৫. সহসেয্যসিক্খাপদং

৪৯. তেন সমযেন বুদ্ধো ভগৰা আল়ৰিযং ৰিহরতি অগ্গাল়ৰে চেতিযে. তেন খো পন সমযেন উপাসকা আরামং আগচ্ছন্তি ধম্মস্সৰনায. ধম্মে ভাসিতে থেরা ভিক্খূ যথাৰিহারং গচ্ছন্তি. নৰকা ভিক্খূ তত্থেৰ উপট্ঠানসালাযং উপাসকেহি সদ্ধিং মুট্ঠস্সতী, অসম্পজানা, নগ্গা, ৰিকূজমানা, কাকচ্ছমানা সেয্যং কপ্পেন্তি. উপাসকা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভদন্তা মুট্ঠস্সতী অসম্পজানা নগ্গা ৰিকূজমানা কাকচ্ছমানা সেয্যং কপ্পেস্সন্তী’’তি! অস্সোসুং খো ভিক্খূ তেসং উপাসকানং উজ্ঝাযন্তানং খিয্যন্তানং ৰিপাচেন্তানং. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ অনুপসম্পন্নেন সহসেয্যং কপ্পেস্সন্তী’’তি! অথ খো তে ভিক্খূ তে নৰকে ভিক্খূ অনেকপরিযাযেন ৰিগরহিত্ৰা ভগৰতো এতমত্থং আরোচেসুং…পে… ‘‘সচ্চং কির, ভিক্খৰে, ভিক্খূ অনুপসম্পন্নেন সহসেয্যং কপ্পেন্তী’’তি? ‘‘সচ্চং, ভগৰা’’তি. ৰিগরহি বুদ্ধো ভগৰা…পে… কথঞ্হি নাম তে, ভিক্খৰে, মোঘপুরিসা অনুপসম্পন্নেন সহসেয্যং কপ্পেস্সন্তি! নেতং, ভিক্খৰে, অপ্পসন্নানং ৰা পসাদায…পে… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

‘‘যো পন ভিক্খু অনুপসম্পন্নেন সহসেয্যং কপ্পেয্য পাচিত্তিয’’ন্তি.

এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি.

৫০. অথ খো ভগৰা আল়ৰিযং যথাভিরন্তং ৰিহরিত্ৰা যেন কোসম্বী তেন চারিকং পক্কামি. অনুপুব্বেন চারিকং চরমানো যেন কোসম্বী তদৰসরি. তত্র সুদং ভগৰা কোসম্বিযং ৰিহরতি বদরিকারামে. ভিক্খূ আযস্মন্তং রাহুলং এতদৰোচুং – ‘‘ভগৰতা, আৰুসো রাহুল, সিক্খাপদং পঞ্ঞত্তং – ‘ন অনুপসম্পন্নেন সহসেয্যা কপ্পেতব্বা’তি. সেয্যং, আৰুসো রাহুল, জানাহী’’তি. অথ খো আযস্মা রাহুলো সেয্যং অলভমানো ৰচ্চকুটিযা সেয্যং কপ্পেসি. অথ খো ভগৰা রত্তিযা পচ্চূসসমযং পচ্চুট্ঠায যেন ৰচ্চকুটি তেনুপসঙ্কমি; উপসঙ্কমিত্ৰা উক্কাসি. আযস্মাপি রাহুলো উক্কাসি. ‘‘কো এত্থা’’তি? ‘‘অহং, ভগৰা, রাহুলো’’তি. ‘‘কিস্স ত্ৰং, রাহুল, ইধ নিসিন্নোসী’’তি? অথ খো আযস্মা রাহুলো ভগৰতো এতমত্থং আরোচেসি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অনুপসম্পন্নেন দিরত্ততিরত্তং সহসেয্যং কপ্পেতুং. এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –

৫১. ‘‘যো পন ভিক্খু অনুপসম্পন্নেন উত্তরিদিরত্ততিরত্তং সহসেয্যং কপ্পেয্য, পাচিত্তিয’’ন্তি.

৫২. যো পনাতি যো যাদিসো…পে… ভিক্খূতি…পে… অযং ইমস্মিং অত্থে অধিপ্পেতো ভিক্খূতি.

অনুপসম্পন্নো নাম ভিক্খুং ঠপেত্ৰা অৰসেসো অনুপসম্পন্নো নাম.

উত্তরিদিরত্ততিরত্তন্তি অতিরেকদিরত্ততিরত্তং.

সহাতি একতো.

সেয্যা নাম সব্বচ্ছন্না, সব্বপরিচ্ছন্না, যেভুয্যেনচ্ছন্না, যেভুয্যেন পরিচ্ছন্না.

সেয্যং কপ্পেয্যাতি চতুত্থে দিৰসে অত্থঙ্গতে সূরিযে, অনুপসম্পন্নে নিপন্নে, ভিক্খু নিপজ্জতি, আপত্তি পাচিত্তিযস্স. ভিক্খু নিপন্নে, অনুপসম্পন্নো নিপজ্জতি, আপত্তি পাচিত্তিযস্স. উভো ৰা নিপজ্জন্তি, আপত্তি পাচিত্তিযস্স. উট্ঠহিত্ৰা পুনপ্পুনং নিপজ্জন্তি, আপত্তি পাচিত্তিযস্স.

৫৩. অনুপসম্পন্নে অনুপসম্পন্নসঞ্ঞী উত্তরিদিরত্ততিরত্তং সহসেয্যং কপ্পেতি, আপত্তি পাচিত্তিযস্স. অনুপসম্পন্নে ৰেমতিকো উত্তরিদিরত্ততিরত্তং সহসেয্যং কপ্পেতি, আপত্তি পাচিত্তিযস্স. অনুপসম্পন্নে উপসম্পন্নসঞ্ঞী উত্তরিদিরত্ততিরত্তং সহসেয্যং কপ্পেতি, আপত্তি পাচিত্তিযস্স.

উপড্ঢচ্ছন্নে উপড্ঢপরিচ্ছন্নে, আপত্তি দুক্কটস্স. উপসম্পন্নে অনুপসম্পন্নসঞ্ঞী, আপত্তি দুক্কটস্স. উপসম্পন্নে ৰেমতিকো, আপত্তি দুক্কটস্স. উপসম্পন্নে উপসম্পন্নসঞ্ঞী, অনাপত্তি.

৫৪. অনাপত্তি দ্ৰেতিস্সো রত্তিযো ৰসতি, ঊনকদ্ৰেতিস্সো রত্তিযো ৰসতি, দ্ৰে রত্তিযো ৰসিত্ৰা ততিযায রত্তিযা পুরারুণা নিক্খমিত্ৰা পুন ৰসতি, সব্বচ্ছন্নে, সব্বঅপরিচ্ছন্নে, সব্বপরিচ্ছন্নে সব্বঅচ্ছন্নে [ৰসতি, সব্বঅচ্ছন্নে সব্বঅপরিচ্ছন্নে, (সী.)], যেভুয্যেন অচ্ছন্নে, যেভুয্যেন অপরিচ্ছন্নে, অনুপসম্পন্নে নিপন্নে ভিক্খু নিসীদতি, ভিক্খু নিপন্নে অনুপসম্পন্নো নিসীদতি, উভো ৰা নিসীদন্তি, উম্মত্তকস্স, আদিকম্মিকস্সাতি.

সহসেয্যসিক্খাপদং নিট্ঠিতং পঞ্চমং.