২. দুতিযপারাজিকং

৮৪. তেন সমযেন বুদ্ধো ভগৰা রাজগহে ৰিহরতি গিজ্ঝকূটে পব্বতে. তেন খো পন সমযেন সম্বহুলা সন্দিট্ঠা সম্ভত্তা ভিক্খূ ইসিগিলিপস্সে তিণকুটিযো করিত্ৰা ৰস্সং উপগচ্ছিংসু. আযস্মাপি ধনিযো কুম্ভকারপুত্তো তিণকুটিকং করিত্ৰা ৰস্সং উপগচ্ছি. অথ খো তে ভিক্খূ ৰস্সংৰুট্ঠা তেমাসচ্চযেন তিণকুটিযো ভিন্দিত্ৰা তিণঞ্চ কট্ঠঞ্চ পটিসামেত্ৰা জনপদচারিকং পক্কমিংসু. আযস্মা পন ধনিযো কুম্ভকারপুত্তো তত্থেৰ ৰস্সং ৰসি, তত্থ হেমন্তং, তত্থ গিম্হং. অথ খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু. দুতিযম্পি খো আযস্মা ধনিযো কুম্ভকারপুত্তো তিণঞ্চ কট্ঠঞ্চ সংকড্ঢিত্ৰা তিণকুটিকং অকাসি. দুতিযম্পি খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু. ততিযম্পি খো আযস্মা ধনিযো কুম্ভকারপুত্তো তিণঞ্চ কট্ঠঞ্চ সংকড্ঢিত্ৰা তিণকুটিকং অকাসি. ততিযম্পি খো আযস্মতো ধনিযস্স কুম্ভকারপুত্তস্স গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু.

অথ খো আযস্মতো ধনিযস্স কুম্ভকারপুত্তস্স এতদহোসি – ‘‘যাৰততিযকং খো মে গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু. অহং খো পন সুসিক্খিতো অনৰযো সকে আচরিযকে কুম্ভকারকম্মে পরিযোদাতসিপ্পো. যংনূনাহং সামং চিক্খল্লং মদ্দিত্ৰা সব্বমত্তিকামযং কুটিকং করেয্য’’ন্তি! অথ খো আযস্মা ধনিযো কুম্ভকারপুত্তো সামং চিক্খল্লং মদ্দিত্ৰা সব্বমত্তিকামযং কুটিকং করিত্ৰা তিণঞ্চ কট্ঠঞ্চ গোমযঞ্চ সংকড্ঢিত্ৰা তং কুটিকং পচি. সা অহোসি কুটিকা অভিরূপা দস্সনীযা পাসাদিকা লোহিতিকা [লোহিতকা (স্যা.)], সেয্যথাপি ইন্দগোপকো. সেয্যথাপি নাম কিঙ্কণিকসদ্দো [কিঙ্কিণিকসদ্দো (সী. স্যা.)] এৰমেৰং তস্সা কুটিকায সদ্দো অহোসি.

৮৫. অথ খো ভগৰা সম্বহুলেহি ভিক্খূহি সদ্ধিং গিজ্ঝকূটা পব্বতা ওরোহন্তো অদ্দস তং কুটিকং অভিরূপং দস্সনীযং পাসাদিকং লোহিতিকং. দিস্ৰান ভিক্খূ আমন্তেসি – ‘‘কিং এতং, ভিক্খৰে, অভিরূপং দস্সনীযং পাসাদিকং লোহিতিকং, সেয্যথাপি ইন্দগোপকো’’তি? অথ খো তে ভিক্খূ ভগৰতো এতমত্থং আরোচেসুং. ৰিগরহি বুদ্ধো ভগৰা – ‘‘অননুচ্ছৰিকং, ভিক্খৰে, তস্স মোঘপুরিসস্স অননুলোমিকং অপ্পতিরূপং অস্সামণকং অকপ্পিযং অকরণীযং. কথঞ্হি নাম সো, ভিক্খৰে, মোঘপুরিসো সব্বমত্তিকামযং কুটিকং করিস্সতি! ন হি নাম, ভিক্খৰে, তস্স মোঘপুরিসস্স পাণেসু অনুদ্দযা অনুকম্পা অৰিহেসা ভৰিস্সতি! গচ্ছথেতং, ভিক্খৰে, কুটিকং ভিন্দথ. মা পচ্ছিমা জনতা পাণেসু পাতব্যতং আপজ্জি. ন চ, ভিক্খৰে, সব্বমত্তিকামযা কুটিকা কাতব্বা. যো করেয্য, আপত্তি দুক্কটস্সা’’তি. ‘‘এৰং, ভন্তে’’তি, খো তে ভিক্খূ ভগৰতো পটিস্সুণিত্ৰা যেন সা কুটিকা তেনুপসঙ্কমিংসু; উপসঙ্কমিত্ৰা তং কুটিকং ভিন্দিংসু. অথ খো আযস্মা ধনিযো কুম্ভকারপুত্তো তে ভিক্খূ এতদৰোচ – ‘‘কিস্স মে তুম্হে, আৰুসো, কুটিকং ভিন্দথা’’তি? ‘‘ভগৰা, আৰুসো, ভেদাপেতী’’তি. ‘‘ভিন্দথাৰুসো, সচে ধম্মস্সামী ভেদাপেতী’’তি.

৮৬. অথ খো আযস্মতো ধনিযস্স কুম্ভকারপুত্তস্স এতদহোসি – ‘‘যাৰততিযকং খো মে গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু. যাপি মযা সব্বমত্তিকামযা কুটিকা কতা সাপি ভগৰতা ভেদাপিতা. অত্থি চ মে দারুগহে গণকো সন্দিট্ঠো. যংনূনাহং দারুগহে গণকং দারূনি যাচিত্ৰা দারুকুটিকং করেয্য’’ন্তি. অথ খো আযস্মা ধনিযো কুম্ভকারপুত্তো যেন দারুগহে গণকো তেনুপসঙ্কমি; উপসঙ্কমিত্ৰা দারুগহে গণকং এতদৰোচ – ‘‘যাৰততিযকং খো মে, আৰুসো, গামং পিণ্ডায পৰিট্ঠস্স তিণহারিযো কট্ঠহারিযো তিণকুটিকং ভিন্দিত্ৰা তিণঞ্চ কট্ঠঞ্চ আদায অগমংসু. যাপি মযা সব্বমত্তিকামযা কুটিকা কতা সাপি ভগৰতা ভেদাপিতা. দেহি মে, আৰুসো, দারূনি. ইচ্ছামি দারুকুটিকং [দারুকুড্ডিকং কুটিকং (সী.)] কাতু’’ন্তি. ‘‘নত্থি, ভন্তে, তাদিসানি দারূনি যানাহং অয্যস্স দদেয্যং. অত্থি, ভন্তে, দেৰগহদারূনি নগরপটিসঙ্খারিকানি আপদত্থায নিক্খিত্তানি. সচে তানি দারূনি রাজা দাপেতি হরাপেথ, ভন্তে’’তি. ‘‘দিন্নানি, আৰুসো, রঞ্ঞা’’তি. অথ খো দারুগহে গণকস্স এতদহোসি – ‘‘ইমে খো সমণা সক্যপুত্তিযা ধম্মচারিনো সমচারিনো [সম্মচারিনো (ক.)] ব্রহ্মচারিনো সচ্চৰাদিনো সীলৰন্তো কল্যাণধম্মা. রাজাপিমেসং অভিপ্পসন্নো. নারহতি অদিন্নং দিন্নন্তি ৰত্তু’’ন্তি. অথ খো দারুগহে গণকো আযস্মন্তং ধনিযং কুম্ভকারপুত্তং এতদৰোচ – ‘‘হরাপেথ, ভন্তে’’তি. অথ খো আযস্মা ধনিযো কুম্ভকারপুত্তো তানি দারূনি খণ্ডাখণ্ডিকং ছেদাপেত্ৰা সকটেহি নিব্বাহাপেত্ৰা দারুকুটিকং অকাসি.

