৩. ততিযসঙ্ঘাদিসেসসিক্খাপদং

৬৮৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ভদ্দায কাপিলানিযা অন্তেৰাসিনী ভিক্খুনী ভিক্খুনীহি সদ্ধিং ভণ্ডিত্ৰা গামকং [গামকে (স্যা.)] ঞাতিকুলং অগমাসি. ভদ্দা কাপিলানী তং ভিক্খুনিং অপস্সন্তী ভিক্খুনিযো পুচ্ছি – ‘‘কহং ইত্থন্নামা, ন দিস্সতী’’তি! ‘‘ভিক্খুনীহি সদ্ধিং, অয্যে, ভণ্ডিত্ৰা ন দিস্সতী’’তি. ‘‘অম্মা, অমুকস্মিং গামকে এতিস্সা ঞাতিকুলং. তত্থ গন্ত্ৰা ৰিচিনথা’’তি. ভিক্খুনিযো তত্থ গন্ত্ৰা তং ভিক্খুনিং পস্সিত্ৰা এতদৰোচুং – ‘‘কিস্স ত্ৰং, অয্যে, একিকা আগতা, কচ্চিসি অপ্পধংসিতা’’তি? ‘‘অপ্পধংসিতাম্হি, অয্যে’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী একা গামন্তরং গচ্ছিস্সতী’’তি…পে… সচ্চং কির, ভিক্খৰে, ভিক্খুনী একা গামন্তরং গচ্ছতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী একা গামন্তরং গচ্ছিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী একা গামন্তরং গচ্ছেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

৬৮৮. তেন খো পন সমযেন দ্ৰে ভিক্খুনিযো সাকেতা সাৰত্থিং অদ্ধানমগ্গপ্পটিপন্না হোন্তি. অন্তরামগ্গে নদী তরিতব্বা হোতি. অথ খো তা ভিক্খুনিযো নাৰিকে উপসঙ্কমিত্ৰা এতদৰোচুং – ‘‘সাধু নো, আৰুসো, তারেথা’’তি. ‘‘নায্যে, সক্কা উভো সকিং তারেতু’’ন্তি. একো একং উত্তারেসি. উত্তিণ্ণো উত্তিণ্ণং দূসেসি. অনুত্তিণ্ণো অনুত্তিণ্ণং দূসেসি. তা পচ্ছা সমাগন্ত্ৰা পুচ্ছিংসু – ‘‘কচ্চিসি, অয্যে, অপ্পধংসিতা’’তি? ‘‘পধংসিতাম্হি, অয্যে! ত্ৰং পন, অয্যে, অপ্পধংসিতা’’তি? ‘‘পধংসিতাম্হি, অয্যে’’তি. অথ খো তা ভিক্খুনিযো সাৰত্থিং গন্ত্ৰা ভিক্খুনীনং এতমত্থং আরোচেসুং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী একা নদীপারং গচ্ছিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং…পে… সচ্চং কির, ভিক্খৰে, ভিক্খুনী একা নদীপারং গচ্ছতী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী একা নদীপারং গচ্ছিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী একা ৰা গামন্তরং গচ্ছেয্য, একা ৰা নদীপারং গচ্ছেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

৬৮৯. তেন খো পন সমযেন সম্বহুলা ভিক্খুনিযো কোসলেসু জনপদে সাৰত্থিং গচ্ছন্তা [গন্ত্ৰা (ক.)] সাযং অঞ্ঞতরং গামং উপগচ্ছিংসু. তত্থ অঞ্ঞতরা ভিক্খুনী অভিরূপা হোতি দস্সনীযা পাসাদিকা. অঞ্ঞতরো পুরিসো তস্সা ভিক্খুনিযা সহ দস্সনেন পটিবদ্ধচিত্তো হোতি. অথ খো সো পুরিসো তাসং ভিক্খুনীনং সেয্যং পঞ্ঞপেন্তো তস্সা ভিক্খুনিযা সেয্যং একমন্তং পঞ্ঞাপেসি. অথ খো সা ভিক্খুনী সল্লক্খেত্ৰা – ‘‘পরিযুট্ঠিতো অযং পুরিসো; সচে রত্তিং আগচ্ছিস্সতি, ৰিস্সরো মে ভৰিস্সতী’’তি, ভিক্খুনিযো অনাপুচ্ছা অঞ্ঞতরং কুলং গন্ত্ৰা সেয্যং কপ্পেসি. অথ খো সো পুরিসো রত্তিং আগন্ত্ৰা তং ভিক্খুনিং গৰেসন্তো ভিক্খুনিযো ঘট্টেসি. ভিক্খুনিযো তং ভিক্খুনিং অপস্সন্তিযো এৰমাহংসু – ‘‘নিস্সংসযং খো সা ভিক্খুনী পুরিসেন সদ্ধিং নিক্খন্তা’’তি.

