৭. সংৰিধানসিক্খাপদং

১৮০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন ছব্বগ্গিযা ভিক্খূ ভিক্খুনীহি সদ্ধিং সংৰিধায একদ্ধানমগ্গং পটিপজ্জন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘যথেৰ মযং সপজাপতিকা আহিণ্ডাম, এৰমেৰিমে সমণা সক্যপুত্তিযা ভিক্খুনীহি সদ্ধিং সংৰিধায আহিণ্ডন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনীহি সদ্ধিং সংৰিধায একদ্ধানমগ্গং পটিপজ্জিস্সন্তী’’তি…পে… ‘‘সচ্চং কির তুম্হে, ভিক্খৰে, ভিক্খুনীহি সদ্ধিং সংৰিধায একদ্ধানমগ্গং পটিপজ্জথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খুনীহি সদ্ধিং সংৰিধায একদ্ধানমগ্গং পটিপজ্জিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ.

‘‘যো পন ভিক্খু ভিক্খুনিযা সদ্ধিং সংৰিধায একদ্ধানমগ্গং পটিপজ্জেয্য, অন্তমসো গামন্তরম্পি, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

১৮১. তেন খো পন সমযেন সম্বহুলা ভিক্খূ চ ভিক্খুনিযো চ সাকেতা সাৰত্থিং অদ্ধানমগ্গপ্পটিপন্না হোন্তি. অথ খো তা ভিক্খুনিযো তে ভিক্খূ এতদৰোচুং – ‘‘মযম্পি অয্যেহি সদ্ধিং গমিস্সামা’’তি. ‘‘ন, ভগিনী, কপ্পতি ভিক্খুনিযা সদ্ধিং সংৰিধায একদ্ধানমগ্গং পটিপজ্জিতুং. তুম্হে ৰা পঠমং গচ্ছথ মযং ৰা গমিস্সামা’’তি. ‘‘অয্যা, ভন্তে, অগ্গপুরিসা. অয্যাৰ পঠমং গচ্ছন্তূ’’তি. অথ খো তাসং ভিক্খুনীনং পচ্ছা গচ্ছন্তীনং অন্তরামগ্গে চোরা অচ্ছিন্দিংসু চ দূসেসুঞ্চ. অথ খো তা ভিক্খুনিযো সাৰত্থিং গন্ত্ৰা ভিক্খুনীনং এতমত্থং আরোচেসুং. ভিক্খুনিযো ভিক্খূনং এতমত্থং আরোচেসুং. ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, সত্থগমনীযে মগ্গে সাসঙ্কসম্মতে সপ্পটিভযে ভিক্খুনিযা সদ্ধিং সংৰিধায একদ্ধানমগ্গং পটিপজ্জিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৮২. ‘‘যো পন ভিক্খু ভিক্খুনিযা সদ্ধিং সংৰিধায একদ্ধানমগ্গং পটিপজ্জেয্য, অন্তমসো গামন্তরম্পি, অঞ্ঞত্র সমযা, পাচিত্তিযং. তত্থাযং সমযো . সত্থগমনীযো হোতি মগ্গো সাসঙ্কসম্মতো সপ্পটিভযো – অযং তত্থ সমযো’’তি.

১৮৩. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনী নাম উভতোসঙ্ঘে উপসম্পন্না.

সদ্ধিন্তি একতো.

সংৰিধাযাতি – ‘‘গচ্ছাম, ভগিনি, গচ্ছামায্য; গচ্ছামায্য, গচ্ছাম, ভগিনি; অজ্জ ৰা হিয্যো ৰা পরে ৰা গচ্ছামা’’তি সংৰিদহতি, আপত্তি দুক্কটস্স.

অন্তমসো গামন্তরম্পীতি কুক্কুটসম্পাতে গামে, গামন্তরে গামন্তরে আপত্তি পাচিত্তিযস্স. অগামকে অরঞ্ঞে, অদ্ধযোজনে অদ্ধযোজনে আপত্তি পাচিত্তিযস্স.

অঞ্ঞত্র সমযাতি ঠপেত্ৰা সমযং.

সত্থগমনীযো নাম মগ্গো ন সক্কা হোতি ৰিনা সত্থেন গন্তুং.

সাসঙ্কং নাম তস্মিং মগ্গে [যস্মিং মগ্গে (?)] চোরানং নিৰিট্ঠোকাসো দিস্সতি, ভুত্তোকাসো দিস্সতি, ঠিতোকাসো দিস্সতি, নিসিন্নোকাসো দিস্সতি, নিপন্নোকাসো দিস্সতি.

সপ্পটিভযং নাম তস্মিং মগ্গে চোরেহি মনুস্সা হতা দিস্সন্তি, ৰিলুত্তা দিস্সন্তি, আকোটিতা দিস্সন্তি, সপ্পটিভযং গন্ত্ৰা অপ্পটিভযং দস্সেত্ৰা উয্যোজেতব্বা – ‘‘গচ্ছথ ভগিনিযো’’তি.

১৮৪. সংৰিদহিতে সংৰিদহিতসঞ্ঞী একদ্ধানমগ্গং পটিপজ্জতি, অন্তমসো গামন্তরম্পি, অঞ্ঞত্র সমযা, আপত্তি পাচিত্তিযস্স. সংৰিদহিতে ৰেমতিকো একদ্ধানমগ্গং পটিপজ্জতি, অন্তমসো গামন্তরম্পি, অঞ্ঞত্র সমযা, আপত্তি পাচিত্তিযস্স. সংৰিদহিতে, অসংৰিদহিতসঞ্ঞী একদ্ধানমগ্গং পটিপজ্জতি, অন্তমসো গামন্তরম্পি, অঞ্ঞত্র সমযা, আপত্তি পাচিত্তিযস্স.

ভিক্খু সংৰিদহতি ভিক্খুনী ন সংৰিদহতি, আপত্তি দুক্কটস্স. অসংৰিদহিতে সংৰিদহিতসঞ্ঞী, আপত্তি দুক্কটস্স. অসংৰিদহিতে ৰেমতিকো, আপত্তি দুক্কটস্স. অসংৰিদহিতে অসংৰিদহিতসঞ্ঞী, অনাপত্তি.

১৮৫. অনাপত্তি সমযে, অসংৰিদহিত্ৰা গচ্ছতি, ভিক্খুনী সংৰিদহতি, ভিক্খু ন সংৰিদহতি, ৰিসঙ্কেতেন গচ্ছন্তি, আপদাসু, উম্মত্তকস্স, আদিকম্মিকস্সাতি.

সংৰিধানসিক্খাপদং নিট্ঠিতং সত্তমং.