৮৭. অথ খো ৰস্সকারো ব্রাহ্মণো মগধমহামত্তো রাজগহে কম্মন্তে অনুসঞ্ঞাযমানো যেন দারুগহে গণকো তেনুপসঙ্কমি; উপসঙ্কমিত্ৰা দারুগহে গণকং এতদৰোচ – ‘‘যানি তানি, ভণে, দেৰগহদারূনি নগরপটিসঙ্খারিকানি আপদত্থায নিক্খিত্তানি কহং তানি দারূনী’’তি? ‘‘তানি, সামি, দারূনি দেৰেন অয্যস্স ধনিযস্স কুম্ভকারপুত্তস্স দিন্নানী’’তি. অথ খো ৰস্সকারো ব্রাহ্মণো মগধমহামত্তো অনত্তমনো অহোসি – ‘‘কথঞ্হি নাম দেৰো দেৰগহদারূনি নগরপটিসঙ্খারিকানি আপদত্থায নিক্খিত্তানি ধনিযস্স কুম্ভকারপুত্তস্স দস্সতী’’তি! অথ খো ৰস্সকারো ব্রাহ্মণো মগধমহামত্তো যেন রাজা মাগধো সেনিযো বিম্বিসারো তেনুপসঙ্কমি; উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘সচ্চং কির, দেৰেন [সচ্চং কির দেৰ দেৰেন (সী.)] দেৰগহদারূনি নগরপটিসঙ্খারিকানি আপদত্থায নিক্খিত্তানি ধনিযস্স কুম্ভকারপুত্তস্স দিন্নানী’’তি? ‘‘কো এৰমাহা’’তি? ‘‘দারুগহে গণকো, দেৰা’’তি. ‘‘তেন হি, ব্রাহ্মণ, দারুগহে গণকং আণাপেহী’’তি. অথ খো ৰস্সকারো ব্রাহ্মণো মগধমহামত্তো দারুগহে গণকং বন্ধং [বদ্ধং (সী.)] আণাপেসি. অদ্দস খো আযস্মা ধনিযো কুম্ভকারপুত্তো দারুগহে গণকং বন্ধং নিয্যমানং. দিস্ৰান দারুগহে গণকং এতদৰোচ – ‘‘কিস্স ত্ৰং, আৰুসো, বন্ধো নিয্যাসী’’তি? ‘‘তেসং, ভন্তে, দারূনং কিচ্চা’’তি. ‘‘গচ্ছাৰুসো, অহম্পি আগচ্ছামী’’তি. ‘‘এয্যাসি, ভন্তে, পুরাহং হঞ্ঞামী’’তি.

৮৮. অথ খো আযস্মা ধনিযো কুম্ভকারপুত্তো যেন রঞ্ঞো মাগধস্স সেনিযস্স বিম্বিসারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. অথ খো রাজা মাগধো সেনিযো বিম্বিসারো যেনাযস্মা ধনিযো কুম্ভকারপুত্তো তেনুপসঙ্কমি; উপসঙ্কমিত্ৰা আযস্মন্তং ধনিযং কুম্ভকারপুত্তং অভিৰাদেত্ৰা একমন্তং নিসীদি. একমন্তং নিসিন্নো খো রাজা মাগধো সেনিযো বিম্বিসারো আযস্মন্তং ধনিযং কুম্ভকারপুত্তং এতদৰোচ – ‘‘সচ্চং কির মযা, ভন্তে, দেৰগহদারূনি নগরপটিসঙ্খারিকানি আপদত্থায নিক্খিত্তানি অয্যস্স দিন্নানী’’তি? ‘‘এৰং, মহারাজা’’তি. ‘‘মযং খো, ভন্তে, রাজানো নাম বহুকিচ্চা বহুকরণীযা, দত্ৰাপি ন সরেয্যাম; ইঙ্ঘ, ভন্তে, সরাপেহী’’তি. ‘‘সরসি ত্ৰং, মহারাজ, পঠমাভিসিত্তো এৰরূপিং ৰাচং ভাসিতা – ‘‘দিন্নঞ্ঞেৰ সমণব্রাহ্মণানং তিণকট্ঠোদকং পরিভুঞ্জন্তূ’’তি. ‘‘সরামহং, ভন্তে. সন্তি, ভন্তে, সমণব্রাহ্মণা লজ্জিনো কুক্কুচ্চকা সিক্খাকামা. তেসং অপ্পমত্তকেপি কুক্কুচ্চং উপ্পজ্জতি. তেসং মযা সন্ধায ভাসিতং, তঞ্চ খো অরঞ্ঞে অপরিগ্গহিতং. সো ত্ৰং, ভন্তে, তেন লেসেন দারূনি অদিন্নং হরিতুং মঞ্ঞসি! কথঞ্হি নাম মাদিসো সমণং ৰা ব্রাহ্মণং ৰা ৰিজিতে ৰসন্তং হনেয্য ৰা বন্ধেয্য ৰা পব্বাজেয্য ৰা! গচ্ছ, ভন্তে, লোমেন ত্ৰং মুত্তোসি. মাস্সু পুনপি এৰরূপং অকাসী’’তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘অলজ্জিনো ইমে সমণা সক্যপুত্তিযা দুস্সীলা মুসাৰাদিনো. ইমে হি নাম ধম্মচারিনো সমচারিনো ব্রাহ্মচারিনো সচ্চৰাদিনো সীলৰন্তো কল্যাণধম্মা পটিজানিস্সন্তি! নত্থি ইমেসং সামঞ্ঞং, নত্থি ইমেসং ব্রহ্মঞ্ঞং. নট্ঠং ইমেসং সামঞ্ঞং, নট্ঠং ইমেসং ব্রহ্মঞ্ঞং. কুতো ইমেসং সামঞ্ঞং, কুতো ইমেসং ব্রহ্মঞ্ঞং! অপগতা ইমে সামঞ্ঞা, অপগতা ইমে ব্রহ্মঞ্ঞা. রাজানম্পি ইমে ৰঞ্চেন্তি, কিং পনঞ্ঞে মনুস্সে’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা সন্তুট্ঠা লজ্জিনো কুক্কুচ্চকা সিক্খাকামা তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা ধনিযো কুম্ভকারপুত্তো রঞ্ঞো দারূনি অদিন্নং আদিযিস্সতী’’তি! অথ খো তে ভিক্খূ আযস্মন্তং ধনিযং কুম্ভকারপুত্তং অনেকপরিযাযেন ৰিগরহিত্ৰা ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা আযস্মন্তং ধনিযং কুম্ভকারপুত্তং পটিপুচ্ছি – ‘‘সচ্চং কির ত্ৰং, ধনিয, রঞ্ঞো দারূনি অদিন্নং আদিযী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিস, অননুলোমিকং অপ্পতিরূপং অস্সামণকং অকপ্পিযং অকরণীযং. কথঞ্হি নাম ত্ৰং, মোঘপুরিস, রঞ্ঞো দারূনি অদিন্নং আদিযিস্সসি! নেতং, মোঘপুরিস, অপ্পসন্নানং ৰা পসাদায পসন্নানং ৰা ভিয্যোভাৰায; অথখ্ৰেতং, মোঘপুরিস, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি.

তেন খো পন সমযেন অঞ্ঞতরো পুরাণৰোহারিকো মহামত্তো ভিক্খূসু পব্বজিতো ভগৰতো অৰিদূরে নিসিন্নো হোতি. অথ খো ভগৰা তং ভিক্খুং এতদৰোচ – ‘‘কিত্তকেন খো ভিক্খু রাজা মাগধো সেনিযো বিম্বিসারো চোরং গহেত্ৰা হনতি ৰা বন্ধতি ৰা পব্বাজেতি ৰা’’তি? ‘‘পাদেন ৰা, ভগৰা, পাদারহেন ৰা’’তি [পাদারহেনৰা অতিরেকপাদেনৰাতি (স্যা.)]. তেন খো পন সমযেন রাজগহে পঞ্চমাসকো পাদো হোতি. অথ খো ভগৰা আযস্মন্তং ধনিযং কুম্ভকারপুত্তং অনেকপরিযাযেন ৰিগরহিত্ৰা দুব্ভরতায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৮৯. ‘‘যো পন ভিক্খু অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুং ৰা বন্ধেয্যুং ৰা পব্বাজেয্যুং ৰা – ‘চোরোসি বালোসি মূল়্হোসি থেনোসী’তি, তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসো’’তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৯০. তেন খো পন সমযেন ছব্বগ্গিযা ভিক্খূ রজকত্থরণং গন্ত্ৰা রজকভণ্ডিকং অৰহরিত্ৰা আরামং হরিত্ৰা ভাজেসুং. ভিক্খূ এৰমাহংসু – ‘‘মহাপুঞ্ঞত্থ তুম্হে, আৰুসো. বহুং তুম্হাকং চীৰরং উপ্পন্ন’’ন্তি. ‘‘কুতো আৰুসো, অম্হাকং পুঞ্ঞং, ইদানি মযং রজকত্থরণং গন্ত্ৰা রজকভণ্ডিকং অৰহরিম্হা’’তি. ‘‘ননু, আৰুসো, ভগৰতা সিক্খাপদং পঞ্ঞত্তং. কিস্স তুম্হে, আৰুসো, রজকভণ্ডিকং অৰহরিত্থা’’তি? ‘‘সচ্চং, আৰুসো, ভগৰতা সিক্খাপদং পঞ্ঞত্তং. তঞ্চ খো গামে, নো অরঞ্ঞে’’তি. ‘‘ননু, আৰুসো, তথেৰেতং হোতি. অননুচ্ছৰিকং, আৰুসো, অননুলোমিকং অপ্পতিরূপং অস্সামণকং অকপ্পিযং অকরণীযং. কথঞ্হি নাম তুম্হে, আৰুসো, রজকভণ্ডিকং অৰহরিস্সথ! নেতং, আৰুসো, অপ্পসন্নানং ৰা পসাদায পসন্নানং ৰা ভিয্যোভাৰায; অথখ্ৰেতং, আৰুসো, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি. অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ভিক্খুসঙ্ঘং সন্নিপাতাপেত্ৰা ছব্বগ্গিযে ভিক্খূ পটিপুচ্ছি – ‘‘সচ্চং কির তুম্হে, ভিক্খৰে, রজকত্থরণং গন্ত্ৰা রজকভণ্ডিকং অৰহরিত্থা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা – ‘‘অননুচ্ছৰিকং, মোঘপুরিসা, অননুলোমিকং অপ্পটিরূপং অস্সামণকং অকপ্পিযং অকরণীযং. কথঞ্হি নাম তুম্হে, মোঘপুরিসা, রজকভণ্ডিকং অৰহরিস্সথ! নেতং, মোঘপুরিসা, অপ্পসন্নানং ৰা পসাদায পসন্নানং ৰা ভিয্যোভাৰায; অথ খ্ৰেতং, মোঘপুরিসা, অপ্পসন্নানঞ্চেৰ অপ্পসাদায পসন্নানঞ্চ একচ্চানং অঞ্ঞথত্তাযা’’তি. অথ খো ভগৰা ছব্বগ্গিযে ভিক্খূ অনেকপরিযাযেন ৰিগরহিত্ৰা দুব্ভরতায…পে… ৰীরিযারম্ভস্স ৰণ্ণং ভাসিত্ৰা ভিক্খূনং তদনুচ্ছৰিকং তদনুলোমিকং ধম্মিং কথং কত্ৰা ভিক্খূ আমন্তেসি…পে… ‘‘এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৯১. ‘‘যো পন ভিক্খু গামা ৰা অরঞ্ঞা ৰা অদিন্নং থেয্যসঙ্খাতং আদিযেয্য, যথারূপে অদিন্নাদানে রাজানো চোরং গহেত্ৰা হনেয্যুং ৰা বন্ধেয্যুং ৰা পব্বাজেয্যুং ৰা – ‘চোরোসি বালোসি মূল়্হোসি থেনোসী’তি, তথারূপং ভিক্খু অদিন্নং আদিযমানো অযম্পি পারাজিকো হোতি অসংৰাসো’’তি.

