২২১. পচ্ছিমৰিকপ্পনুপগচীৰরাদিকথা

৩৫৮. অথ খো ভিক্খূনং এতদহোসি – ‘‘যানি তানি ভগৰতা অনুঞ্ঞাতানি তিচীৰরন্তি ৰা ৰস্সিকসাটিকাতি ৰা নিসীদনন্তি ৰা পচ্চত্থরণন্তি ৰা কণ্ডুপ্পটিচ্ছাদীতি ৰা মুখপুঞ্ছনচোল়ন্তি ৰা পরিক্খারচোল়ন্তি ৰা, সব্বানি তানি অধিট্ঠাতব্বানি নু খো, উদাহু, ৰিকপ্পেতব্বানী’’তি? ভগৰতো এতমত্থং আরোচেসুং. অনুজানামি, ভিক্খৰে, তিচীৰরং অধিট্ঠাতুং ন ৰিকপ্পেতুং; ৰস্সিকসাটিকং ৰস্সানং চাতুমাসং অধিট্ঠাতুং, ততো পরং ৰিকপ্পেতুং; নিসীদনং অধিট্ঠাতুং ন ৰিকপ্পেতুং; পচ্চত্থরণং অধিট্ঠাতুং ন ৰিকপ্পেতুং; কণ্ডুপ্পটিচ্ছাদিং যাৰআবাধা অধিট্ঠাতুং ততো পরং ৰিকপ্পেতুং; মুখপুঞ্ছনচোল়ং অধিট্ঠাতুং ন ৰিকপ্পেতুং; পরিক্খারচোল়ং অধিট্ঠাতুং ন ৰিকপ্পেতুন্তি.

অথ খো ভিক্খূনং এতদহোসি – ‘‘কিত্তকং পচ্ছিমং নু খো চীৰরং ৰিকপ্পেতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, আযামেন অট্ঠঙ্গুলং সুগতঙ্গুলেন চতুরঙ্গুলৰিত্থতং পচ্ছিমং চীৰরং ৰিকপ্পেতুন্তি.

৩৫৯. তেন খো পন সমযেন আযস্মতো মহাকস্সপস্স পংসুকূলকতো গরুকো হোতি. ভগৰতো এতমত্থং আরোচেসুং. অনুজানামি, ভিক্খৰে, সুত্তলূখং কাতুন্তি. ৰিকণ্ণো হোতি. ভগৰতো এতমত্থং আরোচেসুং. অনুজানামি, ভিক্খৰে, ৰিকণ্ণং উদ্ধরিতুন্তি. সুত্তা ওকিরিযন্তি. ভগৰতো এতমত্থং আরোচেসুং. অনুজানামি, ভিক্খৰে, অনুৰাতং পরিভণ্ডং আরোপেতুন্তি.

তেন খো পন সমযেন সঙ্ঘাটিযা পত্তা লুজ্জন্তি. ভগৰতো এতমত্থং আরোচেসুং. অনুজানামি, ভিক্খৰে, অট্ঠপদকং কাতুন্তি.

৩৬০. তেন খো পন সমযেন অঞ্ঞতরস্স ভিক্খুনো তিচীৰরে কযিরমানে সব্বং ছিন্নকং নপ্পহোতি. ভগৰতো এতমত্থং আরোচেসুং. অনুজানামি, ভিক্খৰে, দ্ৰে ছিন্নকানি একং অচ্ছিন্নকন্তি.

দ্ৰে ছিন্নকানি একং অচ্ছিন্নকং নপ্পহোতি. ভগৰতো এতমত্থং আরোচেসুং. অনুজানামি, ভিক্খৰে, দ্ৰে অচ্ছিন্নকানি একং ছিন্নকন্তি.

দ্ৰে অচ্ছিন্নকানি একং ছিন্নকং নপ্পহোতি. ভগৰতো এতমত্থং আরোচেসুং. অনুজানামি, ভিক্খৰে, অন্ৰাধিকম্পি আরোপেতুং, ন চ, ভিক্খৰে, সব্বং অচ্ছিন্নকং ধারেতব্বং. যো ধারেয্য, আপত্তি দুক্কটস্সাতি.

