২০৬. সেট্ঠিপুত্তৰত্থু

৩৩৩. তেন খো পন সমযেন বারাণসেয্যকস্স সেট্ঠিপুত্তস্স মোক্খচিকায কীল়ন্তস্স অন্তগণ্ঠাবাধো হোতি, যেন যাগুপি পীতা ন সম্মা পরিণামং গচ্ছতি, ভত্তম্পি ভুত্তং ন সম্মা পরিণামং গচ্ছতি, উচ্চারোপি পস্সাৰোপি ন পগুণো. সো তেন কিসো হোতি লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো. অথ খো বারাণসেয্যকস্স সেট্ঠিস্স এতদহোসি – ‘‘ময্হং খো পুত্তস্স তাদিসো আবাধো, যেন যাগুপি পীতা ন সম্মা পরিণামং গচ্ছতি, ভত্তম্পি ভুত্তং ন সম্মা পরিণামং গচ্ছতি, উচ্চারোপি পস্সাৰোপি ন পগুণো. সো তেন কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো. যংনূনাহং রাজগহং গন্ত্ৰা রাজানং জীৰকং ৰেজ্জং যাচেয্যং পুত্তং মে তিকিচ্ছিতু’’ন্তি. অথ খো বারাণসেয্যকো সেট্ঠি রাজগহং গন্ত্ৰা যেন রাজা মাগধো সেনিযো বিম্বিসারো তেনুপসঙ্কমি, উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘ময্হং খো, দেৰ, পুত্তস্স তাদিসো আবাধো, যেন যাগুপি পীতা ন সম্মা পরিণামং গচ্ছতি, ভত্তম্পি ভুত্তং ন সম্মা পরিণামং গচ্ছতি, উচ্চারোপি পস্সাৰোপি ন পগুণো. সো তেন কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো. সাধু দেৰো জীৰকং ৰেজ্জং আণাপেতু পুত্তং মে তিকিচ্ছিতু’’ন্তি.

অথ খো রাজা মাগধো সেনিযো বিম্বিসারো জীৰকং কোমারভচ্চং আণাপেসি – ‘‘গচ্ছ, ভণে জীৰক, বারাণসিং গন্ত্ৰা বারাণসেয্যকং সেট্ঠিপুত্তং তিকিচ্ছাহী’’তি. ‘‘এৰং, দেৰা’’তি খো জীৰকো কোমারভচ্চো রঞ্ঞো মাগধস্স সেনিযস্স বিম্বিসারস্স পটিস্সুত্ৰা বারাণসিং গন্ত্ৰা যেন বারাণসেয্যকো সেট্ঠিপুত্তো তেনুপসঙ্কমি, উপসঙ্কমিত্ৰা বারাণসেয্যকস্স সেট্ঠিপুত্তস্স ৰিকারং সল্লক্খেত্ৰা জনং উস্সারেত্ৰা তিরোকরণিযং পরিক্খিপিত্ৰা থম্ভে উব্বন্ধিত্ৰা [উপনিবন্ধিত্ৰা (সী. স্যা.)] ভরিযং পুরতো ঠপেত্ৰা উদরচ্ছৰিং উপ্পাটেত্ৰা অন্তগণ্ঠিং নীহরিত্ৰা ভরিযায দস্সেসি – ‘‘পস্স তে সামিকস্স আবাধং, ইমিনা যাগুপি পীতা ন সম্মা পরিণামং গচ্ছতি, ভত্তম্পি ভুত্তং ন সম্মা পরিণামং গচ্ছতি, উচ্চারোপি পস্সাৰোপি ন পগুণো; ইমিনাযং কিসো লূখো দুব্বণ্ণো উপ্পণ্ডুপ্পণ্ডুকজাতো ধমনিসন্থতগত্তো’’তি. অন্তগণ্ঠিং ৰিনিৰেঠেত্ৰা অন্তানি পটিপৰেসেত্ৰা উদরচ্ছৰিং সিব্বিত্ৰা আলেপং অদাসি. অথ খো বারাণসেয্যকো সেট্ঠিপুত্তো নচিরস্সেৰ অরোগো অহোসি. অথ খো বারাণসেয্যকো সেট্ঠি ‘পুত্তো মে অরোগো ঠিতো’তি [অরোগাপিতোতি (সী.)] জীৰকস্স কোমারভচ্চস্স সোল়সসহস্সানি পাদাসি. অথ খো জীৰকো কোমারভচ্চো তানি সোল়সসহস্সানি আদায পুনদেৰ রাজগহং পচ্চাগঞ্ছি.

সেট্ঠিপুত্তৰত্থু নিট্ঠিতং.