৯২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

গামো নাম এককুটিকোপি গামো, দ্ৰিকুটিকোপি গামো, তিকুটিকোপি গামো, চতুকুটিকোপি গামো, সমনুস্সোপি গামো, অমনুস্সোপি গামো, পরিক্খিত্তোপি গামো, অপরিক্খিত্তোপি গামো, গোনিসাদিনিৰিট্ঠোপি গামো, যোপি সত্থো অতিরেকচতুমাসনিৰিট্ঠো সোপি ৰুচ্চতি গামো.

গামূপচারো নাম পরিক্খিত্তস্স গামস্স ইন্দখীলে [ইন্দখিলে (ক.)] ঠিতস্স মজ্ঝিমস্স পুরিসস্স লেড্ডুপাতো, অপরিক্খিত্তস্স গামস্স ঘরূপচারে ঠিতস্স মজ্ঝিমস্স পুরিসস্স লেড্ডুপাতো.

অরঞ্ঞং নাম ঠপেত্ৰা গামঞ্চ গামূপচারঞ্চ অৰসেসং অরঞ্ঞং নাম.

অদিন্নং নামং যং অদিন্নং অনিস্সট্ঠং অপরিচ্চত্তং রক্খিতং গোপিতং মমাযিতং পরপরিগ্গহিতং. এতং অদিন্নং নাম.

থেয্যসঙ্খাতন্তি থেয্যচিত্তো অৰহরণচিত্তো.

আদিযেয্যাতি আদিযেয্য হরেয্য অৰহরেয্য ইরিযাপথং ৰিকোপেয্য ঠানা চাৰেয্য সঙ্কেতং ৰীতিনামেয্য.

যথারূপং নাম পাদং ৰা পাদারহং ৰা অতিরেকপাদং ৰা.

রাজানো নাম পথব্যারাজা পদেসরাজা মণ্ডলিকা অন্তরভোগিকা অক্খদস্সা মহামত্তা, যে ৰা পন ছেজ্জভেজ্জং করোন্তা অনুসাসন্তি. এতে রাজানো নাম.

চোরো নাম যো পঞ্চমাসকং ৰা অতিরেকপঞ্চমাসকং ৰা অগ্ঘনকং অদিন্নং থেয্যসঙ্খাতং আদিযতি. এসো চোরো নাম.

হনেয্যুং ৰাতি হত্থেন ৰা পাদেন ৰা কসায ৰা ৰেত্তেন ৰা অড্ঢদণ্ডকেন ৰা ছেজ্জায ৰা হনেয্যুং.

বন্ধেয্যুং ৰাতি রজ্জুবন্ধনেন ৰা অন্দুবন্ধনেন ৰা সঙ্খলিকবন্ধনেন ৰা ঘরবন্ধনেন ৰা নগরবন্ধনেন ৰা গামবন্ধনেন ৰা নিগমবন্ধনেন ৰা বন্ধেয্যুং, পুরিসগুত্তিং ৰা করেয্যুং.

পব্বাজেয্যুং ৰাতি গামা ৰা নিগমা ৰা নগরা ৰা জনপদা ৰা জনপদপদেসা ৰা পব্বাজেয্যুং.

চোরোসি বালোসি মূল়্হোসি থেনোসীতি পরিভাসো এসো.

তথারূপং নাম পাদং ৰা পাদারহং ৰা অতিরেকপাদং ৰা.

আদিযমানোতি আদিযমানো হরমানো অৰহরমানো ইরিযাপথং ৰিকোপযমানো ঠানা চাৰযমানো সঙ্কেতং ৰীতিনামযমানো.

অযম্পীতি পুরিমং উপাদায ৰুচ্চতি.

পারাজিকো হোতীতি সেয্যথাপি নাম পণ্ডুপলাসো বন্ধনা পৰুত্তো [হরিতত্তায (সী. স্যা.)] অভব্বো হরিতত্থায [হরিতত্তায (সী. স্যা.)], এৰমেৰ ভিক্খু পাদং ৰা পাদারহং ৰা অতিরেকপাদং ৰা অদিন্নং থেয্যসঙ্খাতং আদিযিত্ৰা অস্সমণো হোতি অসক্যপুত্তিযো. তেন ৰুচ্চতি – ‘পারাজিকো হোতী’তি.

অসংৰাসোতি সংৰাসো নাম এককম্মং একুদ্দেসো সমসিক্খতা. এসো সংৰাসো নাম. সো তেন সদ্ধিং নত্থি. তেন ৰুচ্চতি – ‘অসংৰাসো’তি.

৯৩. ভূমট্ঠং থলট্ঠং আকাসট্ঠং ৰেহাসট্ঠং উদকট্ঠং নাৰট্ঠং যানট্ঠং ভারট্ঠং আরামট্ঠং ৰিহারট্ঠং খেত্তট্ঠং ৰত্থুট্ঠং গামট্ঠং অরঞ্ঞট্ঠং উদকং দন্তপোণং [দন্তপোনং (সী. ক.)] ৰনপ্পতি হরণকং উপনিধি সুঙ্কঘাতং পাণো অপদং দ্ৰিপদং চতুপ্পদং বহুপ্পদং ওচরকো ওণিরক্খো সংৰিদাৰহারো সঙ্কেতকম্মং নিমিত্তকম্মন্তি.

৯৪. ভূমট্ঠং নাম ভণ্ডং ভূমিযং নিক্খিত্তং হোতি নিখাতং পটিচ্ছন্নং. ভূমট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি কুদালং ৰা পিটকং ৰা পরিযেসতি গচ্ছতি ৰা, আপত্তি দুক্কটস্স. তত্থ জাতকং কট্ঠং ৰা লতং ৰা ছিন্দতি, আপত্তি দুক্কটস্স. তত্থ পংসুং খণতি ৰা ব্যূহতি [ৰিযূহতি (স্যা.)] ৰা উদ্ধরতি ৰা, আপত্তি দুক্কটস্স. কুম্ভিং আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. অত্তনো ভাজনং পৰেসেত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. অত্তনো ভাজনগতং ৰা করোতি মুট্ঠিং ৰা ছিন্দতি, আপত্তি পারাজিকস্স. সুত্তারুল়্হং ভণ্ডং পামঙ্গং ৰা কণ্ঠসুত্তকং ৰা কটিসুত্তকং ৰা সাটকং ৰা ৰেঠনং ৰা থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. কোটিযং গহেত্ৰা উচ্চারেতি, আপত্তি থুল্লচ্চযস্স. ঘংসন্তো নীহরতি, আপত্তি থুল্লচ্চযস্স. অন্তমসো কেসগ্গমত্তম্পি কুম্ভিমুখা মোচেতি, আপত্তি পারাজিকস্স. সপ্পিং ৰা তেলং ৰা মধুং ৰা ফাণিতং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো একেন পযোগেন পিৰতি, আপত্তি পারাজিকস্স. তত্থেৰ ভিন্দতি ৰা ছড্ডেতি ৰা ঝাপেতি ৰা অপরিভোগং ৰা করোতি, আপত্তি দুক্কটস্স.

