২০২. জীৰকৰত্থু

৩২৬. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন ৰেসালী ইদ্ধা চেৰ হোতি ফিতা [ফীতা (বহূসু)] চ বহুজনা চ আকিণ্ণমনুস্সা চ সুভিক্খা চ; সত্ত চ পাসাদসহস্সানি সত্ত চ পাসাদসতানি সত্ত চ পাসাদা; সত্ত চ কূটাগারসহস্সানি সত্ত চ কূটাগারসতানি সত্ত চ কূটাগারানি; সত্ত চ আরামসহস্সানি সত্ত চ আরামসতানি সত্ত চ আরামা; সত্ত চ পোক্খরণীসহস্সানি সত্ত চ পোক্খরণীসতানি সত্ত চ পোক্খরণিযো; অম্বপালী চ গণিকা অভিরূপা হোতি দস্সনীযা পাসাদিকা পরমায ৰণ্ণপোক্খরতায সমন্নাগতা, পদক্খিণা [পদক্খা (স্যা.)] নচ্চে চ গীতে চ ৰাদিতে চ, অভিসটা অত্থিকানং অত্থিকানং মনুস্সানং পঞ্ঞাসায চ রত্তিং গচ্ছতি; তায চ ৰেসালী ভিয্যোসোমত্তায উপসোভতি. অথ খো রাজগহকো নেগমো ৰেসালিং অগমাসি কেনচিদেৰ করণীযেন. অদ্দসা খো রাজগহকো নেগমো ৰেসালিং ইদ্ধঞ্চেৰ ফিতঞ্চ বহুজনঞ্চ আকিণ্ণমনুস্সঞ্চ সুভিক্খঞ্চ; সত্ত চ পাসাদসহস্সানি সত্ত চ পাসাদসতানি সত্ত চ পাসাদে; সত্ত চ কূটাগারসহস্সানি সত্ত চ কূটাগারসতানি সত্ত চ কূটাগারানি; সত্ত চ আরামসহস্সানি সত্ত চ আরামসতানি সত্ত চ আরামে; সত্ত চ পোক্খরণীসহস্সানি সত্ত চ পোক্খরণীসতানি সত্ত চ পোক্খরণিযো; অম্বপালিঞ্চ গণিকং অভিরূপং দস্সনীযং পাসাদিকং পরমায ৰণ্ণপোক্খরতায সমন্নাগতং, পদক্খিণং [পদক্খং (স্যা.)] নচ্চে চ গীতে চ ৰাদিতে চ, অভিসটং অত্থিকানং অত্থিকানং মনুস্সানং পঞ্ঞাসায চ রত্তিং গচ্ছন্তিং, তায চ ৰেসালিং ভিয্যোসোমত্তায উপসোভন্তিং.

