২২০. নিসীদনাদিঅনুজাননা

৩৫৩. তেন খো পন সমযেন ভিক্খূ পণীতানি ভোজনানি ভুঞ্জিত্ৰা মুট্ঠস্সতী অসম্পজানা নিদ্দং ওক্কমন্তি. তেসং মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি মুচ্চতি, সেনাসনং অসুচিনা মক্খিযতি. অথ খো ভগৰা আযস্মতা আনন্দেন পচ্ছাসমণেন সেনাসনচারিকং আহিণ্ডন্তো অদ্দস সেনাসনং অসুচিনা মক্খিতং, দিস্ৰান আযস্মন্তং আনন্দং আমন্তেসি – ‘‘কিং এতং, আনন্দ, সেনাসনং মক্খিত’’ন্তি? ‘‘এতরহি, ভন্তে, ভিক্খূ পণীতানি ভোজনানি ভুঞ্জিত্ৰা মুট্ঠস্সতী অসম্পজানা নিদ্দং ওক্কমন্তি. তেসং মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি মুচ্চতি; তযিদং, ভগৰা, সেনাসনং অসুচিনা মক্খিত’’ন্তি. ‘‘এৰমেতং, আনন্দ, এৰমেতং, আনন্দ. মুচ্চতি হি, আনন্দ, মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি. যে তে, আনন্দ, ভিক্খূ উপট্ঠিতস্সতী সম্পজানা নিদ্দং ওক্কমন্তি, তেসং অসুচি ন মুচ্চতি. যেপি তে, আনন্দ, পুথুজ্জনা কামেসু ৰীতরাগা, তেসম্পি অসুচি ন মুচ্চতি. অট্ঠানমেতং, আনন্দ, অনৰকাসো যং অরহতো অসুচি মুচ্চেয্যা’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ইধাহং, ভিক্খৰে, আনন্দেন পচ্ছাসমণেন সেনাসনচারিকং আহিণ্ডন্তো অদ্দসং সেনাসনং অসুচিনা মক্খিতং, দিস্ৰান আনন্দং আমন্তেসিং ‘কিং এতং, আনন্দ, সেনাসনং মক্খিত’ন্তি? ‘এতরহি, ভন্তে, ভিক্খূ পণীতানি ভোজনানি ভুঞ্জিত্ৰা মুট্ঠস্সতী অসম্পজানা নিদ্দং ওক্কমন্তি. তেসং মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি মুচ্চতি; তযিদং, ভগৰা, সেনাসনং অসুচিনা মক্খিত’ন্তি. ‘এৰমেতং, আনন্দ, এৰমেতং, আনন্দ, মুচ্চতি হি, আনন্দ, মুট্ঠস্সতীনং অসম্পজানানং নিদ্দং ওক্কমন্তানং সুপিনন্তেন অসুচি. যে তে, আনন্দ, ভিক্খূ উপট্ঠিতস্সতী সম্পজানা নিদ্দং ওক্কমন্তি, তেসং অসুচি ন মুচ্চতি. যেপি তে, আনন্দ, পুথুজ্জনা কামেসু ৰীতরাগা তেসম্পি অসুচি ন মুচ্চতি. অট্ঠানমেতং, আনন্দ, অনৰকাসো যং অরহতো অসুচি মুচ্চেয্যা’’’তি.

‘‘পঞ্চিমে, ভিক্খৰে, আদীনৰা মুট্ঠস্সতিস্স অসম্পজানস্স নিদ্দং ওক্কমতো – দুক্খং সুপতি, দুক্খং পটিবুজ্ঝতি, পাপকং সুপিনং পস্সতি, দেৰতা ন রক্খন্তি, অসুচি মুচ্চতি. ইমে খো, ভিক্খৰে, পঞ্চ আদীনৰা মুট্ঠস্সতিস্স অসম্পজানস্স নিদ্দং ওক্কমতো.

‘‘পঞ্চিমে, ভিক্খৰে, আনিসংসা উপট্ঠিতস্সতিস্স সম্পজানস্স নিদ্দং ওক্কমতো – সুখং সুপতি, সুখং পটিবুজ্ঝতি, ন পাপকং সুপিনং পস্সতি, দেৰতা রক্খন্তি, অসুচি ন মুচ্চতি. ইমে খো, ভিক্খৰে, পঞ্চ আনিসংসা উপট্ঠিতস্সতিস্স সম্পজানস্স নিদ্দং ওক্কমতো.

