২০৩. সেট্ঠিভরিযাৰত্থু

৩৩০. তেন খো পন সমযেন সাকেতে সেট্ঠিভরিযায সত্তৰস্সিকো সীসাবাধো হোতি. বহূ মহন্তা মহন্তা দিসাপামোক্খা ৰেজ্জা আগন্ত্ৰা নাসক্খিংসু অরোগং কাতুং. বহুং হিরঞ্ঞং আদায অগমংসু. অথ খো জীৰকো কোমারভচ্চো সাকেতং পৰিসিত্ৰা মনুস্সে পুচ্ছি – ‘‘কো, ভণে, গিলানো, কং তিকিচ্ছামী’’তি? ‘‘এতিস্সা, আচরিয, সেট্ঠিভরিযায সত্তৰস্সিকো সীসাবাধো; গচ্ছ, আচরিয, সেট্ঠিভরিযং তিকিচ্ছাহী’’তি. অথ খো জীৰকো কোমারভচ্চো যেন সেট্ঠিস্স গহপতিস্স নিৰেসনং তেনুপসঙ্কমি; উপসঙ্কমিত্ৰা দোৰারিকং আণাপেসি – ‘‘গচ্ছ, ভণে দোৰারিক, সেট্ঠিভরিযায পাৰদ – ‘ৰেজ্জো, অয্যে, আগতো, সো তং দট্ঠুকামো’’’তি. ‘‘এৰং, আচরিযা’’তি খো সো দোৰারিকো জীৰকস্স কোমারভচ্চস্স পটিস্সুত্ৰা যেন সেট্ঠিভরিযা তেনুপসঙ্কমি, উপসঙ্কমিত্ৰা সেট্ঠিভরিযং এতদৰোচ – ‘‘ৰেজ্জো, অয্যে, আগতো; সো তং দট্ঠুকামো’’তি. ‘‘কীদিসো, ভণে দোৰারিক, ৰেজ্জো’’তি? ‘‘দহরকো, অয্যে’’তি. ‘‘অলং, ভণে দোৰারিক, কিং মে দহরকো ৰেজ্জো করিস্সতি? বহূ মহন্তা মহন্তা দিসাপামোক্খা ৰেজ্জা আগন্ত্ৰা নাসক্খিংসু অরোগং কাতুং. বহুং হিরঞ্ঞং আদায অগমংসূ’’তি. অথ খো সো দোৰারিকো যেন জীৰকো কোমারভচ্চো তেনুপসঙ্কমি; উপসঙ্কমিত্ৰা জীৰকং কোমারভচ্চং এতদৰোচ – ‘‘সেট্ঠিভরিযা, আচরিয, এৰমাহ – ‘অলং, ভণে দোৰারিক, কিং মে দহরকো ৰেজ্জো করিস্সতি? বহূ মহন্তা মহন্তা দিসাপামোক্খা ৰেজ্জা আগন্ত্ৰা নাসক্খিংসু অরোগং কাতুং. বহুং হিরঞ্ঞং আদায অগমংসূ’’’তি. ‘‘গচ্ছ, ভণে দোৰারিক, সেট্ঠিভরিযায পাৰদ – ‘ৰেজ্জো, অয্যে, এৰমাহ – মা কির, অয্যে, পুরে কিঞ্চি অদাসি. যদা অরোগা অহোসি তদা যং ইচ্ছেয্যাসি তং দজ্জেয্যাসী’’’তি. ‘‘এৰং, আচরিযা’’তি খো সো দোৰারিকো জীৰকস্স কোমারভচ্চস্স পটিস্সুত্ৰা যেন সেট্ঠিভরিযা তেনুপসঙ্কমি; উপসঙ্কমিত্ৰা সেট্ঠিভরিযং এতদৰোচ – ‘‘ৰেজ্জো, অয্যে, এৰমাহ – ‘মা কির, অয্যে, পুরে কিঞ্চি অদাসি. যদা অরোগা অহোসি তদা যং ইচ্ছেয্যাসি তং দজ্জেয্যাসী’’’তি. ‘‘তেন হি, ভণে দোৰারিক, ৰেজ্জো আগচ্ছতূ’’তি. ‘‘এৰং, অয্যে’’তি খো সো দোৰারিকো সেট্ঠিভরিযায পটিস্সুত্ৰা যেন জীৰকো কোমারভচ্চো তেনুপসঙ্কমি, উপসঙ্কমিত্ৰা জীৰকং কোমারভচ্চং এতদৰোচ – ‘‘সেট্ঠিভরিযা তং, আচরিয, পক্কোসতী’’তি.