৩২৭. অথ খো রাজগহকো নেগমো ৰেসালিযং তং করণীযং তীরেত্ৰা পুনদেৰ রাজগহং পচ্চাগঞ্ছি. যেন রাজা মাগধো সেনিযো বিম্বিসারো তেনুপসঙ্কমি, উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘ৰেসালী, দেৰ, ইদ্ধা চেৰ ফিতা চ বহুজনা চ আকিণ্ণমনুস্সা চ সুভিক্খা চ; সত্ত চ পাসাদসহস্সানি…পে… তায চ ৰেসালী ভিয্যোসোমত্তায উপসোভতি. সাধু, দেৰ, মযম্পি গণিকং ৰুট্ঠাপেস্সামা’’তি [ৰুট্ঠাপেয্যাম (ক.)]. ‘‘তেন হি, ভণে, তাদিসিং কুমারিং জানাথ যং তুম্হে গণিকং ৰুট্ঠাপেয্যাথা’’তি. তেন খো পন সমযেন রাজগহে সালৰতী নাম কুমারী অভিরূপা হোতি দস্সনীযা পাসাদিকা পরমায ৰণ্ণপোক্খরতায সমন্নাগতা. অথ খো রাজগহকো নেগমো সালৰতিং কুমারিং গণিকং ৰুট্ঠাপেসি. অথ খো সালৰতী গণিকা নচিরস্সেৰ পদক্খিণা অহোসি নচ্চে চ গীতে চ ৰাদিতে চ, অভিসটা অত্থিকানং অত্থিকানং মনুস্সানং পটিসতেন চ রত্তিং গচ্ছতি. অথ খো সালৰতী গণিকা নচিরস্সেৰ গব্ভিনী অহোসি. অথ খো সালৰতিযা গণিকায এতদহোসি – ‘‘ইত্থী খো গব্ভিনী পুরিসানং অমনাপা. সচে মং কোচি জানিস্সতি সালৰতী গণিকা গব্ভিনীতি, সব্বো মে সক্কারো ভঞ্জিস্সতি [পরিহাযিস্সতি (সী. স্যা.)]. যংনূনাহং গিলানং পটিৰেদেয্য’’ন্তি. অথ খো সালৰতী গণিকা দোৰারিকং আণাপেসি – ‘‘মা, ভণে দোৰারিক, কোচি পুরিসো পাৰিসি. যো চ মং পুচ্ছতি, ‘গিলানা’তি পটিৰেদেহী’’তি. ‘‘এৰং, অয্যে’’তি খো সো দোৰারিকো সালৰতিযা গণিকায পচ্চস্সোসি. অথ খো সালৰতী গণিকা তস্স গব্ভস্স পরিপাকমন্ৰায পুত্তং ৰিজাযি. অথ খো সালৰতী গণিকা দাসিং আণাপেসি – ‘‘হন্দ, জে, ইমং দারকং কত্তরসুপ্পে পক্খিপিত্ৰা নীহরিত্ৰা সঙ্কারকূটে ছড্ডেহী’’তি. ‘‘এৰং, অয্যে’’তি খো সা দাসী সালৰতিযা গণিকায পটিস্সুত্ৰা তং দারকং কত্তরসুপ্পে পক্খিপিত্ৰা নীহরিত্ৰা সঙ্কারকূটে ছড্ডেসি.

৩২৮. তেন খো পন সমযেন অভযো নাম রাজকুমারো কালস্সেৰ রাজুপট্ঠানং গচ্ছন্তো অদ্দস তং দারকং কাকেহি সম্পরিকিণ্ণং, দিস্ৰান মনুস্সে পুচ্ছি – ‘‘কিং এতং, ভণে, কাকেহি সম্পরিকিণ্ণ’’ন্তি? ‘‘দারকো, দেৰা’’তি. ‘‘জীৰতি, ভণে’’তি? ‘‘জীৰতি, দেৰা’’তি. ‘‘তেন হি, ভণে, তং দারকং অম্হাকং অন্তেপুরং নেত্ৰা ধাতীনং দেথ পোসেতু’’ন্তি. ‘‘এৰং, দেৰা’’তি খো তে মনুস্সা অভযস্স রাজকুমারস্স পটিস্সুত্ৰা তং দারকং অভযস্স রাজকুমারস্স অন্তেপুরং নেত্ৰা ধাতীনং অদংসু – ‘‘পোসেথা’’তি. তস্স জীৰতীতি ‘জীৰকো’তি নামং অকংসু. কুমারেন পোসাপিতোতি ‘কোমারভচ্চো’তি নামং অকংসু. অথ খো জীৰকো কোমারভচ্চো নচিরস্সেৰ ৰিঞ্ঞুতং পাপুণি. অথ খো জীৰকো কোমারভচ্চো যেন অভযো রাজকুমারো তেনুপসঙ্কমি; উপসঙ্কমিত্ৰা অভযং রাজকুমারং এতদৰোচ – ‘‘কা মে, দেৰ, মাতা, কো পিতা’’তি? ‘‘অহম্পি খো তে, ভণে জীৰক, মাতরং ন জানামি; অপি চাহং তে পিতা; মযাসি [মযাপি (ক.)] পোসাপিতো’’তি. অথ খো জীৰকস্স কোমারভচ্চস্স এতদহোসি – ‘‘ইমানি খো রাজকুলানি ন সুকরানি অসিপ্পেন উপজীৰিতুং. যংনূনাহং সিপ্পং সিক্খেয্য’’ন্তি.