৯৫. থলট্ঠং নাম ভণ্ডং থলে নিক্খিত্তং হোতি. থলট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

৯৬. আকাসট্ঠং নাম ভণ্ডং আকাসগতং হোতি. মোরো ৰা কপিঞ্জরো ৰা তিত্তিরো ৰা ৰট্টকো ৰা, সাটকং ৰা ৰেঠনং ৰা হিরঞ্ঞং ৰা সুৰণ্ণং ৰা ছিজ্জমানং পততি. আকাসট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. গমনং উপচ্ছিন্দতি, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

৯৭. ৰেহাসট্ঠং নাম ভণ্ডং ৰেহাসগতং হোতি. মঞ্চে ৰা পীঠে ৰা চীৰরৰংসে ৰা চীৰররজ্জুযা ৰা ভিত্তিখিলে ৰা নাগদন্তে ৰা রুক্খে ৰা লগ্গিতং হোতি, অন্তমসো পত্তাধারকেপি. ৰেহাসট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

৯৮. উদকট্ঠং নাম ভণ্ডং উদকে নিক্খিত্তং হোতি. উদকট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. নিমুজ্জতি ৰা উম্মুজ্জতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. তত্থ জাতকং উপ্পলং ৰা পদুমং ৰা পুণ্ডরীকং ৰা ভিসং ৰা মচ্ছং ৰা কচ্ছপং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

৯৯. নাৰা নাম যায তরতি. নাৰট্ঠং নাম ভণ্ডং নাৰায নিক্খিত্তং হোতি. ‘‘নাৰট্ঠং ভণ্ডং অৰহরিস্সামী’’তি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. নাৰং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. বন্ধনং মোচেতি, আপত্তি দুক্কটস্স. বন্ধনং মোচেত্ৰা আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. উদ্ধং ৰা অধো ৰা তিরিযং ৰা অন্তমসো কেসগ্গমত্তম্পি সঙ্কামেতি, আপত্তি পারাজিকস্স.

১০০. যানং নাম ৰয্হং রথো সকটং সন্দমানিকা. যানট্ঠং নাম ভণ্ডং যানে নিক্খিত্তং হোতি. যানট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. যানং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১০১. ভারো নাম সীসভারো খন্ধভারো কটিভারো ওলম্বকো. সীসে ভারং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. খন্ধং ওরোপেতি, আপত্তি পারাজিকস্স. খন্ধে ভারং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. কটিং ওরোপেতি, আপত্তি পারাজিকস্স. কটিযা ভারং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. হত্থেন গণ্হাতি, আপত্তি পারাজিকস্স. হত্থে ভারং থেয্যচিত্তো ভূমিযং নিক্খিপতি, আপত্তি পারাজিকস্স. থেয্যচিত্তো ভূমিতো গণ্হাতি, আপত্তি পারাজিকস্স.

১০২. আরামো নাম পুপ্ফারামো ফলারামো. আরামট্ঠং নাম ভণ্ডং আরামে চতূহি ঠানেহি নিক্খিত্তং হোতি – ভূমট্ঠং থলট্ঠং, আকাসট্ঠং, ৰেহাসট্ঠং. আরামট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. তত্থ জাতকং মূলং ৰা তচং ৰা পত্তং ৰা পুপ্ফং ৰা ফলং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. আরামং অভিযুঞ্জতি, আপত্তি দুক্কটস্স. সামিকস্স ৰিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স. ধম্মং চরন্তো সামিকং পরাজেতি, আপত্তি পারাজিকস্স. ধম্মং চরন্তো পরজ্জতি, আপত্তি থুল্লচ্চযস্স.

১০৩. ৰিহারট্ঠং নাম ভণ্ডং ৰিহারে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং. ৰিহারট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. ৰিহারং অভিযুঞ্জতি, আপত্তি দুক্কটস্স. সামিকস্স ৰিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স. ধম্মং চরন্তো সামিকং পরাজেতি, আপত্তি পারাজিকস্স. ধম্মং চরন্তো পরজ্জতি, আপত্তি থুল্লচ্চযস্স.

১০৪. খেত্তং নাম যত্থ পুব্বণ্ণং ৰা অপরণ্ণং ৰা জাযতি. খেত্তট্ঠং নাম ভণ্ডং খেত্তে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং. খেত্তট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি, দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. তত্থ জাতকং পুব্বণ্ণং ৰা অপরণ্ণং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. খেত্তং অভিযুঞ্জতি, আপত্তি দুক্কটস্স. সামিকস্স ৰিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স. ধম্মং চরন্তো সামিকং পরাজেতি, আপত্তি পারাজিকস্স. ধম্মং চরন্তো পরজ্জতি, আপত্তি থুল্লচ্চযস্স. খিলং ৰা রজ্জুং ৰা ৰতিং ৰা মরিযাদং ৰা সঙ্কামেতি, আপত্তি দুক্কটস্স. একং পযোগং অনাগতে, আপত্তি থুল্লচ্চযস্স. তস্মিং পযোগে আগতে, আপত্তি পারাজিকস্স.

১০৫. ৰত্থু নাম আরামৰত্থু ৰিহারৰত্থু. ৰত্থুট্ঠং নাম ভণ্ডং ৰত্থুস্মিং চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং. ৰত্থুট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. ৰত্থুং অভিযুঞ্জতি, আপত্তি দুক্কটস্স. সামিকস্স ৰিমতিং উপ্পাদেতি, আপত্তি থুল্লচ্চযস্স. সামিকো ন ময্হং ভৰিস্সতীতি ধুরং নিক্খিপতি, আপত্তি পারাজিকস্স. ধম্মং চরন্তো সামিকং পরাজেতি, আপত্তি পারাজিকস্স. ধম্মং চরন্তো পরজ্জতি, আপত্তি থুল্লচ্চযস্স. খীলং ৰা রজ্জুং ৰা ৰতিং ৰা পাকারং ৰা সঙ্কামেতি, আপত্তি দুক্কটস্স. একং পযোগং অনাগতে আপত্তি থুল্লচ্চযস্স. তস্মিং পযোগে আগতে আপত্তি পারাজিকস্স.

১০৬. গামট্ঠং নাম ভণ্ডং গামে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং. গামট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১০৭. অরঞ্ঞং নাম যং মনুস্সানং পরিগ্গহিতং হোতি, তং অরঞ্ঞং. অরঞ্ঞট্ঠং নাম ভণ্ডং অরঞ্ঞে চতূহি ঠানেহি নিক্খিত্তং হোতি – ভূমট্ঠং, থলট্ঠং, আকাসট্ঠং, ৰেহাসট্ঠং. অরঞ্ঞট্ঠং ভণ্ডং অৰহরিস্সামীতি থেয্যচিত্তো দুতিযং ৰা পরিযেসতি গচ্ছতি ৰা, আপত্তি দুক্কটস্স. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. তত্থ জাতকং কট্ঠং ৰা লতং ৰা তিণং ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১০৮. উদকং নাম ভাজনগতং ৰা হোতি পোক্খরণিযা ৰা তল়াকে ৰা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. অত্তনো ভাজনং পৰেসেত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং উদকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. অত্তনো ভাজনগতং করোতি, আপত্তি পারাজিকস্স. মরিযাদং ভিন্দতি, আপত্তি দুক্কটস্স. মরিযাদং ভিন্দিত্ৰা পঞ্চমাসকং ৰা অতিরেকপঞ্চমাসকং ৰা অগ্ঘনকং উদকং নিক্খামেতি, আপত্তি পারাজিকস্স. অতিরেকমাসকং ৰা ঊনপঞ্চমাসকং ৰা অগ্ঘনকং উদকং নিক্খামেতি, আপত্তি থুল্লচ্চযস্স. মাসকং ৰা ঊনমাসকং ৰা অগ্ঘনকং উদকং নিক্খামেতি, আপত্তি দুক্কটস্স.

১০৯. দন্তপোণং নাম ছিন্নং ৰা অচ্ছিন্নং ৰা. পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১১০. ৰনপ্পতি নাম যো মনুস্সানং পরিগ্গহিতো হোতি রুক্খো পরিভোগো. থেয্যচিত্তো ছিন্দতি, পহারে পহারে আপত্তি দুক্কটস্স. একং পহারং অনাগতে, আপত্তি থুল্লচ্চযস্স. তস্মিং পহারে আগতে, আপত্তি পারাজিকস্স.

