ৰিনীতৰত্থু
৬৭. তেন খো পন সমযেন অঞ্ঞতরো ভিক্খু মক্কটিযা মেথুনং ধম্মং পটিসেৰি. তস্স কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো অহং পারাজিকং আপত্তিং আপন্নো’’তি? ভগৰতো এতমত্থং আরোচেসি. ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন সম্বহুলা ৰেসালিকা ৰজ্জিপুত্তকা ভিক্খূ সিক্খং অপচ্চক্খায দুব্বল্যং অনাৰিকত্ৰা মেথুনং ধম্মং পটিসেৰিংসু. তেসং কুক্কুচ্চং অহোসি – ‘‘ভগৰতা সিক্খাপদং পঞ্ঞত্তং, কচ্চি নু খো মযং পারাজিকং আপত্তিং আপন্না’’তি? ভগৰতো এতমত্থং আরোচেসুং. ‘‘আপত্তিং তুম্হে, ভিক্খৰে, আপন্না পারাজিক’’ন্তি.
তেন খো পন সমযেন অঞ্ঞতরো ভিক্খু – ‘এৰং মে অনাপত্তি ভৰিস্সতী’তি, গিহিলিঙ্গেন মেথুনং ধম্মং পটিসেৰি. তস্স কুক্কুচ্চং অহোসি ‘‘ভগৰতা সিক্খাপদং পঞ্ঞত্তং, কচ্চি নু খো অহং পারাজিকং আপত্তিং আপন্নো’’তি? ভগৰতো এতমত্থং আরোচেসি. ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু – ‘এৰং মে অনাপত্তি ভৰিস্সতী’তি, নগ্গো হুত্ৰা মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু – ‘এৰং মে অনাপত্তি ভৰিস্সতী’তি, কুসচীরং নিৰাসেত্ৰা… ৰাকচীরং নিৰাসেত্ৰা… ফলকচীরং নিৰাসেত্ৰা… কেসকম্বলং নিৰাসেত্ৰা… ৰালকম্বলং নিৰাসেত্ৰা… উলূকপক্খিকং নিৰাসেত্ৰা… অজিনক্খিপং নিৰাসেত্ৰা মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো পিণ্ডচারিকো ভিক্খু পীঠকে নিপন্নং দারিকং পস্সিত্ৰা সারত্তো অঙ্গুট্ঠং অঙ্গজাতং পৰেসেসি. সা কালমকাসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি সঙ্ঘাদিসেসস্সা’’তি.
৬৮. তেন খো পন সমযেন অঞ্ঞতরো মাণৰকো উপ্পলৰণ্ণায ভিক্খুনিযা পটিবদ্ধচিত্তো হোতি. অথ খো সো মাণৰকো উপ্পলৰণ্ণায ভিক্খুনিযা গামং পিণ্ডায পৰিট্ঠায কুটিকং পৰিসিত্ৰা নিলীনো অচ্ছি. উপ্পলৰণ্ণা ভিক্খুনী পচ্ছাভত্তং পিণ্ডপাতপটিক্কন্তা পাদে পক্খালেত্ৰা কুটিকং পৰিসিত্ৰা মঞ্চকে নিসীদি. অথ খো সো মাণৰকো উপ্পলৰণ্ণং ভিক্খুনিং উগ্গহেত্ৰা দূসেসি. উপ্পলৰণ্ণা ভিক্খুনী ভিক্খুনীনং এতমত্থং আরোচেসি. ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং. ‘‘অনাপত্তি, ভিক্খৰে, অসাদিযন্তিযা’’তি.
৬৯. তেন খো পন সমযেন অঞ্ঞতরস্স ভিক্খুনো ইত্থিলিঙ্গং পাতুভূতং হোতি. ভগৰতো এতমত্থং আরোচেসুং. ‘‘অনুজানামি, ভিক্খৰে, তংযেৰ উপজ্ঝং তমেৰ উপসম্পদং তানিযেৰ [তানি (সী. স্যা.)] ৰস্সানি ভিক্খুনীহি সঙ্গমিতুং [সঙ্কমিতুং (সী. স্যা.)]. যা আপত্তিযো ভিক্খূনং ভিক্খুনীহি সাধারণা তা আপত্তিযো ভিক্খুনীনং সন্তিকে ৰুট্ঠাতুং. যা আপত্তিযো ভিক্খূনং ভিক্খুনীহি অসাধারণা তাহি আপত্তীহি অনাপত্তী’’তি.
