৯. নৰমসঙ্ঘাদিসেসসিক্খাপদং

৭২১. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থুল্লনন্দায ভিক্খুনিযা অন্তেৰাসিকা ভিক্খুনিযো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনিযো সংসট্ঠা ৰিহরিস্সন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা’’তি…পে… সচ্চং কির, ভিক্খৰে, ভিক্খুনিযো সংসট্ঠা ৰিহরন্তি পাপাচারা পাপসদ্দা পাপসিলোকা ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকাতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনিযো সংসট্ঠা ৰিহরিস্সন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭২২. ‘‘ভিক্খুনিযো পনেৰ সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. তা ভিক্খুনিযো ভিক্খুনীহি এৰমস্সু ৰচনীযা – ‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা অঞ্ঞমঞ্ঞিস্সা ৰজ্জপ্পটিচ্ছাদিকা. ৰিৰিচ্চথায্যে. ৰিৰেকঞ্ঞেৰ ভগিনীনং সঙ্ঘো ৰণ্ণেতী’তি. এৰঞ্চ তা ভিক্খুনিযো ভিক্খুনীহি ৰুচ্চমানা তথেৰ পগ্গণ্হেয্যুং, তা ভিক্খুনিযো ভিক্খুনীহি যাৰততিযং সমনুভাসিতব্বা তস্স পটিনিস্সগ্গায. যাৰততিযঞ্চে সমনুভাসীযমানা তং পটিনিস্সজ্জেয্যুং, ইচ্চেতং কুসলং; নো চে পটিনিস্সজ্জেয্যুং, ইমাপি ভিক্খুনিযো যাৰততিযকং ধম্মং আপন্না নিস্সারণীযং সঙ্ঘাদিসেস’’ন্তি.

৭২৩. ভিক্খুনিযো পনেৰাতি উপসম্পন্নাযো ৰুচ্চন্তি.

সংসট্ঠা ৰিহরন্তীতি সংসট্ঠা নাম অননুলোমিকেন কাযিকৰাচসিকেন সংসট্ঠা ৰিহরন্তি.

পাপাচারাতি পাপকেন আচারেন সমন্নাগতা.

পাপসদ্দাতি পাপকেন কিত্তিসদ্দেন অব্ভুগ্গতা.

পাপসিলোকাতি পাপকেন মিচ্ছাজীৰেন জীৰিতং কপ্পেন্তি.

ভিক্খুনিসঙ্ঘস্স ৰিহেসিকাতি অঞ্ঞমঞ্ঞিস্সা কম্মে করীযমানে পটিক্কোসন্তি.

অঞ্ঞমঞ্ঞিস্সা ৰজ্জপ্পটিচ্ছাদিকাতি অঞ্ঞমঞ্ঞং ৰজ্জং পটিচ্ছাদেন্তি.

তা ভিক্খুনিযোতি যা তা সংসট্ঠা ভিক্খুনিযো.

ভিক্খুনীহীতি অঞ্ঞাহি ভিক্খুনীহি.

যা পস্সন্তি যা সুণন্তি তাহি ৰত্তব্বা – ‘‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. ৰিৰিচ্চথায্যে. ৰিৰেকঞ্ঞেৰ ভগিনীনং সঙ্ঘো ৰণ্ণেতী’’তি. দুতিযম্পি ৰত্তব্বা. ততিযম্পি ৰত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. সুত্ৰা ন ৰদন্তি, আপত্তি দুক্কটস্স. তা ভিক্খুনিযো সঙ্ঘমজ্ঝম্পি আকড্ঢিত্ৰা ৰত্তব্বা – ‘‘ভগিনিযো খো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. ৰিৰিচ্চথায্যে. ৰিৰেকঞ্ঞেৰ ভগিনীনং সঙ্ঘো ৰণ্ণেতী’’তি. দুতিযম্পি ৰত্তব্বা. ততিযম্পি ৰত্তব্বা. সচে পটিনিস্সজ্জন্তি, ইচ্চেতং কুসলং; নো চে পটিনিস্সজ্জন্তি, আপত্তি দুক্কটস্স. তা ভিক্খুনিযো সমনুভাসিতব্বা. এৰঞ্চ পন, ভিক্খৰে, সমনুভাসিতব্বা. ব্যত্তায ভিক্খুনিযা পটিবলায সঙ্ঘো ঞাপেতব্বো –

