৫. চীৰরদানসিক্খাপদং

১৬৯. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন অঞ্ঞতরো ভিক্খু সাৰত্থিযং অঞ্ঞতরিস্সা ৰিসিখায পিণ্ডায চরতি. অঞ্ঞতরাপি ভিক্খুনী তস্সা ৰিসিখায পিণ্ডায চরতি. অথ খো সো ভিক্খু তং ভিক্খুনিং এতদৰোচ – ‘‘গচ্ছ, ভগিনি, অমুকস্মিং ওকাসে ভিক্খা দিয্যতী’’তি. সাপি খো এৰমাহ – ‘‘গচ্ছায্য, অমুকস্মিং ওকাসে ভিক্খা দিয্যতী’’তি. তে অভিণ্হদস্সনেন সন্দিট্ঠা অহেসুং. তেন খো পন সমযেন সঙ্ঘস্স চীৰরং ভাজীযতি. অথ খো সা ভিক্খুনী ওৰাদং গন্ত্ৰা যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং অভিৰাদেত্ৰা একমন্তং অট্ঠাসি. একমন্তং ঠিতং খো তং ভিক্খুনিং সো ভিক্খু এতদৰোচ – ‘‘অযং মে, ভগিনি, চীৰরপটিৰীসো [পটিৰিংসো (সী.), পটিৰিসো (ইতিপি)]; সাদিযিস্সসী’’তি? ‘‘আমায্য, দুব্বলচীৰরাম্হী’’তি.

অথ খো সো ভিক্খু তস্সা ভিক্খুনিযা চীৰরং অদাসি. সোপি খো ভিক্খু দুব্বলচীৰরো হোতি. ভিক্খূ তং ভিক্খুং এতদৰোচুং – ‘‘করোহি দানি তে, আৰুসো, চীৰর’’ন্তি. অথ খো সো ভিক্খু ভিক্খূনং এতমত্থং আরোচেসি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু ভিক্খুনিযা চীৰরং দস্সতী’’তি…পে… ‘‘সচ্চং কির ত্ৰং, ভিক্খু, ভিক্খুনিযা চীৰরং অদাসী’’তি? ‘‘সচ্চং, ভগৰা’’তি. ‘‘ঞাতিকা তে, ভিক্খু, অঞ্ঞাতিকা’’তি? ‘‘অঞ্ঞাতিকা, ভগৰা’’তি. ‘‘অঞ্ঞাতকো, মোঘপুরিস, অঞ্ঞাতিকায ন জানাতি পতিরূপং ৰা অপ্পতিরূপং ৰা সন্তং ৰা অসন্তং ৰা. কথঞ্হি নাম ত্ৰং, মোঘপুরিস, অঞ্ঞাতিকায ভিক্খুনিযা চীৰরং দস্সসি! নেতং, মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু অঞ্ঞাতিকায ভিক্খুনিযা চীৰরং দদেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

১৭০. তেন খো পন সমযেন ভিক্খূ কুক্কুচ্চাযন্তা ভিক্খুনীনং পারিৰত্তকং [পারিৰট্টকং (ইতিপি)] চীৰরং ন দেন্তি. ভিক্খুনিযো উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা অম্হাকং পারিৰত্তকং চীৰরং ন দস্সন্তী’’তি! অস্সোসুং খো ভিক্খূ তাসং ভিক্খুনীনং উজ্ঝাযন্তীনং খিয্যন্তীনং ৰিপাচেন্তীনং. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, পঞ্চন্নং পারিৰত্তকং দাতুং. ভিক্খুস্স, ভিক্খুনিযা, সিক্খমানায, সামণেরস্স, সামণেরিযা – অনুজানামি, ভিক্খৰে, ইমেসং পঞ্চন্নং পারিৰত্তকং দাতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৭১. ‘‘যো পন ভিক্খু অঞ্ঞাতিকায ভিক্খুনিযা চীৰরং দদেয্য, অঞ্ঞত্র পারিৰত্তকা, পাচিত্তিয’’ন্তি.

১৭২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অঞ্ঞাতিকা নাম মাতিতো ৰা পিতিতো ৰা যাৰ সত্তমা পিতামহযুগা অসম্বদ্ধা.

ভিক্খুনী নাম উভতোসঙ্ঘে উপসম্পন্না.

চীৰরং নাম ছন্নং চীৰরানং অঞ্ঞতরং চীৰরং ৰিকপ্পনুপগং পচ্ছিমং [ৰিকপ্পনুপগপচ্ছিমং (সী.)].

অঞ্ঞত্র পারিৰত্তকাতি ঠপেত্ৰা পারিৰত্তকং দেতি, আপত্তি পাচিত্তিযস্স.

১৭৩. অঞ্ঞাতিকায অঞ্ঞাতিকসঞ্ঞী চীৰরং দেতি, অঞ্ঞত্র পারিৰত্তকা, আপত্তি পাচিত্তিযস্স. অঞ্ঞাতিকায ৰেমতিকো চীৰরং দেতি, অঞ্ঞত্র পারিৰত্তকা, আপত্তি পাচিত্তিযস্স. অঞ্ঞাতিকায ঞাতিকসঞ্ঞী চীৰরং দেতি, অঞ্ঞত্র পারিৰত্তকা, আপত্তি পাচিত্তিযস্স.

একতো উপসম্পন্নায চীৰরং দেতি, অঞ্ঞত্র পারিৰত্তকা, আপত্তি দুক্কটস্স. ঞাতিকায অঞ্ঞাতিকসঞ্ঞী, আপত্তি দুক্কটস্স. ঞাতিকায ৰেমতিকো, আপত্তি দুক্কটস্স. ঞাতিকায ঞাতিকসঞ্ঞী, অনাপত্তি.

১৭৪. অনাপত্তি ঞাতিকায, পারিৰত্তকং পরিত্তেন ৰা ৰিপুলং, ৰিপুলেন ৰা পরিত্তং, ভিক্খুনী ৰিস্সাসং গণ্হাতি, তাৰকালিকং গণ্হাতি, চীৰরং ঠপেত্ৰা অঞ্ঞং পরিক্খারং দেতি, সিক্খমানায, সামণেরিযা, উম্মত্তকস্স, আদিকম্মিকস্সাতি.

চীৰরদানসিক্খাপদং নিট্ঠিতং পঞ্চমং.