১১১. হরণকং নাম অঞ্ঞস্স হরণকং ভণ্ডং. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. সহভণ্ডহারকং পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পারাজিকস্স. পতিতং ভণ্ডং গহেস্সামীতি পাতাপেতি, আপত্তি দুক্কটস্স. পতিতং ভণ্ডং পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১১২. উপনিধি নাম উপনিক্খিত্তং ভণ্ডং. দেহি মে ভণ্ডন্তি ৰুচ্চমানো নাহং গণ্হামীতি ভণতি, আপত্তি দুক্কটস্স. সামিকস্স ৰিমতিং উপ্পাদেতি, আপত্তি থুল্লচ্চযস্স. সামিকো ন ময্হং দস্সতীতি ধুরং নিক্খিপতি, আপত্তি পারাজিকস্স. ধম্মং চরন্তো সামিকং পরাজেতি, আপত্তি পারাজিকস্স. ধম্মং চরন্তো পরজ্জতি, আপত্তি থুল্লচ্চযস্স.

১১৩. সুঙ্কঘাতং নাম রঞ্ঞা ঠপিতং হোতি পব্বতখণ্ডে ৰা নদীতিত্থে ৰা গামদ্ৰারে ৰা – ‘অত্র পৰিট্ঠস্স সুঙ্কং গণ্হন্তূ’তি. তত্র পৰিসিত্ৰা রাজগ্গং [রাজগ্ঘং (সী. স্যা.)] ভণ্ডং পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. পঠমং পাদং সুঙ্কঘাতং অতিক্কামেতি, আপত্তি থুল্লচ্চযস্স. দুতিযং পাদং অতিক্কামেতি, আপত্তি পারাজিকস্স. অন্তোসুঙ্কঘাতে ঠিতো বহিসুঙ্কঘাতং পাতেতি, আপত্তি পারাজিকস্স. সুঙ্কং পরিহরতি, আপত্তি দুক্কটস্স.

১১৪. পাণো নাম মনুস্সপাণো ৰুচ্চতি. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পারাজিকস্স.

অপদং নাম অহি মচ্ছা. পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১১৫. দ্ৰিপদং নাম মনুস্সা, পক্খজাতা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি পারাজিকস্স.

১১৬. চতুপ্পদং নাম – হত্থী অস্সা ওট্ঠা গোণা গদ্রভা পসুকা. থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. পদসা নেস্সামীতি পঠমং পাদং সঙ্কামেতি, আপত্তি থুল্লচ্চযস্স. দুতিযং পাদং সঙ্কামেতি, আপত্তি থুল্লচ্চযস্স. ততিযং পাদং সঙ্কামেতি, আপত্তি থুল্লচ্চযস্স. চতুত্থং পাদং সঙ্কামেতি, আপত্তি পারাজিকস্স.

১১৭. বহুপ্পদং নাম – ৰিচ্ছিকা সতপদী উচ্চালিঙ্গপাণকা. পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স. পদসা নেস্সামীতি সঙ্কামেতি, পদে পদে আপত্তি থুল্লচ্চযস্স. পচ্ছিমং পাদং সঙ্কামেতি, আপত্তি পারাজিকস্স.

১১৮. ওচরকো নাম ভণ্ডং ওচরিত্ৰা আচিক্খতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো তং ভণ্ডং অৰহরতি, আপত্তি উভিন্নং পারাজিকস্স.

ওণিরক্খো নাম আহটং ভণ্ডং গোপেন্তো পঞ্চমাসকং ৰা অতিরেকপঞ্চমাসকং ৰা অগ্ঘনকং থেয্যচিত্তো আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

সংৰিদাৰহারো নাম সম্বহুলা সংৰিদহিত্ৰা একো ভণ্ডং অৰহরতি, আপত্তি সব্বেসং পারাজিকস্স.

১১৯. সঙ্কেতকম্মং নাম সঙ্কেতং করোতি – ‘‘পুরেভত্তং ৰা পচ্ছাভত্তং ৰা রত্তিং ৰা দিৰা ৰা তেন সঙ্কেতেন তং ভণ্ডং অৰহরা’’তি, আপত্তি দুক্কটস্স. তেন সঙ্কেতেন তং ভণ্ডং অৰহরতি, আপত্তি উভিন্নং পারাজিকস্স. তং সঙ্কেতং পুরে ৰা পচ্ছা ৰা তং ভণ্ডং অৰহরতি, মূলট্ঠস্স অনাপত্তি. অৰহারকস্স আপত্তি পারাজিকস্স.

১২০. নিমিত্তকম্মং নাম নিমিত্তং করোতি. অক্খিং ৰা নিখণিস্সামি ভমুকং ৰা উক্খিপিস্সামি সীসং ৰা উক্খিপিস্সামি, তেন নিমিত্তেন তং ভণ্ডং অৰহরাতি, আপত্তি দুক্কটস্স. তেন নিমিত্তেন তং ভণ্ডং অৰহরতি, আপত্তি উভিন্নং পারাজিকস্স. তং নিমিত্তং পুরে ৰা পচ্ছা ৰা তং ভণ্ডং অৰহরতি, মূলট্ঠস্স অনাপত্তি. অৰহারকস্স আপত্তি পারাজিকস্স.

১২১. ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো তং মঞ্ঞমানো তং অৰহরতি, আপত্তি উভিন্নং পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো তং মঞ্ঞমানো অঞ্ঞং অৰহরতি, মূলট্ঠস্স অনাপত্তি. অৰহারকস্স আপত্তি পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো অঞ্ঞং মঞ্ঞমানো তং অৰহরতি, আপত্তি উভিন্নং পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো অঞ্ঞং মঞ্ঞমানো অঞ্ঞং অৰহরতি, মূলট্ঠস্স অনাপত্তি. অৰহারকস্স আপত্তি পারাজিকস্স.

ভিক্খু ভিক্খুং আণাপেতি – ‘‘ইত্থন্নামস্স পাৰদ – ‘ইত্থন্নামো ইত্থন্নামস্স পাৰদতু – ইত্থন্নামো ইত্থন্নামং ভণ্ডং অৰহরতূ’’’তি, আপত্তি দুক্কটস্স. সো ইতরস্স আরোচেতি, আপত্তি দুক্কটস্স. অৰহারকো পটিগ্গণ্হাতি, মূলট্ঠস্স আপত্তি থুল্লচ্চযস্স. সো তং ভণ্ডং অৰহরতি, আপত্তি সব্বেসং পারাজিকস্স.

ভিক্খু ভিক্খুং আণাপেতি – ‘‘ইত্থন্নামস্স পাৰদ – ‘ইত্থন্নামো ইত্থন্নামস্স পাৰদতু – ইত্থন্নামো ইত্থন্নামং ভণ্ডং অৰহরতূ’’’তি, আপত্তি দুক্কটস্স. সো অঞ্ঞং আণাপেতি, আপত্তি দুক্কটস্স. অৰহারকো পটিগ্গণ্হাতি, আপত্তি দুক্কটস্স. সো তং ভণ্ডং অৰহরতি, মূলট্ঠস্স অনাপত্তি. আণাপকস্স চ অৰহারকস্স চ আপত্তি পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো গন্ত্ৰা পুন পচ্চাগচ্ছতি – ‘‘নাহং সক্কোমি তং ভণ্ডং অৰহরিতু’’ন্তি. সো পুন আণাপেতি – ‘‘যদা সক্কোসি তদা তং ভণ্ডং অৰহরা’’তি, আপত্তি দুক্কটস্স. সো তং ভণ্ডং অৰহরতি, আপত্তি উভিন্নং পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো আণাপেত্ৰা ৰিপ্পটিসারী ন সাৰেতি – ‘‘মা অৰহরী’’তি. সো তং ভণ্ডং অৰহরতি, আপত্তি উভিন্নং পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো আণাপেত্ৰা ৰিপ্পটিসারী সাৰেতি – ‘‘মা অৰহরী’’তি. সো ‘‘আণত্তো অহং তযা’’তি, তং ভণ্ডং অৰহরতি, মূলট্ঠস্স অনাপত্তি. অৰহারকস্স আপত্তি পারাজিকস্স.

ভিক্খু ভিক্খুং আণাপেতি – ‘‘ইত্থন্নামং ভণ্ডং অৰহরা’’তি, আপত্তি দুক্কটস্স. সো আণাপেত্ৰা ৰিপ্পটিসারী সাৰেতি – ‘‘মা অৰহরী’’তি. সো ‘‘সাধূ’’তি [সুট্ঠূতি (ক.)]? ওরমতি, উভিন্নং অনাপত্তি.

১২২. পঞ্চহি আকারেহি অদিন্নং আদিযন্তস্স আপত্তি পারাজিকস্স – পরপরিগ্গহিতঞ্চ হোতি, পরপরিগ্গহিতসঞ্ঞী চ, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১২৩. পঞ্চহি আকারেহি অদিন্নং আদিযন্তস্স আপত্তি থুল্লচ্চযস্স – পরপরিগ্গহিতঞ্চ হোতি, পরপরিগ্গহিতসঞ্ঞী চ, লহুকো চ হোতি পরিক্খারো, অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি থুল্লচ্চযস্স.

