৭. ধম্মদেসনাসিক্খাপদং

৬০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তেন খো পন সমযেন আযস্মা উদাযী সাৰত্থিযং কুলূপকো হোতি, বহুকানি কুলানি উপসঙ্কমতি. অথ খো আযস্মা উদাযী পুব্বণ্হসমযং নিৰাসেত্ৰা পত্তচীৰরমাদায যেন অঞ্ঞতরং কুলং তেনুপসঙ্কমি. তেন খো পন সমযেন ঘরণী নিৰেসনদ্ৰারে নিসিন্না হোতি, ঘরসুণ্হা আৰসথদ্ৰারে নিসিন্না হোতি. অথ খো আযস্মা উদাযী যেন ঘরণী তেনুপসঙ্কমি; উপসঙ্কমিত্ৰা ঘরণিযা উপকণ্ণকে ধম্মং দেসেসি. অথ খো ঘরসুণ্হায এতদহোসি – ‘‘কি নু খো সো সমণো সস্সুযা জারো উদাহু ওভাসতী’’তি?

অথ খো আযস্মা উদাযী ঘরণিযা উপকণ্ণকে ধম্মং দেসেত্ৰা যেন ঘরসুণ্হা তেনুপসঙ্কমি; উপসঙ্কমিত্ৰা ঘরসুণ্হায উপকণ্ণকে ধম্মং দেসেসি. অথ খো ঘরণিযা এতদহোসি – ‘‘কিং নু খো সো সমণো ঘরসুণ্হায জারো উদাহু ওভাসতী’’তি? অথ খো আযস্মা উদাযী ঘরসুণ্হায উপকণ্ণকে ধম্মং দেসেত্ৰা পক্কামি. অথ খো ঘরণী ঘরসুণ্হং এতদৰোচ – ‘‘হে জে, কিং তে এসো সমণো অৰোচা’’তি? ‘‘ধম্মং মে, অয্যে, দেসেসি’’. ‘‘অয্যায পন কিং অৰোচা’’তি? ‘‘ময্হম্পি ধম্মং দেসেসী’’তি. তা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যো উদাযী মাতুগামস্স উপকণ্ণকে ধম্মং দেসেস্সতি! ননু নাম ৰিস্সট্ঠেন ৰিৰটেন ধম্মো দেসেতব্বো’’তি?

অস্সোসুং খো ভিক্খূ তাসং ইত্থীনং উজ্ঝাযন্তীনং খিয্যন্তীনং ৰিপাচেন্তীনং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উদাযী মাতুগামস্স ধম্মং দেসেস্সতী’’তি! অথ খো তে ভিক্খূ আযস্মন্তং উদাযিং অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির ত্ৰং, উদাযি, মাতুগামস্স ধম্মং দেসেসী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, মাতুগামস্স ধম্মং দেসেস্সসি. নেতং মোঘপুরিস, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু মাতুগামস্স ধম্মং দেসেয্য পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৬১. তেন খো পন সমযেন উপাসিকা ভিক্খূ পস্সিত্ৰা এতদৰোচুং – ‘‘ইঙ্ঘায্যা ধম্মং দেসেথা’’তি. ‘‘ন, ভগিনী, কপ্পতি মাতুগামস্স ধম্মং দেসেতু’’ন্তি. ‘‘ইঙ্ঘায্যা ছপ্পঞ্চৰাচাহি ধম্মং দেসেথ, সক্কা এত্তকেনপি ধম্মো অঞ্ঞাতু’’ন্তি. ‘‘ন, ভগিনী, কপ্পতি মাতুগামস্স ধম্মং দেসেতু’’ন্তি. কুক্কুচ্চাযন্তা ন দেসেসুং. উপাসিকা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অয্যা অম্হেহি যাচিযমানা ধম্মং ন দেসেস্সন্তী’’তি! অস্সোসুং খো ভিক্খূ তাসং উপাসিকানং উজ্ঝাযন্তীনং খিয্যন্তীনং ৰিপাচেন্তীনং. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, মাতুগামস্স ছপ্পঞ্চৰাচাহি ধম্মং দেসেতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খূ মাতুগামস্স উত্তরিছপ্পঞ্চৰাচাহি ধম্মং দেসেয্য, পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৬২. তেন খো পন সমযেন ছব্বগ্গিযা ভিক্খূ – ‘‘ভগৰতা অনুঞ্ঞাতং মাতুগামস্স ছপ্পঞ্চৰাচাহি ধম্মং দেসেতু’’ন্তি তে অৰিঞ্ঞুং পুরিসৰিগ্গহং উপনিসীদাপেত্ৰা মাতুগামস্স উত্তরিছপ্পঞ্চৰাচাহি ধম্মং দেসেন্তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অৰিঞ্ঞুং পুরিসৰিগ্গহং উপনিসীদাপেত্ৰা মাতুগামস্স উত্তরিছপ্পঞ্চৰাচাহি ধম্মং দেসেস্সন্তী’’তি!

