১০. পথৰীখণনসিক্খাপদং

৮৪. তেন সমযেন বুদ্ধো ভগৰা আল়ৰিযং ৰিহরতি অগ্গাল়ৰে চেতিযে. তেন খো পন সমযেন আল়ৰকা [আল়ৰিকা (স্যা.)] ভিক্খূ নৰকম্মং করোন্তা পথৰিং খণন্তিপি খণাপেন্তিপি. মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা পথৰিং খণিস্সন্তিপি খণাপেস্সন্তিপি! একিন্দ্রিযং সমণা সক্যপুত্তিযা জীৰং ৰিহেঠেন্তী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আল়ৰকা ভিক্খূ পথৰিং খণিস্সন্তিপি খণাপেস্সন্তিপী’’তি…পে… ‘‘সচ্চং কির তুম্হে, ভিক্খৰে, পথৰিং খণথপি খণাপেথপী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, পথৰিং খণিস্সথপি খণাপেস্সথপি! জীৰসঞ্ঞিনো হি, মোঘপুরিসা, মনুস্সা পথৰিযা. নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৮৫. ‘‘যো পন ভিক্খু পথৰিং খণেয্য ৰা খণাপেয্য ৰা, পাচিত্তিয’’ন্তি.

৮৬. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

পথৰী নাম দ্ৰে পথৰিযো – জাতা চ পথৰী অজাতা চ পথৰী.

জাতা নাম পথৰী – সুদ্ধপংসু সুদ্ধমত্তিকা অপ্পপাসাণা অপ্পসক্খরা অপ্পকঠলা অপ্পমরুম্বা অপ্পৰালিকা, যেভুয্যেনপংসুকা, যেভুয্যেনমত্তিকা. অদড্ঢাপি ৰুচ্চতি জাতা পথৰী. যোপি পংসুপুঞ্জো ৰা মত্তিকাপুঞ্জো ৰা অতিরেকচাতুমাসং ওৰট্ঠো, অযম্পি ৰুচ্চতি জাতা পথৰী.

অজাতা নাম পথৰী – সুদ্ধপাসাণা সুদ্ধসক্খরা সুদ্ধকঠলা সুদ্ধমরুম্বা সুদ্ধৰালিকা অপ্পপংসুকা অপ্পমত্তিকা, যেভুয্যেনপাসাণা, যেভুয্যেনসক্খরা, যেভুয্যেনকঠলা, যেভুয্যেনমরুম্বা, যেভুয্যেনৰালিকা. দড্ঢাপি ৰুচ্চতি অজাতা পথৰী. যোপি পংসুপুঞ্জো ৰা মত্তিকাপুঞ্জো ৰা ওমকচাতুমাসং ওৰট্ঠো, অযম্পি ৰুচ্চতি অজাতা পথৰী.

খণেয্যাতি সযং খণতি, আপত্তি পাচিত্তিযস্স.

খণাপেয্যাতি অঞ্ঞং আণাপেতি, আপত্তি পাচিত্তিযস্স. সকিং আণত্তো বহুকম্পি খণতি, আপত্তি পাচিত্তিযস্স.

৮৭. পথৰিযা পথৰিসঞ্ঞী খণতি ৰা খণাপেতি ৰা, ভিন্দতি ৰা ভেদাপেতি ৰা, দহতি ৰা দহাপেতি ৰা, আপত্তি পাচিত্তিযস্স.

পথৰিযা ৰেমতিকো খণতি ৰা খণাপেতি ৰা, ভিন্দতি ৰা ভেদাপেতি ৰা, দহতি ৰা দহাপেতি ৰা, আপত্তি দুক্কটস্স.

পথৰিযা অপথৰিসঞ্ঞী খণতি ৰা খণাপেতি ৰা, ভিন্দতি ৰা ভেদাপেতি ৰা, দহতি ৰা দহাপেতি ৰা, অনাপত্তি.

অপথৰিযা পথৰিসঞ্ঞী, আপত্তি দুক্কটস্স. অপথৰিযা ৰেমতিকো, আপত্তি দুক্কটস্স. অপথৰিযা অপথৰিসঞ্ঞী, অনাপত্তি.

৮৮. অনাপত্তি – ‘‘ইমং জান, ইমং দেহি, ইমং আহর, ইমিনা অত্থো, ইমং কপ্পিযং করোহী’’তি ভণতি, অসঞ্চিচ্চ, অসতিযা, অজানন্তস্স, উম্মত্তকস্স, আদিকম্মিকস্সাতি.

পথৰীখণনসিক্খাপদং নিট্ঠিতং দসমং.

মুসাৰাদৰগ্গো পঠমো.

তস্সুদ্দানং –

মুসা ওমসপেসুঞ্ঞং, পদসেয্যায ৰে দুৰে;

অঞ্ঞত্র ৰিঞ্ঞুনা ভূতা, দুট্ঠুল্লাপত্তি খণনাতি.