১. পঠমসঙ্ঘাদিসেসসিক্খাপদং

ইমে খো পনায্যাযো সত্তরস সঙ্ঘাদিসেসা

ধম্মা উদ্দেসং আগচ্ছন্তি.

৬৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরো উপাসকো ভিক্খুনিসঙ্ঘস্স উদোসিতং [উদ্দোসিতং (সী. স্যা.)] দত্ৰা কালঙ্কতো হোতি. তস্স দ্ৰে পুত্তা হোন্তি – একো অস্সদ্ধো অপ্পসন্নো, একো সদ্ধো পসন্নো. তে পেত্তিকং সাপতেয্যং ৰিভজিংসু. অথ খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি. এৰং ৰুত্তে সো সদ্ধো পসন্নো তং অস্সদ্ধং অপ্পসন্নং এতদৰোচ – ‘‘মায্যো, এৰং অৰচ. অম্হাকং পিতুনা ভিক্খুনিসঙ্ঘস্স দিন্নো’’তি. দুতিযম্পি খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি. অথ খো সো সদ্ধো পসন্নো তং অস্সদ্ধং অপ্পসন্নং এতদৰোচ – ‘‘মায্যো, এৰং অৰচ. অম্হাকং পিতুনা ভিক্খুনিসঙ্ঘস্স দিন্নো’’তি. ততিযম্পি খো সো অস্সদ্ধো অপ্পসন্নো তং সদ্ধং পসন্নং এতদৰোচ – ‘‘অম্হাকং উদোসিতো, তং ভাজেমা’’তি. অথ খো সো সদ্ধো পসন্নো – ‘‘সচে ময্হং ভৰিস্সতি, অহম্পি ভিক্খুনিসঙ্ঘস্স দস্সামী’’তি – তং অস্সদ্ধং অপ্পসন্নং এতদৰোচ – ‘‘ভাজেমা’’তি. অথ খো সো উদোসিতো তেহি ভাজীযমানো তস্স অস্সদ্ধস্স অপ্পসন্নস্স পাপুণাতি [পাপুণি (স্যা.)]. অথ খো সো অস্সদ্ধো অপ্পসন্নো ভিক্খুনিযো উপসঙ্কমিত্ৰা এতদৰোচ – ‘‘নিক্খমথায্যে, অম্হাকং উদোসিতো’’তি.

এৰং ৰুত্তে থুল্লনন্দা ভিক্খুনী তং পুরিসং এতদৰোচ – ‘‘মায্যো, এৰং অৰচ, তুম্হাকং পিতুনা ভিক্খুনিসঙ্ঘস্স দিন্নো’’তি. ‘‘দিন্নো ন দিন্নো’’তি ৰোহারিকে মহামত্তে পুচ্ছিংসু. মহামত্তা এৰমাহংসু – ‘‘কো, অয্যে, জানাতি ভিক্খুনিসঙ্ঘস্স দিন্নো’’তি? এৰং ৰুত্তে থুল্লনন্দা ভিক্খুনী তে মহামত্তে এতদৰোচ – ‘‘অপি নায্যো [অপি ন্ৰয্যা (স্যা.), অপি নায্যো (ক.)] তুম্হেহি দিট্ঠং ৰা সুতং ৰা সক্খিং ঠপযিত্ৰা দানং দিয্যমান’’ন্তি? অথ খো তে মহামত্তা – ‘‘সচ্চং খো অয্যা আহা’’তি তং উদোসিতং ভিক্খুনিসঙ্ঘস্স অকংসু. অথ খো সো পুরিসো পরাজিতো উজ্ঝাযতি খিয্যতি ৰিপাচেতি – ‘‘অস্সমণিযো ইমা মুণ্ডা বন্ধকিনিযো. কথঞ্হি নাম অম্হাকং উদোসিতং অচ্ছিন্দাপেস্সন্তী’’তি! থুল্লনন্দা ভিক্খুনী মহামত্তানং এতমত্থং আরোচেসি. মহামত্তা তং পুরিসং দণ্ডাপেসুং. অথ খো সো পুরিসো দণ্ডিতো ভিক্খুনূপস্সযস্স অৰিদূরে আজীৰকসেয্যং কারাপেত্ৰা আজীৰকে উয্যোজেসি – ‘‘এতা ভিক্খুনিযো অচ্চাৰদথা’’তি.

