২০৫. রাজগহসেট্ঠিৰত্থু

৩৩২. তেন খো পন সমযেন রাজগহকস্স সেট্ঠিস্স সত্তৰস্সিকো সীসাবাধো হোতি. বহূ মহন্তা মহন্তা দিসাপামোক্খা ৰেজ্জা আগন্ত্ৰা নাসক্খিংসু অরোগং কাতুং. বহুং হিরঞ্ঞং আদায অগমংসু. অপি চ, ৰেজ্জেহি পচ্চক্খাতো হোতি. একচ্চে ৰেজ্জা এৰমাহংসু – ‘‘পঞ্চমং দিৰসং সেট্ঠি গহপতি কালং করিস্সতী’’তি. একচ্চে ৰেজ্জা এৰমাহংসু – ‘‘সত্তমং দিৰসং সেট্ঠি গহপতি কালং করিস্সতী’’তি. অথ খো রাজগহকস্স নেগমস্স এতদহোসি – ‘‘অযং খো সেট্ঠি গহপতি বহূপকারো রঞ্ঞো চেৰ নেগমস্স চ. অপি চ, ৰেজ্জেহি পচ্চক্খাতো. একচ্চে ৰেজ্জা এৰমাহংসু – ‘পঞ্চমং দিৰসং সেট্ঠি গহপতি কালং করিস্সতী’তি. একচ্চে ৰেজ্জা এৰমাহংসু – ‘সত্তমং দিৰসং সেট্ঠি গহপতি কালং করিস্সতী’তি. অযঞ্চ রঞ্ঞো জীৰকো ৰেজ্জো তরুণো ভদ্রকো. যংনূন মযং রাজানং জীৰকং ৰেজ্জং যাচেয্যাম সেট্ঠিং গহপতিং তিকিচ্ছিতু’’ন্তি. অথ খো রাজগহকো নেগমো যেন রাজা মাগধো সেনিযো বিম্বিসারো তেনুপসঙ্কমি; উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘অযং, দেৰ, সেট্ঠি গহপতি বহূপকারো দেৰস্স চেৰ নেগমস্স চ; অপি চ, ৰেজ্জেহি পচ্চক্খাতো. একচ্চে ৰেজ্জা এৰমাহংসু – পঞ্চমং দিৰসং সেট্ঠি গহপতি কালং করিস্সতীতি. একচ্চে ৰেজ্জা এৰমাহংসু – সত্তমং দিৰসং সেট্ঠি গহপতি কালং করিস্সতীতি. সাধু দেৰো জীৰকং ৰেজ্জং আণাপেতু সেট্ঠিং গহপতিং তিকিচ্ছিতু’’ন্তি.

অথ খো রাজা মাগধো সেনিযো বিম্বিসারো জীৰকং কোমারভচ্চং আণাপেসি – ‘‘গচ্ছ, ভণে জীৰক, সেট্ঠিং গহপতিং তিকিচ্ছাহী’’তি. ‘‘এৰং, দেৰা’’তি খো জীৰকো কোমারভচ্চো রঞ্ঞো মাগধস্স সেনিযস্স বিম্বিসারস্স পটিস্সুত্ৰা যেন সেট্ঠি গহপতি তেনুপসঙ্কমি; উপসঙ্কমিত্ৰা সেট্ঠিস্স গহপতিস্স ৰিকারং সল্লক্খেত্ৰা সেট্ঠিং গহপতিং এতদৰোচ – ‘‘সচে ত্ৰং, গহপতি, অরোগো ভৰেয্যাসি [সচাহং তং গহপতি অরোগাপেয্যং (সী.), সচাহং তং গহপতি অরোগং করেয্যং (স্যা.)] কিং মে অস্স দেয্যধম্মো’’তি? ‘‘সব্বং সাপতেয্যঞ্চ তে, আচরিয, হোতু, অহঞ্চ তে দাসো’’তি. ‘‘সক্খিস্সসি পন ত্ৰং, গহপতি, একেন পস্সেন সত্তমাসে নিপজ্জিতু’’ন্তি? ‘‘সক্কোমহং, আচরিয, একেন পস্সেন সত্তমাসে নিপজ্জিতু’’ন্তি. ‘‘সক্খিস্সসি পন ত্ৰং, গহপতি, দুতিযেন পস্সেন সত্তমাসে নিপজ্জিতু’’ন্তি? ‘‘সক্কোমহং, আচরিয, দুতিযেন পস্সেন সত্তমাসে নিপজ্জিতু’’ন্তি. ‘‘সক্খিস্সসি পন ত্ৰং, গহপতি, উত্তানো সত্তমাসে নিপজ্জিতু’’ন্তি? ‘‘সক্কোমহং, আচরিয, উত্তানো সত্তমাসে নিপজ্জিতু’’ন্তি.