১২৪. পঞ্চহি আকারেহি অদিন্নং আদিযন্তস্স আপত্তি দুক্কটস্স. পরপরিগ্গহিতঞ্চ হোতি, পরপরিগ্গহিতসঞ্ঞী চ, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি দুক্কটস্স.

১২৫. ছহি আকারেহি অদিন্নং আদিযন্তস্স আপত্তি পারাজিকস্স. ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস. ফন্দাপেতি, আপত্তি থুল্লচ্চযস্স. ঠানা চাৰেতি, আপত্তি পারাজিকস্স.

১২৬. ছহি আকারেহি অদিন্নং আদিযন্তস্স আপত্তি থুল্লচ্চযস্স. ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, লহুকো চ হোতি পরিক্খারো অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি থুল্লচ্চযস্স.

১২৭. ছহি আকারেহি অদিন্নং আদিযন্তস্স আপত্তি দুক্কটস্স. ন চ সকসঞ্ঞী, ন চ ৰিস্সাসগ্গাহী, ন চ তাৰকালিকং, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি দুক্কটস্স.

১২৮. পঞ্চহি আকারেহি অদিন্নং আদিযন্তস্স আপত্তি দুক্কটস্স. ন চ পরপরিগ্গহিতং হোতি, পরপরিগ্গহিতসঞ্ঞী চ, গরুকো চ হোতি পরিক্খারো, পঞ্চমাসকো ৰা অতিরেকপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি দুক্কটস্স.

১২৯. পঞ্চহি আকারেহি অদিন্নং আদিযন্তস্স আপত্তি দুক্কটস্স. ন চ পরপরিগ্গহিতং হোতি, পরপরিগ্গহিতসঞ্ঞী চ, লহুকো চ হোতি পরিক্খারো, অতিরেকমাসকো ৰা ঊনপঞ্চমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি দুক্কটস্স.

১৩০. পঞ্চহি আকারেহি অদিন্নং আদিযন্তস্স আপত্তি দুক্কটস্স. ন চ পরপরিগ্গহিতং হোতি, পরপরিগ্গহিতসঞ্ঞী চ, লহুকো চ হোতি পরিক্খারো, মাসকো ৰা ঊনমাসকো ৰা, থেয্যচিত্তঞ্চ পচ্চুপট্ঠিতং হোতি. আমসতি, আপত্তি দুক্কটস্স. ফন্দাপেতি, আপত্তি দুক্কটস্স. ঠানা চাৰেতি, আপত্তি দুক্কটস্স.

১৩১. অনাপত্তি সসঞ্ঞিস্স, ৰিস্সাসগ্গাহে, তাৰকালিকে, পেতপরিগ্গহে, তিরচ্ছানগতপরিগ্গহে, পংসুকূলসঞ্ঞিস্স, উম্মত্তকস্স, (খিত্তচিত্তস্স ৰেদনাট্টস্স) [(খিত্তচিত্তস্স ৰেদনাট্টস্স) কত্থচি নত্থি] আদিকম্মিকস্সাতি.

অদিন্নাদানম্হি পঠমভাণৰারো নিট্ঠিতো.

ৰিনীতৰত্থুউদ্দানগাথা

রজকেহি পঞ্চ অক্খাতা, চতুরো অত্থরণেহি চ;

অন্ধকারেন ৰে পঞ্চ, পঞ্চ হারণকেন চ.

নিরুত্তিযা পঞ্চ অক্খাতা, ৰাতেহি অপরে দুৰে;

অসম্ভিন্নে কুসাপাতো, জন্তগ্গেন [জন্তাঘরেন (স্যা.)] সহা দস.

ৰিঘাসেহি পঞ্চ অক্খাতা, পঞ্চ চেৰ অমূলকা;

দুব্ভিক্খে কুরমংসঞ্চ [কূরমংসঞ্চ (স্যা.)], পূৰসক্খলিমোদকা.

ছপরিক্খারথৰিকা, ভিসিৰংসা ন নিক্খমে;

খাদনীযঞ্চ ৰিস্সাসং, সসঞ্ঞাযপরে দুৰে.

সত্ত নাৰহরামাতি, সত্ত চেৰ অৰাহরুং;

সঙ্ঘস্স অৰহরুং সত্ত, পুপ্ফেহি অপরে দুৰে.

তযো চ ৰুত্তৰাদিনো, মণি তীণি অতিক্কমে;

সূকরা চ মিগা মচ্ছা, যানঞ্চাপি পৰত্তযি.

দুৰে পেসী দুৰে দারূ, পংসুকূলং দুৰে দকা;

অনুপুব্বৰিধানেন, তদঞ্ঞো ন পরিপূরযি.

সাৰত্থিযা চতুরো মুট্ঠী, দ্ৰে ৰিঘাসা দুৰে তিণা;

সঙ্ঘস্স ভাজযুং সত্ত, সত্ত চেৰ অস্সামিকা.

দারুদকা মত্তিকা দ্ৰে তিণানি;

সঙ্ঘস্স সত্ত অৰহাসি সেয্যং;

সস্সামিকং ন চাপি নীহরেয্য;

হরেয্য সস্সামিকং তাৰকালিকং.

চম্পা রাজগহে চেৰ, ৰেসালিযা চ অজ্জুকো;

বারাণসী চ কোসম্বী, সাগলা দল়্হিকেন চাতি.

ৰিনীতৰত্থু

১৩২. তেন খো পন সমযেন ছব্বগ্গিযা ভিক্খূ রজকত্থরণং গন্ত্ৰা রজকভণ্ডিকং অৰহরিংসু. তেসং কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং. কচ্চি নু খো মযং পারাজিকং আপত্তিং আপন্না’’তি. ভগৰতো এতমত্থং আরোচেসুং. ‘‘আপত্তিং তুম্হে, ভিক্খৰে, আপন্না পারাজিক’’ন্তি.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তং উপ্পাদেসি. তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং পারাজিকং আপত্তিং আপন্নো’’তি? ভগৰতো এতমত্থং আরোচেসি. ‘‘অনাপত্তি, ভিক্খু, চিত্তুপ্পাদে’’তি.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো আমসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো ফন্দাপেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি থুল্লচ্চযস্সা’’তি.

তেন খো পন সমযেন অঞ্ঞতরো ভিক্খু রজকত্থরণং গন্ত্ৰা মহগ্ঘং দুস্সং পস্সিত্ৰা থেয্যচিত্তো ঠানা চাৰেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৩৩. তেন খো পন সমযেন অঞ্ঞতরো পিণ্ডচারিকো ভিক্খু মহগ্ঘং উত্তরত্থরণং পস্সিত্ৰা থেয্যচিত্তং উপ্পাদেসি…পে… থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো ঠানা চাৰেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৩৪. তেন খো পন সমযেন অঞ্ঞতরো ভিক্খু দিৰা ভণ্ডং পস্সিত্ৰা নিমিত্তং অকাসি – ‘রত্তিং অৰহরিস্সামী’তি. সো তং মঞ্ঞমানো তং অৰহরি…পে… তং মঞ্ঞমানো অঞ্ঞং অৰহরি…পে… অঞ্ঞং মঞ্ঞমানো তং অৰহরি…পে… অঞ্ঞং মঞ্ঞমানো অঞ্ঞং অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু দিৰা ভণ্ডং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি. সো তং মঞ্ঞমানো অত্তনো ভণ্ডং অৰহরি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.

তেন খো পন সমযেন অঞ্ঞতরো ভিক্খু অঞ্ঞস্স ভণ্ডং হরন্তো সীসে ভারং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো খন্ধং ওরোপেসি…পে… খন্ধে ভারং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো কটিং ওরোপেসি…পে… কটিযা ভারং থেয্যচিত্তো আমসি…পে… থেয্যচিত্তো ফন্দাপেসি…পে… থেয্যচিত্তো হত্থেন অগ্গহেসি…পে… হত্থে ভারং থেয্যচিত্তো ভূমিযং নিক্খিপি…পে… থেয্যচিত্তো ভূমিতো অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৩৫. তেন খো পন সমযেন অঞ্ঞতরো ভিক্খু অজ্ঝোকাসে চীৰরং পত্থরিত্ৰা ৰিহারং পাৰিসি. অঞ্ঞতরো ভিক্খু – ‘মাযিদং চীৰরং নস্সী’তি, পটিসামেসি. সো নিক্খমিত্ৰা তং ভিক্খুং পুচ্ছি – ‘‘আৰুসো, ময্হং চীৰরং কেন অৰহট’’ন্তি? সো এৰমাহ – ‘‘মযা অৰহট’’ন্তি. ‘‘সো তং আদিযি, অস্সমণোসি ত্ৰ’’ন্তি. তস্স কুক্কুচ্চং অহোসি…পে…. ভগৰতো এতমত্থং আরোচেসি. ‘‘কিংচিত্তো ত্ৰং, ভিক্খূ’’তি? ‘‘নিরুত্তিপথো অহং, ভগৰা’’তি. ‘‘অনাপত্তি, ভিক্খু, নিরুত্তিপথে’’তি.

