৯. দুট্ঠুল্লারোচনসিক্খাপদং

৭৮. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উপনন্দো সক্যপুত্তো ছব্বগ্গিযেহি ভিক্খূহি সদ্ধিং ভণ্ডনকতো হোতি. সো সঞ্চেতনিকং সুক্কৰিস্সট্ঠিং আপত্তিং আপজ্জিত্ৰা সঙ্ঘং তস্সা আপত্তিযা পরিৰাসং যাচি. তস্স সঙ্ঘো তস্সা আপত্তিযা পরিৰাসং অদাসি. তেন খো পন সমযেন সাৰত্থিযং অঞ্ঞতরস্স পূগস্স সঙ্ঘভত্তং হোতি. সো পরিৰসন্তো ভত্তগ্গে আসনপরিযন্তে নিসীদি. ছব্বগ্গিযা ভিক্খূ তে উপাসকে এতদৰোচুং – ‘‘এসো, আৰুসো, আযস্মা উপনন্দো সক্যপুত্তো তুম্হাকং সম্ভাৰিতো কুলূপকো; যেনেৰ হত্থেন সদ্ধাদেয্যং ভুঞ্জতি তেনেৰ হত্থেন উপক্কমিত্ৰা অসুচিং মোচেসি. সো সঞ্চেতনিকং সুক্কৰিস্সট্ঠিং আপত্তিং আপজ্জিত্ৰা সঙ্ঘং তস্সা আপত্তিযা পরিৰাসং যাচি. তস্স সঙ্ঘো তস্সা আপত্তিযা পরিৰাসং অদাসি. সো পরিৰসন্তো আসনপরিযন্তে নিসিন্নো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ ভিক্খুস্স দুট্ঠুল্লং আপত্তিং অনুপসম্পন্নস্স আরোচেস্সন্তী’’তি…পে… ‘‘সচ্চং কির তুম্হে, ভিক্খৰে, ভিক্খুস্স দুট্ঠুল্লং আপত্তিং অনুপসম্পন্নস্স আরোচেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, ভিক্খুস্স দুট্ঠুল্লং আপত্তিং অনুপসম্পন্নস্স আরোচেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৭৯. ‘‘যো পন ভিক্খু ভিক্খুস্স দুট্ঠুল্লং আপত্তিং অনুপসম্পন্নস্স আরোচেয্য, অঞ্ঞত্র ভিক্খুসম্মুতিযা [ভিক্খুসম্মতিযা (স্যা.)], পাচিত্তিয’’ন্তি.

৮০. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

ভিক্খুস্সাতি অঞ্ঞস্স ভিক্খুস্স.

দুট্ঠুল্লা নাম আপত্তি – চত্তারি চ পারাজিকানি, তেরস চ সঙ্ঘাদিসেসা.

অনুপসম্পন্নো নাম ভিক্খুঞ্চ ভিক্খুনিঞ্চ ঠপেত্ৰা অৰসেসো অনুপসম্পন্নো নাম.

আরোচেয্যাতি আরোচেয্য ইত্থিযা ৰা পুরিসস্স ৰা গহট্ঠস্স ৰা পব্বজিতস্স ৰা.

অঞ্ঞত্র ভিক্খুসম্মুতিযাতি ঠপেত্ৰা ভিক্খুসম্মুতিং.

অত্থি ভিক্খুসম্মুতি আপত্তিপরিযন্তা, ন কুলপরিযন্তা. অত্থি ভিক্খুসম্মুতি কুলপরিযন্তা, ন আপত্তিপরিযন্তা, অত্থি ভিক্খুসম্মুতি আপত্তিপরিযন্তা চ কুলপরিযন্তা চ, অত্থি ভিক্খুসম্মুতি নেৰ আপত্তিপরিযন্তা ন কুলপরিযন্তা.

আপত্তিপরিযন্তা নাম আপত্তিযো পরিগ্গহিতাযো হোন্তি – ‘‘এত্তকাহি আপত্তীহি আরোচেতব্বো’’তি.