তেন খো পন সমযেন অঞ্ঞতরিস্সা ভিক্খুনিযা পুরিসলিঙ্গং পাতুভূতং হোতি. ভগৰতো এতমত্থং আরোচেসুং. ‘‘অনুজানামি, ভিক্খৰে, তংযেৰ উপজ্ঝং তমেৰ উপসম্পদং তানিযেৰ [তানি (সী. স্যা.)] ৰস্সানি ভিক্খূহি সঙ্গমিতুং [সঙ্কমিতুং (সী. স্যা.)]. যা আপত্তিযো ভিক্খুনীনং ভিক্খূহি সাধারণা তা আপত্তিযো ভিক্খূনং সন্তিকে ৰুট্ঠাতুং. যা আপত্তিযো ভিক্খুনীনং ভিক্খূহি অসাধারণা তাহি আপত্তীহি অনাপত্তী’’তি.
৭০. তেন খো পন সমযেন অঞ্ঞতরো ভিক্খু – ‘এৰং মে অনাপত্তি ভৰিস্সতী’তি, মাতুযা মেথুনং ধম্মং পটিসেৰি… ধীতুযা মেথুনং ধম্মং পটিসেৰি… ভগিনিযা মেথুনং ধম্মং পটিসেৰি… তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু পুরাণদুতিযিকায মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
৭১. তেন খো পন সমযেন অঞ্ঞতরো ভিক্খু মুদুপিট্ঠিকো হোতি. সো অনভিরতিযা পীল়িতো অত্তনো অঙ্গজাতং মুখেন অগ্গহেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পরাজিক’’ন্তি.
তেন খো পন সমযেন অঞ্ঞতরো ভিক্খু লম্বী হোতি. সো অনভিরতিযা পীল়িতো অত্তনো অঙ্গজাতং অত্তনো ৰচ্চমগ্গং পৰেসেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু মতসরীরং পস্সি. তস্মিঞ্চ সরীরে অঙ্গজাতসামন্তা ৰণো হোতি. সো – ‘এৰং মে অনাপত্তি ভৰিস্সতী’তি, অঙ্গজাতে অঙ্গজাতং পৰেসেত্ৰা ৰণেন নীহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু মতসরীরং পস্সি. তস্মিঞ্চ সরীরে অঙ্গজাতসামন্তা ৰণো হোতি. সো – ‘এৰং মে অনাপত্তি ভৰিস্সতী’তি, ৰণে অঙ্গজাতং পৰেসেত্ৰা অঙ্গজাতেন নীহরি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু সারত্তো লেপচিত্তস্স নিমিত্তং অঙ্গজাতেন ছুপি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.
তেন খো পন সমযেন অঞ্ঞতরো ভিক্খু সারত্তো দারুধীতলিকায নিমিত্তং অঙ্গজাতেন ছুপি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.
৭২. তেন খো পন সমযেন সুন্দরো নাম ভিক্খু রাজগহা পব্বজিতো রথিকায [রথিযায (ক.)] গচ্ছতি. অঞ্ঞতরা ইত্থী – ‘মুহুত্তং [ইত্থী তং পস্সিত্ৰা এতদৰোচ মুহুত্তং (স্যা.)], ভন্তে, আগমেহি, ৰন্দিস্সামী’তি সা ৰন্দন্তী অন্তরৰাসকং উক্খিপিত্ৰা মুখেন অঙ্গজাতং অগ্গহেসি. তস্স কুক্কুচ্চং অহোসি…পে… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি. ‘‘অনাপত্তি, ভিক্খু, অসাদিযন্তস্সা’’তি.
