১০. রহোনিসজ্জসিক্খাপদং

১৯৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মতো উদাযিস্স পুরাণদুতিযিকা ভিক্খুনীসু পব্বজিতা হোতি. সা আযস্মতো উদাযিস্স সন্তিকে অভিক্খণং আগচ্ছতি, আযস্মাপি উদাযী তস্সা ভিক্খুনিযা সন্তিকে অভিক্খণং গচ্ছতি. তেন খো পন সমযেন আযস্মা উদাযী তস্সা ভিক্খুনিযা সদ্ধিং একো একায রহো নিসজ্জং কপ্পেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী ভিক্খুনিযা সদ্ধিং একো একায রহো নিসজ্জং কপ্পেস্সতী’’তি…পে… সচ্চং কির ত্ৰং, উদাযি, ভিক্খুনিযা সদ্ধিং একো একায রহো নিসজ্জং কপ্পেসীতি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, ভিক্খুনিযা সদ্ধিং একো একায রহো নিসজ্জং কপ্পেস্সসি! নেতং, মোঘপুরিস অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৯৯. ‘‘যো পন ভিক্খু ভিক্খুনিযা সদ্ধিং একো একায রহো নিসজ্জং কপ্পেয্য, পাচিত্তিয’’ন্তি.

২০০. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

একো একাযাতি ভিক্খু চেৰ হোতি ভিক্খুনী চ.

[পাচি. ২৮৬, ২৯১; পারা. ৪৪৫,৪৫৪] রহো নাম চক্খুস্স রহো সোতস্স রহো. চক্খুস্স রহো নাম ন সক্কা হোতি অক্খিং ৰা নিখণীযমানে ভমুকং ৰা উক্খিপীযমানে সীসং ৰা উক্খিপীযমানে পস্সিতুং. সোতস্স রহো নাম ন সক্কা হোতি পকতিকথা সোতুং.

নিসজ্জং কপ্পেয্যাতি ভিক্খুনিযা নিসিন্নায ভিক্খু উপনিসিন্নো ৰা হোতি উপনিপন্নো ৰা, আপত্তি পাচিত্তিযস্স.

ভিক্খু নিসিন্নে ভিক্খুনী উপনিসিন্না ৰা হোতি উপনিপন্না ৰা, আপত্তি পাচিত্তিযস্স. উভো ৰা নিসিন্না হোন্তি উভো ৰা নিপন্না, আপত্তি পাচিত্তিযস্স.

২০১. রহো রহোসঞ্ঞী একো একায নিসজ্জং কপ্পেতি, আপত্তি পাচিত্তিযস্স. রহো ৰেমতিকো একো একায নিসজ্জং কপ্পেতি, আপত্তি পাচিত্তিযস্স. রহো অরহোসঞ্ঞী একো একায নিসজ্জং কপ্পেতি, আপত্তি পাচিত্তিযস্স.

অরহো রহোসঞ্ঞী, আপত্তি দুক্কটস্স. অরহো ৰেমতিকো, আপত্তি দুক্কটস্স. অরহো অরহোসঞ্ঞী, অনাপত্তি.

২০২. অনাপত্তি যো কোচি ৰিঞ্ঞূ দুতিযো হোতি, তিট্ঠতি ন নিসীদতি, অরহোপেক্খো, অঞ্ঞৰিহিতো নিসীদতি, উম্মত্তকস্স, আদিকম্মিকস্সাতি.

রহোনিসজ্জসিক্খাপদং নিট্ঠিতং দসমং.

ওৰাদৰগ্গো ততিযো.

তস্সুদ্দানং –

অসম্মতঅত্থঙ্গতূ, পস্সযামিসদানেন;

সিব্বতি অদ্ধানং নাৰং ভুঞ্জেয্য, একো একায তে দসাতি.