কুলপরিযন্তা নাম কুলানি পরিগ্গহিতানি হোন্তি – ‘‘এত্তকেসু কুলেসু আরোচেতব্বো’’তি. আপত্তিপরিযন্তা চ কুলপরিযন্তা চ নাম আপত্তিযো চ পরিগ্গহিতাযো হোন্তি, কুলানি চ পরিগ্গহিতানি হোন্তি – ‘‘এত্তকাহি আপত্তীহি এত্তকেসু কুলেসু আরোচেতব্বো’’তি. নেৰ আপত্তিপরিযন্তা ন কুলপরিযন্তা নাম আপত্তিযো চ অপরিগ্গহিতাযো হোন্তি, কুলানি চ অপরিগ্গহিতানি হোন্তি – ‘‘এত্তকাহি আপত্তীহি এত্তকেসু কুলেসু আরোচেতব্বো’’তি.

৮১. আপত্তিপরিযন্তে যা আপত্তিযো পরিগ্গহিতাযো হোন্তি, তা আপত্তিযো ঠপেত্ৰা অঞ্ঞাহি আপত্তীহি আরোচেতি, আপত্তি পাচিত্তিযস্স.

কুলপরিযন্তে যানি কুলানি পরিগ্গহিতানি হোন্তি, তানি কুলানি ঠপেত্ৰা অঞ্ঞেসু কুলেসু আরোচেতি, আপত্তি পাচিত্তিযস্স.

আপত্তিপরিযন্তে চ কুলপরিযন্তে চ যা আপত্তিযো পরিগ্গহিতাযো হোন্তি, তা আপত্তিযো ঠপেত্ৰা যানি কুলানি পরিগ্গহিতানি হোন্তি, তানি কুলানি ঠপেত্ৰা অঞ্ঞাহি আপত্তীহি অঞ্ঞেসু কুলেসু আরোচেতি, আপত্তি পাচিত্তিযস্স.

নেৰ আপত্তিপরিযন্তে ন কুলপরিযন্তে, অনাপত্তি.

৮২. দুট্ঠুল্লায আপত্তিযা দুট্ঠুল্লাপত্তিসঞ্ঞী অনুপসম্পন্নস্স আরোচেতি, অঞ্ঞত্র ভিক্খুসম্মুতিযা, আপত্তি পাচিত্তিযস্স.

দুট্ঠুল্লায আপত্তিযা ৰেমতিকো অনুপসম্পন্নস্স আরোচেতি, অঞ্ঞত্র ভিক্খুসম্মুতিযা, আপত্তি পাচিত্তিযস্স.

দুট্ঠুল্লায আপত্তিযা অদুট্ঠুল্লাপত্তিসঞ্ঞী অনুপসম্পন্নস্স আরোচেতি, অঞ্ঞত্র ভিক্খুসম্মুতিযা, আপত্তি পাচিত্তিযস্স.

অদুট্ঠুল্লং আপত্তিং আরোচেতি, আপত্তি দুক্কটস্স.

অনুপসম্পন্নস্স দুট্ঠুল্লং ৰা অদুট্ঠুল্লং ৰা অজ্ঝাচারং আরোচেতি, আপত্তি দুক্কটস্স.

অদুট্ঠুল্লায আপত্তিযা দুট্ঠুল্লাপত্তিসঞ্ঞী, আপত্তি দুক্কটস্স.

অদুট্ঠুল্লায আপত্তিযা ৰেমতিকো, আপত্তি দুক্কটস্স.

অদুট্ঠুল্লায আপত্তিযা অদুট্ঠুল্লাপত্তিসঞ্ঞী, আপত্তি দুক্কটস্স.

৮৩. অনাপত্তি ৰত্থুং আরোচেতি নো আপত্তিং, আপত্তিং আরোচেতি নো ৰত্থুং, ভিক্খুসম্মুতিযা, উম্মত্তকস্স, আদিকম্মিকস্সাতি.

দুট্ঠুল্লারোচনসিক্খাপদং নিট্ঠিতং নৰমং.