৬. চীৰরসিব্বনসিক্খাপদং

১৭৫. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী পট্টো [পট্ঠো (সী. স্যা.)] হোতি চীৰরকম্মং কাতুং. অঞ্ঞতরা ভিক্খুনী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘সাধু মে, ভন্তে, অয্যো চীৰরং সিব্বতূ’’তি. অথ খো আযস্মা উদাযী তস্সা ভিক্খুনিযা চীৰরং সিব্বিত্ৰা সুরত্তং সুপরিকম্মকতং কত্ৰা মজ্ঝে পটিভানচিত্তং ৰুট্ঠাপেত্ৰা সংহরিত্ৰা নিক্খিপি. অথ খো সা ভিক্খুনী যেনাযস্মা উদাযী তেনুপসঙ্কমি; উপসঙ্কমিত্ৰা আযস্মন্তং উদাযিং এতদৰোচ – ‘‘কহং তং, ভন্তে, চীৰর’’ন্তি? ‘‘হন্দ, ভগিনি, ইমং চীৰরং যথাসংহটং হরিত্ৰা নিক্খিপিত্ৰা যদা ভিক্খুনিসঙ্ঘো ওৰাদং আগচ্ছতি তদা ইমং চীৰরং পারুপিত্ৰা ভিক্খুনিসঙ্ঘস্স পিট্ঠিতো পিট্ঠিতো আগচ্ছা’’তি. অথ খো সা ভিক্খুনী তং চীৰরং যথাসংহটং হরিত্ৰা নিক্খিপিত্ৰা যদা ভিক্খুনিসঙ্ঘো ওৰাদং আগচ্ছতি তদা তং চীৰরং পারুপিত্ৰা ভিক্খুনিসঙ্ঘস্স পিট্ঠিতো পিট্ঠিতো আগচ্ছতি. মনুস্সা উজ্ঝাযন্তি খিয্যন্তি ৰিপাচেন্তি – ‘‘যাৰ ছিন্নিকা ইমা ভিক্খুনিযো ধুত্তিকা অহিরিকাযো, যত্র হি নাম চীৰরে পটিভানচিত্তং ৰুট্ঠাপেস্সন্তী’’তি!

ভিক্খুনিযো এৰমাহংসু – ‘‘কস্সিদং কম্ম’’ন্তি? ‘‘অয্যস্স উদাযিস্সা’’তি. ‘‘যেপি তে ছিন্নকা ধুত্তকা অহিরিকা তেসম্পি এৰরূপং ন সোভেয্য, কিং পন অয্যস্স উদাযিস্সা’’তি! অথ খো তা ভিক্খুনিযো ভিক্খূনং এতমত্থং আরোচেসুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী ভিক্খুনিযা চীৰরং সিব্বিস্সতী’’তি…পে… সচ্চং কির ত্ৰং, উদাযি, ভিক্খুনিযা চীৰরং সিব্বসী’’তি? ‘‘সচ্চং, ভগৰা’’তি. ‘‘ঞাতিকা তে, উদাযি, অঞ্ঞাতিকা’’তি? ‘‘অঞ্ঞাতিকা, ভগৰা’’তি. ‘‘অঞ্ঞাতকো, মোঘপুরিস, অঞ্ঞাতিকায ন জানাতি পতিরূপং ৰা অপ্পতিরূপং ৰা পাসাদিকং ৰা অপাসাদিকং ৰা. কথঞ্হি নাম ত্ৰং, মোঘপুরিস, অঞ্ঞাতিকায ভিক্খুনিযা চীৰরং সিব্বিস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৭৬. ‘‘যো পন ভিক্খু অঞ্ঞাতিকায ভিক্খুনিযা চীৰরং সিব্বেয্য ৰা সিব্বাপেয্য ৰা, পাচিত্তিয’’ন্তি.

১৭৭. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অঞ্ঞাতিকা নাম মাতিতো ৰা পিতিতো ৰা যাৰ সত্তমা পিতামহযুগা অসম্বদ্ধা.

ভিক্খুনী নাম উভতোসঙ্ঘে উপসম্পন্না.

চীৰরং নাম ছন্নং চীৰরানং অঞ্ঞতরং চীৰরং.

সিব্বেয্যাতি সযং সিব্বতি আরাপথে আরাপথে আপত্তি পাচিত্তিযস্স.

সিব্বাপেয্যাতি অঞ্ঞং আণাপেতি, আপত্তি পাচিত্তিযস্স. সকিং আণত্তো বহুকম্পি সিব্বতি, আপত্তি পাচিত্তিযস্স.

১৭৮. অঞ্ঞাতিকায অঞ্ঞাতিকসঞ্ঞী চীৰরং সিব্বতি ৰা সিব্বাপেতি ৰা, আপত্তি পাচিত্তিযস্স. অঞ্ঞাতিকায ৰেমতিকো চীৰরং সিব্বতি ৰা সিব্বাপেতি ৰা, আপত্তি পাচিত্তিযস্স. অঞ্ঞাতিকায ঞাতিকসঞ্ঞী চীৰরং সিব্বতি ৰা সিব্বাপেতি ৰা, আপত্তি পাচিত্তিযস্স.

একতোউপসম্পন্নায চীৰরং সিব্বতি ৰা সিব্বাপেতি ৰা, আপত্তি দুক্কটস্স. ঞাতিকায অঞ্ঞাতিকসঞ্ঞী, আপত্তি দুক্কটস্স. ঞাতিকায ৰেমতিকো, আপত্তি দুক্কটস্স. ঞাতিকায ঞাতিকসঞ্ঞী, অনাপত্তি.

১৭৯. অনাপত্তি ঞাতিকায, চীৰরং ঠপেত্ৰা অঞ্ঞং পরিক্খারং সিব্বতি ৰা সিব্বাপেতি ৰা, সিক্খমানায, সামণেরিযা, উম্মত্তকস্স, আদিকম্মিকস্সাতি.

চীৰরসিব্বনসিক্খাপদং নিট্ঠিতং ছট্ঠং.