২৪০. অধম্মকম্মাদিকথা

৩৯৭. ইধ পন, ভিক্খৰে, ভিক্খুস্স ন হোতি আপত্তি দট্ঠব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্য’’ন্তি. তং সঙ্ঘো আপত্তিযা অদস্সনে উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি আপত্তি পটিকাতব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমযং পটিকরেয্য’’ন্তি. তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি? পটিকরোহি তং আপত্তি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং. নত্থি মে, আৰুসো, আপত্তি, যমহং পটিকরেয্য’’ন্তি. তং সঙ্ঘো অদস্সনে ৰা অপ্পটিকম্মে ৰা উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং; নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৰা অপ্পটিনিস্সগ্গে ৰা উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পটিকরেয্যং. নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং.

ইধ পন, ভিক্খৰে, ভিক্খুস্স ন হোতি আপত্তি দট্ঠব্বা, ন হোতি আপত্তি পটিকাতব্বা, ন হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং. নত্থি মে, আৰুসো, আপত্তি, যমহং পটিকরেয্যং. নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং.

৩৯৮. ইধ পন, ভিক্খৰে, ভিক্খুস্স হোতি আপত্তি দট্ঠব্বা. তমেনং চোদেতি. সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘আমাৰুসো, পস্সামী’’তি. তং সঙ্ঘো আপত্তিযা অদস্সনে উক্খিপতি – অধম্মকম্মং.

ইধ পন, ভিক্খৰে, ভিক্খুস্স হোতি আপত্তি পটিকাতব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি. সো এৰং ৰদেতি – ‘‘আমাৰুসো, পটিকরিস্সামী’’তি. তং সঙ্ঘো আপত্তিযা অপ্পটিকম্মে উক্খিপতি – অধম্মকম্মং.

ইধ পন, ভিক্খৰে, ভিক্খুস্স হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি; পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘আমাৰুসো, পটিনিস্সজ্জিস্সামী’’তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – অধম্মকম্মং.

ইধ পন, ভিক্খৰে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে… হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং; পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘আমাৰুসো, পস্সামি, আম পটিকরিস্সামি, আম পটিনিস্সজ্জিস্সামী’’তি. তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – অধম্মকম্মং.

৩৯৯. ইধ পন, ভিক্খৰে, ভিক্খুস্স হোতি আপত্তি দট্ঠব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তি’’ন্তি? সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্য’’ন্তি. তং সঙ্ঘো আপত্তিযা অদস্সনে উক্খিপতি – ধম্মকম্মং.

ইধ পন, ভিক্খৰে, ভিক্খুস্স হোতি আপত্তি পটিকাতব্বা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পটিকরোহি তং আপত্তি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পটিকরেয্য’’ন্তি. তং সঙ্ঘো আপত্তিযা অপ্পটিকম্মে উক্খিপতি – ধম্মকম্মং.

ইধ পন, ভিক্খৰে, ভিক্খুস্স হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘পাপিকা তে, আৰুসো, দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো পাপিকায দিট্ঠিযা অপ্পটিনিস্সগ্গে উক্খিপতি – ধম্মকম্মং.

ইধ পন, ভিক্খৰে, ভিক্খুস্স হোতি আপত্তি দট্ঠব্বা, হোতি আপত্তি পটিকাতব্বা…পে…

হোতি আপত্তি দট্ঠব্বা, হোতি পাপিকা দিট্ঠি পটিনিস্সজ্জেতা…পে… হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা …পে… হোতি আপত্তি দট্ঠব্বা, হোতি আপত্তি পটিকাতব্বা, হোতি পাপিকা দিট্ঠি পটিনিস্সজ্জেতা. তমেনং চোদেতি সঙ্ঘো ৰা সম্বহুলা ৰা একপুগ্গলো ৰা – ‘‘আপত্তিং ত্ৰং, আৰুসো, আপন্নো, পস্সসেতং আপত্তিং? পটিকরোহি তং আপত্তিং. পাপিকা তে দিট্ঠি, পটিনিস্সজ্জেতং পাপিকং দিট্ঠি’’ন্তি. সো এৰং ৰদেতি – ‘‘নত্থি মে, আৰুসো, আপত্তি, যমহং পস্সেয্যং. নত্থি মে, আৰুসো, আপত্তি যমহং পটিকরেয্যং. নত্থি মে, আৰুসো, পাপিকা দিট্ঠি, যমহং পটিনিস্সজ্জেয্য’’ন্তি. তং সঙ্ঘো অদস্সনে ৰা অপ্পটিকম্মে ৰা অপ্পটিনিস্সগ্গে ৰা উক্খিপতি – ধম্মকম্মন্তি.

অধম্মকম্মাদিকথা নিট্ঠিতা.