২. অত্থঙ্গতসিক্খাপদং

১৫৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন থেরা ভিক্খূ ভিক্খুনিযো ওৰদন্তি পরিযাযেন. তেন খো পন সমযেন আযস্মতো চূল়পন্থকস্স পরিযাযো হোতি ভিক্খুনিযো ওৰদিতুং. ভিক্খুনিযো এৰমাহংসু – ‘‘ন দানি অজ্জ ওৰাদো ইদ্ধো ভৰিস্সতি, তঞ্ঞেৰ দানি উদানং অয্যো চূল়পন্থকো পুনপ্পুনং ভণিস্সতী’’তি. অথ খো তা ভিক্খুনিযো যেনাযস্মা চূল়পন্থকো তেনুপসঙ্কমিংসু; উপসঙ্কমিত্ৰা আযস্মন্তং চূল়পন্থকং অভিৰাদেত্ৰা একমন্তং নিসীদিংসু. একমন্তং নিসিন্না খো তা ভিক্খুনিযো আযস্মা চূল়পন্থকো এতদৰোচ – ‘‘সমগ্গাত্থ, ভগিনিযো’’তি? ‘‘সমগ্গাম্হায্যা’’তি. ‘‘ৰত্তন্তি, ভগিনিযো, অট্ঠ গরুধম্মা’’তি? ‘‘ৰত্তন্তায্যা’’তি. ‘‘এসো, ভগিনিযো, ওৰাদো’’তি নিয্যাদেত্ৰা ইমং উদানং পুনপ্পুনং অভাসি –

[উদা. ৩৭] ‘‘অধিচেতসো অপ্পমজ্জতো, মুনিনো মোনপথেসু সিক্খতো;

সোকা ন ভৰন্তি তাদিনো, উপসন্তস্স সদা সতীমতো’’তি.

ভিক্খুনিযো এৰমাহংসু – ‘‘ননু অৰোচুম্হা – ন দানি অজ্জ ওৰাদো ইদ্ধো ভৰিস্সতি, তঞ্ঞেৰ দানি উদানং অয্যো চূল়পন্থকো পুনপ্পুনং ভণিস্সতী’’তি! অস্সোসি খো আযস্মা চূল়পন্থকো তাসং ভিক্খুনীনং ইমং কথাসল্লাপং. অথ খো আযস্মা চূল়পন্থকো ৰেহাসং অব্ভুগ্গন্ত্ৰা আকাসে অন্তলিক্খে চঙ্কমতিপি তিট্ঠতিপি নিসীদতিপি সেয্যম্পি কপ্পেতি ধূমাযতিপি পজ্জলতিপি অন্তরধাযতিপি, তঞ্চেৰ [তঞ্ঞেৰ (ইতিপি)] উদানং ভণতি অঞ্ঞঞ্চ বহুং বুদ্ধৰচনং. ভিক্খুনিযো এৰমাহংসু – ‘‘অচ্ছরিযং ৰত ভো, অব্ভুতং ৰত ভো, ন ৰত নো ইতো পুব্বে ওৰাদো এৰং ইদ্ধো ভূতপুব্বো যথা অয্যস্স চূল়পন্থকস্সা’’তি. অথ খো আযস্মা চূল়পন্থকো তা ভিক্খুনিযো যাৰ সমন্ধকারা ওৰদিত্ৰা উয্যোজেসি – গচ্ছথ ভগিনিযোতি.

অথ খো তা ভিক্খুনিযো নগরদ্ৰারে থকিতে বহিনগরে ৰসিত্ৰা কালস্সেৰ নগরং পৰিসন্তি. মনুস্সা উজ্ঝাযন্তি খিয্যন্তি ৰিপাচেন্তি – ‘‘অব্রহ্মচারিনিযো ইমা ভিক্খুনিযো; আরামে ভিক্খূহি সদ্ধিং ৰসিত্ৰা ইদানি নগরং পৰিসন্তী’’তি. অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা চূল়পন্থকো অত্থঙ্গতে সূরিযে ভিক্খুনিযো ওৰদিস্সতী’’তি…পে… ‘‘সচ্চং কির ত্ৰং, চূল়পন্থক, অত্থঙ্গতে সূরিযে ভিক্খুনিযো ওৰদসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, চূল়পন্থক, অত্থঙ্গতে সূরিযে ভিক্খুনিযো ওৰদিস্সসি! নেতং, চূল়পন্থক, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

১৫৪. ‘‘সম্মতোপি চে ভিক্খু অত্থঙ্গতে সূরিযে ভিক্খুনিযো ওৰদেয্য, পাচিত্তিয’’ন্তি.

১৫৫. সম্মতো নাম ঞত্তিচতুত্থেন কম্মেন সম্মতো.

অত্থঙ্গতে সূরিযেতি ওগ্গতে সূরিযে.

ভিক্খুনী নাম উভতোসঙ্ঘে উপসম্পন্না.

ওৰদেয্যাতি অট্ঠহি ৰা গরুধম্মেহি অঞ্ঞেন ৰা ধম্মেন ওৰদতি, আপত্তি পাচিত্তিযস্স.

১৫৬. অত্থঙ্গতে অত্থঙ্গতসঞ্ঞী ওৰদতি, আপত্তি পাচিত্তিযস্স. অত্থঙ্গতে ৰেমতিকো ওৰদতি, আপত্তি পাচিত্তিযস্স. অত্থঙ্গতে অনত্থঙ্গতসঞ্ঞী ওৰদতি, আপত্তি পাচিত্তিযস্স.

একতোউপসম্পন্নায ওৰদতি, আপত্তি দুক্কটস্স. অনত্থঙ্গতে অত্থঙ্গতসঞ্ঞী, আপত্তি দুক্কটস্স. অনত্থঙ্গতে ৰেমতিকো, আপত্তি দুক্কটস্স. অনত্থঙ্গতে অনত্থঙ্গতসঞ্ঞী, অনাপত্তি.

১৫৭. অনাপত্তি উদ্দেসং দেন্তো, পরিপুচ্ছং দেন্তো, ‘‘ওসারেহি অয্যা’’তি ৰুচ্চমানো, ওসারেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং ভিক্খুনিযো সুণন্তি, সিক্খমানায সামণেরিযা, উম্মত্তকস্স, আদিকম্মিকস্সাতি.

অত্থঙ্গতসিক্খাপদং নিট্ঠিতং দুতিযং.