৩. ভিক্খুনুপস্সযসিক্খাপদং

১৫৮. তেন সমযেন বুদ্ধো ভগৰা সক্কেসু ৰিহরতি কপিলৰত্থুস্মিং নিগ্রোধারামে. তেন খো পন সমযেন ছব্বগ্গিযা ভিক্খূ ভিক্খুনুপস্সযং উপসঙ্কমিত্ৰা ছব্বগ্গিযা ভিক্খুনিযো ওৰদন্তি. ভিক্খুনিযো ছব্বগ্গিযা ভিক্খুনিযো এতদৰোচুং – ‘‘এথায্যে, ওৰাদং গমিস্সামা’’তি. ‘‘যম্পি [যং হি (ক.)] মযং, অয্যে, গচ্ছেয্যাম ওৰাদস্স কারণা, অয্যা ছব্বগ্গিযা ইধেৰ আগন্ত্ৰা অম্হে ওৰদন্তী’’তি. ভিক্খুনিযো উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনুপস্সযং উপসঙ্কমিত্ৰা ভিক্খুনিযো ওৰদিস্সন্তী’’তি [ছব্বগ্গিযা ভিক্খুনিযো ওৰাদং ন গচ্ছিস্সন্তীতি (সী.)]! অথ খো তা ভিক্খুনিযো ভিক্খূনং এতমত্থং আরোচেসুং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুনুপস্সযং উপসঙ্কমিত্ৰা ভিক্খুনিযো ওৰদিস্সন্তী’’তি…পে… ‘‘সচ্চং কির তুম্হে, ভিক্খৰে, ভিক্খুনুপস্সযং উপসঙ্কমিত্ৰা ভিক্খুনিযো ওৰদথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খুনুপস্সযং উপসঙ্কমিত্ৰা ভিক্খুনিযো ওৰদিস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু ভিক্খুনুপস্সযং উপসঙ্কমিত্ৰা ভিক্খুনিযো ওৰদেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

১৫৯. তেন খো পন সমযেন মহাপজাপতি গোতমী গিলানা হোতি. থেরা ভিক্খূ যেন মহাপজাপতি গোতমী তেনুপসঙ্কমিংসু; উপসঙ্কমিত্ৰা মহাপজাপতিং গোতমিং এতদৰোচুং – ‘‘কচ্চি তে, গোতমি, খমনীযং কচ্চি যাপনীয’’ন্তি? ‘‘ন মে, অয্যা, খমনীযং ন যাপনীযং’’. ‘‘ইঙ্ঘয্যা, ধম্মং দেসেথা’’তি. ‘‘ন, ভগিনি, কপ্পতি ভিক্খুনুপস্সযং উপসঙ্কমিত্ৰা ভিক্খুনিযো ধম্মং দেসেতু’’ন্তি কুক্কুচ্চাযন্তা ন দেসেসুং. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন মহাপজাপতি গোতমী তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি. নিসজ্জ খো ভগৰা মহাপজাপতিং গোতমিং এতদৰোচ – ‘‘কচ্চি তে, গোতমি, খমনীযং কচ্চি যাপনীয’’ন্তি? ‘‘পুব্বে মে, ভন্তে, থেরা ভিক্খূ আগন্ত্ৰা ধম্মং দেসেন্তি. তেন মে ফাসু হোতি. ইদানি পন – ‘‘ভগৰতা পটিক্খিত্ত’’ন্তি, কুক্কুচ্চাযন্তা ন দেসেন্তি. তেন মে ন ফাসু হোতী’’তি. অথ খো ভগৰা মহাপজাপতিং গোতমিং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা পক্কামি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ভিক্খুনুপস্সযং উপসঙ্কমিত্ৰা গিলানং ভিক্খুনিং ওৰদিতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৬০. ‘‘যো পন ভিক্খু ভিক্খুনুপস্সযং উপসঙ্কমিত্ৰা ভিক্খুনিযো ওৰদেয্য, অঞ্ঞত্র সমযা, পাচিত্তিযং. তত্থাযং সমযো. গিলানা হোতি ভিক্খুনী – অযং তত্থ সমযো’’তি.

১৬১. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুনুপস্সযো নাম যত্থ ভিক্খুনিযো একরত্তম্পি ৰসন্তি.

উপসঙ্কমিত্ৰাতি তত্থ গন্ত্ৰা.

ভিক্খুনী নাম উভতোসঙ্ঘে উপসম্পন্না.

ওৰদেয্যাতি অট্ঠহি গরুধম্মেহি ওৰদতি, আপত্তি পাচিত্তিযস্স.

অঞ্ঞত্র সমযাতি ঠপেত্ৰা সমযং.

গিলানা নাম ভিক্খুনী ন সক্কোতি ওৰাদায ৰা সংৰাসায ৰা গন্তুং.

১৬২. উপসম্পন্নায উপসম্পন্নসঞ্ঞী ভিক্খুনুপস্সযং উপসঙ্কমিত্ৰা অঞ্ঞত্র সমযা ওৰদতি, আপত্তি পাচিত্তিযস্স. উপসম্পন্নায ৰেমতিকো ভিক্খুনুপস্সযং উপসঙ্কমিত্ৰা অঞ্ঞত্র সমযা ওৰদতি, আপত্তি পাচিত্তিযস্স. উপসম্পন্নায অনুপসম্পন্নসঞ্ঞী ভিক্খুনুপস্সযং উপসঙ্কমিত্ৰা অঞ্ঞত্র সমযা ওৰদতি, আপত্তি পাচিত্তিযস্স.

অঞ্ঞেন ধম্মেন ওৰদতি, আপত্তি দুক্কটস্স. একতোউপসম্পন্নায ওৰদতি, আপত্তি দুক্কটস্স. অনুপসম্পন্নায উপসম্পন্নসঞ্ঞী, আপত্তি দুক্কটস্স. অনুপসম্পন্নায ৰেমতিকো, আপত্তি দুক্কটস্স. অনুপসম্পন্নায অনুপসম্পন্নসঞ্ঞী, অনাপত্তি.

১৬৩. অনাপত্তি সমযে, উদ্দেসং দেন্তো, পরিপুচ্ছং দেন্তো, ‘‘ওসারেহি অয্যা’’তি ৰুচ্চমানো ওসারেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং ভিক্খুনিযো সুণন্তি, সিক্খমানায সামণেরিযা, উম্মত্তকস্স, আদিকম্মিকস্সাতি.

ভিক্খুনুপস্সযসিক্খাপদং নিট্ঠিতং ততিযং.