১৪৪. ভণ্ডনকারকৰত্থু

২৪০. তেন খো পন সমযেন সম্বহুলা সন্দিট্ঠা সম্ভত্তা ভিক্খূ কোসলেসু জনপদে অঞ্ঞতরস্মিং আৰাসে ৰস্সং উপগচ্ছিংসু. তেসং সামন্তা অঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা ৰস্সং উপগচ্ছিংসু – মযং তেসং ভিক্খূনং ৰস্সংৰুট্ঠানং পৰারণায পৰারণং ঠপেস্সামাতি. অস্সোসুং খো তে ভিক্খূ – ‘‘অম্হাকং কির সামন্তা অঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা ৰস্সং উপগতা – মযং তেসং ভিক্খূনং ৰস্সংৰুট্ঠানং পৰারণায পৰারণং ঠপেস্সামা’’তি. কথং নু খো অম্হেহি পটিপজ্জিতব্বন্তি? ভগৰতো এতমত্থং আরোচেসুং.

ইধ পন, ভিক্খৰে, সম্বহুলা সন্দিট্ঠা সম্ভত্তা ভিক্খূ অঞ্ঞতরস্মিং আৰাসে ৰস্সং উপগচ্ছন্তি. তেসং সামন্তা অঞ্ঞে ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা ৰস্সং উপগচ্ছন্তি – মযং তেসং ভিক্খূনং ৰস্সংৰুট্ঠানং পৰারণায পৰারণং ঠপেস্সামাতি. অনুজানামি, ভিক্খৰে, তেহি ভিক্খূহি দ্ৰে তযো উপোসথে চাতুদ্দসিকে কাতুং – কথং মযং তেহি ভিক্খূহি পঠমতরং পৰারেয্যামাতি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তং আৰাসং আগচ্ছন্তি, তেহি, ভিক্খৰে, আৰাসিকেহি ভিক্খূহি লহুং লহুং সন্নিপতিত্ৰা পৰারেতব্বং, পৰারেত্ৰা ৰত্তব্বা – ‘‘পৰারিতা খো মযং, আৰুসো; যথাযস্মন্তা মঞ্ঞন্তি তথা করোন্তূ’’তি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা অসংৰিহিতা তং আৰাসং আগচ্ছন্তি, তেহি, ভিক্খৰে, আৰাসিকেহি ভিক্খূহি আসনং পঞ্ঞপেতব্বং, পাদোদকং পাদপীঠং পাদকথলিকং উপনিক্খিপিতব্বং, পচ্চুগ্গন্ত্ৰা পত্তচীৰরং পটিগ্গহেতব্বং, পানীযেন পরিপুচ্ছিতব্বা; তেসং ৰিক্খিত্ৰা [ৰিক্খিপাপেত্ৰা (পটিৰিসোধকানং মতি), আচিক্খিত্ৰা (ক.)] নিস্সীমং গন্ত্ৰা পৰারেতব্বং, পৰারেত্ৰা ৰত্তব্বা – ‘‘পৰারিতা খো মযং, আৰুসো; যথাযস্মন্তা মঞ্ঞন্তি তথা করোন্তূ’’তি. এৰঞ্চেতং লভেথ, ইচ্চেতং কুসলং. নো চে লভেথ, আৰাসিকেন ভিক্খুনা ব্যত্তেন পটিবলেন আৰাসিকা ভিক্খূ ঞাপেতব্বা –

‘‘সুণন্তু মে, আযস্মন্তো [আযস্মন্তা (ক.)], আৰাসিকা. যদাযস্মন্তানং পত্তকল্লং, ইদানি উপোসথং করেয্যাম, পাতিমোক্খং উদ্দিসেয্যাম, আগমে কাল়ে পৰারেয্যামা’’তি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে ভিক্খূ এৰং ৰদেয্যুং – ‘‘সাধাৰুসো, ইদানেৰ নো পৰারেথা’’তি, তে এৰমস্সু ৰচনীযা – ‘‘অনিস্সরা খো তুম্হে, আৰুসো, অম্হাকং পৰারণায; ন তাৰ মযং পৰারেয্যামা’’তি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তং কাল়ং অনুৰসেয্যুং, আৰাসিকেন, ভিক্খৰে, ভিক্খুনা ব্যত্তেন পটিবলেন আৰাসিকা ভিক্খূ ঞাপেতব্বা –

