৯. পরিপাচিতসিক্খাপদং

১৯২. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন থুল্লনন্দা ভিক্খুনী অঞ্ঞতরস্স কুলস্স কুলূপিকা হোতি নিচ্চভত্তিকা. তেন চ গহপতিনা থেরা ভিক্খূ নিমন্তিতা হোন্তি. অথ খো থুল্লনন্দা ভিক্খুনী পুব্বণ্হসমযং নিৰাসেত্ৰা পত্তচীৰরমাদায যেন তং কুলং তেনুপসঙ্কমি; উপসঙ্কমিত্ৰা তং গহপতিং এতদৰোচ – ‘‘কিমিদং, গহপতি, পহূতং খাদনীযং ভোজনীযং পটিযত্ত’’ন্তি? ‘‘থেরা মযা, অয্যে, নিমন্তিতা’’তি. ‘‘কে পন তে, গহপতি, থেরা’’তি? ‘‘অয্যো সারিপুত্তো অয্যো মহামোগ্গল্লানো অয্যো মহাকচ্চানো অয্যো মহাকোট্ঠিকো অয্যো মহাকপ্পিনো অয্যো মহাচুন্দো অয্যো অনুরুদ্ধো অয্যো রেৰতো অয্যো উপালি অয্যো আনন্দো অয্যো রাহুলো’’তি. ‘‘কিং পন ত্ৰং, গহপতি, মহানাগে তিট্ঠমানে চেটকে নিমন্তেসী’’তি?

‘‘কে পন তে, অয্যে, মহানাগা’’তি? ‘‘অয্যো দেৰদত্তো অয্যো কোকালিকো অয্যো কটমোদকতিস্সকো [কটমোরকতিস্সকো (সী.) কতমোরকতিস্সকো (স্যা.)] অয্যো খণ্ডদেৰিযা পুত্তো অয্যো সমুদ্দদত্তো’’তি. অযং চরহি থুল্লনন্দায ভিক্খুনিযা অন্তরা কথা ৰিপ্পকতা, অথ তে থেরা ভিক্খূ পৰিসিংসু. ‘‘সচ্চং মহানাগা খো তযা, গহপতি, নিমন্তিতা’’তি. ‘‘ইদানেৰ খো ত্ৰং, অয্যে, চেটকে অকাসি; ইদানি মহানাগে’’তি. ঘরতো চ নিক্কড্ঢি, নিচ্চভত্তঞ্চ পচ্ছিন্দি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম দেৰদত্তো জানং ভিক্খুনিপরিপাচিতং পিণ্ডপাতং ভুঞ্জিস্সতী’’তি…পে… ‘‘সচ্চং কির ত্ৰং, দেৰদত্ত, জানং ভিক্খুনিপরিপাচিতং পিণ্ডপাতং ভুঞ্জসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, জানং ভিক্খুনিপরিপাচিতং পিণ্ডপাতং ভুঞ্জিস্সসি. নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু জানং ভিক্খুনিপরিপাচিতং পিণ্ডপাতং ভুঞ্জেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

১৯৩. তেন খো পন সমযেন অঞ্ঞতরো ভিক্খু রাজগহা পব্বজিতো ঞাতিকুলং অগমাসি. মনুস্সা – ‘‘চিরস্সম্পি ভদন্তো আগতো’’তি সক্কচ্চং ভত্তং অকংসু. তস্স কুলস্স কুলূপিকা ভিক্খুনী তে মনুস্সে এতদৰোচ – ‘‘দেথয্যস্স, আৰুসো, ভত্ত’’ন্তি. অথ খো সো ভিক্খু – ‘‘ভগৰতা পটিক্খিত্তং জানং ভিক্খুনিপরিপাচিতং পিণ্ডপাতং ভুঞ্জিতু’’ন্তি কুক্কুচ্চাযন্তো ন পটিগ্গহেসি. নাসক্খি পিণ্ডায চরিতুং, ছিন্নভত্তো অহোসি. অথ খো সো ভিক্খু আরামং গন্ত্ৰা ভিক্খূনং এতমত্থং আরোচেসি. ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পুব্বে গিহিসমারম্ভে জানং ভিক্খুনিপরিপাচিতং পিণ্ডপাতং ভুঞ্জিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৯৪. ‘‘যো পন ভিক্খু জানং ভিক্খুনিপরিপাচিতং পিণ্ডপাতং ভুঞ্জেয্য, অঞ্ঞত্র পুব্বে গিহিসমারম্ভা, পাচিত্তিয’’ন্তি.

১৯৫. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

জানাতি নাম সামং ৰা জানাতি অঞ্ঞে ৰা তস্স আরোচেন্তি সা ৰা আরোচেতি.

ভিক্খুনী নাম উভতোসঙ্ঘে উপসম্পন্না.

পরিপাচেতি নাম পুব্বে অদাতুকামানং অকত্তুকামানং – ‘‘অয্যো ভাণকো, অয্যো বহুস্সুতো, অয্যো সুত্তন্তিকো, অয্যো ৰিনযধরো, অয্যো ধম্মকথিকো, দেথ অয্যস্স, করোথ অয্যস্সা’’তি এসা পরিপাচেতি নাম.

পিণ্ডপাতো নাম পঞ্চন্নং ভোজনানং অঞ্ঞতরং ভোজনং.

অঞ্ঞত্র পুব্বে গিহিসমারম্ভাতি ঠপেত্ৰা গিহিসমারম্ভং.

গিহিসমারম্ভো নাম ঞাতকা ৰা হোন্তি পৰারিতা ৰা পকতিপটিযত্তং ৰা.

অঞ্ঞত্র পুব্বে গিহিসমারম্ভা ভুঞ্জিস্সামীতি পটিগ্গণ্হাতি, আপত্তি দুক্কটস্স. অজ্ঝোহারে অজ্ঝোহারে, আপত্তি পাচিত্তিযস্স.

১৯৬. পরিপাচিতে পরিপাচিতসঞ্ঞী ভুঞ্জতি, অঞ্ঞত্র পুব্বে গিহিসমারম্ভা, আপত্তি পাচিত্তিযস্স. পরিপাচিতে ৰেমতিকো ভুঞ্জতি, অঞ্ঞত্র পুব্বে গিহিসমারম্ভা, আপত্তি দুক্কটস্স. পরিপাচিতে অপরিপাচিতসঞ্ঞী ভুঞ্জতি, অঞ্ঞত্র পুব্বে গিহিসমারম্ভা, অনাপত্তি. একতোউপসম্পন্নায পরিপাচিতং ভুঞ্জতি, অঞ্ঞত্র পুব্বে গিহিসমারম্ভা, আপত্তি দুক্কটস্স. অপরিপাচিতে পরিপাচিতসঞ্ঞী, আপত্তি দুক্কটস্স. অপরিপাচিত্তে ৰেমতিকো, আপত্তি দুক্কটস্স. অপরিপাচিতে অপরিপাচিতসঞ্ঞী, অনাপত্তি.

১৯৭. অনাপত্তি পুব্বে গিহিসমারম্ভে, সিক্খমানা পরিপাচেতি, সামণেরী পরিপাচেতি, পঞ্চ ভোজনানি ঠপেত্ৰা সব্বত্থ অনাপত্তি, উম্মত্তকস্স, আদিকম্মিকস্সাতি.

পরিপাচিতসিক্খাপদং নিট্ঠিতং নৰমং.