৩. হসধম্মসিক্খাপদং

৩৩৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন সত্তরসৰগ্গিযা ভিক্খূ অচিরৰতিযা নদিযা উদকে কীল়ন্তি. তেন খো পন সমযেন রাজা পসেনদি কোসলো মল্লিকায দেৰিযা সদ্ধিং উপরিপাসাদৰরগতো হোতি. অদ্দসা খো রাজা পসেনদি কোসলো সত্তরসৰগ্গিযে ভিক্খূ অচিরৰতিযা নদিযা উদকে কীল়ন্তে. দিস্ৰান মল্লিকং দেৰিং এতদৰোচ – ‘‘এতে তে, মল্লিকে, অরহন্তো উদকে কীল়ন্তী’’তি. ‘‘নিস্সংসযং খো, মহারাজ, ভগৰতা সিক্খাপদং অপঞ্ঞত্তং. তে ৰা ভিক্খূ অপ্পকতঞ্ঞুনো’’তি. অথ খো রঞ্ঞো পসেনদিস্স কোসলস্স এতদহোসি – ‘‘কেন নু খো অহং উপাযেন ভগৰতো চ ন আরোচেয্যং, ভগৰা চ জানেয্য ইমে ভিক্খূ উদকে কীল়িতা’’তি? অথ খো রাজা পসেনদি কোসলো সত্তরসৰগ্গিযে ভিক্খূ পক্কোসাপেত্ৰা মহন্তং গুল়পিণ্ডং অদাসি – ‘‘ইমং, ভন্তে, গুল়পিণ্ডং ভগৰতো দেথা’’তি. সত্তরসৰগ্গিযা ভিক্খূ তং গুল়পিণ্ডং আদায যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং এতদৰোচুং – ‘‘ইমং, ভন্তে, গুল়পিণ্ডং রাজা পসেনদি কোসলো ভগৰতো দেতী’’তি. ‘‘কহং পন তুম্হে, ভিক্খৰে, রাজা অদ্দসা’’তি. ‘‘অচিরৰতিযা নদিযা, ভগৰা, উদকে কীল়ন্তে’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, উদকে কীল়িস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৩৩৬. ‘‘উদকে হসধম্মে [হস্সধম্মে (সী. স্যা.)] পাচিত্তিয’’ন্তি.

৩৩৭. উদকে হসধম্মো নাম উপরিগোপ্ফকে উদকে হসাধিপ্পাযো নিমুজ্জতি ৰা উম্মুজ্জতি ৰা পলৰতি ৰা, আপত্তি পাচিত্তিযস্স.

৩৩৮. উদকে হসধম্মে হসধম্মসঞ্ঞী, আপত্তি পাচিত্তিযস্স. উদকে হসধম্মে ৰেমতিকো, আপত্তি পাচিত্তিযস্স. উদকে হসধম্মে অহসধম্মসঞ্ঞী, আপত্তি পাচিত্তিযস্স.

হেট্ঠাগোপ্ফকে উদকে কীল়তি, আপত্তি দুক্কটস্স. উদকে নাৰায কীল়তি, আপত্তি দুক্কটস্স. হত্থেন ৰা পাদেন ৰা কট্ঠেন ৰা কঠলায ৰা উদকং পহরতি, আপত্তি দুক্কটস্স. ভাজনগতং উদকং ৰা কঞ্জিকং ৰা খীরং ৰা তক্কং ৰা রজনং ৰা পস্সাৰং ৰা চিক্খল্লং ৰা কীল়তি, আপত্তি দুক্কটস্স.

উদকে অহসধম্মে হসধম্মসঞ্ঞী, আপত্তি দুক্কটস্স. উদকে অহসধম্মে ৰেমতিকো, আপত্তি দুক্কটস্স. উদকে অহসধম্মে অহসধম্মসঞ্ঞী, অনাপত্তি.

৩৩৯. অনাপত্তি ন হসাধিপ্পাযো, সতি করণীযে উদকং ওতরিত্ৰা নিমুজ্জতি ৰা উম্মুজ্জতি ৰা পলৰতি ৰা, পারং গচ্ছন্তো নিমুজ্জতি ৰা উম্মুজ্জতি ৰা পলৰতি ৰা, আপদাসু, উম্মত্তকস্স, আদিকম্মিকস্সাতি.

হসধম্মসিক্খাপদং নিট্ঠিতং ততিযং.