৩৬১. তেন খো পন সমযেন অঞ্ঞতরস্স ভিক্খুনো বহুং চীৰরং উপ্পন্নং হোতি. সো চ তং চীৰরং মাতাপিতূনং দাতুকামো হোতি. ভগৰতো এতমত্থং আরোচেসুং. মাতাপিতরোতি [মাতাপিতূনং খো (সী.)] খো, ভিক্খৰে, দদমানে [ৰদমানো (ক.), ৰদমানে (?)] কিং ৰদেয্যাম? অনুজানামি, ভিক্খৰে, মাতাপিতূনং দাতুং. ন চ, ভিক্খৰে, সদ্ধাদেয্যং ৰিনিপাতেতব্বং. যো ৰিনিপাতেয্য, আপত্তি দুক্কটস্সাতি.

৩৬২. তেন খো পন সমযেন অঞ্ঞতরো ভিক্খু অন্ধৰনে চীৰরং নিক্খিপিত্ৰা সন্তরুত্তরেন গামং পিণ্ডায পাৰিসি. চোরা তং চীৰরং অৰহরিংসু. সো ভিক্খু দুচ্চোল়ো হোতি লূখচীৰরো. ভিক্খূ এৰমাহংসু – ‘‘কিস্স ত্ৰং, আৰুসো, দুচ্চোল়ো লূখচীৰরোসী’’তি? ‘‘ইধাহং [সো অহং (কত্থচি)], আৰুসো, অন্ধৰনে চীৰরং নিক্খিপিত্ৰা সন্তরুত্তরেন গামং পিণ্ডায পাৰিসিং. চোরা তং চীৰরং অৰহরিংসু. তেনাহং দুচ্চোল়ো লূখচীৰরো’’তি. ভগৰতো এতমত্থং আরোচেসুং. ন, ভিক্খৰে, সন্তরুত্তরেন গামো পৰিসিতব্বো. যো পৰিসেয্য, আপত্তি দুক্কটস্সাতি.

তেন খো পন সমযেন আযস্মা আনন্দো অস্সতিযা সন্তরুত্তরেন গামং পিণ্ডায পাৰিসি. ভিক্খূ আযস্মন্তং আনন্দং এতদৰোচুং – ‘‘ননু, আৰুসো আনন্দ, ভগৰতা পঞ্ঞত্তং – ‘ন সন্তরুত্তরেন গামো পৰিসিতব্বো’তি? কিস্স ত্ৰং, আৰুসো আনন্দ, সন্তরুত্তরেন গামং পৰিট্ঠো’’তি? ‘‘সচ্চং, আৰুসো, ভগৰতা পঞ্ঞত্তং – ‘ন সন্তরুত্তরেন গামো পৰিসিতব্বো’তি. অপি চাহং অস্সতিযা পৰিট্ঠো’’তি. ভগৰতো এতমত্থং আরোচেসুং.

পঞ্চিমে, ভিক্খৰে, পচ্চযা সঙ্ঘাটিযা নিক্খেপায – গিলানো ৰা হোতি, ৰস্সিকসঙ্কেতং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, অত্থতকথিনং ৰা হোতি. ইমে খো, ভিক্খৰে, পঞ্চ পচ্চযা সঙ্ঘাটিযা নিক্খেপায.

পঞ্চিমে, ভিক্খৰে, পচ্চযা উত্তরাসঙ্গস্স নিক্খেপায…পে… অন্তরৰাসকস্স নিক্খেপায – গিলানো ৰা হোতি, ৰস্সিকসঙ্কেতং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, অত্থতকথিনং ৰা হোতি. ইমে খো, ভিক্খৰে, পঞ্চ পচ্চযা উত্তরাসঙ্গস্স অন্তরৰাসকস্স নিক্খেপায.

পঞ্চিমে, ভিক্খৰে, পচ্চযা ৰস্সিকসাটিকায নিক্খেপায – গিলানো ৰা হোতি, নিস্সীমং গন্তুং ৰা হোতি, নদীপারং গন্তুং ৰা হোতি, অগ্গল়গুত্তিৰিহারো ৰা হোতি, ৰস্সিকসাটিকা অকতা ৰা হোতি ৰিপ্পকতা ৰা. ইমে খো, ভিক্খৰে, পঞ্চ পচ্চযা ৰস্সিকসাটিকায নিক্খেপাযাতি.

পচ্ছিমৰিকপ্পনুপগচীৰরাদিকথা নিট্ঠিতা.