২০৪. বিম্বিসাররাজৰত্থু

৩৩১. তেন খো পন সমযেন রঞ্ঞো মাগধস্স সেনিযস্স বিম্বিসারস্স ভগন্দলাবাধো হোতি. সাটকা লোহিতেন মক্খিযন্তি. দেৰিযো দিস্ৰা উপ্পণ্ডেন্তি – ‘‘উতুনী দানি দেৰো, পুপ্ফং দেৰস্স উপ্পন্নং, ন চিরং [নচিরস্সেৰ (স্যা.)] দেৰো ৰিজাযিস্সতী’’তি. তেন রাজা মঙ্কু হোতি. অথ খো রাজা মাগধো সেনিযো বিম্বিসারো অভযং রাজকুমারং এতদৰোচ – ‘‘ময্হং খো, ভণে অভয, তাদিসো আবাধো, সাটকা লোহিতেন মক্খিযন্তি, দেৰিযো মং দিস্ৰা উপ্পণ্ডেন্তি – ‘উতুনী দানি দেৰো, পুপ্ফং দেৰস্স উপ্পন্নং, ন চিরং দেৰো ৰিজাযিস্সতী’তি. ইঙ্ঘ, ভণে অভয, তাদিসং ৰেজ্জং জানাহি যো মং তিকিচ্ছেয্যা’’তি. ‘‘অযং, দেৰ, অম্হাকং জীৰকো ৰেজ্জো তরুণো ভদ্রকো. সো দেৰং তিকিচ্ছিস্সতী’’তি. ‘‘তেন হি, ভণে অভয, জীৰকং ৰেজ্জং আণাপেহি; সো মং তিকিচ্ছিস্সতী’’তি. অথ খো অভযো রাজকুমারো জীৰকং কোমারভচ্চং আণাপেসি – ‘‘গচ্ছ, ভণে জীৰক, রাজানং তিকিচ্ছাহী’’তি. ‘‘এৰং, দেৰা’’তি খো জীৰকো কোমারভচ্চো অভযস্স রাজকুমারস্স পটিস্সুত্ৰা নখেন ভেসজ্জং আদায যেন রাজা মাগধো সেনিযো বিম্বিসারো তেনুপসঙ্কমি, উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘আবাধং তে, দেৰ, পস্সামা’’তি [পস্সামীতি (স্যা.)]. অথ খো জীৰকো কোমারভচ্চো রঞ্ঞো মাগধস্স সেনিযস্স বিম্বিসারস্স ভগন্দলাবাধং একেনেৰ আলেপেন অপকড্ঢি. অথ খো রাজা মাগধো সেনিযো বিম্বিসারো অরোগো সমানো পঞ্চ ইত্থিসতানি সব্বালঙ্কারং ভূসাপেত্ৰা ওমুঞ্চাপেত্ৰা পুঞ্জং কারাপেত্ৰা জীৰকং কোমারভচ্চং এতদৰোচ – ‘‘এতং, ভণে জীৰক, পঞ্চন্নং ইত্থিসতানং সব্বালঙ্কারং তুয্হং হোতূ’’তি. ‘‘অলং, দেৰ, অধিকারং মে দেৰো সরতূ’’তি. ‘‘তেন হি, ভণে জীৰক, মং উপট্ঠহ, ইত্থাগারঞ্চ, বুদ্ধপ্পমুখঞ্চ ভিক্খুসঙ্ঘ’’ন্তি. ‘‘এৰং, দেৰা’’তি খো জীৰকো কোমারভচ্চো রঞ্ঞো মাগধস্স সেনিযস্স বিম্বিসারস্স পচ্চস্সোসি.

বিম্বিসাররাজৰত্থু নিট্ঠিতং.