দৰাসিনী চ…পে… মুহুত্তিকা চ ধজাহটা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

একমূলকং নিট্ঠিতং.

দুমূলকম্পি তিমূলকম্পি যাৰ নৰমূলকং এৰমেৰ কাতব্বং.

ইদং দসমূলকং

৩৩০. সপরিদণ্ডায যেন দণ্ডো ঠপিতো হোতি সো ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোতু ইত্থন্নামস্স ভরিযা ধনক্কীতা চ ছন্দৰাসিনী চ ভোগৰাসিনী চ পটৰাসিনী চ ওদপত্তকিনী চ ওভটচুম্বটা চ দাসী চ ভরিযা চ কম্মকারী চ ভরিযা চ ধজাহটা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

দণ্ডঠপিতচক্কং নিট্ঠিতং.

মাতুরক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোমি ইত্থন্নামস্স ভরিযা ধনক্কীতা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মাতুরক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোমি ইত্থন্নামস্স ভরিযা ছন্দৰাসিনী…পে… ভোগৰাসিনী… পটৰাসিনী… ওদপত্তকিনী… ওভটচুম্বটা… দাসী চ ভরিযা চ… কম্মকারী চ ভরিযা চ… ধজাহটা… মুহুত্তিকা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

নিক্খেপপদানি.

৩৩১. মাতুরক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোমি ইত্থন্নামস্স ভরিযা ধনক্কীতা চ ছন্দৰাসিনী চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

মাতুরক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোমি ইত্থন্নামস্স ভরিযা ধনক্কীতা চ ভোগৰাসিনী চ…পে… ধনক্কীতা চ পটৰাসিনী চ…পে… ধনক্কীতা চ মুহুত্তিকা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

খণ্ডচক্কং.

৩৩২. মাতুরক্খিতা ভিক্খুং পহিণতি – ‘‘গচ্ছ, ভন্তে, ইত্থন্নামং ব্রূহি – ‘হোমি ইত্থন্নামস্স ভরিযা ছন্দৰাসিনী চ ভোগৰাসিনী চ…পে… ছন্দৰাসিনী চ মুহুত্তিকা চ… ছন্দৰাসিনী চ ধনক্কীতা চা’’’তি. পটিগ্গণ্হাতি ৰীমংসতি পচ্চাহরতি, আপত্তি সঙ্ঘাদিসেসস্স.

বদ্ধচক্কং মূলং সংখিত্তং.