৬. ছট্ঠসঙ্ঘাদিসেসসিক্খাপদং

৭০৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সুন্দরীনন্দা ভিক্খুনী অভিরূপা হোতি দস্সনীযা পাসাদিকা. মনুস্সা ভত্তগ্গে সুন্দরীনন্দং ভিক্খুনিং পস্সিত্ৰা অৰস্সুতা সুন্দরীনন্দায ভিক্খুনিযা অগ্গমগ্গানি ভোজনানি দেন্তি. সুন্দরীনন্দা ভিক্খুনী কুক্কুচ্চাযন্তী ন পটিগ্গণ্হাতি. অনন্তরিকা ভিক্খুনী সুন্দরীনন্দং ভিক্খুনিং এতদৰোচ – ‘‘কিস্স ত্ৰং, অয্যে, ন পটিগ্গণ্হাসী’’তি? ‘‘অৰস্সুতা, অয্যে’’তি. ‘‘ত্ৰং পন, অয্যে, অৰস্সুতা’’তি? ‘‘নাহং, অয্যে, অৰস্সুতা’’তি. ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা. ইঙ্ঘং, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা, ভুঞ্জ ৰা’’তি.

যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী এৰং ৰক্খতি – ‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা. ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি…পে… সচ্চং কির, ভিক্খৰে, ভিক্খুনী এৰং ৰদেতি – ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা যতো ত্ৰং অনৰস্সুতা! ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী এৰং ৰক্খতি – ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা যতো ত্ৰং অনৰস্সুতা; ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’. নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৭০৫. ‘‘যা পন ভিক্খুনী এৰং ৰদেয্য – ‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা. ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’তি, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

৭০৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

এৰং ৰদেয্যাতি – ‘‘কিং তে, অয্যে, এসো পুরিসপুগ্গলো করিস্সতি অৰস্সুতো ৰা অনৰস্সুতো ৰা, যতো ত্ৰং অনৰস্সুতা. ইঙ্ঘ, অয্যে, যং তে এসো পুরিসপুগ্গলো দেতি খাদনীযং ৰা ভোজনীযং ৰা তং ত্ৰং সহত্থা পটিগ্গহেত্ৰা খাদ ৰা ভুঞ্জ ৰা’’তি উয্যোজেতি, আপত্তি দুক্কটস্স. তস্সা ৰচনেন ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি থুল্লচ্চযস্স. ভোজনপরিযোসানে আপত্তি সঙ্ঘাদিসেসস্স.

অযম্পীতি পুরিমাযো উপাদায ৰুচ্চতি.

পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

উদকদন্তপোনং ‘‘পটিগ্গণ্হা’’তি উয্যোজেতি, আপত্তি দুক্কটস্স. তস্সা ৰচনেন খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স.

৭০৭. একতোঅৰস্সুতে যক্খস্স ৰা পেতস্স ৰা পণ্ডকস্স ৰা তিরচ্ছানগতমনুস্সৰিগ্গহস্স ৰা হত্থতো খাদনীযং ৰা ভোজনীযং ৰা ‘‘খাদ ৰা ভুঞ্জ ৰা’’তি উয্যোজেতি, আপত্তি দুক্কটস্স. তস্সা ৰচনেন ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে আপত্তি দুক্কটস্স. ভোজনপরিযোসানে আপত্তি থুল্লচ্চযস্স. উদকদন্তপোনং পটিগ্গণ্হাতি উয্যোজেতি, আপত্তি দুক্কটস্স. তস্সা ৰচনেন ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স.

৭০৮. অনাপত্তি ‘‘অনৰস্সুতো’’তি জানন্তী উয্যোজেতি, ‘‘কুপিতা ন পটিগ্গণ্হাতী’’তি উয্যোজেতি, ‘‘কুলানুদ্দযতায ন পটিগ্গণ্হাতী’’তি উয্যোজেতি, উম্মত্তিকায, আদিকম্মিকাযাতি.

ছট্ঠসঙ্ঘাদিসেসসিক্খাপদং নিট্ঠিতং.