১২. দুব্বচসিক্খাপদং

৪২৪. তেন সমযেন বুদ্ধো ভগৰা কোসম্বিযং ৰিহরতি ঘোসিতারামে. তেন খো পন সমযেন আযস্মা ছন্নো অনাচরং আচরতি. ভিক্খূ এৰমাহংসু – ‘‘মাৰুসো, ছন্ন, এৰরূপং অকাসি. নেতং কপ্পতী’’তি. সো এৰং ৰদেতি – ‘‘কিং নু খো নাম তুম্হে, আৰুসো, মং ৰত্তব্বং মঞ্ঞথ? অহং খো নাম তুম্হে ৰদেয্যং. অম্হাকং বুদ্ধো অম্হাকং ধম্মো অম্হাকং অয্যপুত্তেন ধম্মো অভিসমিতো. সেয্যথাপি নাম মহাৰাতো ৰাযন্তো তিণকট্ঠপণ্ণসটং [তিণকট্ঠপণ্ণকসটং (ক.)] একতো উস্সারেয্য, সেয্যথা ৰা পন নদী পব্বতেয্যা সঙ্খসেৰালপণকং একতো উস্সারেয্য, এৰমেৰ তুম্হে নানানামা নানাগোত্তা নানাজচ্চা নানাকুলা পব্বজিতা একতো উস্সরিতা. কিং নু খো নাম তুম্হে, আৰুসো, মং ৰত্তব্বং মঞ্ঞথ? অহং খো নাম তুম্হে ৰদেয্যং! অম্হাকং বুদ্ধো অম্হাকং ধম্মো অম্হাকং অয্যপুত্তেন ধম্মো অভিসমিতো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ছন্নো ভিক্খূহি সহধম্মিকং ৰুচ্চমানো অত্তানং অৰচনীযং করিস্সতী’’তি! অথ খো তে ভিক্খূ আযস্মন্তং ছন্নং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, ছন্ন, ভিক্খূহি সহধম্মিকং ৰুচ্চমানো অত্তানং অৰচনীযং করোসী’’তি? ‘‘সচ্চং ভগৰা’’তি. ৰিগরহি বুদ্ধো ভগৰা…পে… ‘‘কথঞ্হি নাম ত্ৰং, মোঘপুরিস, ভিক্খূহি সহধম্মিকং ৰুচ্চমানো অত্তানং অৰচনীযং করিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৪২৫. ‘‘ভিক্খু পনেৰ দুব্বচজাতিকো হোতি উদ্দেসপরিযাপন্নেসু সিক্খাপদেসু ভিক্খূহি সহধম্মিকং ৰুচ্চমানো অত্তানং অৰচনীযং করোতি – ‘মা মং আযস্মন্তো কিঞ্চি অৰচুত্থ কল্যাণং ৰা পাপকং ৰা, অহংপাযস্মন্তে ন কিঞ্চি ৰক্খামি কল্যাণং ৰা পাপকং ৰা, ৰিরমথাযস্মন্তো মম ৰচনাযা’তি, সো ভিক্খু ভিক্খূহি এৰমস্স ৰচনীযো – ‘মাযস্মা অত্তানং অৰচনীযং অকাসি, ৰচনীযমেৰাযস্মা অত্তানং করোতু, আযস্মাপি ভিক্খূ ৰদেতু সহধম্মেন, ভিক্খূপি আযস্মন্তং ৰক্খন্তি সহধম্মেন. এৰং সংৰদ্ধা হি তস্স ভগৰতো পরিসা যদিদং অঞ্ঞমঞ্ঞৰচনেন অঞ্ঞমঞ্ঞৰুট্ঠাপনেনাতি. এৰঞ্চ সো ভিক্খুং ভিক্খূহি ৰুচ্চমানো তথেৰ পগ্গণ্হেয্য, সো ভিক্খু ভিক্খূহি যাৰততিযং সমনুভাসিতব্বো তস্স পটিনিস্সগ্গায. যাৰততিযঞ্চে সমনুভাসীযমানো তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, সঙ্ঘাদিসেসো’’তি.

৪২৬. ভিক্খূ পনেৰ দুব্বচজাতিকো হোতীতি দুব্বচো হোতি দোৰচস্সকরণেহি ধম্মেহি সমন্নাগতো অক্খমো অপ্পদক্খিণগ্গাহী অনুসাসনিং.

উদ্দেসপরিযাপন্নেসু সিক্খাপদেসূতি পাতিমোক্খপরিযাপন্নেসু সিক্খাপদেসু.

ভিক্খূহীতি অঞ্ঞেহি ভিক্খূহি.

সহধম্মিকং নাম যং ভগৰতা পঞ্ঞত্তং সিক্খাপদং, এতং সহধম্মিকং নাম.