তেন খো পন সমযেন অঞ্ঞতরা ইত্থী ভিক্খুং পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি. ‘‘অলং, ভগিনি, নেতং কপ্পতী’’তি. ‘‘এহি, ভন্তে, অহং ৰাযমিস্সামি, ত্ৰং মা ৰাযমি, এৰং তে অনাপত্তি ভৰিস্সতী’’তি. সো ভিক্খু তথা অকাসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরা ইত্থী ভিক্খুং পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি. ‘‘অলং, ভগিনি, নেতং কপ্পতী’’তি. ‘‘এহি ভন্তে, ত্ৰং ৰাযম, অহং ন ৰাযমিস্সামি, এৰং তে অনাপত্তি ভৰিস্সতী’’তি. সো ভিক্খু তথা অকাসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরা ইত্থী ভিক্খুং পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি. ‘‘অলং, ভগিনি, নেতং কপ্পতী’’তি. ‘‘এহি, ভন্তে, অব্ভন্তরং ঘট্টেত্ৰা বহি মোচেহি…পে… বহি ঘট্টেত্ৰা অব্ভন্তরং মোচেহি, এৰং তে অনাপত্তি ভৰিস্সতী’’তি. সো ভিক্খু তথা অকাসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
৭৩. তেন খো পন সমযেন অঞ্ঞতরো ভিক্খু সিৰথিকং গন্ত্ৰা অক্খাযিতং সরীরং পস্সিত্ৰা তস্মিং মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু সিৰথিকং গন্ত্ৰা যেভুয্যেন অক্খাযিতং সরীরং পস্সিত্ৰা তস্মিং মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু সিৰথিকং গন্ত্ৰা যেভুয্যেন খাযিতং সরীরং পস্সিত্ৰা তস্মিং মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি থুল্লচ্চযস্সা’’তি.
তেন খো পন সমযেন অঞ্ঞতরো ভিক্খু সিৰথিকং গন্ত্ৰা ছিন্নসীসং পস্সিত্ৰা ৰট্টকতে মুখে ছুপন্তং অঙ্গজাতং পৰেসেসি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু সিৰথিকং গন্ত্ৰা ছিন্নসীসং পস্সিত্ৰা ৰট্টকতে মুখে অচ্ছুপন্তং অঙ্গজাতং পৰেসেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.
তেন খো পন সমযেন অঞ্ঞতরো ভিক্খু অঞ্ঞতরিস্সা ইত্থিযা পটিবদ্ধচিত্তো হোতি. সা কালঙ্কতা [কালকতা (সী. স্যা.)] সুসানে ছড্ডিতা. অট্ঠিকানি ৰিপ্পকিণ্ণানি হোন্তি. অথ খো সো ভিক্খু সিৰথিকং গন্ত্ৰা অট্ঠিকানি সঙ্কড্ঢিত্ৰা নিমিত্তে অঙ্গজাতং পটিপাদেসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি দুক্কটস্সা’’তি.
তেন খো পন সমযেন অঞ্ঞতরো ভিক্খু নাগিযা মেথুনং ধম্মং পটিসেৰি… যক্খিনিযা মেথুনং ধম্মং পটিসেৰি… পেতিযা মেথুনং ধম্মং পটিসেৰি … পণ্ডকস্স মেথুনং ধম্মং পটিসেৰি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু উপহতিন্দ্রিযো হোতি. সো – ‘নাহং ৰেদিযামি [ৰেদযামি (ক.)] সুখং ৰা দুক্খং ৰা, অনাপত্তি মে ভৰিস্সতী’তি, মেথুনং ধম্মং পটিসেৰি. ভগৰতো এতমত্থং আরোচেসুং. ‘‘ৰেদযি ৰা সো, ভিক্খৰে, মোঘপুরিসো ন ৰা ৰেদযি, আপত্তি পারাজিকস্সা’’তি.
তেন খো পন সমযেন অঞ্ঞতরো ভিক্খু – ‘ইত্থিযা মেথুনং ধম্মং পটিসেৰিস্সামী’তি, ছুপিতমত্তে ৰিপ্পটিসারী অহোসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি সঙ্ঘাদিসেসস্সা’’তি.