অথ খো জীৰকো কোমারভচ্চো সেট্ঠিং গহপতিং মঞ্চকে নিপাতেত্ৰা [নিপজ্জাপেত্ৰা (সী. স্যা.)] মঞ্চকে [মঞ্চকেন (সী.)] সম্বন্ধিত্ৰা সীসচ্ছৰিং উপ্পাটেত্ৰা [ফালেত্ৰা (সী.)] সিব্বিনিং ৰিনামেত্ৰা দ্ৰে পাণকে নীহরিত্ৰা মহাজনস্স দস্সেসি – ‘‘পস্সথয্যে [পস্সেস্যাথ (সী.), পস্সথ (স্যা.), পস্সথয্যো (ক.)], ইমে দ্ৰে পাণকে, একং খুদ্দকং একং মহল্লকং. যে তে আচরিযা এৰমাহংসু – পঞ্চমং দিৰসং সেট্ঠি গহপতি কালং করিস্সতীতি – তেহাযং মহল্লকো পাণকো দিট্ঠো. পঞ্চমং দিৰসং সেট্ঠিস্স গহপতিস্স মত্থলুঙ্গং পরিযাদিযিস্সতি. মত্থলুঙ্গস্স পরিযাদানা সেট্ঠি গহপতি কালং করিস্সতি. সুদিট্ঠো তেহি আচরিযেহি. যে তে আচরিযা এৰমাহংসু – সত্তমং দিৰসং সেট্ঠি গহপতি কালং করিস্সতীতি – তেহাযং খুদ্দকো পাণকো দিট্ঠো. সত্তমং দিৰসং সেট্ঠিস্স গহপতিস্স মত্থলুঙ্গং পরিযাদিযিস্সতি. মত্থলুঙ্গস্স পরিযাদানা সেট্ঠি গহপতি কালং করিস্সতি. সুদিট্ঠো তেহি আচরিযেহী’’তি. সিব্বিনিং সম্পটিপাটেত্ৰা সীসচ্ছৰিং সিব্বিত্ৰা আলেপং অদাসি. অথ খো সেট্ঠি গহপতি সত্তাহস্স অচ্চযেন জীৰকং কোমারভচ্চং এতদৰোচ – ‘‘নাহং, আচরিয, সক্কোমি একেন পস্সেন সত্তমাসে নিপজ্জিতু’’ন্তি. ‘‘ননু মে ত্ৰং, গহপতি, পটিস্সুণি – সক্কোমহং, আচরিয, একেন পস্সেন সত্তমাসে নিপজ্জিতু’’ন্তি? ‘‘সচ্চাহং, আচরিয, পটিস্সুণিং, অপাহং মরিস্সামি, নাহং সক্কোমি একেন পস্সেন সত্তমাসে নিপজ্জিতু’’ন্তি. ‘‘তেন হি ত্ৰং, গহপতি, দুতিযেন পস্সেন সত্তমাসে নিপজ্জাহী’’তি. অথ খো সেট্ঠি গহপতি সত্তাহস্স অচ্চযেন জীৰকং কোমারভচ্চং এতদৰোচ – ‘‘নাহং, আচরিয, সক্কোমি দুতিযেন পস্সেন সত্তমাসে নিপজ্জিতু’’ন্তি. ‘‘ননু মে ত্ৰং, গহপতি, পটিস্সুণি – সক্কোমহং, আচরিয, দুতিযেন পস্সেন সত্তমাসে নিপজ্জিতু’’ন্তি? ‘‘সচ্চাহং, আচরিয, পটিস্সুণিং, অপাহং মরিস্সামি, নাহং, আচরিয, সক্কোমি দুতিযেন পস্সেন সত্তমাসে নিপজ্জিতু’’ন্তি. ‘‘তেন হি ত্ৰং, গহপতি, উত্তানো সত্তমাসে নিপজ্জাহী’’তি. অথ খো সেট্ঠি গহপতি সত্তাহস্স অচ্চযেন জীৰকং কোমারভচ্চং এতদৰোচ – ‘‘নাহং, আচরিয, সক্কোমি উত্তানো সত্তমাসে নিপজ্জিতু’’ন্তি. ‘‘ননু মে ত্ৰং, গহপতি, পটিস্সুণি – সক্কোমহং, আচরিয, উত্তানো সত্তমাসে নিপজ্জিতু’’ন্তি? ‘‘সচ্চাহং, আচরিয, পটিস্সুণিং, অপাহং মরিস্সামি, নাহং সক্কোমি উত্তানো সত্তমাসে নিপজ্জিতু’’ন্তি. ‘‘অহং চে তং, গহপতি, ন ৰদেয্যং, এত্তকম্পি ত্ৰং ন নিপজ্জেয্যাসি, অপি চ পটিকচ্চেৰ মযা ঞাতো – তীহি সত্তাহেহি সেট্ঠি গহপতি অরোগো ভৰিস্সতীতি. উট্ঠেহি, গহপতি, অরোগোসি. জানাসি কিং মে দেয্যধম্মো’’তি? ‘‘সব্বং সাপতেয্যঞ্চ তে, আচরিয, হোতু, অহঞ্চ তে দাসো’’তি. ‘‘অলং, গহপতি, মা মে ত্ৰং সব্বং সাপতেয্যং অদাসি, মা চ মে দাসো. রঞ্ঞো সতসহস্সং দেহি, ময্হং সতসহস্স’’ন্তি. অথ খো সেট্ঠি গহপতি অরোগো সমানো রঞ্ঞো সতসহস্সং অদাসি, জীৰকস্স কোমারভচ্চস্স সতসহস্সং.

রাজগহসেট্ঠিৰত্থু নিট্ঠিতং.