তেন খো পন সমযেন অঞ্ঞতরো ভিক্খু পীঠে চীৰরং নিক্খিপিত্ৰা. পীঠে নিসীদনং নিক্খিপিত্ৰা… হেট্ঠাপীঠে পত্তং নিক্খিপিত্ৰা ৰিহারং পাৰিসি. অঞ্ঞতরো ভিক্খু – ‘‘মাযং পত্তো নস্সী’’তি পটিসামেসি. সো নিক্খমিত্ৰা তং ভিক্খুং পুচ্ছি – ‘‘আৰুসো, ময্হং পত্তো কেন অৰহটো’’তি? সো এৰমাহ – ‘‘মযা অৰহটো’’তি. ‘‘সো তং আদিযি, অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, নিরুত্তিপথে’’তি.

তেন খো পন সমযেন অঞ্ঞতরা ভিক্খুনী ৰতিযা চীৰরং পত্থরিত্ৰা ৰিহারং পাৰিসি. অঞ্ঞতরা ভিক্খুনী – ‘মাযিদং চীৰরং নস্সী’তি পটিসামেসি. সা নিক্খমিত্ৰা তং ভিক্খুনিং পুচ্ছি – ‘‘অয্যে, ময্হং চীৰরং কেন অৰহট’’ন্তি? সা এৰমাহ – ‘‘মযা অৰহট’’ন্তি. ‘‘সা তং আদিযি, অস্সমণীসি ত্ৰ’’ন্তি. তস্সা কুক্কুচ্চং অহোসি. অথ খো সা ভিক্খুনী ভিক্খুনীনং এতমত্থং আরোচেসি. ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং…পে… ‘‘অনাপত্তি, ভিক্খৰে, নিরুত্তিপথে’’তি.

১৩৬. তেন খো পন সমযেন অঞ্ঞতরো ভিক্খু ৰাতমণ্ডলিকায উক্খিত্তং সাটকং পস্সিত্ৰা সামিকানং দস্সামীতি, অগ্গহেসি. সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘কিংচিত্তো ত্ৰং ভিক্খূ’’তি? ‘‘অথেয্যচিত্তো অহং, ভগৰা’’তি. অনাপত্তি, ভিক্খু, অথেয্যচিত্তস্সা’’তি.

তেন খো পন সমযেন অঞ্ঞতরো ভিক্খু ৰাতমণ্ডলিকায উক্খিত্তং ৰেঠনং পস্সিত্ৰা ‘পুরে সামিকা পস্সন্তী’তি থেয্যচিত্তো অগ্গহেসি. সামিকা তং ভিক্খুং চোদেসুং – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৩৭. তেন খো পন সমযেন অঞ্ঞতরো ভিক্খু সুসানং গন্ত্ৰা অভিন্নে সরীরে পংসুকূলং অগ্গহেসি. তস্মিঞ্চ সরীরে পেতো অধিৰত্থো হোতি. অথ খো সো পেতো তং ভিক্খুং এতদৰোচ – ‘‘মা, ভন্তে, ময্হং সাটকং অগ্গহেসী’’তি. সো ভিক্খু অনাদিযন্তো অগমাসি. অথ খো তং সরীরং উট্ঠহিত্ৰা তস্স ভিক্খুনো পিট্ঠিতো পিট্ঠিতো অনুবন্ধি. অথ খো সো ভিক্খু ৰিহারং পৰিসিত্ৰা দ্ৰারং থকেসি. অথ খো তং সরীরং তত্থেৰ পরিপতি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. ন চ, ভিক্খৰে, অভিন্নে সরীরে পংসুকূলং গহেতব্বং. সো গণ্হেয্য, আপত্তি দুক্কটস্সা’’তি.

১৩৮. তেন খো পন সমযেন অঞ্ঞতরো ভিক্খু সঙ্ঘস্স চীৰরে ভাজীযমানে থেয্যচিত্তো কুসং সঙ্কামেত্ৰা চীৰরং অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৩৯. তেন খো পন সমযেন আযস্মা আনন্দো জন্তাঘরে অঞ্ঞতরস্স ভিক্খুনো অন্তরৰাসকং অত্তনো মঞ্ঞমানো নিৰাসেসি. অথ খো সো ভিক্খু আযস্মন্তং আনন্দং এতদৰোচ – ‘‘কিস্স মে ত্ৰং, আৰুসো আনন্দ, অন্তরৰাসকং নিৰাসেসী’’তি? ‘‘সকসঞ্ঞী অহং, আৰুসো’’তি. ভগৰতো এতমত্থং আরোচেসুং. ‘‘অনাপত্তি, ভিক্খৰে, সকসঞ্ঞিস্সা’’তি.

১৪০. তেন খো পন সমযেন সম্বহুলা ভিক্খূ গিজ্ঝকূটা পব্বতা ওরোহন্তা সীহৰিঘাসং পস্সিত্ৰা পচাপেত্ৰা পরিভুঞ্জিংসু. তেসং কুক্কুচ্চং অহোসি…পে… ‘‘অনাপত্তি, ভিক্খৰে, সীহৰিঘাসে’’তি.

তেন খো পন সমযেন সম্বহুলা ভিক্খূ গিজ্ঝকূটা পব্বতা ওরোহন্তা ব্যগ্ঘৰিঘাসং পস্সিত্ৰা… দীপিৰিঘাসং পস্সিত্ৰা… তরচ্ছৰিঘাসং পস্সিত্ৰা… কোকৰিঘাসং পস্সিত্ৰা পচাপেত্ৰা পরিভুঞ্জিংসু. তেসং কুক্কুচ্চং অহোসি…পে… ‘‘অনাপত্তি, ভিক্খৰে, তিরচ্ছানগতপরিগ্গহে’’তি.

১৪১. তেন খো পন সমযেন অঞ্ঞতরো ভিক্খু সঙ্ঘস্স ওদনে ভাজীযমানে – ‘অপরস্স ভাগং দেহী’তি অমূলকং অগ্গহেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি সম্পজানমুসাৰাদে পাচিত্তিযস্সা’’তি.

তেন খো পন সমযেন অঞ্ঞতরো ভিক্খু সঙ্ঘস্স খাদনীযে ভাজিযমানে… সঙ্ঘস্স পূৰে ভাজিযমানে… সঙ্ঘস্স উচ্ছুম্হি ভাজিযমানে… সঙ্ঘস্স তিম্বরূসকে ভাজিযমানে – ‘অপরস্স ভাগং দেহী’তি অমূলকং অগ্গহেসি. তস্স কুক্কুচ্চং অহোসি…পে…. ‘‘অনাপত্তি, ভিক্খু, পারাজিকস্স. আপত্তি সম্পজানমুসাৰাদে পাচিত্তিযস্সা’’তি.

১৪২. তেন খো পন সমযেন অঞ্ঞতরো ভিক্খু দুব্ভিক্খে ওদনীযঘরং পৰিসিত্ৰা পত্তপূরং ওদনং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু দুব্ভিক্খে সূনঘরং [সূনাঘরং (সী. স্যা)] পৰিসিত্ৰা পত্তপূরং মংসং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু দুব্ভিক্খে পূৰঘরং পৰিসিত্ৰা পত্তপূরং পূৰং থেয্যচিত্তো অৰহরি…পে… পত্তপূরা সক্খলিযো থেয্যচিত্তো অৰহরি…পে… পত্তপূরে মোদকে থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৪৩. তেন খো পন সমযেন অঞ্ঞতরো ভিক্খু দিৰা পরিক্খারং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি. সো তং মঞ্ঞমানো তং অৰহরি…পে… তং মঞ্ঞমানো অঞ্ঞং অৰহরি…পে… অঞ্ঞং মঞ্ঞমানো তং অৰহরি…পে… অঞ্ঞং মঞ্ঞমানো অঞ্ঞং অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু দিৰা পরিক্খারং পস্সিত্ৰা নিমিত্তং অকাসি – ‘‘রত্তিং অৰহরিস্সামী’’তি. সো তং মঞ্ঞমানো অত্তনো পরিক্খারং অৰহরি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.