৭৪. তেন খো পন সমযেন অঞ্ঞতরো ভিক্খু ভদ্দিযে জাতিযাৰনে দিৰাৰিহারগতো নিপন্নো হোতি. তস্স অঙ্গমঙ্গানি ৰাতূপত্থদ্ধানি হোন্তি. অঞ্ঞতরা ইত্থী পস্সিত্ৰা অঙ্গজাতে অভিনিসীদিত্ৰা যাৰদত্থং কত্ৰা পক্কামি. ভিক্খূ কিলিন্নং পস্সিত্ৰা ভগৰতো এতমত্থং আরোচেসুং. ‘‘পঞ্চহি, ভিক্খৰে, আকারেহি অঙ্গজাতং কম্মনিযং হোতি – রাগেন, ৰচ্চেন, পস্সাৰেন, ৰাতেন, উচ্চালিঙ্গপাণকদট্ঠেন. ইমেহি খো, ভিক্খৰে, পঞ্চহাকারেহি অঙ্গজাতং কম্মনিযং হোতি. অট্ঠানমেতং, ভিক্খৰে, অনৰকাসো যং তস্স ভিক্খুনো রাগেন অঙ্গজাতং কম্মনিযং অস্স. অরহং সো, ভিক্খৰে, ভিক্খু. অনাপত্তি, ভিক্খৰে, তস্স ভিক্খুনো’’তি.
তেন খো পন সমযেন অঞ্ঞতরো ভিক্খু সাৰত্থিযা অন্ধৰনে দিৰাৰিহারগতো নিপন্নো হোতি. অঞ্ঞতরা গোপালিকা পস্সিত্ৰা অঙ্গজাতে অভিনিসীদি. সো ভিক্খু পৰেসনং সাদিযি, পৰিট্ঠং সাদিযি, ঠিতং সাদিযি, উদ্ধরণং সাদিযি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
তেন খো পন সমযেন অঞ্ঞতরো ভিক্খু সাৰত্থিযা অন্ধৰনে দিৰাৰিহারগতো নিপন্নো হোতি. অঞ্ঞতরা অজপালিকা পস্সিত্ৰা… অঞ্ঞতরা কট্ঠহারিকা পস্সিত্ৰা… অঞ্ঞতরা গোমযহারিকা পস্সিত্ৰা অঙ্গজাতে অভিনিসীদি. সো ভিক্খু পৰেসনং সাদিযি, পৰিট্ঠং সাদিযি, ঠিতং সাদিযি, উদ্ধরণং সাদিযি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
৭৫. তেন খো পন সমযেন অঞ্ঞতরো ভিক্খু ৰেসালিযং মহাৰনে দিৰাৰিহারগতো নিপন্নো হোতি. অঞ্ঞতরা ইত্থী পস্সিত্ৰা অঙ্গজাতে অভিনিসীদিত্ৰা যাৰদত্থং কত্ৰা সামন্তা হসমানা ঠিতা হোতি. সো ভিক্খু পটিবুজ্ঝিত্ৰা তং ইত্থিং এতদৰোচ – ‘‘তুয্হিদং কম্ম’’ন্তি? ‘‘আম, ময্হং কম্ম’’ন্তি. তস্স কুক্কুচ্চং অহোসি…পে… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, জানামী’’তি. ‘‘অনাপত্তি, ভিক্খু, অজানন্তস্সা’’তি.
৭৬. তেন খো পন সমযেন অঞ্ঞতরো ভিক্খু ৰেসালিযং মহাৰনে দিৰাৰিহারগতো রুক্খং অপস্সায নিপন্নো হোতি. অঞ্ঞতরা ইত্থী পস্সিত্ৰা অঙ্গজাতে অভিনিসীদি. সো ভিক্খু সহসা ৰুট্ঠাসি. তস্স কুক্কুচ্চং অহোসি…পে… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি. ‘‘অনাপত্তি, ভিক্খু, অসাদিযন্তস্সা’’তি.
তেন খো পন সমযেন অঞ্ঞতরো ভিক্খু ৰেসালিযং মহাৰনে দিৰাৰিহারগতো রুক্খং অপস্সায নিপন্নো হোতি. অঞ্ঞতরা ইত্থী পস্সিত্ৰা অঙ্গজাতে অভিনিসীদি. সো ভিক্খু অক্কমিত্ৰা পৰত্তেসি [পৰট্টেসি (সী. স্যা.)]. তস্স কুক্কুচ্চং অহোসি…পে… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি. ‘‘অনাপত্তি, ভিক্খু, অসাদিযন্তস্সা’’তি.