অথ খো সা ভিক্খুনী তস্সা রত্তিযা অচ্চযেন যেন তা ভিক্খুনিযো তেনুপসঙ্কমি. ভিক্খুনিযো তং ভিক্খুনিং এতদৰোচুং – ‘‘কিস্স ত্ৰং, অয্যে, পুরিসেন সদ্ধিং নিক্খন্তা’’তি? ‘‘নাহং, অয্যে, পুরিসেন সদ্ধিং নিক্খন্তা’’তি. ভিক্খুনীনং এতমত্থং আরোচেসি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খুনী একা রত্তিং ৰিপ্পৰসিস্সতী’’তি…পে… সচ্চং কির, ভিক্খৰে, ভিক্খুনী একা রত্তিং ৰিপ্পৰসীতি [ৰিপ্পৰসীতি (ক.)]? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী একা রত্তিং ৰিপ্পৰসিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

‘‘যা পন ভিক্খুনী একা ৰা গামন্তরং গচ্ছেয্য, একা ৰা নদীপারং গচ্ছেয্য, একা ৰা রত্তিং ৰিপ্পৰসেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

এৰঞ্চিদং ভগৰতা ভিক্খুনীনং সিক্খাপদং পঞ্ঞত্তং হোতি.

৬৯০. তেন খো পন সমযেন সম্বহুলা ভিক্খুনিযো কোসলেসু জনপদে সাৰত্থিং অদ্ধানমগ্গপ্পটিপন্না হোন্তি. তত্থ অঞ্ঞতরা ভিক্খুনী ৰচ্চেন পীল়িতা একিকা ওহীযিত্ৰা [ওহিযিত্ৰা (ক.)] পচ্ছা অগমাসি. মনুস্সা তং ভিক্খুনিং পস্সিত্ৰা দূসেসুং. অথ খো সা ভিক্খুনী যেন তা ভিক্খুনিযো তেনুপসঙ্কমি. ভিক্খুনিযো তং ভিক্খুনিং এতদৰোচুং – ‘‘কিস্স ত্ৰং, অয্যে, একিকা ওহীনা, কচ্চিসি অপ্পধংসিতা’’তি? ‘‘পধংসিতাম্হি, অয্যে’’তি. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – কথঞ্হি নাম ভিক্খুনী একা গণম্হা ওহীযিস্সতীতি…পে… সচ্চং কির, ভিক্খৰে, ভিক্খুনী একা গণম্হা ওহীযতীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, ভিক্খুনী একা গণম্হা ওহীযিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৬৯১. ‘‘যা পন ভিক্খুনী একা ৰা গামন্তরং গচ্ছেয্য, একা ৰা নদীপারং গচ্ছেয্য, একা ৰা রত্তিং ৰিপ্পৰসেয্য, একা ৰা গণম্হা ওহীযেয্য, অযম্পি ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

৬৯২. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

একা ৰা গামন্তরং গচ্ছেয্যাতি পরিক্খিত্তস্স গামস্স পরিক্খেপং পঠমং পাদং অতিক্কামেন্তিযা আপত্তি থুল্লচ্চযস্স, দুতিযং পাদং অতিক্কামেন্তিযা আপত্তি সঙ্ঘাদিসেসস্স.

অপরিক্খিত্তস্স গামস্স উপচারং পঠমং পাদং অতিক্কামেন্তিযা আপত্তি থুল্লচ্চযস্স. দুতিযং পাদং অতিক্কামেন্তিযা আপত্তি সঙ্ঘাদিসেসস্স.

একা ৰা নদীপারং গচ্ছেয্যাতি নদী নাম তিমণ্ডলং পটিচ্ছাদেত্ৰা যত্থ কত্থচি উত্তরন্তিযা ভিক্খুনিযা অন্তরৰাসকো তেমিযতি. পঠমং পাদং উত্তরন্তিযা আপত্তি থুল্লচ্চযস্স. দুতিযং পাদং উত্তরন্তিযা আপত্তি সঙ্ঘাদিসেসস্স.

একা ৰা রত্তিং ৰিপ্পৰসেয্যাতি সহ অরুণুগ্গমনা দুতিযিকায ভিক্খুনিযা হত্থপাসং ৰিজহন্তিযা আপত্তি থুল্লচ্চযস্স. ৰিজহিতে আপত্তি সঙ্ঘাদিসেসস্স.

একা ৰা গণম্হা ওহীযেয্যাতি অগামকে অরঞ্ঞে দুতিযিকায ভিক্খুনিযা দস্সনূপচারং ৰা সৰনূপচারং ৰা ৰিজহন্তিযা আপত্তি থুল্লচ্চযস্স. ৰিজহিতে আপত্তি সঙ্ঘাদিসেসস্স.

অযম্পীতি পুরিমাযো উপাদায ৰুচ্চতি.

পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসোতি…পে… তেনপি ৰুচ্চতি সঙ্ঘাদিসেসোতি.

৬৯৩. অনাপত্তি দুতিযিকা ভিক্খুনী পক্কন্তা ৰা হোতি ৰিব্ভন্তা ৰা কালঙ্কতা ৰা পক্খসঙ্কন্তা ৰা, আপদাসু, উম্মত্তিকায, আদিকম্মিকাযাতি.

ততিযসঙ্ঘাদিসেসসিক্খাপদং নিট্ঠিতং.