১৪৩. ৰত্থুঠপনাদি

২৩৯. ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো. ইদং ৰত্থু পঞ্ঞাযতি, ন পুগ্গলো. যদি সঙ্ঘস্স পত্তকল্লং, ৰত্থুং ঠপেত্ৰা সঙ্ঘো পৰারেয্যা’’তি. সো এৰমস্স ৰচনীযো – ‘‘ভগৰতা খো, আৰুসো, ৰিসুদ্ধানং পৰারণা পঞ্ঞত্তা. সচে ৰত্থু পঞ্ঞাযতি, ন পুগ্গলো, ইদানেৰ নং ৰদেহী’’তি.

ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো. অযং পুগ্গলো পঞ্ঞাযতি, ন ৰত্থু. যদি সঙ্ঘস্স পত্তকল্লং, পুগ্গলং ঠপেত্ৰা সঙ্ঘো পৰারেয্যা’’তি. সো এৰমস্স ৰচনীযো – ‘‘ভগৰতা খো, আৰুসো, সমগ্গানং পৰারণা পঞ্ঞত্তা. সচে পুগ্গলো পঞ্ঞাযতি, ন ৰত্থু, ইদানেৰ নং ৰদেহী’’তি.

ইধ পন, ভিক্খৰে, ভিক্খু তদহু পৰারণায সঙ্ঘমজ্ঝে উদাহরেয্য – ‘‘সুণাতু মে, ভন্তে, সঙ্ঘো. ইদং ৰত্থু চ পুগ্গলো চ পঞ্ঞাযতি. যদি সঙ্ঘস্স পত্তকল্লং, ৰত্থুঞ্চ পুগ্গলঞ্চ ঠপেত্ৰা সঙ্ঘো পৰারেয্যা’’তি. সো এৰমস্স ৰচনীযো – ‘‘ভগৰতা খো, আৰুসো, ৰিসুদ্ধানঞ্চ সমগ্গানঞ্চ পৰারণা পঞ্ঞত্তা. সচে ৰত্থু চ পুগ্গলো চ পঞ্ঞাযতি, ইদানেৰ নং ৰদেহী’’তি.

পুব্বে চে, ভিক্খৰে, পৰারণায ৰত্থু পঞ্ঞাযতি, পচ্ছা পুগ্গলো, কল্লং ৰচনায. পুব্বে চে, ভিক্খৰে, পৰারণায পুগ্গলো পঞ্ঞাযতি, পচ্ছা ৰত্থু, কল্লং ৰচনায. পুব্বে চে, ভিক্খৰে, পৰারণায ৰত্থু চ পুগ্গলো চ পঞ্ঞাযতি, তং চে কতায পৰারণায উক্কোটেতি, উক্কোটনকং পাচিত্তিযন্তি.

ৰত্থুঠপনাদি নিট্ঠিতা.