অথ খো জীৰকো কোমারভচ্চো যেন সেট্ঠিভরিযা তেনুপসঙ্কমি, উপসঙ্কমিত্ৰা সেট্ঠিভরিযায ৰিকারং সল্লক্খেত্ৰা সেট্ঠিভরিযং এতদৰোচ – ‘‘পসতেন, অয্যে, সপ্পিনা অত্থো’’তি. অথ খো সেট্ঠিভরিযা জীৰকস্স কোমারভচ্চস্স পসতং সপ্পিং দাপেসি. অথ খো জীৰকো কোমারভচ্চো তং পসতং সপ্পিং নানাভেসজ্জেহি নিপ্পচিত্ৰা সেট্ঠিভরিযং মঞ্চকে উত্তানং নিপাতেত্ৰা [নিপজ্জাপেত্ৰা (সী. স্যা.)] নত্থুতো অদাসি. অথ খো তং সপ্পিং নত্থুতো দিন্নং মুখতো উগ্গঞ্ছি. অথ খো সেট্ঠিভরিযা পটিগ্গহে নিট্ঠুভিত্ৰা দাসিং আণাপেসি – ‘‘হন্দ, জে, ইমং সপ্পিং পিচুনা গণ্হাহী’’তি. অথ খো জীৰকস্স কোমারভচ্চস্স এতদহোসি – ‘‘অচ্ছরিযং [অচ্ছরিযং ৰত ভো (স্যা.)] যাৰ লূখাযং ঘরণী, যত্র হি নাম ইমং ছড্ডনীযধম্মং সপ্পিং পিচুনা গাহাপেস্সতি. বহুকানি চ মে মহগ্ঘানি [মহগ্ঘানি মহগ্ঘানি (সী. স্যা.)] ভেসজ্জানি উপগতানি. কিম্পি মাযং কিঞ্চি [কঞ্চি (স্যা.)] দেয্যধম্মং দস্সতী’’তি. অথ খো সেট্ঠিভরিযা জীৰকস্স কোমারভচ্চস্স ৰিকারং সল্লক্খেত্ৰা জীৰকং কোমারভচ্চং এতদৰোচ – ‘‘কিস্স ত্ৰং, আচরিয, ৰিমনোসী’’তি? ইধ মে এতদহোসি – ‘‘অচ্ছরিযং যাৰ লূখাযং ধরণী, যত্র হি নাম ইমং ছড্ডনীযধম্মং সপ্পিং পিচুনা গাহাপেস্সতি. বহুকানি চ মে মহগ্ঘানি সজ্জানি উপগতানি. কিম্পি মাযং কিঞ্চি দেয্যধম্মং দস্সতী’’তি. ‘‘মযং খো, আচরিয, আগারিকা নাম উপজানামেতস্স সংযমস্স. ৰরমেতং সপ্পি দাসানং ৰা কম্মকরানং ৰা পাদব্ভঞ্জনং ৰা পদীপকরণে ৰা আসিত্তং. মা খো ত্ৰং, আচরিয, ৰিমনো অহোসি. ন তে দেয্যধম্মো হাযিস্সতী’’তি. অথ খো জীৰকো কোমারভচ্চো সেট্ঠিভরিযায সত্তৰস্সিকং সীসাবাধং একেনেৰ নত্থুকম্মেন অপকড্ঢি. অথ খো সেট্ঠিভরিযা অরোগা সমানা জীৰকস্স কোমারভচ্চস্স চত্তারি সহস্সানি পাদাসি. পুত্তো – মাতা মে অরোগা ঠিতাতি চত্তারি সহস্সানি পাদাসি. সুণিসা – সস্সু মে অরোগা ঠিতাতি চত্তারি সহস্সানি পাদাসি. সেট্ঠি গহপতি – ভরিযা মে অরোগা ঠিতাতি চত্তারি সহস্সানি পাদাসি দাসঞ্চ দাসিঞ্চ অস্সরথঞ্চ.

অথ খো জীৰকো কোমারভচ্চো তানি সোল়সসহস্সানি আদায দাসঞ্চ দাসিঞ্চ অস্সরথঞ্চ যেন রাজগহং তেন পক্কামি. অনুপুব্বেন যেন রাজগহং যেন অভযো রাজকুমারো তেনুপসঙ্কমি, উপসঙ্কমিত্ৰা অভযং রাজকুমারং এতদৰোচ – ‘‘ইদং মে, দেৰ, পঠমকম্মং সোল়সসহস্সানি দাসো চ দাসী চ অস্সরথো চ. পটিগ্গণ্হাতু মে দেৰো পোসাৰনিক’’ন্তি. ‘‘অলং, ভণে জীৰক; তুয্হমেৰ হোতু. অম্হাকঞ্ঞেৰ অন্তেপুরে নিৰেসনং মাপেহী’’তি. ‘‘এৰং, দেৰা’’তি খো জীৰকো কোমারভচ্চো অভযস্স রাজকুমারস্স পটিস্সুত্ৰা অভযস্স রাজকুমারস্স অন্তেপুরে নিৰেসনং মাপেসি.

সেট্ঠিভরিযাৰত্থু নিট্ঠিতং.