২৩৯. দ্ৰেনিস্সারণাদিকথা

৩৯৫. দ্ৰেমা, ভিক্খৰে, নিস্সারণা. অত্থি, ভিক্খৰে, পুগ্গলো অপ্পত্তো নিস্সারণং. তঞ্চে সঙ্ঘো নিস্সারেতি, একচ্চো সুনিস্সারিতো, একচ্চো দুন্নিস্সারিতো. কতমো চ, ভিক্খৰে, পুগ্গলো অপ্পত্তো নিস্সারণং, তঞ্চে সঙ্ঘো নিস্সারেতি – দুন্নিস্সারিতো? ইধ পন, ভিক্খৰে, ভিক্খু সুদ্ধো হোতি অনাপত্তিকো. তঞ্চে সঙ্ঘো নিস্সারেতি – দুন্নিস্সারিতো. অযং ৰুচ্চতি, ভিক্খৰে, পুগ্গলো অপ্পত্তো নিস্সারণং, তঞ্চে সঙ্ঘো নিস্সারেতি – দুন্নিস্সারিতো.

কতমো চ, ভিক্খৰে, পুগ্গলো অপ্পত্তো নিস্সারণং, তঞ্চে সঙ্ঘো নিস্সারেতি – সুনিস্সারিতো? ইধ পন, ভিক্খৰে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৰিহরতি অননুলোমিকেহি গিহিসংসগ্গেহি, তঞ্চে সঙ্ঘো নিস্সারেতি – সুনিস্সারিতো. অযং ৰুচ্চতি, ভিক্খৰে, পুগ্গলো অপ্পত্তো নিস্সারণং, তঞ্চে সঙ্ঘো নিস্সারেতি – সুনিস্সারিতো.

৩৯৬. দ্ৰেমা, ভিক্খৰে, ওসারণা. অত্থি, ভিক্খৰে, পুগ্গলো অপ্পত্তো ওসারণং তঞ্চে সঙ্ঘো ওসারেতি, একচ্চো সোসারিতো, একচ্চো দোসারিতো. কতমো চ, ভিক্খৰে, পুগ্গলো অপ্পত্তো ওসারণং, তঞ্চে সঙ্ঘো ওসারেতি – দোসারিতো? পণ্ডকো, ভিক্খৰে, অপ্পত্তো ওসারণং, তঞ্চে সঙ্ঘো ওসারেতি – দোসারিতো. থেয্যসংৰাসকো, ভিক্খৰে, অপ্পত্তো ওসারণং, তঞ্চে সঙ্ঘো ওসারেতি – দোসারিতো. তিত্থিযপক্কন্তকো, ভিক্খৰে…পে… তিরচ্ছানগতো, ভিক্খৰে… মাতুঘাতকো, ভিক্খৰে… পিতুঘাতকো, ভিক্খৰে… অরহন্তঘাতকো, ভিক্খৰে… ভিক্খুনিদূসকো, ভিক্খৰে… সঙ্ঘভেদকো, ভিক্খৰে… লোহিতুপ্পাদকো, ভিক্খৰে… উভতোব্যঞ্জনকো, ভিক্খৰে, অপ্পত্তো, ওসারণং, তঞ্চে সঙ্ঘো ওসারেতি – দোসারিতো. অযং ৰুচ্চতি, ভিক্খৰে, পুগ্গলো অপ্পত্তো ওসারণং, তঞ্চে সঙ্ঘো ওসারেতি – দোসারিতো. ইমে ৰুচ্চন্তি, ভিক্খৰে, পুগ্গলা অপ্পত্তা ওসারণং, তে চে সঙ্ঘো ওসারেতি – দোসারিতা.

কতমো চ, ভিক্খৰে, পুগ্গলো অপ্পত্তো ওসারণং, তঞ্চে সঙ্ঘো ওসারেতি – সোসারিতো? হত্থচ্ছিন্নো, ভিক্খৰে, অপ্পত্তো ওসারণং, তঞ্চে সঙ্ঘো ওসারেতি, সোসারিতো. পাদচ্ছিন্নো, ভিক্খৰে…পে… হত্থপাদচ্ছিন্নো, ভিক্খৰে… কণ্ণচ্ছিন্নো, ভিক্খৰে… নাসচ্ছিন্নো, ভিক্খৰে… কণ্ণনাসচ্ছিন্নো, ভিক্খৰে… অঙ্গুলিচ্ছিন্নো, ভিক্খৰে… অল়চ্ছিন্নো, ভিক্খৰে… কণ্ডরচ্ছিন্নো, ভিক্খৰে… ফণহত্থকো, ভিক্খৰে… খুজ্জো, ভিক্খৰে… ৰামনো, ভিক্খৰে… গলগণ্ডী, ভিক্খৰে… লক্খণাহতো, ভিক্খৰে… কসাহতো, ভিক্খৰে… লিখিতকো, ভিক্খৰে… সীপদিকো, ভিক্খৰে… পাপরোগী, ভিক্খৰে… পরিসদূসকো, ভিক্খৰে… কাণো, ভিক্খৰে… কুণী, ভিক্খৰে… খঞ্জো, ভিক্খৰে… পক্খহতো, ভিক্খৰে… ছিন্নিরিযাপথো, ভিক্খৰে… জরাদুব্বলো, ভিক্খৰে… অন্ধো, ভিক্খৰে… মূগো, ভিক্খৰে… বধিরো, ভিক্খৰে… অন্ধমূগো, ভিক্খৰে… অন্ধবধিরো, ভিক্খৰে… মূগবধিরো, ভিক্খৰে… অন্ধমূগবধিরো, ভিক্খৰে, অপ্পত্তো ওসারণং, তঞ্চে সঙ্ঘো ওসারেতি – সোসারিতো. অযং ৰুচ্চতি, ভিক্খৰে, পুগ্গলো অপ্পত্তো ওসারণং, তঞ্চে সঙ্ঘো ওসারেতি – সোসারিতো. ইমে ৰুচ্চন্তি, ভিক্খৰে, পুগ্গলা অপ্পত্তা ওসারণং, তে চে সঙ্ঘো ওসারেতি – সোসারিতা.

দ্ৰেনিস্সারণাদিকথা নিট্ঠিতা.

ৰাসভগামভাণৰারো নিট্ঠিতো পঠমো.