৪. আমিসসিক্খাপদং

১৬৪. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থেরা ভিক্খূ ভিক্খুনিযো ওৰদন্তা লাভিনো হোন্তি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং. ছব্বগ্গিযা ভিক্খূ এৰং ৰদন্তি – ‘‘ন বহুকতা থেরা ভিক্খূ ভিক্খুনিযো ওৰদিতুং; আমিসহেতু থেরা ভিক্খূ ভিক্খুনিযো ওৰদন্তী’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ এৰং ৰক্খন্তি – ‘ন বহুকতা থেরা ভিক্খূ ভিক্খুনিযো ওৰদিতুং; আমিসহেতু থেরা ভিক্খূ ভিক্খুনিযো ওৰদন্তী’’’তি…পে… ‘‘সচ্চং কির তুম্হে, ভিক্খৰে, এৰং ৰদেথ – ‘ন বহুকতা থেরা ভিক্খূ ভিক্খুনিযো ওৰদিতুং; আমিসহেতু থেরা ভিক্খূ ভিক্খুনিযো ওৰদন্তী’’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, এৰং ৰক্খথ – ন বহুকতা থেরা ভিক্খূ ভিক্খুনিযো ওৰদিতুং; আমিসহেতু থেরা ভিক্খূ ভিক্খুনিযো ওৰদন্তীতি! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৬৫. ‘‘যো পন ভিক্খু এৰং ৰদেয্য – ‘আমিসহেতু থেরা ভিক্খূ ভিক্খুনিযো ওৰন্দতী’তি, পাচিত্তিয’’ন্তি.

১৬৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

আমিসহেতূতি চীৰরহেতু পিণ্ডপাতহেতু সেনাসনহেতু গিলানপ্পচ্চযভেসজ্জপরিক্খারহেতু সক্কারহেতু গরুকারহেতু মাননহেতু ৰন্দনহেতু পূজনহেতু.

এৰং ৰদেয্যাতি উপসম্পন্নং সঙ্ঘেন সম্মতং ভিক্খুনোৰাদকং অৰণ্ণং কত্তুকামো অযসং কত্তুকামো মঙ্কুকত্তুকামো এৰং ৰদেতি – ‘‘চীৰরহেতু পিণ্ডপাতহেতু সেনাসনহেতু গিলানপ্পচ্চযভেসজ্জপরিক্খারহেতু সক্কারহেতু গরুকারহেতু মাননহেতু ৰন্দনহেতু পূজনহেতু ওৰদতী’’তি ভণতি, আপত্তি পাচিত্তিযস্স.

১৬৭. ধম্মকম্মে ধম্মকম্মসঞ্ঞী এৰং ৰদেতি, আপত্তি পাচিত্তিযস্স. ধম্মকম্মে ৰেমতিকো এৰং ৰদেতি, আপত্তি পাচিত্তিযস্স. ধম্মকম্মে অধম্মকম্মসঞ্ঞী এৰং ৰদেতি, আপত্তি পাচিত্তিযস্স.

উপসম্পন্নং সঙ্ঘেন অসম্মতং ভিক্খুনোৰাদকং অৰণ্ণং কত্তুকামো অযসং কত্তুকামো মঙ্কুকত্তুকামো এৰং ৰদেতি – ‘‘চীৰরহেতু…পে… পূজনহেতু ওৰদতী’’তি ভণতি, আপত্তি দুক্কটস্স. অনুপসম্পন্নং সঙ্ঘেন সম্মতং ৰা অসম্মতং ৰা ভিক্খুনোৰাদকং অৰণ্ণং কত্তুকামো অযসং কত্তুকামো মঙ্কুকত্তুকামো এৰং ৰদেতি – ‘‘চীৰরহেতু পিণ্ডপাতহেতু সেনাসনহেতু গিলানপ্পচ্চযভেসজ্জপরিক্খারহেতু সক্কারহেতু গরুকারহেতু মাননহেতু ৰন্দনহেতু পূজনহেতু ওৰদতী’’তি ভণতি, আপত্তি দুক্কটস্স. অধম্মকম্মে ধম্মকম্মসঞ্ঞী, আপত্তি দুক্কটস্স. অধম্মকম্মে ৰেমতিকো, আপত্তি দুক্কটস্স. অধম্মকম্মে অধম্মকম্মসঞ্ঞী, আপত্তি দুক্কটস্স.

১৬৮. অনাপত্তি পকতিযা চীৰরহেতু পিণ্ডপাতহেতু সেনাসনহেতু গিলানপ্পচ্চযভেসজ্জপরিক্খারহেতু সক্কারহেতু গরুকারহেতু মাননহেতু ৰন্দনহেতু পূজনহেতু ওৰদন্তং ভণতি, উম্মত্তকস্স, আদিকম্মিকস্সাতি.

আমিসসিক্খাপদং নিট্ঠিতং চতুত্থং.