৭৭. তেন খো পন সমযেন অঞ্ঞতরো ভিক্খু ৰেসালিযং মহাৰনে কূটাগারসালাযং দিৰাৰিহারগতো দ্ৰারং ৰিৰরিত্ৰা নিপন্নো হোতি. তস্স অঙ্গমঙ্গানি ৰাতূপত্থদ্ধানি হোন্তি. তেন খো পন সমযেন সম্বহুলা ইত্থিযো গন্ধঞ্চ মালঞ্চ আদায আরামং আগমংসু ৰিহারপেক্খিকাযো. অথ খো তা ইত্থিযো তং ভিক্খুং পস্সিত্ৰা অঙ্গজাতে অভিনিসীদিত্ৰা যাৰদত্থং কত্ৰা, পুরিসূসভো ৰতাযন্তি ৰত্ৰা গন্ধঞ্চ মালঞ্চ আরোপেত্ৰা পক্কমিংসু. ভিক্খূ কিলিন্নং পস্সিত্ৰা ভগৰতো এতমত্থং আরোচেসুং. ‘‘পঞ্চহি, ভিক্খৰে, আকারেহি অঙ্গজাতং কম্মনিযং হোতি – রাগেন, ৰচ্চেন, পস্সাৰেন, ৰাতেন, উচ্চালিঙ্গপাণকদট্ঠেন. ইমেহি খো, ভিক্খৰে, পঞ্চহাকারেহি অঙ্গজাতং কম্মনিযং হোতি. অট্ঠানমেতং, ভিক্খৰে, অনৰকাসো, যং তস্স ভিক্খুনো রাগেন অঙ্গজাতং কম্মনিযং অস্স. অরহং সো, ভিক্খৰে, ভিক্খু. অনাপত্তি, ভিক্খৰে, তস্স ভিক্খুনো. অনুজানামি, ভিক্খৰে, দিৰা পটিসল্লীযন্তেন দ্ৰারং সংৰরিত্ৰা পটিসল্লীযিতু’’ন্তি.
৭৮. তেন খো পন সমযেন অঞ্ঞতরো ভারুকচ্ছকো ভিক্খু সুপিনন্তে [সুপিনন্তেন (সী. স্যা.)] পুরাণদুতিযিকায মেথুনং ধম্মং পটিসেৰিত্ৰা – ‘অস্সমণো অহং, ৰিব্ভমিস্সামী’তি, ভারুকচ্ছং গচ্ছন্তো অন্তরামগ্গে আযস্মন্তং উপালিং পস্সিত্ৰা এতমত্থং আরোচেসি. আযস্মা উপালি এৰমাহ – ‘‘অনাপত্তি, আৰুসো, সুপিনন্তেনা’’তি.
তেন খো পন সমযেন রাজগহে সুপব্বা নাম উপাসিকা মুধপ্পসন্না [মুদ্ধপ্পসন্না (সী.)] হোতি. সা এৰংদিট্ঠিকা হোতি – ‘‘যা মেথুনং ধম্মং দেতি সা অগ্গদানং দেতী’’তি. সা ভিক্খুং পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি. ‘‘অলং, ভগিনি, নেতং কপ্পতী’’তি. ‘‘এহি, ভন্তে, ঊরুন্তরিকায [ঊরন্তরিকায (সী.)] ঘট্টেহি, এৰং তে অনাপত্তি ভৰিস্সতী’’তি…পে… এহি, ভন্তে, নাভিযং ঘট্টেহি… এহি, ভন্তে, উদরৰট্টিযং ঘট্টেহি… এহি, ভন্তে, উপকচ্ছকে ঘট্টেহি… এহি, ভন্তে, গীৰাযং ঘট্টেহি… এহি, ভন্তে, কণ্ণচ্ছিদ্দে ঘট্টেহি… এহি, ভন্তে, কেসৰট্টিযং ঘট্টেহি… এহি, ভন্তে, অঙ্গুলন্তরিকায ঘট্টেহি… ‘‘এহি, ভন্তে, হত্থেন উপক্কমিত্ৰা মোচেস্সামি, এৰং তে অনাপত্তি ভৰিস্সতী’’তি. সো ভিক্খু তথা অকাসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি সঙ্ঘাদিসেসস্সা’’তি.
