২২৩. উপনন্দসক্যপুত্তৰত্থু

৩৬৪. তেন খো পন সমযেন আযস্মা উপনন্দো সক্যপুত্তো সাৰত্থিযং ৰস্সংৰুট্ঠো অঞ্ঞতরং গামকাৰাসং অগমাসি. তত্থ চ ভিক্খূ চীৰরং ভাজেতুকামা সন্নিপতিংসু. তে এৰমাহংসু – ‘‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৰুসো, সাদিযিস্সামী’’তি. ততো চীৰরভাগং গহেত্ৰা অঞ্ঞং আৰাসং অগমাসি. তত্থপি ভিক্খূ চীৰরং ভাজেতুকামা সন্নিপতিংসু. তেপি এৰমাহংসু – ‘‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৰুসো, সাদিযিস্সামী’’তি. ততোপি চীৰরভাগং গহেত্ৰা অঞ্ঞং আৰাসং অগমাসি. তত্থপি ভিক্খূ চীৰরং ভাজেতুকামা সন্নিপতিংসু. তেপি এৰমাহংসু – ‘‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’’ন্তি? ‘‘আমাৰুসো, সাদিযিস্সামী’’তি. ততোপি চীৰরভাগং গহেত্ৰা মহন্তং চীৰরভণ্ডিকং আদায পুনদেৰ সাৰত্থিং পচ্চাগঞ্ছি. ভিক্খূ এৰমাহংসু – ‘‘মহাপুঞ্ঞোসি ত্ৰং, আৰুসো উপনন্দ, বহুং তে চীৰরং উপ্পন্ন’’ন্তি. ‘‘কুতো মে, আৰুসো, পুঞ্ঞং? ইধাহং, আৰুসো, সাৰত্থিযং ৰস্সংৰুট্ঠো অঞ্ঞতরং গামকাৰাসং অগমাসিং. তত্থ ভিক্খূ চীৰরং ভাজেতুকামা সন্নিপতিংসু. তে মং এৰমাহংসু – ‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’ন্তি? ‘আমাৰুসো, সাদিযিস্সামী’তি. ততো চীৰরভাগং গহেত্ৰা অঞ্ঞং আৰাসং অগমাসিং. তত্থপি ভিক্খূ চীৰরং ভাজেতুকামা সন্নিপতিংসু. তেপি মং এৰমাহংসু – ‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’’’ন্তি? ‘আমাৰুসো, সাদিযিস্সামী’তি. ততোপি চীৰরভাগং গহেত্ৰা অঞ্ঞং আৰাসং অগমাসিং. তত্থপি ভিক্খূ চীৰরং ভাজেতুকামা সন্নিপতিংসু. তেপি মং এৰমাহংসু – ‘ইমানি খো, আৰুসো, সঙ্ঘিকানি চীৰরানি ভাজিযিস্সন্তি, সাদিযিস্সসি ভাগ’ন্তি? ‘আমাৰুসো, সাদিযিস্সামী’তি. ততোপি চীৰরভাগং অগ্গহেসিং. এৰং মে বহুং চীৰরং উপ্পন্নন্তি. ‘‘কিং পন ত্ৰং, আৰুসো উপনন্দ, অঞ্ঞত্র ৰস্সংৰুট্ঠো অঞ্ঞত্র চীৰরভাগং সাদিযী’’তি? ‘‘এৰমাৰুসো’’তি. যে তে ভিক্খূ অপ্পিচ্ছা…পে… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা উপনন্দো সক্যপুত্তো অঞ্ঞত্র ৰস্সংৰুট্ঠো অঞ্ঞত্র চীৰরভাগং সাদিযিস্সতী’’তি. ভগৰতো এতমত্থং আরোচেসুং…পে… ‘‘সচ্চং কির ত্ৰং, উপনন্দ, অঞ্ঞত্র ৰস্সংৰুট্ঠো অঞ্ঞত্র চীৰরভাগং সাদিযী’’তি? ‘‘সচ্চং ভগৰা’’তি. ৰিগরহি বুদ্ধো ভগৰা…পে… কথঞ্হি নাম ত্ৰং, মোঘপুরিস, অঞ্ঞত্র ৰস্সংৰুট্ঠো অঞ্ঞত্র চীৰরভাগং সাদিযিস্সসি. নেতং, মোঘপুরিস, অপ্পসন্নানং ৰা পসাদায…পে… ৰিগরহিত্ৰা…পে… ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, অঞ্ঞত্র ৰস্সংৰুট্ঠেন অঞ্ঞত্র চীৰরভাগো সাদিতব্বো. যো সাদিযেয্য, আপত্তি দুক্কটস্সা’’তি.

তেন খো পন সমযেন আযস্মা উপনন্দো সক্যপুত্তো একো দ্ৰীসু আৰাসেসু ৰস্সং ৰসি – ‘‘এৰং মে বহুং চীৰরং উপ্পজ্জিস্সতী’’তি. অথ খো তেসং ভিক্খূনং এতদহোসি – ‘‘কথং নু খো আযস্মতো উপনন্দস্স সক্যপুত্তস্স চীৰরপটিৰীসো দাতব্বো’’তি? ভগৰতো এতমত্থং আরোচেসুং. দেথ, ভিক্খৰে, মোঘপুরিসস্স একাধিপ্পাযং. ইধ পন, ভিক্খৰে, ভিক্খু একো দ্ৰীসু আৰাসেসু ৰস্সং ৰসতি – ‘‘এৰং মে বহুং চীৰরং উপ্পজ্জিস্সতী’’তি. সচে অমুত্র উপড্ঢং অমুত্র উপড্ঢং ৰসতি, অমুত্র উপড্ঢো অমুত্র উপড্ঢো চীৰরপটিৰীসো দাতব্বো. যত্থ ৰা পন বহুতরং ৰসতি, ততো চীৰরপটিৰীসো দাতব্বোতি.

উপনন্দসক্যপুত্তৰত্থু নিট্ঠিতং.