৪. চতুত্থসঙ্ঘাদিসেসসিক্খাপদং

৬৯৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন চণ্ডকাল়ী ভিক্খুনী ভণ্ডনকারিকা হোতি কলহকারিকা ৰিৰাদকারিকা ভস্সকারিকা সঙ্ঘে অধিকরণকারিকা. থুল্লনন্দা ভিক্খুনী তস্সা কম্মে করীযমানে পটিক্কোসতি. তেন খো পন সমযেন থুল্লনন্দা ভিক্খুনী গামকং অগমাসি কেনচিদেৰ করণীযেন. অথ খো ভিক্খুনিসঙ্ঘো – ‘‘থুল্লনন্দা ভিক্খুনী পক্কন্তা’’তি, চণ্ডকাল়িং ভিক্খুনিং আপত্তিযা অদস্সনে [অদস্সনেন (ক.)] উক্খিপি. থুল্লনন্দা ভিক্খুনী গামকে তং করণীযং তীরেত্ৰা পুনদেৰ সাৰত্থিং পচ্চাগচ্ছি. চণ্ডকাল়ী ভিক্খুনী থুল্লনন্দায ভিক্খুনিযা আগচ্ছন্তিযা নেৰ আসনং পঞ্ঞপেসি ন পাদোদকং পাদপীঠং পাদকঠলিকং উপনিক্খিপি ন পচ্চুগ্গন্ত্ৰা পত্তচীৰরং পটিগ্গহেসি ন পানীযেন আপুচ্ছি. থুল্লনন্দা ভিক্খুনী চণ্ডকাল়িং ভিক্খুনিং এতদৰোচ – ‘‘কিস্স ত্ৰং, অয্যে, মযি আগচ্ছন্তিযা নেৰ আসনং পঞ্ঞপেসি ন পাদোদকং পাদপীঠং পাদকঠলিকং উপনিক্খিপি ন পচ্চুগ্গন্ত্ৰা পত্তচীৰরং পটিগ্গহেসি ন পানীযেন আপুচ্ছী’’তি? ‘‘এৰঞ্হেতং, অয্যে, হোতি যথা তং অনাথাযা’’তি. ‘‘কিস্স পন ত্ৰং, অয্যে, অনাথা’’তি? ‘‘ইমা মং, অয্যে, ভিক্খুনিযো – ‘‘অযং অনাথা অপ্পঞ্ঞাতা, নত্থি ইমিস্সা কাচি পটিৰত্তা’’তি, আপত্তিযা অদস্সনে [অদস্সনেন (ক.)] উক্খিপিংসূ’’তি.

থুল্লনন্দা ভিক্খুনী – ‘‘বালা এতা অব্যত্তা এতা, নেৰ জানন্তি কম্মং ৰা কম্মদোসং ৰা কম্মৰিপত্তিং ৰা কম্মসম্পত্তিং ৰা. মযং খো জানাম কম্মম্পি কম্মদোসম্পি কম্মৰিপত্তিম্পি কম্মসম্পত্তিম্পি. মযং খো অকতং ৰা কম্মং কারেয্যাম কতং ৰা কম্মং কোপেয্যামা’’তি, লহুং লহুং ভিক্খুনিসঙ্ঘং সন্নিপাতেত্ৰা চণ্ডকাল়িং ভিক্খুনিং ওসারেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেস্সতী’’তি…পে… সচ্চং কির, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেতীতি [ওসারেসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৬৯৫. ‘‘যা পন ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৰিনযেন সত্থুসাসনেন অনপলোকেত্ৰা কারকসঙ্ঘং অনঞ্ঞায গণস্স ছন্দং ওসারেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

৬৯৬. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

সমগ্গো নাম সঙ্ঘো সমানসংৰাসকো সমানসীমাযং ঠিতো.

উক্খিত্তা নাম আপত্তিযা অদস্সনে ৰা অপ্পটিকম্মে ৰা অপ্পটিনিস্সগ্গে ৰা [অদস্সনেন ৰা অপ্পটিকম্মেন ৰা অপ্পটিনিস্সগ্গেন ৰা (ক.), অদস্সনে ৰা অপ্পটিকম্মে ৰা পাপিকায দিট্ঠিযা অপ্পটিনিস্সগ্গে ৰা (?)] উক্খিত্তা.

ধম্মেন ৰিনযেনাতি যেন ধম্মেন যেন ৰিনযেন.

সত্থুসাসনেনাতি জিনসাসনেন বুদ্ধসাসনেন.

অনপলোকেত্ৰা কারকসঙ্ঘন্তি কম্মকারকসঙ্ঘং অনাপুচ্ছা.

অনঞ্ঞায গণস্স ছন্দন্তি গণস্স ছন্দং অজানিত্ৰা.

‘‘ওসারেস্সামী’’তি গণং ৰা পরিযেসতি, সীমং ৰা সম্মন্নতি, আপত্তি দুক্কটস্স. ঞত্তিযা দুক্কটং, দ্ৰীহি কম্মৰাচাহি থুল্লচ্চযা, কম্মৰাচাপরিযোসানে আপত্তি সঙ্ঘাদিসেসস্স.

অযম্পীতি পুরিমাযো উপাদায ৰুচ্চতি.

পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৬৯৭. ধম্মকম্মে ধম্মকম্মসঞ্ঞা ওসারেতি, আপত্তি সঙ্ঘাদিসেসস্স. ধম্মকম্মে ৰেমতিকা ওসারেতি আপত্তি সঙ্ঘাদিসেসস্স. ধম্মকম্মে অধম্মকম্মসঞ্ঞা ওসারেতি, আপত্তি সঙ্ঘাদিসেসস্স.

অধম্মকম্মে ধম্মকম্মসঞ্ঞা, আপত্তি দুক্কটস্স. অধম্মকম্মে ৰেমতিকা, আপত্তি দুক্কটস্স. অধম্মকম্মে অধম্মকম্মসঞ্ঞা, আপত্তি দুক্কটস্স.

৬৯৮. অনাপত্তি কম্মকারকসঙ্ঘং অপলোকেত্ৰা ওসারেতি, গণস্স ছন্দং জানিত্ৰা ওসারেতি, ৰত্তে ৰত্তন্তিং ওসারেতি, অসন্তে কম্মকারকসঙ্ঘে ওসারেতি, উম্মত্তিকায, আদিকম্মিকাযাতি.

চতুত্থসঙ্ঘাদিসেসসিক্খাপদং নিট্ঠিতং.