৭৯. তেন খো পন সমযেন সাৰত্থিযং সদ্ধা নাম উপাসিকা মুধপ্পসন্না হোতি. সা এৰংদিট্ঠিকা হোতি – ‘‘যা মেথুনং ধম্মং দেতি সা অগ্গদানং দেতী’’তি. সা ভিক্খুং পস্সিত্ৰা এতদৰোচ – ‘‘এহি, ভন্তে, মেথুনং ধম্মং পটিসেৰা’’তি. ‘‘অলং, ভগিনি, নেতং কপ্পতী’’তি. ‘‘এহি, ভন্তে, ঊরুন্তরিকায ঘট্টেহি…পে… এহি, ভন্তে, হত্থেন উপক্কমিত্ৰা মোচেস্সামি, এৰং তে অনাপত্তি ভৰিস্সতী’’তি. সো ভিক্খু তথা অকাসি. তস্স কুক্কুচ্চং অহোসি…পে… ‘‘অনাপত্তি, ভিক্খু, পারাজিকস্স. আপত্তি সঙ্ঘাদিসেসস্সা’’তি.
৮০. তেন খো পন সমযেন ৰেসালিযং লিচ্ছৰিকুমারকা ভিক্খুং গহেত্ৰা ভিক্খুনিযা ৰিপ্পটিপাদেসুং… সিক্খমানায ৰিপ্পটিপাদেসুং… সামণেরিযা ৰিপ্পটিপাদেসুং. উভো সাদিযিংসু. উভো নাসেতব্বা. উভো ন সাদিযিংসু. উভিন্নং অনাপত্তি.
৮১. তেন খো পন সমযেন ৰেসালিযং লিচ্ছৰিকুমারকা ভিক্খুং গহেত্ৰা ৰেসিযা ৰিপ্পটিপাদেসুং… পণ্ডকে ৰিপ্পটিপাদেসুং… গিহিনিযা ৰিপ্পটিপাদেসুং. ভিক্খু সাদিযি. ভিক্খু নাসেতব্বো. ভিক্খু ন সাদিযি. ভিক্খুস্স অনাপত্তি.
তেন খো পন সমযেন ৰেসালিযং লিচ্ছৰিকুমারকা ভিক্খূ গহেত্ৰা অঞ্ঞমঞ্ঞং ৰিপ্পটিপাদেসুং. উভো সাদিযিংসু. উভো নাসেতব্বা. উভো ন সাদিযিংসু. উভিন্নং অনাপত্তি.
৮২. তেন খো পন সমযেন অঞ্ঞতরো ৰুড্ঢপব্বজিতো ভিক্খু পুরাণদুতিযিকায দস্সনং অগমাসি. সা – ‘এহি, ভন্তে, ৰিব্ভমা’তি অগ্গহেসি. সো ভিক্খু পটিক্কমন্তো উত্তানো পরিপতি. সা উব্ভজিত্ৰা [উব্ভুজিত্ৰা (সী. স্যা.)] অঙ্গজাতে [অঙ্গজাতেন (সী.)] অভিনিসীদি. তস্স কুক্কুচ্চং অহোসি …পে… ‘‘সাদিযি ত্ৰং, ভিক্খূ’’তি? ‘‘নাহং, ভগৰা, সাদিযি’’ন্তি. ‘‘অনাপত্তি, ভিক্খু, অসাদিযন্তস্সা’’তি.
৮৩. তেন খো পন সমযেন অঞ্ঞতরো ভিক্খু অরঞ্ঞে ৰিহরতি. মিগপোতকো তস্স পস্সাৰট্ঠানং আগন্ত্ৰা পস্সাৰং পিৰন্তো মুখেন অঙ্গজাতং অগ্গহেসি. সো ভিক্খু সাদিযি. তস্স কুক্কুচ্চং অহোসি…পে… ‘‘আপত্তিং ত্ৰং, ভিক্খু, আপন্নো পারাজিক’’ন্তি.
পঠমপারাজিকং সমত্তং.