২১৮. অতিরেকচীৰরকথা

৩৪৭. [পারা. ৪৬১] তেন খো পন সমযেন ছব্বগ্গিযা ভিক্খূ ভগৰতা তিচীৰরং অনুঞ্ঞাতন্তি অঞ্ঞেনেৰ তিচীৰরেন গামং পৰিসন্তি, অঞ্ঞেন তিচীৰরেন আরামে অচ্ছন্তি, অঞ্ঞেন তিচীৰরেন নহানং ওতরন্তি. যে তে ভিক্খূ অপ্পিচ্ছা তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ অতিরেকচীৰরং ধারেস্সন্তী’’তি. অথ খো তে ভিক্খূ ভগৰতো এতমত্থং আরোচেসুং. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘ন, ভিক্খৰে, অতিরেকচীৰরং ধারেতব্বং. যো ধারেয্য, যথাধম্মো কারেতব্বো’’তি.

[পারা. ৪৬১] তেন খো পন সমযেন আযস্মতো আনন্দস্স অতিরেকচীৰরং উপ্পন্নং হোতি. আযস্মা চ আনন্দো তং চীৰরং আযস্মতো সারিপুত্তস্স দাতুকামো হোতি. আযস্মা চ সারিপুত্তো সাকেতে ৰিহরতি. অথ খো আযস্মতো আনন্দস্স এতদহোসি – ‘‘ভগৰতা সিক্খাপদং পঞ্ঞত্তং ‘ন অতিরেকচীৰরং ধারেতব্ব’ন্তি. ইদঞ্চ মে অতিরেকচীৰরং উপ্পন্নং. অহঞ্চিমং চীৰরং আযস্মতো সারিপুত্তস্স দাতুকামো. আযস্মা চ সারিপুত্তো সাকেতে ৰিহরতি. কথং নু খো মযা পটিপজ্জিতব্ব’’ন্তি? ভগৰতো এতমত্থং আরোচেসি. ‘‘কীৰচিরং পনানন্দ, সারিপুত্তো আগচ্ছিস্সতী’’তি? ‘‘নৰমং ৰা, ভগৰা, দিৰসং, দসমং ৰা’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, দসাহপরমং অতিরেকচীৰরং ধারেতু’’ন্তি.

তেন খো পন সমযেন ভিক্খূনং অতিরেকচীৰরং উপ্পন্নং হোতি. অথ খো ভিক্খূনং এতদহোসি – ‘‘কথং নু খো অম্হেহি অতিরেকচীৰরে পটিপজ্জিতব্ব’’ন্তি? ভগৰতো এতমত্থং আরোচেসুং. অনুজানামি, ভিক্খৰে, অতিরেকচীৰরং ৰিকপ্পেতুন্তি.

৩৪৮. অথ খো ভগৰা ৰেসালিযং যথাভিরন্তং ৰিহরিত্ৰা যেন বারাণসী তেন চারিকং পক্কামি. অনুপুব্বেন চারিকং চরমানো যেন বারাণসী তদৰসরি. তত্র সুদং ভগৰা বারাণসিযং ৰিহরতি ইসিপতনে মিগদাযে. তেন খো পন সমযেন অঞ্ঞতরস্স ভিক্খুনো অন্তরৰাসকো ছিদ্দো হোতি. অথ খো তস্স ভিক্খুনো এতদহোসি – ‘‘ভগৰতা তিচীৰরং অনুঞ্ঞাতং – দিগুণা সঙ্ঘাটি, একচ্চিযো উত্তরাসঙ্গো, একচ্চিযো অন্তরৰাসকো. অযঞ্চ মে অন্তরৰাসকো ছিদ্দো. যংনূনাহং অগ্গল়ং অচ্ছুপেয্যং, সমন্ততো দুপট্টং ভৰিস্সতি, মজ্ঝে একচ্চিয’’ন্তি. অথ খো সো ভিক্খু অগ্গল়ং অচ্ছুপেসি. অদ্দসা খো ভগৰা সেনাসনচারিকং আহিণ্ডন্তো তং ভিক্খুং অগ্গল়ং অচ্ছুপেন্তং [অচ্ছুপন্তং (ক.)], দিস্ৰান যেন সো ভিক্খু তেনুপসঙ্কমি, উপসঙ্কমিত্ৰা তং ভিক্খুং এতদৰোচ – ‘‘কিং ত্ৰং, ভিক্খু, করোসী’’তি? ‘‘অগ্গল়ং, ভগৰা, অচ্ছুপেমী’’তি. ‘‘সাধু সাধু, ভিক্খু; সাধু খো ত্ৰং, ভিক্খু, অগ্গল়ং অচ্ছুপেসী’’তি. অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, অহতানং দুস্সানং অহতকপ্পানং দিগুণং সঙ্ঘাটিং, একচ্চিযং উত্তরাসঙ্গং, একচ্চিযং অন্তরৰাসকং; উতুদ্ধটানং দুস্সানং চতুগ্গুণং সঙ্ঘাটিং, দিগুণং উত্তরাসঙ্গং, দিগুণং অন্তরৰাসকং; পংসুকূলে যাৰদত্থং; পাপণিকে উস্সাহো করণীযো. অনুজানামি, ভিক্খৰে, অগ্গল়ং তুন্নং ওৰট্টিকং কণ্ডুসকং দল়্হীকম্ম’’ন্তি.

অতিরেকচীৰরকথা নিট্ঠিতা.