৮. নাৰাভিরুহনসিক্খাপদং

১৮৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ ভিক্খুনীহি সদ্ধিং সংৰিধায একং নাৰং [একনাৰং (স্যা.)] অভিরুহন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘যথেৰ মযং সপজাপতিকা নাৰায [একনাৰায (স্যা.)] কীল়াম, এৰমেৰিমে সমণা সক্যপুত্তিযা ভিক্খুনীহি সদ্ধিং সংৰিধায নাৰায কীল়ন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনীহি সদ্ধিং সংৰিধায একং নাৰং অভিরুহিস্সন্তী’’তি…পে… ‘‘সচ্চং কির তুম্হে, ভিক্খৰে, ভিক্খুনীহি সদ্ধিং সংৰিধায একং নাৰং অভিরুহথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খুনীহি সদ্ধিং সংৰিধায একং নাৰং অভিরুহিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু ভিক্খুনিযা সদ্ধিং সংৰিধায একং নাৰং [একনাৰং (স্যা.)] অভিরুহেয্য, উদ্ধংগামিনিং ৰা অধোগামিনিং ৰা, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

১৮৭. তেন খো পন সমযেন সম্বহুলা ভিক্খূ চ ভিক্খুনিযো চ সাকেতা সাৰত্থিং অদ্ধানমগ্গপ্পটিপন্না হোন্তি. অন্তরামগ্গে নদী তরিতব্বা [উত্তরিতব্বা (স্যা.)] হোতি. অথ খো তা ভিক্খুনিযো তে ভিক্খূ এতদৰোচুং – ‘‘মযম্পি অয্যেহি সদ্ধিং উত্তরিস্সামা’’তি. ‘‘ন, ভগিনী, কপ্পতি ভিক্খুনিযা সদ্ধিং সংৰিধায একং নাৰং অভিরুহিতুং; তুম্হে ৰা পঠমং উত্তরথ মযং ৰা উত্তরিস্সামা’’তি. ‘‘অয্যা, ভন্তে, অগ্গপুরিসা. অয্যাৰ পঠমং উত্তরন্তূ’’তি. অথ খো তাসং ভিক্খুনীনং পচ্ছা উত্তরন্তীনং চোরা অচ্ছিন্দিংসু চ দূসেসুঞ্চ. অথ খো তা ভিক্খুনিযো সাৰত্থিং গন্ত্ৰা ভিক্খুনীনং এতমত্থং আরোচেসুং. ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, তিরিযং তরণায ভিক্খুনিযা সদ্ধিং সংৰিধায একং নাৰং অভিরুহিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৮৮. ‘‘যো পন ভিক্খু ভিক্খুনিযা সদ্ধিং সংৰিধায একং নাৰং অভিরুহেয্য উদ্ধংগামিনিং ৰা অধোগামিনিং ৰা, অঞ্ঞত্র তিরিযং তরণায, পাচিত্তিয’’ন্তি.

১৮৯. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

সংৰিধাযাতি ‘‘অভিরুহাম, ভগিনি, অভিরুহামায্য; অভিরুহামায্য, অভিরুহাম, ভগিনি; অজ্জ ৰা হিয্যো ৰা পরে ৰা অভিরুহামা’’তি সংৰিদহতি আপত্তি দুক্কটস্স.

ভিক্খুনিযা অভিরুল়্হে ভিক্খু অভিরুহতি, আপত্তি পাচিত্তিযস্স. ভিক্খুম্হি অভিরুল়্হে ভিক্খুনী অভিরুহতি, আপত্তি পাচিত্তিযস্স. উভো ৰা অভিরুহন্তি, আপত্তি পাচিত্তিযস্স.

উদ্ধংগামিনিন্তি উজ্জৰনিকায.

অধোগামিনিন্তি ওজৰনিকায.

অঞ্ঞত্র তিরিযং তরণাযাতি ঠপেত্ৰা তিরিযং তরণং.

কুক্কুটসম্পাতে গামে, গামন্তরে গামন্তরে আপত্তি পাচিত্তিযস্স. অগামকে অরঞ্ঞে, অড্ঢযোজনে অড্ঢযোজনে আপত্তি পাচিত্তিযস্স.

১৯০. সংৰিদহিতে সংৰিদহিতসঞ্ঞী একং নাৰং অভিরুহতি উদ্ধংগামিনিং ৰা অধোগামিনিং ৰা, অঞ্ঞত্র তিরিযং তরণায, আপত্তি পাচিত্তিযস্স. সংৰিদহিতে ৰেমতিকো একং নাৰং অভিরুহতি উদ্ধংগামিনিং ৰা অধোগামিনিং ৰা, অঞ্ঞত্র তিরিযং তরণায, আপত্তি পাচিত্তিযস্স. সংৰিদহিতে অসংৰিদহিতসঞ্ঞী একং নাৰং অভিরুহতি উদ্ধংগামিনিং ৰা অধোগামিনিং ৰা, অঞ্ঞত্র তিরিযং তরণায, আপত্তি পাচিত্তিযস্স.

ভিক্খু সংৰিদহতি, ভিক্খুনী ন সংৰিদহতি, আপত্তি দুক্কটস্স. অসংৰিদহিতে সংৰিদহিতসঞ্ঞী, আপত্তি দুক্কটস্স. অসংৰিদহিতে ৰেমতিকো, আপত্তি দুক্কটস্স. অসংৰিদহিতে, অসংৰিদহিতসঞ্ঞী, অনাপত্তি.

১৯১. অনাপত্তি তিরিযং তরণায, অসংৰিদহিত্ৰা অভিরুহন্তি, ভিক্খুনী সংৰিদহতি, ভিক্খু ন সংৰিদহতি, ৰিসঙ্কেতেন অভিরুহন্তি, আপদাসু উম্মত্তকস্স, আদিকম্মিস্সাতি.

নাৰাভিরুহনসিক্খাপদং নিট্ঠিতং অট্ঠমং.