থুল্লনন্দা ভিক্খুনী মহামত্তানং এতমত্থং আরোচেসি. মহামত্তা তং পুরিসং বন্ধাপেসুং. মনুস্সা উজ্ঝাযন্তি খিয্যন্তি ৰিপাচেন্তি – ‘‘পঠমং ভিক্খুনিযো উদোসিতং অচ্ছিন্দাপেসুং, দুতিযং দণ্ডাপেসুং, ততিযং বন্ধাপেসুং. ইদানি ঘাতাপেস্সন্তী’’তি! অস্সোসুং খো ভিক্খুনিযো তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যা তা ভিক্খুনিযো অপ্পিচ্ছা…পে… তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা থুল্লনন্দা উস্সযৰাদিকা ৰিহরিস্সতী’’তি! অথ খো তা ভিক্খুনিযো ভিক্খূনং এতমত্থং আরোচেসুং…পে… সচ্চং কির, ভিক্খৰে, থুল্লনন্দা ভিক্খুনী উস্সযৰাদিকা ৰিহরতীতি. ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম, ভিক্খৰে, থুল্লনন্দা ভিক্খুনী উস্সযৰাদিকা ৰিহরিস্সতি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ভিক্খুনিযো ইমং সিক্খাপদং উদ্দিসন্তু –

৬৭৯. ‘‘যা পন ভিক্খুনী উস্সযৰাদিকা ৰিহরেয্য গহপতিনা ৰা গহপতিপুত্তেন ৰা দাসেন ৰা কম্মকারেন [কম্মকরেন (সী. স্যা.)] ৰা অন্তমসো সমণপরিব্বাজকেনাপি, অযং ভিক্খুনী পঠমাপত্তিকং ধম্মং আপন্না নিস্সারণীযং সঙ্ঘাদিসেস’’ন্তি.

৬৮০. যা পনাতি যা যাদিসা…পে… ভিক্খুনীতি…পে… অযং ইমস্মিং অত্থে অধিপ্পেতা ভিক্খুনীতি.

উস্সযৰাদিকা নাম অড্ডকারিকা ৰুচ্চতি.

গহপতি নাম যো কোচি অগারং অজ্ঝাৰসতি.

গহপতিপুত্তো নাম যে কেচি পুত্তভাতরো.

দাসো নাম অন্তোজাতো ধনক্কীতো করমরানীতো.

কম্মকারো নাম ভটকো আহতকো.

সমণপরিব্বাজকো নাম ভিক্খুঞ্চ ভিক্খুনিঞ্চ সিক্খমানঞ্চ সামণেরঞ্চ সামণেরিঞ্চ ঠপেত্ৰা যো কোচি পরিব্বাজকসমাপন্নো.

অড্ডং করিস্সামীতি দুতিযং ৰা পরিযেসতি গচ্ছতি ৰা, আপত্তি দুক্কটস্স. একস্স আরোচেতি, আপত্তি দুক্কটস্স. দুতিযস্স আরোচেতি, আপত্তি থুল্লচ্চযস্স. অড্ডপরিযোসানে আপত্তি সঙ্ঘাদিসেসস্স.

পঠমাপত্তিকন্তি সহ ৰত্থুজ্ঝাচারা আপজ্জতি অসমনুভাসনায.

নিস্সারণীযন্তি সঙ্ঘম্হা নিস্সারীযতি.

সঙ্ঘাদিসেসন্তি সঙ্ঘোৰ তস্সা আপত্তিযা মানত্তং দেতি মূলায পটিকস্সতি অব্ভেতি, ন সম্বহুলা ন একা ভিক্খুনী. তেন ৰুচ্চতি ‘‘সঙ্ঘাদিসেসো’’তি. তস্সেৰ আপত্তিনিকাযস্স নামকম্মং অধিৰচনং. তেনপি ৰুচ্চতি ‘‘সঙ্ঘাদিসেসো’’তি.

৬৮১. অনাপত্তি মনুস্সেহি আকড্ঢীযমানা গচ্ছতি, আরক্খং যাচতি, অনোদিস্স আচিক্খতি, উম্মত্তিকায…পে… আদিকম্মিকাযাতি.

পঠমসঙ্ঘাদিসেসসিক্খাপদং নিট্ঠিতং.