৩২৯. তেন খো পন সমযেন তক্কসিলাযং [তক্কসীলাযং (ক.)] দিসাপামোক্খো ৰেজ্জো পটিৰসতি. অথ খো জীৰকো কোমারভচ্চো অভযং রাজকুমারং অনাপুচ্ছা যেন তক্কসিলা তেন পক্কামি. অনুপুব্বেন যেন তক্কসিলা, যেন ৰেজ্জো তেনুপসঙ্কমি; উপসঙ্কমিত্ৰা তং ৰেজ্জং এতদৰোচ – ‘‘ইচ্ছামহং, আচরিয, সিপ্পং সিক্খিতু’’ন্তি. ‘‘তেন হি, ভণে জীৰক, সিক্খস্সূ’’তি. অথ খো জীৰকো কোমারভচ্চো বহুঞ্চ গণ্হাতি লহুঞ্চ গণ্হাতি সুট্ঠু চ উপধারেতি, গহিতঞ্চস্স ন সম্মুস্সতি [ন পমুস্সতি (সী. স্যা.)]. অথ খো জীৰকস্স কোমারভচ্চস্স সত্তন্নং ৰস্সানং অচ্চযেন এতদহোসি – ‘‘অহং, খো বহুঞ্চ গণ্হামি লহুঞ্চ গণ্হামি সুট্ঠু চ উপধারেমি, গহিতঞ্চ মে ন সম্মুস্সতি, সত্ত চ মে ৰস্সানি অধীযন্তস্স, নযিমস্স সিপ্পস্স অন্তো পঞ্ঞাযতি. কদা ইমস্স সিপ্পস্স অন্তো পঞ্ঞাযিস্সতী’’তি. অথ খো জীৰকো কোমারভচ্চো যেন সো ৰেজ্জো তেনুপসঙ্কমি, উপসঙ্কমিত্ৰা তং ৰেজ্জং এতদৰোচ – ‘‘অহং খো, আচরিয, বহুঞ্চ গণ্হামি লহুঞ্চ গণ্হামি সুট্ঠু চ উপধারেমি, গহিতঞ্চ মে ন সম্মুস্সতি, সত্ত চ মে ৰস্সানি অধীযন্তস্স, নযিমস্স সিপ্পস্স অন্তো পঞ্ঞাযতি. কদা ইমস্স সিপ্পস্স অন্তো পঞ্ঞাযিস্সতী’’তি? ‘‘তেন হি, ভণে জীৰক, খণিত্তিং আদায তক্কসিলায সমন্তা যোজনং আহিণ্ডিত্ৰা যং কিঞ্চি অভেসজ্জং পস্সেয্যাসি তং আহরা’’তি. ‘‘এৰং, আচরিযা’’তি খো জীৰকো কোমারভচ্চো তস্স ৰেজ্জস্স পটিস্সুত্ৰা খণিত্তিং আদায তক্কসিলায সমন্তা যোজনং আহিণ্ডন্তো ন কিঞ্চি অভেসজ্জং অদ্দস. অথ খো জীৰকো কোমারভচ্চো যেন সো ৰেজ্জো তেনুপসঙ্কমি, উপসঙ্কমিত্ৰা তং ৰেজ্জং এতদৰোচ – ‘‘আহিণ্ডন্তোম্হি, আচরিয, তক্কসিলায সমন্তা যোজনং, ন কিঞ্চি [আহিণ্টন্তো ন কিঞ্চি (ক.)] অভেসজ্জং অদ্দস’’ন্তি. ‘‘সুসিক্খিতোসি, ভণে জীৰক. অলং তে এত্তকং জীৰিকাযা’’তি জীৰকস্স কোমারভচ্চস্স পরিত্তং পাথেয্যং পাদাসি. অথ খো জীৰকো কোমারভচ্চো তং পরিত্তং পাথেয্যং আদায যেন রাজগহং তেন পক্কামি. অথ খো জীৰকস্স কোমারভচ্চস্স তং পরিত্তং পাথেয্যং অন্তরামগ্গে সাকেতে পরিক্খযং অগমাসি. অথ খো জীৰকস্স কোমারভচ্চস্স এতদহোসি – ‘‘ইমে খো মগ্গা কন্তারা অপ্পোদকা অপ্পভক্খা, ন সুকরা অপাথেয্যেন গন্তুং. যংনূনাহং পাথেয্যং পরিযেসেয্য’’ন্তি.

জীৰকৰত্থু নিট্ঠিতং.