অথ খো তে ভিক্খূ ছব্বগ্গিযে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির তুম্হে, ভিক্খৰে, অৰিঞ্ঞুং পুরিসৰিগ্গহং উপনিসীদাপেত্ৰা মাতুগামস্স উত্তরিছপ্পঞ্চৰাচাহি ধম্মং দেসেথা’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তুম্হে, মোঘপুরিসা, অৰিঞ্ঞুং পুরিসৰিগ্গহং উপনিসীদাপেত্ৰা মাতুগামস্স উত্তরিছপ্পঞ্চৰাচাহি ধম্মং দেসেস্সথ! নেতং, মোঘপুরিসা, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৬৩. ‘‘যো পন ভিক্খু মাতুগামস্স উত্তরিছপ্পঞ্চৰাচাহি ধম্মং দেসেয্য, অঞ্ঞত্র ৰিঞ্ঞুনা পুরিসৰিগ্গহেন, পাচিত্তিয’’ন্তি.

৬৪. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

মাতুগামো নাম মনুস্সিত্থী; ন যক্খী ন পেতী ন তিরচ্ছানগতা; ৰিঞ্ঞূ, পটিবলা সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

উত্তরিছপ্পঞ্চৰাচাহীতি অতিরেকছপ্পঞ্চৰাচাহি.

ধম্মো নাম বুদ্ধভাসিতো, সাৰকভাসিতো, ইসিভাসিতো, দেৰতাভাসিতো, অত্থূপসঞ্হিতো, ধম্মূপসঞ্হিতো.

দেসেয্যাতি পদেন দেসেতি, পদে পদে আপত্তি পাচিত্তিযস্স. অক্খরায দেসেতি, অক্খরক্খরায আপত্তি পাচিত্তিযস্স.

অঞ্ঞত্র ৰিঞ্ঞুনা পুরিসৰিগ্গহেনাতি ঠপেত্ৰা ৰিঞ্ঞুং পুরিসৰিগ্গহং. ৰিঞ্ঞূ নাম পুরিসৰিগ্গহো, পটিবলো হোতি সুভাসিতদুব্ভাসিতং দুট্ঠুল্লাদুট্ঠুল্লং আজানিতুং.

৬৫. মাতুগামে মাতুগামসঞ্ঞী উত্তরিছপ্পঞ্চৰাচাহি ধম্মং দেসেতি, অঞ্ঞত্র ৰিঞ্ঞুনা পুরিসৰিগ্গহেন, আপত্তি পাচিত্তিযস্স. মাতুগামে ৰেমতিকো উত্তরিছপ্পঞ্চৰাচাহি ধম্মং দেসেতি, অঞ্ঞত্র ৰিঞ্ঞুনা পুরিসৰিগ্গহেন, আপত্তি পাচিত্তিযস্স. মাতুগামে অমাতুগামসঞ্ঞী উত্তরিছপ্পঞ্চৰাচাহি ধম্মং দেসেতি, অঞ্ঞত্র ৰিঞ্ঞুনা পুরিসৰিগ্গহেন, আপত্তি পাচিত্তিযস্স.

যক্খিযা ৰা পেতিযা ৰা পণ্ডকস্স ৰা তিরচ্ছানগতমনুস্সৰিগ্গহিত্থিযা ৰা উত্তরিছপ্পঞ্চৰাচাহি ধম্মং দেসেতি, অঞ্ঞত্র ৰিঞ্ঞুনা পুরিসৰিগ্গহেন, আপত্তি দুক্কটস্স. অমাতুগামে মাতুগামসঞ্ঞী, আপত্তি দুক্কটস্স. অমাতুগামে ৰেমতিকো, আপত্তি দুক্কটস্স. অমাতুগামে অমাতুগামসঞ্ঞী, অনাপত্তি.

৬৬. অনাপত্তি ৰিঞ্ঞুনা পুরিসৰিগ্গহেন, ছপ্পঞ্চৰাচাহি ধম্মং দেসেতি, ঊনকছপ্পঞ্চৰাচাহি ধম্মং দেসেতি, উট্ঠহিত্ৰা পুন নিসীদিত্ৰা দেসেতি, মাতুগামো উট্ঠহিত্ৰা পুন নিসীদতি তস্মিং দেসেতি, অঞ্ঞস্স মাতুগামস্স দেসেতি, পঞ্হং পুচ্ছতি, পঞ্হং পুট্ঠো কথেতি, অঞ্ঞস্সত্থায ভণন্তং মাতুগামো সুণাতি, উম্মত্তকস্স, আদিকম্মিকস্সাতি.

ধম্মদেসনাসিক্খাপদং নিট্ঠিতং সত্তমং.