তেন ৰুচ্চমানো অত্তানং অৰচনীযং করোতি – ‘‘মা মং আযস্মন্তো কিঞ্চি অৰচুত্থ কল্যাণং ৰা পাপকং ৰা, অহংপাযস্মন্তে ন কিঞ্চি ৰক্খামি কল্যাণং ৰা পাপকং ৰা. ৰিরমথাযস্মন্তো মম ৰচনাযা’’তি.

সো ভিক্খূতি যো সো দুব্বচজাতিকো ভিক্খু.

ভিক্খূহীতি অঞ্ঞেহি ভিক্খূহি. যে পস্সন্তি যে সুণন্তি তেহি ৰত্তব্বো – ‘‘মাযস্মা অত্তানং অৰচনীযং অকাসি. ৰচনীযমেৰ আযস্মা অত্তানং করোতু. আযস্মাপি ভিক্খূ ৰদেতু সহধম্মেন, ভিক্খূপি আযস্মন্তং ৰক্খন্তি সহধম্মেন. এৰং সংৰদ্ধা হি তস্স ভগৰতো পরিসা যদিদং অঞ্ঞমঞ্ঞৰচনেন অঞ্ঞমঞ্ঞৰুট্ঠাপনেনা’’তি. দুতিযম্পি ৰত্তব্বো. ততিযম্পি ৰত্তব্বো. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৰা ন ৰদন্তি, আপত্তি দুক্কটস্স. সো ভিক্খু সঙ্ঘমজ্ঝম্পি আকড্ঢিত্ৰা ৰত্তব্বো – ‘‘মাযস্মা অত্তানং অৰচনীযং অকাসি…পে… অঞ্ঞমঞ্ঞৰুট্ঠাপনেনা’’তি. দুতিযম্পি ৰত্তব্বো. ততিযম্পি ৰত্তব্বো. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সো ভিক্খু সমনুভাসিতব্বো. এৰঞ্চ পন, ভিক্খৰে, সমনুভাসিতব্বো. ব্যত্তেন ভিক্খুনা পটিবলেন সঙ্ঘো ঞাপেতব্বো –

৪২৭. ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৰুচ্চমানো অত্তানং অৰচনীযং করোতি. সো তং ৰত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুং সমনুভাসেয্য তস্স ৰত্থুস্স পটিনিস্সগ্গায. এসা ঞত্তি.

‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৰুচ্চমানো অত্তানং অৰচনীযং করোতি. সো তং ৰত্থুং ন পটিনিস্সজ্জতি. সঙ্ঘো ইত্থন্নামং ভিক্খুং সমনুভাসতি তস্স ৰত্থুস্স পটিনিস্সগ্গায. যস্সাযস্মতো খমতি ইত্থন্নামস্স ভিক্খুনো সমনুভাসনা তস্স ৰত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি – ‘‘সুণাতু মে, ভন্তে, সঙ্ঘো. অযং ইত্থন্নামো ভিক্খু ভিক্খূহি সহধম্মিকং ৰুচ্চমানো অত্তানং অৰচনীযং করোতি. সো তং ৰত্থুং ন পটিনিস্সজ্জতি. সঙ্ঘো ইত্থন্নামং ভিক্খুং সমনুভাসতি তস্স ৰত্থুস্স পটিনিস্সগ্গায. যস্সাযস্মতো খমতি ইত্থন্নামস্স ভিক্খুনো সমনুভাসনা তস্স ৰত্থুস্স পটিনিস্সগ্গায, সো তুণ্হস্স; যস্স নক্খমতি, সো ভাসেয্য.

‘‘সমনুভট্ঠো সঙ্ঘেন ইত্থন্নামো ভিক্খু তস্স ৰত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৰমেতং ধারযামী’’তি.

৪২৮. ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচাপরিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তস্স ঞত্তিযা দুক্কটং, দ্ৰীহি কম্মৰাচাহি থুল্লচ্চযা পটিপ্পস্সম্ভন্তি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৪২৯. ধম্মকম্মে ধম্মকম্মসঞ্ঞী ন পটিনিস্সজ্জতি, আপত্তি সঙ্ঘাদিসেসস্স.

ধম্মকম্মে ৰেমতিকো ন পটিনিস্সজ্জতি, আপত্তি সঙ্ঘাদিসেসস্স.

ধম্মকম্মে অধম্মকম্মসঞ্ঞী ন পটিনিস্সজ্জতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞী, আপত্তি দুক্কটস্স.

অধম্মকম্মে ৰেমতিকো, আপত্তি দুক্কটস্স.

অধম্মকম্মে অধম্মকম্মসঞ্ঞী, আপত্তি দুক্কটস্স.

৪৩০. অনাপত্তি অসমনুভাসন্তস্স, পটিনিস্সজ্জন্তস্স, উম্মত্তকস্স, আদিকম্মিকস্সাতি.

দুব্বচসিক্খাপদং নিট্ঠিতং দ্ৰাদসমং.