১৪৪. তেন খো পন সমযেন অঞ্ঞতরো ভিক্খু পীঠে থৰিকং পস্সিত্ৰা – ‘‘ইতো গণ্হন্তো পারাজিকো ভৰিস্সামী’’তি সহ পীঠকেন সঙ্কামেত্ৰা অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু সঙ্ঘস্স ভিসিং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৪৫. তেন খো পন সমযেন অঞ্ঞতরো ভিক্খু চীৰরৰংসে চীৰরং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু ৰিহারে চীৰরং অৰহরিত্ৰা – ‘‘ইতো নিক্খমন্তো পারাজিকো ভৰিস্সামী’’তি ৰিহারা ন নিক্খমি…পে… ভগৰতো এতমত্থং আরোচেসুং. ‘‘নিক্খমি [নিক্খমেয্য (সী. স্যা.)] ৰা সো, ভিক্খৰে, মোঘপুরিসো ন ৰা নিক্খমি [নিক্খমেয্য (সী. স্যা.)], আপত্তি পারাজিকস্সা’’তি.

১৪৬. তেন খো পন সমযেন দ্ৰে ভিক্খূ সহাযকা হোন্তি. একো ভিক্খু গামং পিণ্ডায পাৰিসি. দুতিযো ভিক্খু সঙ্ঘস্স খাদনীযে ভাজীযমানে সহাযকস্স ভাগং গহেত্ৰা তস্স ৰিস্সসন্তো পরিভুঞ্জি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘কিং চিত্তো ত্ৰং, ভিক্খূ’’তি? ‘‘ৰিস্সাসগ্গাহো অহং, ভগৰা’’তি. ‘‘অনাপত্তি, ভিক্খু, ৰিস্সাসগ্গাহে’’তি.

১৪৭. তেন খো পন সমযেন সম্বহুলা ভিক্খূ চীৰরকম্মং করোন্তি. সঙ্ঘস্স খাদনীযে ভাজীযমানে সব্বেসং পটিৰিসা আহরিত্ৰা উপনিক্খিত্তা হোন্তি. অঞ্ঞতরো ভিক্খু অঞ্ঞতরস্স ভিক্খুনো পটিৰিসং অত্তনো মঞ্ঞমানো পরিভুঞ্জি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘কিংচিত্তো ত্ৰং, ভিক্খূ’’তি? ‘‘সকসঞ্ঞী অহং, ভগৰা’’তি. ‘‘অনাপত্তি, ভিক্খু, সকসঞ্ঞিস্সা’’তি.

তেন খো পন সমযেন সম্বহুলা ভিক্খূ চীৰরকম্মং করোন্তি. সঙ্ঘস্স খাদনীযে ভাজিযমানে অঞ্ঞতরস্স ভিক্খুনো পত্তেন অঞ্ঞতরস্স ভিক্খুনো পটিৰিসো আহরিত্ৰা উপনিক্খিত্তো হোতি. পত্তসামিকো ভিক্খু অত্তনো মঞ্ঞমানো পরিভুঞ্জি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, সকসঞ্ঞিস্সা’’তি.

১৪৮. তেন খো পন সমযেন অম্বচোরকা অম্বং পাতেত্ৰা ভণ্ডিকং আদায অগমংসু. সামিকা তে চোরকে অনুবন্ধিংসু. চোরকা সামিকে পস্সিত্ৰা ভণ্ডিকং পাতেত্ৰা পলাযিংসু. ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ভগৰতো এতমত্থং আরোচেসুং. ‘‘কিংচিত্তা তুম্হে, ভিক্খৰে’’তি? ‘‘পংসুকূলসঞ্ঞিনো মযং, ভগৰা’’তি. ‘‘অনাপত্তি, ভিক্খৰে, পংসুকূলসঞ্ঞিস্সা’’তি.

তেন খো পন সমযেন জম্বুচোরকা… লবুজচোরকা… পনসচোরকা… তালপক্কচোরকা… উচ্ছুচোরকা… তিম্বরূসকচোরকা তিম্বরূসকে উচ্চিনিত্ৰা ভণ্ডিকং আদায অগমংসু. সামিকা তে চোরকে অনুবন্ধিংসু. চোরকা সামিকে পস্সিত্ৰা ভণ্ডিকং পাতেত্ৰা পলাযিংসু. ভিক্খূ পংসুকূলসঞ্ঞিনো পটিগ্গহাপেত্ৰা পরিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘অনাপত্তি, ভিক্খৰে, পংসুকূলসঞ্ঞিস্সা’’তি.

তেন খো পন সমযেন অম্বচোরকা অম্বং পাতেত্ৰা ভণ্ডিকং আদায অগমংসু. সামিকা তে চোরকে অনুবন্ধিংসু. চোরকা সামিকে পস্সিত্ৰা ভণ্ডিকং পাতেত্ৰা পলাযিংসু. ভিক্খূ – ‘পুরে সামিকা পস্সন্তী’তি, থেয্যচিত্তা পরিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘আপত্তিং তুম্হে, ভিক্খৰে, আপন্না পারাজিক’’ন্তি.

তেন খো পন সমযেন জম্বুচোরকা… লবুজচোরকা… পনসচোরকা… তালপক্কচোরকা… উচ্ছুচোরকা… তিম্বরূসকচোরকা তিম্বরূসকে উচ্চিনিত্ৰা ভণ্ডিকং আদায অগমংসু. সামিকা তে চোরকে অনুবন্ধিংসু. চোরকা সামিকে পস্সিত্ৰা ভণ্ডিকং পাতেত্ৰা পলাযিংসু. ভিক্খূ – ‘পুরে সামিকা পস্সন্তী’তি, থেয্যচিত্তা পরিভুঞ্জিংসু. সামিকা তে ভিক্খূ চোদেসুং – ‘‘অস্সমণাত্থ তুম্হে’’তি. তেসং কুক্কুচ্চং অহোসি…পে… ‘‘আপত্তিং তুম্হে, ভিক্খৰে, আপন্না পারাজিক’’ন্তি.

তেন খো পন সমযেন অঞ্ঞতরো ভিক্খু সঙ্ঘস্স অম্বং থেয্যচিত্তো অৰহরি… সঙ্ঘস্স জম্বুং… সঙ্ঘস্স লবুজং… সঙ্ঘস্স পনসং… সঙ্ঘস্স তালপক্কং… সঙ্ঘস্স উচ্ছুং… সঙ্ঘস্স তিম্বরূসকং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

১৪৯. তেন খো পন সমযেন অঞ্ঞতরো ভিক্খু পুপ্ফারামং গন্ত্ৰা ওচিতং পুপ্ফং পঞ্চমাসগ্ঘনকং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.

তেন খো পন সমযেন অঞ্ঞতরো ভিক্খু পুপ্ফারামং গন্ত্ৰা পুপ্ফং ওচিনিত্ৰা পঞ্চমাসগ্ঘনকং থেয্যচিত্তো অৰহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু আপন্নো পারাজিক’’ন্তি.

১৫০. তেন খো পন সমযেন অঞ্ঞতরো ভিক্খু গামকং গচ্ছন্তো অঞ্ঞতরং ভিক্খুং এতদৰোচ – ‘‘আৰুসো, তুয্হং উপট্ঠাককুলং ৰুত্তো ৰজ্জেমী’’তি. সো গন্ত্ৰা একং সাটকং আহরাপেত্ৰা অত্তনা পরিভুঞ্জি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. ন চ, ভিক্খৰে, ৰুত্তো ৰজ্জেমীতি ৰত্তব্বো. যো ৰদেয্য, আপত্তি দুক্কটস্সা’’তি.

তেন খো পন সমযেন অঞ্ঞতরো ভিক্খু গামকং গচ্ছতি. অঞ্ঞতরো ভিক্খু তং ভিক্খুং এতদৰোচ – ‘‘আৰুসো, ময্হং উপট্ঠাককুলং ৰুত্তো ৰজ্জেহী’’তি. সো গন্ত্ৰা যুগসাটকং আহরাপেত্ৰা একং অত্তনা পরিভুঞ্জি, একং তস্স ভিক্খুনো অদাসি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. ন চ, ভিক্খৰে, ৰুত্তো ৰজ্জেহীতি ৰত্তব্বো. যো ৰদেয্য, আপত্তি দুক্কটস্সা’’তি.

তেন খো পন সমযেন অঞ্ঞতরো ভিক্খু গামকং গচ্ছন্তো অঞ্ঞতরং ভিক্খুং এতদৰোচ – ‘‘আৰুসো, তুয্হং উপট্ঠাককুলং ৰুত্তো ৰজ্জেমী’’তি. সোপি এৰমাহ – ‘‘ৰুত্তো ৰজ্জেহী’’তি. সো গন্ত্ৰা আল়্হকং সপ্পিং তুলং গুল়ং দোণং তণ্ডুলং আহরাপেত্ৰা অত্তনা পরিভুঞ্জি. সো জানিত্ৰা তং চোদেসি – ‘‘অস্সমণোসি ত্ৰ’’ন্তি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. ন চ, ভিক্খৰে, ৰুত্তো ৰজ্জেমীতি ৰত্তব্বো, ন চ ৰুত্তো ৰজ্জেহীতি ৰত্তব্বো. যো ৰদেয্য, আপত্তি দুক্কটস্সা’’তি.