৭২৪. ‘‘সুণাতু মে, অয্যে, সঙ্ঘো. ইত্থন্নামা চ ইত্থন্নামা চ ভিক্খুনিযো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. তা তং ৰত্থুং ন পটিনিস্সজ্জন্তি. যদি সঙ্ঘস্স পত্তকল্লং, সঙ্ঘো ইত্থন্নামঞ্চ ইত্থন্নামঞ্চ ভিক্খুনিযো সমনুভাসেয্য তস্স ৰত্থুস্স পটিনিস্সগ্গায. এসা ঞত্তি.

‘‘সুণাতু মে, অয্যে, সঙ্ঘো. ইত্থন্নামা চ ইত্থন্নামা চ ভিক্খুনিযো সংসট্ঠা ৰিহরন্তি পাপাচারা পাপসদ্দা পাপসিলোকা, ভিক্খুনিসঙ্ঘস্স ৰিহেসিকা, অঞ্ঞমঞ্ঞিস্সা ৰজ্জপ্পটিচ্ছাদিকা. তা তং ৰত্থুং ন পটিনিস্সজ্জন্তি. সঙ্ঘো ইত্থন্নামঞ্চ ইত্থন্নামঞ্চ ভিক্খুনিযো সমনুভাসতি তস্স ৰত্থুস্স পটিনিস্সগ্গায. যস্সা অয্যায খমতি ইত্থন্নামায চ ইত্থন্নামায চ ভিক্খুনীনং সমনুভাসনা তস্স ৰত্থুস্স পটিনিস্সগ্গায, সা তুণ্হস্স; যস্সা নক্খমতি, সা ভাসেয্য.

‘‘দুতিযম্পি এতমত্থং ৰদামি…পে… ততিযম্পি এতমত্থং ৰদামি…পে….

‘‘সমনুভট্ঠা সঙ্ঘেন, ইত্থন্নামা চ ইত্থন্নামা চ ভিক্খুনিযো তস্স ৰত্থুস্স পটিনিস্সগ্গায. খমতি সঙ্ঘস্স, তস্মা তুণ্হী, এৰমেতং ধারযামী’’তি.

ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচাপরিযোসানে আপত্তি সঙ্ঘাদিসেসস্স. সঙ্ঘাদিসেসং অজ্ঝাপজ্জন্তীনং ঞত্তিযা দুক্কটং দ্ৰীহি কম্মৰাচাহি থুল্লচ্চযা পটিপ্পস্সম্ভন্তি. দ্ৰে তিস্সো একতো সমনুভাসিতব্বা. ততুত্তরি ন সমনুভাসিতব্বা.

ইমাপি ভিক্খুনিযোতি পুরিমাযো উপাদায ৰুচ্চন্তি.

যাৰততিযকন্তি যাৰততিযং সমনুভাসনায আপজ্জন্তি, ন সহ ৰত্থুজ্ঝাচারা.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৭২৫. ধম্মকম্মে ধম্মকম্মসঞ্ঞা ন পটিনিস্সজ্জন্তি, আপত্তি সঙ্ঘাদিসেসস্স. ধম্মকম্মে ৰেমতিকা ন পটিনিস্সজ্জন্তি, আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ন পটিনিস্সজ্জন্তি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৭২৬. অনাপত্তি অসমনুভাসন্তীনং, পটিনিস্সজ্জন্তীনং, উম্মত্তিকানং, আদিকম্মিকানন্তি.

নৰমসঙ্ঘাদিসেসসিক্খাপদং নিট্ঠিতং.