২২২. সঙ্ঘিকচীৰরুপ্পাদকথা

৩৬৩. তেন খো পন সমযেন অঞ্ঞতরো ভিক্খু একো ৰস্সং ৰসি. তত্থ মনুস্সা সঙ্ঘস্স দেমাতি চীৰরানি অদংসু. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘চতুৰগ্গো পচ্ছিমো সঙ্ঘো’তি. অহঞ্চম্হি এককো. ইমে চ মনুস্সা সঙ্ঘস্স দেমাতি চীৰরানি অদংসু. যংনূনাহং ইমানি সঙ্ঘিকানি চীৰরানি সাৰত্থিং হরেয্য’’ন্তি. অথ খো সো ভিক্খু তানি চীৰরানি আদায সাৰত্থিং গন্ত্ৰা ভগৰতো এতমত্থং আরোচেসি. ‘‘তুয্হেৰ, ভিক্খু, তানি চীৰরানি যাৰ কথিনস্স উব্ভারাযা’’তি. ইধ পন, ভিক্খৰে, ভিক্খু একো ৰস্সং ৰসতি. তত্থ মনুস্সা সঙ্ঘস্স দেমাতি চীৰরানি দেন্তি. অনুজানামি, ভিক্খৰে, তস্সেৰ তানি চীৰরানি যাৰ কথিনস্স উব্ভারাযাতি.

তেন খো পন সমযেন অঞ্ঞতরো ভিক্খু উতুকালং একো ৰসি. তত্থ মনুস্সা সঙ্ঘস্স দেমাতি চীৰরানি অদংসু. অথ খো তস্স ভিক্খুনো এতদহোসি – ‘‘ভগৰতা পঞ্ঞত্তং ‘চতুৰগ্গো পচ্ছিমো সঙ্ঘো’তি. অহঞ্চম্হি এককো. ইমে চ মনুস্সা সঙ্ঘস্স দেমাতি চীৰরানি অদংসু. যংনূনাহং ইমানি সঙ্ঘিকানি চীৰরানি সাৰত্থিং হরেয্য’’ন্তি. অথ খো সো ভিক্খু তানি চীৰরানি আদায সাৰত্থিং গন্ত্ৰা ভিক্খূনং এতমত্থং আরোচেসি. ভিক্খূ ভগৰতো এতমত্থং আরোচেসুং. অনুজানামি, ভিক্খৰে, সম্মুখীভূতেন সঙ্ঘেন ভাজেতুং. ইধ পন, ভিক্খৰে, ভিক্খু উতুকালং একো ৰসতি. তত্থ মনুস্সা সঙ্ঘস্স দেমাতি চীৰরানি দেন্তি. অনুজানামি, ভিক্খৰে, তেন ভিক্খুনা তানি চীৰরানি অধিট্ঠাতুং – ‘‘ময্হিমানি চীৰরানী’’তি. তস্স চে, ভিক্খৰে, ভিক্খুনো তং চীৰরং অনধিট্ঠিতে অঞ্ঞো ভিক্খু আগচ্ছতি, সমকো দাতব্বো ভাগো. তেহি চে, ভিক্খৰে, ভিক্খূহি তং চীৰরং ভাজিযমানে, অপাতিতে কুসে, অঞ্ঞো ভিক্খু আগচ্ছতি, সমকো দাতব্বো ভাগো. তেহি চে, ভিক্খৰে, ভিক্খূহি তং চীৰরং ভাজিযমানে, পাতিতে কুসে, অঞ্ঞো ভিক্খু আগচ্ছতি, নাকামা দাতব্বো ভাগোতি.

তেন খো পন সমযেন দ্ৰে ভাতিকা থেরা, আযস্মা চ ইসিদাসো আযস্মা চ ইসিভটো, সাৰত্থিযং ৰস্সংৰুট্ঠা অঞ্ঞতরং গামকাৰাসং অগমংসু. মনুস্সা চিরস্সাপি থেরা আগতাতি সচীৰরানি ভত্তানি অদংসু. আৰাসিকা ভিক্খূ থেরে পুচ্ছিংসু – ‘‘ইমানি, ভন্তে, সঙ্ঘিকানি চীৰরানি থেরে আগম্ম উপ্পন্নানি, সাদিযিস্সন্তি থেরা ভাগ’’ন্তি. থেরা এৰমাহংসু – ‘‘যথা খো মযং, আৰুসো, ভগৰতা ধম্মং দেসিতং আজানাম, তুম্হাকংযেৰ তানি চীৰরানি যাৰ কথিনস্স উব্ভারাযা’’তি.

তেন খো পন সমযেন তযো ভিক্খূ রাজগহে ৰস্সং ৰসন্তি. তত্থ মনুস্সা সঙ্ঘস্স

দেমাতি চীৰরানি দেন্তি. অথ খো তেসং ভিক্খূনং এতদহোসি – ‘‘ভগৰতা পঞ্ঞত্তং ‘চতুৰগ্গো পচ্ছিমো সঙ্ঘো’তি. মযঞ্চম্হা তযো জনা. ইমে চ মনুস্সা সঙ্ঘস্স দেমাতি চীৰরানি দেন্তি. কথং নু খো অম্হেহি পটিপজ্জিতব্ব’’ন্তি? তেন খো পন সমযেন সম্বহুলা থেরা, আযস্মা চ নিলৰাসী আযস্মা চ সাণৰাসী আযস্মা চ গোতকো আযস্মা চ ভগু আযস্মা চ ফল়িকসন্তানো, পাটলিপুত্তে ৰিহরন্তি কুক্কুটারামে. অথ খো তে ভিক্খূ পাটলিপুত্তং গন্ত্ৰা থেরে পুচ্ছিংসু. থেরা এৰমাহংসু – ‘‘যথা খো মযং আৰুসো ভগৰতা ধম্মং দেসিতং আজানাম, তুম্হাকংযেৰ তানি চীৰরানি যাৰ কথিনস্স উব্ভারাযা’’তি.

সঙ্ঘিকচীৰরুপ্পাদকথা নিট্ঠিতা.