‘‘অনুজানামি, ভিক্খৰে, কাযগুত্তিযা চীৰরগুত্তিযা সেনাসনগুত্তিযা নিসীদন’’ন্তি.

তেন খো পন সমযেন অতিখুদ্দকং নিসীদনং ন সব্বং সেনাসনং সংগোপেতি. ভগৰতো এতমত্থং আরোচেসুং. অনুজানামি, ভিক্খৰে, যাৰমহন্তং পচ্চত্থরণং আকঙ্খতি তাৰমহন্তং পচ্চত্থরণং কাতুন্তি.

৩৫৪. তেন খো পন সমযেন আযস্মতো আনন্দস্স উপজ্ঝাযস্স আযস্মতো বেলট্ঠসীসস্স থুল্লকচ্ছাবাধো হোতি. তস্স লসিকায চীৰরানি কাযে লগ্গন্তি. তানি ভিক্খূ উদকেন তেমেত্ৰা তেমেত্ৰা অপকড্ঢন্তি. অদ্দসা খো ভগৰা সেনাসনচারিকং আহিণ্ডন্তো তে ভিক্খূ তানি চীৰরানি উদকেন তেমেত্ৰা তেমেত্ৰা অপকড্ঢন্তে, দিস্ৰান যেন তে ভিক্খূ তেনুপসঙ্কমি, উপঙ্কমিত্ৰা তে ভিক্খূ এতদৰোচ – ‘‘কিং ইমস্স, ভিক্খৰে, ভিক্খুনো আবাধো’’তি? ‘‘ইমস্স, ভন্তে, আযস্মতো থুল্লকচ্ছাবাধো. লসিকায চীৰরানি কাযে লগ্গন্তি. তানি মযং উদকেন তেমেত্ৰা তেমেত্ৰা অপকড্ঢামা’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, যস্স কণ্ডু ৰা পিল়কা ৰা অস্সাৰো ৰা থুল্লকচ্ছু ৰা আবাধো কণ্ডুপ্পটিচ্ছাদি’’ন্তি.

৩৫৫. অথ খো ৰিসাখা মিগারমাতা মুখপুঞ্ছনচোল়ং [মুখপুঞ্জনচোল়ং (ক.)] আদায যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্না খো ৰিসাখা মিগারমাতা ভগৰন্তং এতদৰোচ – ‘‘পটিগ্গণ্হাতু মে, ভন্তে, ভগৰা মুখপুঞ্ছনচোল়ং, যং মমস্স দীঘরত্তং হিতায সুখাযা’’তি. পটিগ্গহেসি ভগৰা মুখপুঞ্ছনচোল়ং. অথ খো ভগৰা ৰিসাখং মিগারমাতরং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো ৰিসাখা মিগারমাতা ভগৰতা ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, মুখপুঞ্ছনচোল়ক’’ন্তি [মুখপুঞ্ছনচোলন্তি (স্যা.)].

৩৫৬. তেন খো পন সমযেন রোজো মল্লো আযস্মতো আনন্দস্স সহাযো হোতি. রোজস্স মল্লস্স খোমপিলোতিকা আযস্মতো আনন্দস্স হত্থে নিক্খিত্তা হোতি. আযস্মতো চ আনন্দস্স খোমপিলোতিকায অত্থো হোতি. ভগৰতো এতমত্থং আরোচেসুং. অনুজানামি, ভিক্খৰে, পঞ্চহঙ্গেহি সমন্নাগতস্স ৰিস্সাসং গহেতুং – সন্দিট্ঠো চ হোতি, সম্ভত্তো চ, আলপিতো চ, জীৰতি চ, জানাতি চ, গহিতে মে অত্তমনো ভৰিস্সতীতি. অনুজানামি, ভিক্খৰে, ইমেহি পঞ্চহঙ্গেহি সমন্নাগতস্স ৰিস্সাসং গহেতুন্তি.

৩৫৭. তেন খো পন সমযেন ভিক্খূনং পরিপুণ্ণং হোতি তিচীৰরং. অত্থো চ হোতি পরিস্সাৰনেহিপি থৰিকাহিপি. ভগৰতো এতমত্থং আরোচেসুং. অনুজানামি, ভিক্খৰে, পরিক্খারচোল়কন্তি.

নিসীদনাদিঅনুজাননা নিট্ঠিতা.