৫. পঞ্চমসঙ্ঘাদিসেসসিক্খাপদং

৬৯৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সুন্দরীনন্দা ভিক্খুনী অভিরূপা হোতি দস্সনীযা পাসাদিকা. মনুস্সা ভত্তগ্গে সুন্দরীনন্দং ভিক্খুনিং পস্সিত্ৰা অৰস্সুতা অৰস্সুতায সুন্দরীনন্দায ভিক্খুনিযা অগ্গমগ্গানি ভোজনানি দেন্তি. সুন্দরীনন্দা ভিক্খুনী যাৰদত্থং ভুঞ্জতি; অঞ্ঞা ভিক্খুনিযো ন চিত্তরূপং লভন্তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা সুন্দরীনন্দা অৰস্সুতা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদিস্সতি ভুঞ্জিস্সতী’’তি…পে… সচ্চং কির, ভিক্খৰে, সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদতি ভুঞ্জতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, সুন্দরীনন্দা ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদিস্সতি ভুঞ্জিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭০০. ‘‘যা পন ভিক্খুনী অৰস্সুতা অৰস্সুতস্স পুরিসপুগ্গলস্স হত্থতো খাদনীযং ৰা ভোজনীযং ৰা সহত্থা পটিগ্গহেত্ৰা খাদেয্য ৰা ভুঞ্জেয্য ৰা, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

৭০১. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

অৰস্সুতা নাম সারত্তা অপেক্খৰতী পটিবদ্ধচিত্তা.

অৰস্সুতো নাম সারত্তো অপেক্খৰা পটিবদ্ধচিত্তো.

পুরিসপুগ্গলো নাম মনুস্সপুরিসো, ন যক্খো ন পেতো ন তিরচ্ছানগতো, ৰিঞ্ঞূ পটিবলো সারজ্জিতুং.

খাদনীযং নাম পঞ্চ ভোজনানি – উদকদন্তপোনং ঠপেত্ৰা অৰসেসং খাদনীযং নাম.

ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং.

‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি থুল্লচ্চযস্স. অজ্ঝোহারে অজ্ঝোহারে আপত্তি সঙ্ঘাদিসেসস্স.

অযম্পীতি পুরিমাযো উপাদায ৰুচ্চতি.

পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

উদকদন্তপোনং পটিগ্গণ্হাতি, আপত্তি দুক্কটস্স. একতোঅৰস্সুতে ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স.

৭০২. অজ্ঝোহারে অজ্ঝোহারে আপত্তি থুল্লচ্চযস্স. উদকদন্তপোনং পটিগ্গণ্হাতি, আপত্তি দুক্কটস্স. উভতোঅৰস্সুতে যক্খস্স ৰা পেতস্স ৰা পণ্ডকস্স ৰা তিরচ্ছানগতমনুস্সৰিগ্গহস্স ৰা হত্থতো ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি থুল্লচ্চযস্স. উদকদন্তপোনং পটিগ্গণ্হাতি, আপত্তি দুক্কটস্স. একতোঅৰস্সুতে ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি দুক্কটস্স. উদকদন্তপোনং পটিগ্গণ্হাতি, আপত্তি দুক্কটস্স.

৭০৩. অনাপত্তি উভতোঅনৰস্সুতা হোন্তি, ‘‘অনৰস্সুতো’’তি জানন্তী পটিগ্গণ্হাতি, উম্মত্তিকায, আদিকম্মিকাযাতি.

পঞ্চমসঙ্ঘাদিসেসসিক্খাপদং নিট্ঠিতং.