২৩৮. পারিৰাসিকাদিকথা

৩৯৩. পারিৰাসিকচতুত্থো চে, ভিক্খৰে, পরিৰাসং দদেয্য, মূলায পটিকস্সেয্য, মানত্তং দদেয্য, তংৰীসো অব্ভেয্য – অকম্মং ন চ করণীযং. মূলায পটিকস্সনারহচতুত্থো চে, ভিক্খৰে, পরিৰাসং দদেয্য, মূলায পটিকস্সেয্য, মানত্তং দদেয্য, তংৰীসো অব্ভেয্য – অকম্মং ন চ করণীযং. মানত্তারহচতুত্থো চে, ভিক্খৰে, পরিৰাসং দদেয্য, মূলায পটিকস্সেয্য, মানত্তং দদেয্য, তংৰীসো অব্ভেয্য – অকম্মং ন চ করণীযং. মানত্তচারিকচতুত্থো চে, ভিক্খৰে, পরিৰাসং দদেয্য, মূলায পটিকস্সেয্য, মানত্তং দদেয্য, তংৰীসো অব্ভেয্য – অকম্মং ন চ করণীযং. অব্ভানারহচতুত্থো চে, ভিক্খৰে, পরিৰাসং দদেয্য, মূলায পটিকস্সেয্য, মানত্তং দদেয্য, তংৰীসো অব্ভেয্য – অকম্মং ন চ করণীযং.

৩৯৪. একচ্চস্স, ভিক্খৰে, সঙ্ঘমজ্ঝে পটিক্কোসনা রুহতি, একচ্চস্স ন রুহতি. কস্স চ, ভিক্খৰে, সঙ্ঘমজ্ঝে পটিক্কোসনা ন রুহতি? ভিক্খুনিযা, ভিক্খৰে, সঙ্ঘমজ্ঝে পটিক্কোসনা ন রুহতি. সিক্খমানায, ভিক্খৰে…পে… সামণেরস্স, ভিক্খৰে… সামণেরিযা, ভিক্খৰে… সিক্খাপচ্চক্খাতকস্স ভিক্খৰে… অন্তিমৰত্থুং অজ্ঝাপন্নকস্স, ভিক্খৰে … উম্মত্তকস্স, ভিক্খৰে… খিত্তচিত্তস্স, ভিক্খৰে… ৰেদনাট্টস্স, ভিক্খৰে… আপত্তিযা অদস্সনে উক্খিত্তকস্স, ভিক্খৰে… আপত্তিযা অপ্পটিকম্মে উক্খিত্তকস্স, ভিক্খৰে… পাপিকায দিট্ঠিযা অপ্পটিনিস্সগ্গে উক্খিত্তকস্স, ভিক্খৰে… পণ্ডকস্স, ভিক্খৰে… থেয্যসংৰাসকস্স, ভিক্খৰে… তিত্থিযপক্কন্তকস্স, ভিক্খৰে … তিরচ্ছানগতস্স ভিক্খৰে… মাতুঘাতকস্স, ভিক্খৰে… পিতুঘাতকস্স, ভিক্খৰে… অরহন্তঘাতকস্স, ভিক্খৰে… ভিক্খুনিদূসকস্স, ভিক্খৰে… সঙ্ঘভেদকস্স, ভিক্খৰে… লোহিতুপ্পাদকস্স, ভিক্খৰে… উভতোব্যঞ্জনকস্স, ভিক্খৰে… নানাসংৰাসকস্স, ভিক্খৰে… নানাসীমায ঠিতস্স, ভিক্খৰে… ইদ্ধিযা ৰেহাসে ঠিতস্স, ভিক্খৰে, যস্স সঙ্ঘো কম্মং করোতি, তস্স চ [তস্স (স্যা.)], ভিক্খৰে, সঙ্ঘমজ্ঝে পটিক্কোসনা ন রুহতি. ইমেসং খো, ভিক্খৰে, সঙ্ঘমজ্ঝে পটিক্কোসনা ন রুহতি.

কস্স চ, ভিক্খৰে, সঙ্ঘমজ্ঝে পটিক্কোসনা রুহতি? ভিক্খুস্স, ভিক্খৰে, পকতত্তস্স

সমানসংৰাসকস্স সমানসীমায ঠিতস্স অন্তমসো আনন্তরিকস্সাপি [অনন্তরিকস্সাপি (স্যা.)] ভিক্খুনো ৰিঞ্ঞাপেন্তস্স সঙ্ঘমজ্ঝে পটিক্কোসনা রুহতি. ইমস্স খো, ভিক্খৰে, সঙ্ঘমজ্ঝে পটিক্কোসনা রুহতি.

পারিৰাসিকাদিকথা নিট্ঠিতা.