৮. অট্ঠমসঙ্ঘাদিসেসসিক্খাপদং

৭১৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন চণ্ডকাল়ী ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেতি – ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা চণ্ডকাল়ী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰক্খতি – ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি…পে… সচ্চং কির, ভিক্খৰে, চণ্ডকাল়ী ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, চণ্ডকাল়ী ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰক্খতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭১৬. ‘‘যা পন ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেয্য – ‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’তি, সা ভিক্খুনী ভিক্খুনীহি এৰমস্স ৰচনীযা – ‘মায্যে, কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ – ছন্দগামিনিযো চ ভিক্খুনিযো দোসগামিনিযো চ ভিক্খুনিযো মোহগামিনিযো চ ভিক্খুনিযো ভযগামিনিযো চ ভিক্খুনিযোতি. অয্যা খো ছন্দাপি গচ্ছেয্য, দোসাপি গচ্ছেয্য, মোহাপি গচ্ছেয্য, ভযাপি গচ্ছেয্যা’তি. এৰঞ্চ সা ভিক্খুনী ভিক্খুনীহি ৰুচ্চমানা তথেৰ পগ্গণ্হেয্য, সা ভিক্খুনী ভিক্খুনীহি যাৰততিযং সমনুভাসিতব্বা তস্স পটিনিস্সগ্গায. যাৰততিযঞ্চে সমনুভাসীযমানা তং পটিনিস্সজ্জেয্য, ইচ্চেতং কুসলং; নো চে পটিনিস্সজ্জেয্য, অযম্পি ভিক্খুনী যাৰততিযকং ধম্মং আপন্না নিস্সারণীযং সঙ্ঘাদিসেস’’ন্তি.

৭১৭. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

কিস্মিঞ্চিদেৰ অধিকরণেতি অধিকরণং নাম চত্তারি অধিকরণানি – ৰিৰাদাধিকরণং, অনুৰাদাধিকরণং, আপত্তাধিকরণং, কিচ্চাধিকরণং.

পচ্চাকতা নাম পরাজিতা ৰুচ্চতি.

কুপিতা অনত্তমনাতি অনভিরদ্ধা আহতচিত্তা খিলজাতা.

এৰং ৰদেয্যাতি – ‘‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’’তি.

সা ভিক্খুনীতি যা সা এৰংৰাদিনী ভিক্খুনী.

ভিক্খুনীহীতি অঞ্ঞাহি ভিক্খুনীহি.

যা পস্সন্তি যা সুণন্তি তাহি ৰত্তব্বা – ‘‘মায্যে, কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. অয্যা খো ছন্দাপি গচ্ছেয্য…পে… ভযাপি গচ্ছেয্যা’’তি. দুতিযম্পি ৰত্তব্বা. ততিযম্পি ৰত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সুত্ৰা ন ৰদন্তি, আপত্তি দুক্কটস্স. সা ভিক্খুনী সঙ্ঘমজ্ঝম্পি আকড্ঢিত্ৰা ৰত্তব্বা – ‘‘মায্যে, কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং অৰচ – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. অয্যা খো ছন্দাপি গচ্ছেয্য…পে… ভযাপি গচ্ছেয্যা’’তি. দুতিযম্পি ৰত্তব্বা. ততিযম্পি ৰত্তব্বা. সচে পটিনিস্সজ্জতি, ইচ্চেতং কুসলং; নো চে পটিনিস্সজ্জতি, আপত্তি দুক্কটস্স. সা ভিক্খুনী সমনুভাসিতব্বা. এৰঞ্চ পন, ভিক্খৰে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৭১৮. ‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেতি – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. সা তং ৰত্থুং ন পটিনিস্সজ্জতি. যদি সঙ্ঘস্স পত্তকল্লং, সঙ্ঘো ইত্থন্নামং ভিক্খুনিং সমনুভাসেয্য তস্স ৰত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. অযং ইত্থন্নামা ভিক্খুনী কিস্মিঞ্চিদেৰ অধিকরণে পচ্চাকতা কুপিতা অনত্তমনা এৰং ৰদেতি – ‘ছন্দগামিনিযো চ ভিক্খুনিযো…পে… ভযগামিনিযো চ ভিক্খুনিযো’তি. সা তং ৰত্থুং ন পটিনিস্সজ্জতি. সঙ্ঘো ইত্থন্নামং ভিক্খুনিং সমনুভাসতি তস্স ৰত্থুস্স পটিনিস্সগ্গায. যস্সা অয্যায খমতি ইত্থন্নামায ভিক্খুনিযা সমনুভাসনা তস্স ৰত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘সমনুভট্ঠা সঙ্ঘেন ইত্থন্নামা ভিক্খুনী তস্স ৰত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৰমেতং ধারযামী’’তি.

ঞত্তিযা দুক্কটং. দ্ৰীহি কম্মৰাচাহি থুল্লচ্চযা. কম্মৰাচাপরিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তিযা ঞত্তিযা দুক্কটং. দ্ৰীহি কম্মৰাচাহি থুল্লচ্চযা পটিপ্পস্সম্ভন্তি.

অযম্পীতি পুরিমাযো উপাদায ৰুচ্চতি.

যাৰততিযকন্তি যাৰততিযং সমনুভাসনায আপজ্জতি, ন সহ ৰত্থুজ্ঝাচারা.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৭১৯. ধম্মকম্মে ধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেস্স. ধম্মকম্মে ৰেমতিকা ন পটিনিস্সজ্জতি, আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ন পটিনিস্সজ্জতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা আপত্তি দুক্কটস্স.

৭২০. অনাপত্তি অসমনুভাসন্তিযা, পটিনিস্সজ্জন্তিযা, উম্মত্তিকায, আদিকম্মিকাযাতি.

অট্ঠমসঙ্ঘাদিসেসসিক্খাপদং নিট্ঠিতং.