‘‘সুণন্তু মে, আযস্মন্তো, আৰাসিকা. যদাযস্মন্তানং পত্তকল্লং, ইদানি উপোসথং করেয্যাম, পাতিমোক্খং উদ্দিসেয্যাম, আগমে জুণ্হে পৰারেয্যামা’’তি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তে ভিক্খূ এৰং ৰদেয্যুং – ‘‘সাধাৰুসো, ইদানেৰ নো পৰারেয্যাথা’’তি, তে এৰমস্সু ৰচনীযা – ‘‘অনিস্সরা খো তুম্হে, আৰুসো, অম্হাকং পৰারণায, ন তাৰ মযং পৰারেয্যামা’’তি. তে চে, ভিক্খৰে, ভিক্খূ ভণ্ডনকারকা কলহকারকা ৰিৰাদকারকা ভস্সকারকা সঙ্ঘে অধিকরণকারকা তম্পি জুণ্হং অনুৰসেয্যুং, তেহি, ভিক্খৰে, ভিক্খূহি সব্বেহেৰ আগমে জুণ্হে কোমুদিযা চাতুমাসিনিযা অকামা পৰারেতব্বং.

তেহি চে, ভিক্খৰে, ভিক্খূহি পৰারিযমানে গিলানো অগিলানস্স পৰারণং ঠপেতি, সো এৰমস্স ৰচনীযো – ‘‘আযস্মা খো গিলানো. গিলানো চ অননুযোগক্খমো ৰুত্তো ভগৰতা. আগমেহি, আৰুসো, যাৰ অরোগো হোসি. অরোগো আকঙ্খমানো চোদেস্সসী’’তি. এৰঞ্চে ৰুচ্চমানো চোদেতি, অনাদরিযে পাচিত্তিযং. তেহি চে, ভিক্খৰে, ভিক্খূহি পৰারিযমানে অগিলানো গিলানস্স পৰারণং ঠপেতি, সো এৰমস্স ৰচনীযো – ‘‘অযং খো, আৰুসো, ভিক্খু গিলানো. গিলানো চ অননুযোগক্খমো ৰুত্তো ভগৰতা. আগমেহি, আৰুসো, যাৰাযং ভিক্খু অরোগো হোতি. অরোগং আকঙ্খমানো চোদেস্সসী’’তি. এৰঞ্চে ৰুচ্চমানো চোদেতি, অনাদরিযে পাচিত্তিযং. তেহি চে, ভিক্খৰে, ভিক্খূহি পৰারিযমানে গিলানো গিলানস্স পৰারণং ঠপেতি, সো এৰমস্স ৰচনীযো – ‘‘আযস্মন্তা খো গিলানা. গিলানো চ অননুযোগক্খমো ৰুত্তো ভগৰতা. আগমেহি, আৰুসো, যাৰ অরোগা হোথ. অরোগো অরোগং আকঙ্খমানো চোদেস্সসী’’তি [যাৰ অরোগো হোতি, অরোগং আকঙ্খমানো চোদেস্সসীতি (ক.)]. এৰঞ্চে ৰুচ্চমানো চোদেতি, অনাদরিযে পাচিত্তিযং. তেহি চে, ভিক্খৰে, ভিক্খূহি পৰারিযমানে অগিলানো অগিলানস্স পৰারণং ঠপেতি, উভো সঙ্ঘেন সমনুযুঞ্জিত্ৰা সমনুগাহিত্ৰা [সমনুভাসিত্ৰা (সী.)] যথাধম্মং কারাপেত্ৰা সঙ্ঘেন পৰারেতব্বন্তি.

ভণ্ডনকারকৰত্থু নিট্ঠিতং.